ALUMNONAN DI MARIA GORETTI COLLEGE KLAS
5 A Y B A RICIBI BISHITA DI PROME MINISTER
"Ta importante pa mantene e legado di Betico bibo den curason y mente di tur nos muchanan”
Dialuna mainta Prome Minister Evelyn Wever-Croes a cuminsa cu su bishitanan na scol basico pa asina admira con cada un di nan ta preparando pa e celebracion grandi di Dia di Betico. E di dos scol cu Prome Minister a bishita riba e mainta aki, ta Maria Goretti College na unda e tabata tin e oportunidad di combersa cu alumnonan di klas 5 A y B. Na su yega Prome Minister a wordo ricibi pa alumno Noëmi "Nini" Bergen cu porcierto tabata e candidata pa reina infantil diasabra ultimo, hunto cu alumno Dayler Limonier.
Prome Minister a expresa di ta hopi contento di por a scucha con hopi e alumnonan aki ya caba sa di Betico. Nan por a conta hopi di e bida di Betico y con hopi el a lucha pa asina Aruba awe tin su Status Aparte. Como famia di Betico, Prome Minister a tuma e oportunidad pa conta nan mas den detaye di Betico su bida personal manera su cuminda y color preferi. Tambe Prome Minister a haci algun pregunta na e alumnonan aki pa asina test con hopi mas nan sa. Mester bisa cu e alumnonan aki sorprendentemente tabata sa hopi mes di nos Libertador. Esaki sigur ta importante, pa asina mantene e legado di Betico bibo den curason y mente di tur nos muchanan.
“Un danki na cabesante di scol Jufrouw Mirla de Cuba, Jufrouw
Sandra Ramadhin di klas 5A, Juffrouw Jaryann Geerman di klas 5 B, Men M & S, Dillon Willems, Wrn Hoofd Bianca Werleman pa nan dedicacion y esfuerso den educa nos muchanan riba temanan importante relaciona cu historia di pais Aruba. E deseo di Betico ta pa tur nos muchanan fiha nan meta pa futuro, y sa cu si nan traha duro y cu amor pa Aruba nan por logra cosnan grandi. Danki na cabesante, docentenan y alumnonan di Maria Goretti College pa e oportunidad aki y mi ta desea cada un di boso un dushi Dia di Betico”, Prome Minister a expresa.
Prome Minister Evelyn Wever-Croes: Celebrando bida, lucha y logronan di Betico Croes:
PROME MINISTER A BISHITA MUCHANAN DI 6DE
KLAS NA SCOL CACIQUE MACUARIMA
Manera ta conoci, tur aña den conexion cu e celebracion di Dia di Betico, Prome Minister Evelyn Wever-Croes ta bishita varios scol pa asina por mira con e scolnan ta prepara pa e gran dia aki. E prome scol cu Prome Minister a bishita dialuna mainta tabata Cacique Macuarima na Santa Cruz na unda e tabata tin e oportunidad di saluda y combersa cu alumnonan di klas 6 A y 6 B.
Prome Minister a expresa cu e meta di e bishitanan aki ta pa splica e muchanan di e edadnan aki un poco di Betico su bida, su lucha y su logronan pa pais Aruba. Ta importante pa nan compronde cu tempo cu Betico tabata tin nan edad, e tabata un mucha comun, mescos cu nan, cu tabata gusta bay scol, tabata gusta haci deporte, y tin biaha tabata bay bon na scol y tin biaha no. Loke si semper Betico tabata tin di chikito tabata su amor pa e pais aki, y pese'y ta bon pa e muchanan aki crece sabiendo cu nan cada un tin un poco di Betico den nan, y cu nan tambe por logra cosnan grandi den futuro.
"Mi kier gradici cabesante di Scol Cacique Macuarima Juf Rachelle Croes-Caster, Juffrouw Karin di klas 6A y juffrouw Jasmine di klas 6B pa e oportunidad cu nan a duna mi di por a bishita nan scol. Tambe un danki na tur e alumnonan pa un mainta hopi agradabel y e oportunidad di por a comparti tur e informacionnan importante relaciona cu nos Libertador Betico Croes", Prome Minister a expresa.
