GABINETE WEVER-CROES A CUMPLI CU E PROMESA
HACI NA OPPA Y NA TUR PENSIONADO DI ARUBA
17 mil pensionado lo no paga impuesto mas y remedy lo wordo cubri atrobe
Durante e reunion di diaranson 25 di September 2024 cu Prome Minister Evelyn Wever-Croes tabata tin cu e Organisacion di Pensionadonan Publico Arubano (OPPA), un di e temanan riba agenda tabata e peso di impuesto cu pensionadonan ta paga. Den e reunion aki a participa tambe señor Edwin Jacobs di AZV y SVB.
Prome Minister den e reunion ey a splica Presidente di OPPA, señor Ivo Valdez cu desde cu el a drenta den Gobierno na 2017, su compromiso tabata pa baha e peso di impuesto y percura pa pensionadonan no paga impuesto mas. Sinembargo esaki no tabata un decision cu por a haci sin mas, mirando cu e tempo ey e gobierno prome cu Gabinete Wever-Croes, esta e gobierno di AVP, a hiba un mal maneho financiero y no tabata tin fondo pa cumpli cu e compromiso ey.
“Pero nos a traha duro, stap pa stap, y asina cu tabata tin espacio financiero, nos tabata alivia e peso di impuesto. Te cu awor a logra pa elimina e impuesto aki pa 17 mil di e 19 mil pensionadonan cu ta biba na Aruba. Cu esaki mi ta considera cu nos a cumpli cu nos promesa haci na OPPA y na tur pensionado di Aruba”, Prome Minister a enfatisa.
Un otro promesa haci den e reunion di diaranson 25 di
September 2024, tabata e remedinan cu pensionadonan mester a paga. Mientras tanto a crea e espacio financiero pa pensionadonan por haya remedi sin mester paga.
“Gabinete Wever-Croes a haya hopi elogio, y principalmente hopi mensahe di DANKI di pensionadonan pa cu esaki”, Prome Minister a termina bisando.
Prome Minister Evelyn Wever-Croes: Apesar cu e situacion na Venezuela ta uno tenso
MINISTER DI DEFENSA DI REINO A SIGURA CU
ARUBA NO TIN MOTIBO PA PREOCUPA
Siman pasa dia 10 di Januari 2025 a tuma luga e inauguracion di e Presidente nobo di Venezuela señor Nicolas Maduro. Manera ta conoci Reino Hulandes no ta reconoce e eleccion di Nicolas Maduro como presidente di Venezuela, mirando cu Union Eurpeo a pidi pa Nicolas Maduro demostra cu e actanan cu realmente el a gana e eleccion, y esaki nunca a wordo demostra. Pa e motibo aki, Reino Hulandes a keda riba e punto cu nan no ta reconoce e victoria ni su inauguracion.
E ponencia aki di Reino Hulandes a crea cierto tension den e relacion entre Reino Hulandes y Venezuela, cu e resultado cu Nicolas Maduro a tuma e decision cu embahada di Reino Hulandes na Caracas lo mester reduci su personal di diplomaticonan Hulandes cu ta na Caracas. Actualmente tin un total di 6 persona di Hulanda na Caracas di cual 3 lo mester bay bek. Esnan cu lo keda eynan lo ta e Embahadora mes cu 2 miembro mas di e personal y tur e trahadonan local. Apesar cu e cantidad di personal ta wordo reduci, e trabounan consular di Embahada, y e trabou di aplicacion pa visa lo continua y lo wordo conduci pa e Embahadora mes cu sosten di e personal local.
E decision di Nicolas Maduro sigur no a cay na agrado di Hulanda, y basa riba esaki, Minister di Relacion Exterior di Hulanda a ordena pa e Embahada di Venezuela na Den Haag tambe baha su cantidad di personanan cu Venezuela a manda pa eynan. Eynan tin un total di 4 empleado di cual 2 lo mester retira. Esaki sigur ta un contra reaccion di Hulanda riba e decision di Presidente Maduro, ya cu nan no a aprecia e decision tuma.
Hecho ta cu tur e contra temponan aki ta trece mas tension den e relacion entre Hulanda y Venezuela, pero di parti di Ministerio di Relacion Exterior a sigura cu e consulnan lo sigui haci nan trabou y cu e trabounan consular cu ta wordo haci na e Embahada na Caracas pa cu ciudadanonan di pais Aruba lo continua. Pa loke ta e Consul di Venezuela na Aruba, trabounan tambe lo sigui debidamente.
