“Apesar cu nos ta un gobierno demisionario”
EHECUCION WORDO FINALISA NA SAN NICOLAS
“SNBA ta un stakeholder importante pa e proyectonan den planificacion y den ehecucion”
Diaranson 11 di september Prome Minister Evelyn Wever-Croes a reuni cu e Daily Board di San Nicolas Business Association (SNBA) pa trata proyectonan den ehecucion. Gobierno ta reuni riba base regular cu diferente stakeholder y San Nicolas Business Association ta un stakeholder importante mirando e proyectonan den planificacion y den ehecucion na San Nicolas.
Durante e reunion SNBA a trece algun punto di importancia padilanti riba proyectonan andando y tambe a manifesta nan preocupacion y interes riba e status di e proyectonan mirando cu Gobierno ta demisionario.
Prome Minister a splica cu un Gobierno demisionario si por sigui atende “lopende zaken” of casonan y proyectonan coriente. Esey ta significa cu proyectonan cu ya a cuminsa hunto cu SNBA prome cu Gobierno a bira demisionario, por continua.
“Nos lo sigui traha na bienestar di pais Aruba, apesar di ta demisionario. Nos meta y enfoke ta pa trece bida bek den centro di San Nicolas y pa mehora e aspecto den diferente area y asina trece progreso y bienestar den tur hogar na San Nicolas. Tawata un bon reunion y nos lo sigui den dialogo pa percura pa proyectonan cu ya ta den ehecucion por wordo finalisa”, Prome Minister a duna di conoce.
DELEGACION GABINETE DI ARUBA NA DOCUMENTARIO I CAN’T BE MOE
Un delegacion di Gabinete di Minister Plenipotenciario a asisti na e estreno na Hulanda di e documenatario I can’t be moe na e festival Film by the Sea na Vlissingen. I can’t be moe ta un documentario riba e bida y trabao di Alice van Romondt. E delegacion encabesa pa directora di Gabinete di Aruba Joselin Croes LL.M/M. Sc a consisti alabes di Nuris Dabian, Jennifer Sneek, Sharine Henriquez-Kelly, Helene Kelly, Sheila GielDubero y Sidney Kock.
Na e presentacion di e documentario aki tambe tabata presente Rebecca Roos, cu a traha e documentario y Jonathan Vieira, productor di e documentario. Na comienso di e presentacion Rebecca Roos a duna un splicacion riba e motibo di e documentario aki, cual idea a bin na 2018, e aña cu Alice van Romondt a ricibi for di man di Princesa Beatrix un Zilveren Anjer di Het Cultuurfonds pa tur su trabao y dedicacion na arte, cultura y literatura na Aruba. Tambe señora Roos a bisa cu e trabaonan cu Alice van Romondt ta hopi mas cu e publico ta mira den e documentario.
I can’t be moe enberdad ta duna un ilustracion di un persona cu un pasion grandi pa e mundo di arte, cultura y literatura na Aruba. E presentacion di e documentario aki na Film by the Sea ta forma parti di e partnership cu e festival na Vlissingen tin cu e Festival di Film Internacion di Curaçao.
MINISTER MADURO A REPRESENTA ARUBA NA E CELEBRACION DI DIA DI BONEIRO
Dia 6 di september Minister Maduro di Cultura tabata na Boneiro pa asina representa Aruba na e celebracion di Dia di Boneiro.
E dia a cuminsa cu un reunion solem na Conseho Insular di Boneiro guia pa Gezaghebber Soliano sigui pa un Ceremonia Protocolar riba Plaza Wilhelmina y un recepcion na unda cu Minister Maduro por a saluda, felicita y comparti un rato cu varios invitado di e comunidad Boneriano y tambe di nos islanan ruman den Reino. Anochi a sigui e parti Cultural na unda e mandatario por a disfruta memey di e Bonerianonan di nan musica, cuminda y arte.