Prome Minister Evelyn Wever-Croes: Resultado di bon trabou y e pasion cu e tin pa deporte
PROME MINISTER TA FELICITA EX-MINISTER DI
DEPORTE ENDY CROES CU PROYECTO DI LUZNAN
LED PA 5 CANCHA DEPORTIVO
Recientemente a yega Aruba e carga di luz LED pa e prome 5 canchanan deportivo. Prome Minister Evelyn Wever Croes ta indica cu esaki ta parti di un proyecto di renobacion di exMinister Endy Croes di canchanan deportivo na Aruba cu ta inclui luz nobo di tecnologia LED.
Pronto trabounan lo inicia y e prome canchanan cu lo haya luznan LED nobo danki na e proyecto aki. E canchanan aki ta di Estrella, San Luis Deportivo, Tanki Leendert, Sport Boys y veld di Dakota. Ta trata di lusnan LED ultra moderno, di calidad cu por wanta condicionnan di clima manera biento y awacero. Tambe e luznan ta duna iluminacion uniforme y adecuado pa un cancha di deporte. Nan tin un iluminacion efectivo y ta provee un nivel di luz consistente riba henter e tereno di wega.
“Tur cancha lo yega na turno y e deportistanan, y Aruba en general lo conta cu canchanan bunita, cu ekipo moderno y adecua, unda e clubnan por practica deporte den tur comodidad. Mi ta gradici ex-Minister Endy Croes pa su bon trabou y e
pasion cu e tin pa deporte y awe nos ta mira resultado di su bon trabou refleha den yegada di e carga di luz LED pa diferente cancha di deporte rond di nos isla. Gabinete Wever-Croes a priminti, nos a cumpli y nos ta cumpliendo keto bay. Si deporte gana, Aruba ta gana”, Prome Minister a expresa.
Prome Minister Evelyn Wever-Croes:
“Rene su dushi Wega”
a wordo batisa
PROME MINISTER TA FELICITA
LADY
RUTH CU
PRESENTACION DI SU PROME BUKI PA MUCHA NA
PAPIAMENTO
Lady Ruth ta un escritora y artista cu un trayectoria largo y impresionante
Diaranson, 15 di januari 2025, Ruthy "Lady Ruth" VrieswijkBergen a presenta su buki “Rene su dushi Wega”. Ta trata su prome buki pa mucha na Papiamento y e ta contene cantica y poesia. Prome Minister Evelyn Wever-Croes ta manda su sincero felicitacion pa Lady Ruth cu e ocasion special aki y tambe ta gradici’e pa e bunita contribucion na e desaroyo di muchanan.
Lady Ruth ta un escritora y artista cu un trayectoria largo y impresionante. E ta un pintor y a participa na varios exposicion na Aruba y tambe como poeta a skirbi obranan den idiomanan Papiamento, Hulandes, Spaño y Ingles y ya a publica 5 buki. Ruthy a dedica su bida na inspira, motiva, informa y trece alegria den e pueblo di Aruba y semper ta contribui cu e herencia cultural di pais Aruba.
Prome Minister:
“Na UNOCA Lady Ruth a presenta su buki cu cancion y
poesia, den compania di esnan cu a yud’e den e trayecto aki, especialmente su esposo. Lamentablemente mi no por tabata presente debi cu mi ta den exterior, pero desde aki mi ta felicita
Lady Ruth cu su buki nobo y yam’e danki pa su contribucion na e desaroyo di nos muchanan. Mi ta gradici’e tambe pa su contribucion continuo cu cultura di Aruba y riba e tereno literario na Aruba, y pa semper stima, kere y yuda promove arte y cultura di nos pais”.
CONSEHO DI MINISTER HUNTO CU PERSONAL DI BESTUURSKANTOOR A DESPEDI DI SEÑOR HENNY EMAN
Dialuna 13 di januari, net un siman pasa, a tuma luga entiero di ex Minister President Sr. Henny Eman. Riba e mainta aki famianan y amistadnan a pasa Bestuurskantoor na unda a wordo ricibi pa Conseho di Minister y personal di Bestuurskantoor pa asina duna un ultimo honor, rindi respet y despedi di Sr. Eman cu tabata e Prome Minister President di Aruba.
Riba e mainta aki, Vice Premier Xiomara Maduro a hiba palabra den nomber di Prome Minister Evelyn Wever-Croes dunando un splicacion corto riba e biografia di Jan Hendrik Albert "Henny" Eman. Ela splica cu señor Eman tabata un persona importante den e historia politico y desaroyo di Pais Aruba. Como ex Prome Minister sr. Eman a goberna Aruba den 2 oportunidad entre 1986 pa 1989 y entre 1994 pa 2001. Señor Henny Eman a fayece na edad di 76 aña. Su trabou, contribucion y legado lo keda semper como un parti importante den historia di Pais Aruba. Por ultimo Minister Xiomara Maduro a duna condolencia y desea famia, amistadnan, y partido AVP hopi forza cu e perdida di nan ser keri.