Pa loke ta e tema di defensa, siman pasa Prome Minister a reuni cu Minister di Defensa di Reino señor Ruben Brekelmans cu tabata na Aruba. Durante e reunion a delibera extensamente riba e tema aki, na unda cu Minister Brekelmans a sigura, cu pa awor Aruba no tin motibo pa preocupacion. E situacion ta uno tenso y ta wordo vigila hopi di serca, pa asina Aruba ta prepara den caso di cualkier eventualidad.
Prome Minister a expresa cu e situacion y e violacion di derecho humano na Venezuela ta un topico hopi preocupante, y cu ta riba su agenda di prioridad ya pa 7 aña caba cu e ta den Gobierno. E situacion aki ta uno cu Venezuela mes tin cu soluciona internamente, y Aruba no por yuda cu nada na e momentonan aki, solamente uni den oracion pa pronto bin un resolucion pa cu e situacion aki na Venezuela.
MINISTER MADURO TA SPLICA RIBA E DESICION PA REDUCI IMPUESTO RIBA ENTRADA NA COMIENSO DI AÑA 2025
E cambio fiscal aki no ta ‘afscheidsbeleid’
Nos a haci un cambio fiscal grandi cu ta yuda cu e poder di compra grandemente na Aruba. Claro tin algun hende cu no ta contento y ta cuestiona e intencion y e timing di e desicion. Pa nan e siguiente splicacion aki.
Maneho serio na bienestar di Aruba
Nos manera di maneha fondo publico ta uno serio, transparente y semper cu bienestar di Aruba den mente. Desde aña 2018 nos a cuminsa traha riba cambionan fiscal pa crea espacio fiscal pa por paga debe di Aruba y haci inversionan necesario. E maneho serio aki a trece mehoracion grandi den Aruba su finansa publico, a tene Aruba stabiel durante pandemia y awo a crea espacio fiscal cu cual Aruba ta pagando su debe, tin fondo pa haci inversion y tin placa pa por duna alivio fiscal y yuda e poder di compra di e Pueblo di Aruba.
Cada cambio fiscal ta conta cu compensacion
Den nos forma di traha, cada cambio fiscal haci a wordo compaña pa compensacion pa esnan cu mas mester di dje den comunidad. Den e Reforma Fiscal na aña 2019 y den e Plan Fiscal 2023, por ehempel, a baha loonbelasting como compensacion. Awo na comienso di aña 2025 a dicidi di haci un rebaho mas grandi den loonbelasting como compensacion. E ultimo aki a bira necesario ya cu e compensacion den reduccion di invoerrechten haci den e Plan Fiscal 2023 no a duna e resultado desea di trece alivio den e poder di compra di Pueblo.
Gobierno su finansa por carga e cambio fiscal E cambio fiscal aki na comienso di aña 2025 den reduccion grandi den impuesto riba entrada, ta pas den e plachi financiero multianual di Aruba. Esaki kiermeen cu Gobierno tin suficiente espacio fiscal pa por cubri e entrada cu ta bay perdi debi na e cambio aki. Pues e Gobierno actual y esun cu ta sigui, no ta wordo perhudica pa por cumpli cu e norma financiero di 1% di surplus. Gobierno su finansa por carga e cambio fiscal aki.
Timing y intencion di e desicion
Hopi hende a cuestiona e timing y e intencion di e desicion pa tuma e desicion pa un rebaho grandi den impuesto riba entrada na comienso di aña 2025. Tin hende puntra dicon te awo despues di eleccion ta haci e cambio grandi aki, dicon no a haci e cambio prome cu eleccion y si ta trata di ‘afscheidsbeleid’ pa perhudica otro gobernacion. Manera menciona, trabou y cambio continuo a wordo haci desde aña 2018 pa Aruba por
a logra yega na e espacio financiero pa por cumpli cu paga debe, haci inversion y duna bek na Pueblo. Ora a constata cu e compensacion di rebaho di invoerrechten den aña 2023 no a traduci su mes den mehoracion di poder di compra na Aruba, a cuminsa traha pa por bolbe baha impuesto riba entrada ya cu un reduccion den e impuesto directo aki ta yuda e cartera y poder di compra di Pueblo directamente. Den augustus 2024 a cuminsa cu e calculacion necesario cu a tuma su tempo y a logra keda cla fin di december 2024 na unda e analisis necesario a tuma luga y na comienso di januari 2025 e desicion a cay pa bay pa e cambio fiscal aki cu ta yuda poder di compra na Aruba. Pues pa resumi, si e calculacion por a caba mas prome, lo por a tuma desicion mas prome. E unico intencion tras di e desicion aki ta bienestar general di Pueblo di Aruba.