Minister Maduro ta felicita e Pueblo Boneriano cu e bunita celebracion di Dia di Boneiro y ta gradici tur hende pa e bunita recepcion pa su persona na Boneiro.
MINISTER MADURO A CELEBRA DIA DI BONEIRO
HUNTO CU CLUB BONERIANO NA ARUBA
En conexion cu Dia di Boneiro, Minister Maduro di Cultura tabata presente na e celebracion organisa pa Club Boneriano na Aruba na Centro di Bario Brazil. E mandatario a hiba palabra pa felicita e comunidad Boneriano residencia na Aruba pa e Dia di Boneiro y tambe gradici nan pa nan aporte na e desaroyo di Aruba.
Den su discurso Minister Maduro a menciona algun persona di decendencia Boneriano cu a y ta yuda na e desaroyo di Aruba, manera, Sr. Hubert ‘Lio’ Booi, den feliz memoria, Sr. Glenn Thode, Sra. Lydia Emerencia, Sra. Belen Kock-Marchena, sra. Munye Oduber-Winklaar y Famia Goedgedrag. Minister Maduro a enfatisa cu tin hopi mas persona di decendencia Boneriano cu nan aporte na e desaroyo di Aruba ta wordo altamente aprecia.
E mandatario a comparti un rato ameno na e celebracion na unda ela pasa saluda esnan presente y a disfruta un tiki tambe di e platonan tradicional di Boneiro.
Minister Maduro ta gradici y felicita e directiva di Club Boneriano pa e invitacion y pa a organisa e bunita celebracion di Dia di Boneiro na Aruba.
UNION EUROPEO TA CONTRIBUI CU FONDO PA E
PLAN DI ACCION NACIONAL PA DESAROYO DURADERO & INCLUSIVO
Como parti di e vision di Minister di Asunto Economico, Comunicacion y Desaroyo Sostenibel, sr. Geoffrey Wever, e sosten di fondo for di Union Europeo ta esencial pa logra e transicion pa yuda reduci gasto y emision di CO2 pa e autonan di gobierno. Recientemente, Minister Wever a entrega e prome 4 autonan electrico na Departamento di Asunto Economico, Comercio y Industria (DEZHI) como parti di e programa piloto pa e transicion pa autonan electrico of hibrido den ful Gobierno.
Despues di a haci un estudio di mercado hunto cu DOW, a haci tambe un inventario detaya di e flota di auto di Gobierno y di e opcionnan disponibel na Aruba. E enfoke a cuminsa riba e autonan di lease den uzo na DEZHI. Siguientemente, a firma un acuerdo historico cu Elmar na april ultimo, unda cu Elmar lo zorg pa e infrastructura di EV charger na Sunset Plaza, caminda DEZHI ta localisa actualmente.
E plan y vision aki a keda presenta na GO-Facility (Green Overseas) pa Minister Wever hunto cu DEZHI y DOW en busca di sosten tecnico y financiero como tambe e implementacion di e proyecto aki. E esfuerso aki tabata uno exitoso mirando cu e programa di Green Overseas (GO) y Union Europeo (EU) a aproba y tambe opta pa financia esaki.
Na mes momento e compania Expertise France (EF) lo
ta encarga pa realisa e proyecto aki, cu e meta di contribui na un desaroyo duradero y inclusivo di e paisnan/teritorio exterior di EU y tambe Reino Hulandes. Pa esaki a aloca €190.000 pa realisa e transcion pa autonan electrico dentro di e departamentonan gubernamental. Cu e programa piloto di transicion aki Minister Geoffrey Wever ta demostra cu e colaboracion aki ta un ehempel di con por haci uzo di fondo di Union Europeo cu ta destina pa contribui den teritorionan pafo di Europa.
Pa loke ta trata asistencia tecnico, GO-Facility a saca un destaho publico internacionalmente cu e enfoke riba regulacion di prijs pa e mercado di energia na Aruba na un nivel macro economico. Ultimo dia pa entrega esaki ta 16 di September binidero.