Prome Minister ta lamenta e hecho di no por tabata presente na e entiero, y ta manda palabra di profundo condolencia na su famia, y su sernan keri cu e partida fisico di e ex mandatario. Cu Dios otorga su famia- y amigonan fortalesa y consuelo den e dianan nos dilanti.
Prome Minister Evelyn Wever-Croes: Den conexion cu Dia di Betico
MUCHANAN DI 5DE KLAS DI REINA BEATRIX SCHOOL
TAMBE A HAYA
BISHITA
DI PROME MINISTER
“Ban demostra cu orguyoso di a conoce un gran persona manera Betico Croes”
Tur aña, un siman prome cu e celebracion di Dia di Betico, Prome Minister Evelyn Wever-Croes ta cuminsa cu su bishitanan na varios scol basico na unda e tin e oportunidad di duna charla riba bida, lucha y logronan di Aruba su Libertador Betico Croes.
Riba e prome dia, dialuna mainta Prome Minister a bishita varios scol di cual uno ta Reina Beatrix School. Akinan e tabata tin e oportunidad di combersa y duna su charla na tur e alumnonan di 3 Klas 5. Prome Minister a expresa cu e alumnonan aki ya caba sa hopi di e bida di Betico, pero a haci algun pregunta di cual Prome Minister a contesta.
Prome Minister a expresa cu e bishitanan aki semper ta yene di orguyo, pasobra e ta realisa con hopi e muchanan cu ta nos futuro generacion sa di e bida di Betico, y esaki ta yuda hopi na mantene e legado di nos Libertador bibo. E ta sigur importante pa e muchanan aki lanta y crece sabiendo cu cada un di nan tin algo di Betico den nan, y cu si nan tin e determinacion, nan lo por logra cosnan grandi den futuro pa pais Aruba.
"Un danki na e cabesante di scol Jufrouw Rosalinda y e docentenan y alumnonan di klas 5. E docentenan a haci un bon trabou den educa e alumnonan di klas 5 riba e historia di Betico Croes y riba tur loke el a significa pa pais Aruba. Mi ta felicita nan pa e bon trabou y alaves kier a invita cada un di nan y e alumnonan tambe pa e manifestacion cultural cu lo tuma luga diabierna 24 di Januari pa 7:30 pm, na Plaza Betico Croes, cu ta un expression di canto, baile, poësia etc.. masha bunita. Tambe lo tin varios tent di cuminda y artesania tipico di Aruba. Ban hisa e bandera y demostra cu orguyo, e orguyo cu nos ta sinti cu e pais aki a conoce un gran persona manera Betico Croes" Prome Minister a expresa.
CONSTRUCCION DI E RESTAURANT NA BABY BEACH, PARTI DI E MASTERPLAN SERO COLORADO
Minister Demisionario Dangui Oduber ta contento di informa pronto e destaho publico pa construccion di restaurant Baby Beach lo bai na vigor. E proyecto di restaurant aki ta forma parti di e masterplan di Sero Colorado.
Despues di un periodo largo di preparacion y ehecucion, e masterplan aki ta drentando su fase final. E masterplan aki a wordo reparti den diferente fasenan, manera por ehempel e restauracion di e trapi nan na Rodgers y Baby Beach, Realocacion di e turtle wall, restructuracion di Rodgers Beach su parkeo, Baby Beach su parkeo, construccion di un “trafohuis” nobo, renovacion di e dos canchanan deportivo di tennis na Baby Beach, y awo e construccion di e restaurant na Baby Beach, cual ta situa entre e dos canchanan di tennis.
E realizacion di tur e proyectonan aki a percura pa eleva e calidad di e area completo. Sigur nan lo duna un impulso positivo y lo crea un spinoff economico grandi pa e area aki. E destaho publico pa construccion di e restaurant lo bai cuminsa dentro di poco pa asina e construccion tambe di e restaurant por cuminsa y wordo finaliza e aña venidero. Una vez e canchanan deportivo di tennis y e restaurant wordo entrega e masterplan di e Proyecto di Baby Beach lo keda cristaliza.