E cambio fiscal aki no ta ‘afscheidsbeleid’
Por ultimo, laga nos aclarea cu e cambio fiscal aki cu ta duna Pueblo en general un alivio fiscal, no ta un ‘afscheidsbeleid.’ Desde aña 2018 nos ta trahando riba cambionan fiscal y prome cu eleccion a wordo anuncia, ya nos tabata trahando riba e rebaho aki di impuesto riba entrada. Aunke ta trata di un rebaho hopi grandi cu ta conta pa tur pagado di belasting, esaki no ta un cambio controversial, ya cu e ta pas den e trabounan cu nos a bin ta haci desde aña 2018, na unda cu na aña 2019 y aña 2023, ya caba a cuminsa baha impuesto riba entrada como parti di compensacion pa tene poder di compra. E cambio fiscal por wordo carga financieramente pa Gobierno, pues no ta un desicion cu ta bay perhudica ni e Gobierno aki of e proximo Gobierno. Tur por keda cumpli cu e norma financiero di 1% di GDP na surplus. Ta un cambio fiscal cu ta beneficia TUR pagado di belasting, pues e chens ta hopi chikito cu un otro Gobierno lo kier cambia e desicion aki cu Minister Maduro di Finansa ta autorisa pa tuma basa riba Ley di Impuesto.
DISCURSO DI MINISTER MADURO COMO VICE
MINISTER
PRESIDENT
NA OCASION
DI ENTIERO DI SR. JAN HENDRIK ALBERT “HENNY” EMAN
Nos ta reuni awe pa rindi un homenahe y respet na Jan Hendrik Albert "Henny" Eman, cu tabata un persona importante den e historia politico y desaroyo di Pais Aruba. Henny Eman a nace dia 20 di maart 1948 denter di un famia politico cu a funda e partido cristian democrata AVP. Henny a continua cu e compromiso familiar y a lidera e partido AVP y Pais Aruba na varios ocasion.
Na momento cu Aruba a logra Status Aparte dia 1 di januari 1986, Henny Eman a bay den historia di Aruba como e prome Minister-President di un Aruba autonomo. Su liderato durante e periodo ey tabata enfoca riba stabilisa y reanima economia di Aruba despues cu e refineria di LAGO a cera. Henny a sirbi den tres termino como Minister-President di Pais Aruba, durante añanan 1986 pa 1989 y dos biaha durante di añanan 1994 pa 2001. Tambe Henny tabatin un rol significante den Parlamento di Aruba den oposicion. Durante su carera politico, Henny a demostra su amor pa nos Pais, su fe den progreso y e tabatin un compromiso pa logra bienestar di Pais Aruba.
Den e ultimo etapa di su bida, Henny a dedica su tempo pa guia y prepara e generacion nobo di lidernan di e partido AVP. Henny a wordo reconoci tambe na nivel internacional cu distincionnan di e Orden Francisco de Miranda di Venezuela y Officier in de Orde van de Nederlandse Leeuw di Hulanda. Den nomber di Gobierno di Aruba, como gobernante y como politico nos ta reconoce y duna credito na un persona cu a dedica gran parti di su bida na desaroyo politico na Aruba formando parti di e diferente institutonan democratico di Pais Aruba.
Ser un gobernante den funcion y special den un Pais chikito tin su retonan, sacrificio y ta tuma hopi energia y boluntad di esnan cu ta scohe pa haci esaki. Esaki ta conta mas aun pa un persona cu ta lider di un partido y cu a fungi na diferente ocasion como Minister President di Pais Aruba. Ta hopi esfuerso lidernan di partido tq haci pa mantene partido hunto, gobierno hunto y pueblo bon informa pa mustra un solo liña di maneho. Un trabou cu hopi biaha no ta wordo aprecia, pero ta
un hecho cu mester tin hendenan dispuesto y cu ta scohe pa hasi e trabou aki.
Apesar cu Henny a sali di un famia cu un trayectoria politico, e como persona, mester a tuma un decision dado momento di continua riba e caminda di sirbi su Pais. Poniendo su mes asina na disposicion di e Pueblo di Aruba. Pa esaki den nomber di Gobierno di Aruba nos kier a gradici su persona pa e dedicacion y trabou aki na bienestar di Pais Aruba.
Un danki tambe ta bay na su famia cu a permiti y a sostene Henny durante e añanan den su funcion politico na Aruba.