Minister Geoffrey Wever a expresa su gratitud pa e pasonan tuma te cu awor den realisacion di e Plan di Accion Nacional pa Desaroyo Duradero & Inclusivo 2023- 2025. “Cu reduccion di gasto operacional y di emision di auto na Aruba nos ta promove miho calidad di bida, proteha naturalesa y contribui na frena e cambio climatico. No tin nada mas miho como Gobierno di Aruba pa tuma e rol ehemplar aki pa otro pais cu ta encontra e mesun retonan, pero tambe den propio cas”, Minister Wever a expresa.
PLATAFORMA 1 A REUNI PA DIALOGA TOCANTE
DIFERENTE
PUNTO DI INTERES
NA BIENESTAR
DI ENSEÑANSA DEN SU TOTALIDAD
Recientemente, a tuma luga e prome reunion di Plataforma 1 pa e aña escolar 2024 -2025. Plataforma 1 ta consisti di miembro di Departamento di Enseñansa Aruba (DEA), tur dies (10) schoolbestuur y Minister di Enseñansa y Deporte Endy Croes y ta reuni pa trata diferente topico cu ta di vital importancia di enseñansa. Durante e encuentro, Minister Endy Croes a pidi e directivanan di scol pa encurasha e maestronan pa intercambia nan e-mail cu e persona cu ta atende cu Land Academy Aruba, Matrix y Center for Teaching Excellence di University of South Carolina cu ta brinda e maestronan e oportunidad pa gratuitamente haci diferente curso pa profesionalisa nan mes.
Pues, ta trata di tres (3) plataforma digital, unda e docentenan por registra pa sigui profesionalisa nan mes den nan mesun tempo y ricibi un certificado na final. Ademas di esaki, a trata e proyecto di Studentenkamer cu ta planea pa tuma luga dia 26 di september proximo pa e hobennan cu ta continua cu nan estudio avansa sea na Hulanda of Merca. Fuera di esaki, a trata e tema di accounting protocol, cual ta recomendacion 10 di e Doorlichtings Rapport cu ta drenta na vigor na luna di januari 2025.
Pa conclui, Minister Endy Croes ta desea e dirigentenan di e scolnan di Aruba hopi exito e aña escolar 2024 - 2025. Alabes a gradici nan pa ta presente na e reunion.
MINISTER ENDY CROES A HACI UN BISHITA OFICIAL NA SCOL PRACTICO PA OFISHI (SPO)
NA SANTA CRUZ
Diaranson mainta, Minister di Enseñansa y Deporte Endy Croes hunto cu Comision Fiho di Enseñansa di Parlamento di Aruba a haci un bishita oficial na Scol Practico pa Ofishi (SPO) Santa Cruz. E bishita tabata en conexion cu e introduccion di aña cuater (4) y cinco (5). Antes e estudio na SPO tabata te cu aña tres (3) y awo a extende te cu aña cinco (5).
Minister Endy Croes hunto cu Comision Fiho di Enseñansa di Parlamento di Aruba a ricibi un recorido na e scol y por a pasa bishita diferente klas. Minister Endy Croes a indica cu e alumnonan di SPO tabata termina nan estudio mucho hoben y no por a drenta mercado laboral di biaha. Pa e motibo aki, a traha duro durante un (1) aña pa e aña escolar aki extende e estudio y asina crea oportunidad pa e alumnonan di SPO prepara nan mes mas miho pa mercado laboral. Tur alumno cu a termina aña tres (3), a inscribi e aña aki escolar aki pa continua nan estudio den aña cuater (4).
Minister Endy Croes ta gradici e directiva Sra. Jeanine Thiel, Sra. Sharon Lacle y staf cu a ricibi nan cu un caluroso bonbini. Alabes, ta felicita nan pa e tremendo trabou cu nan ta haciendo na scol. Pa finalisa, Minister Endy Croes ta desea tur alumno hopi exito e aña escolar aki.