Minister Oduber ta contento cu apesar di masha hopi contratiempo a logra percura pa realiza e bunita proyecto, caminda a inverti miyones di florin den mehoracion di henter area y pone e area bek den su temponan di gloria. Hopi politico a priminti San Nicolas hopi cos y tiki por a realmente cumpli.
Minister Dangui Oduber a bisa loke e ta bai haci y a haci loke e la bisa. Ora cu e proyecto di Baby Beach y Rodgers beach keda cla henter e area lo keda masha bunita mes.
E maneho cu a wordo a hiba pa Minister Dangui Oduber a enfoka riba haci inversionan den producto Aruba pa asina nos producto keda uno competitivo y e proyecto aki ta demostra con a cumpli cu e maneho tambe cu a wordo hiba.
Kabinet
CONDELENCIA PA EX-PREMIER HENNY EMAN
Un delegacion di e oficina di ATA na Hulanda tabata na Gabinete di Aruba pa firma e registro di condolencia pa exprome Minister Henny Eman.
Director di ATA Europa Tirso Tromp a firma como prome persona, sigi pa e otro miembronan di e personal di ATA Europa y asina expresa nan palabranan di pesame na famia di Henny Eman.
Kabinet van de Gevolmachtigde Minister van Aruba: SINT MAARTEN A FIRMA REGISTRO DI CONDELENCIA PA EX-PREMIER HENNY EMAN
Un delegacion di Gabinete di Minister Plenipotenciario di Sint
Maarten a bishita Gabinete di Aruba pa firma e registro di condolencia pa ex-prome Minister Henny Eman.
E delegacion encabesa pa Minister Plenipotenciario di Sint
Maarten Gracita Arrindell a consisti di henter e staf y personal di Gabinete di Sint Maarten. Di e manera aki Gabinete di Minister Plenipotenciario di Sint
Maarten e rindi respet pa e ex-Prome Minister di Aruba y tambe expresa nan palabranan di pesame na famia di Henny Eman.
DUO ENTRANTE E LUNA AKI TA MANDA MENSAHE
TOCANTE COMPENSACION PA (EX-)STUDIANTENAN
(Ex-)studiantenan cu a studia un of mas aña den enseñansa superior bou di e sistema di financiamento (leenstelsel) na Hulanda, no a ricibi un beca basico den e periodo ey. Pa e motibo ey posiblemente nan mester a haci un fiansa extra cerca DUO. Pa yuda e studiantenan cu esaki, nan ta ricibi un compensacion financiero.
Tin 2 compensacion cu studiantenan cu a studia bou di e sistema di financiamento (di september 2015 te cu augustus 2023) posiblemente tin derecho riba dje: e compensacion pa beca basico cu no a haci uzo di dje y e compensacion di voucher di estudio. Un di e condicionnan pa bin na remarca pa esaki ta, cu e studiante mester a haya un diploma (final).
Compensacion pa beca basico cu no a haci uzo di dje Si nan ta cumpli cu e condicionnan, (ex-) studiantenan ta haya e compensacion pa beca basico cu no a haci uzo di dje. Esaki ta un suma di € 34,17 pa luna. Ta desconta e suma for di un eventual debe di estudio, of ta pag’e si no tin debe di estudio.
Compensacion di voucher di estudio
(Ex-)studiantenan cu pa di prome biaha den e prome 4 añanan di estudio a ricibi financiamento di estudio di e sistema di financiamento, banda di e compensacion pa beca basico cu
no a haci uzo di dje, tin derecho tambe riba e compensacion di voucher di estudio. Esey ta un solo biaha un suma di € 2.098, -. Ta desconta e suma aki tambe for di un eventual debe di estudio, of ta pag’e si no tin debe di estudio.
Notificacion personal of haci peticion bo mes (Ex-)studiantenan cu ta cumpli cu e condicionnan, ta haya notificacion personal den luna di januari si DUO tin nan datonan. Studiantenan cu logra nan diploma mas despues, ta ricibi notificacion despues cu e instancia educacional a manda nan diploma.
Studiantenan cu no a haci uzo di financiamento di estudio of di e producto di biahe pa studiante, mes mester pidi e compensacion pa beca basico cu no a haci uzo di dje.
Por haya mas informacion tocante e compensacionnan riba: duo.nl/tegemoetkomingleenstelsel.
DUO ta ehecuta entre otro ley- i areglonan riba tereno di financiamento di instancianan educacional, dunamento y cobramento di financiamento di estudio y compensacion pa gastonan escolar y ta percura pa e proceso di reconocemento y legalisacion di diploma pa ministerio di OCW.