Dia 6 di januari 2025, Henny Eman a fayece na edad di 76 aña. Su trabou, contribucion y legado lo keda semper como un parti importante den historia di Pais Aruba.
Den nomber di Gobierno di Aruba, nos mas profundo condolencia na Henny su casa, yiunan, famia, amigonan, conocirnan, pueblo di Aruba, tur miembro y simpatisante di AVP cu e perdida di Henny.
Henny danki pa tur locual bo a haci pa Pais Aruba. Cu e alma di Henny descansa na paz.
PROYECTO “ SERO COLORADO MEMORIAL” TA BAI CUMINSA PRONTO
Minister Demisionario Dangui Oduber ta contento di informa cu tin un bunita proyecto mas cu ta den tramite pa start.
Como parti di a maneho di turismo y tambe historia, na comienso di aña 2023 a colabora cu e comision di Aruba, Outdoor Amenities, huntu cu ministerio di Infrastructura y TPEF a sigui explora e vision pa sigui preserva y restaura nos historia. Den cuadro di esaki a proyecto pa preserva y embeyese e area di bunker riba cero colorado a cristalisa.
E parkeo di e area aki lo wordo restaura, embeyese y tambe lo introduci un “Memorial Area” den cual nos localnan y turista por lesa y conoce mas di nos historia. Mas bien riba e historia di e area, cual ta e Ammo Bunker, Lighthouse y nan funcion tempo di guera.
Esaki ta un otro bunita proyecto cu tawata tin varios luna caba den preparacion y ta sumamante conento di mira nan bai wordo realisa.
Mi kier a duna un aprecio y gradicimento na nos departamento di obra publico (DOW) di pa diseña y encamina e proceso di destaho y tambe TPEF pa kere den e proyecto. Por ultimo e comision Aruba Outdoor Amenities pa tin e aprecio pa nos historia y cultura.
Trabou nan ta premira pa start pronto y lo dura algun luna. Corda tene na cuenta cu e area den momento nan di construccion. Minister ta hopi satisfecho di mira cuanto proyecto a wordo ehecuta caba y cuanto lo bai cuminsa e aña aki.
Minister Demisioniario Dangui Oduber: PRIMARE CARE ARUBA
Minister Dangui Oduber a aproba pa Primary Care Aruba (Fundacion Cuido Primario Aruba) keda reconoci como un "zorginstelling". Esaki ta un entidad oficial cu por brinda servicio den sector di cuido na Aruba.
Primary Care Aruba ta un organisacion independiente cu lo yuda reenforsa e prome liña di cuido y crea integracion mas eficiente entre e diferente stakeholders den prome liña di cuido manera a wordo delinea den e Zorgakkoord.
Awendia e prome liña di cuido ta birando mas compleho, e atencion pidi di instancianan a subi drasticamente y e trabou a ta encera mas cu solamente duna servicio di cuido.
E metanan di Primary Care Aruba ta entre otro:
• Brinda sosten na dokternan di cas unda nan por keda eherce nan trabou di wak pashent mientras por ricibi facilitacion den maneho di e praktijk manera asistencia cu personal (HR), material, ekipo, IT, etc.
• Facilita y maneha servicio di cuido di huisartsenpost pafo di orarionan di trabou cu personal y asistencia pa mehora
eficiencia
• Maneha oficinanan di HOED (cas di dokter) den seno di prome liña di cuido cu experticio di prome liña di cuido
• Crea structura entre diferente stakeholders manera dokternan di cas (HAVA), thuiszorg, palliatieve zorg (Hospice), POH (WGK), fysioterapia, logopedia, optometrista, partera y otro
• Brinda solucion den comunicacion di practicanan diario entre prome liña (dokternan di cas) y segundo liña (Hospital/ IMSAN)
• Crea iniciativanan nobo den prome liña di cuido (tecnologia)
E vision di Primary Care Aruba ta pa haci e prome liña di cuido mas eficiente y duradero. Door di identifica y drecha areanan vulnerabel, lo por yuda dunadornan di cuido cu hermentnan y asina duna nan oportunidad pa brinda Aruba su pashentnan e miho cuido posibel.
Minister Dangui Oduber ta felicita e fundadornan di Primary Care Aruba, cual ta dokternan di cas dr. Juaquin van Trigt y dr. Eelco Veringa.
SECRETARIO DI ESTADO PA ASUNTONAN DI REINO ZSOLT SZABÓ A FIRMA REGISTRO DI
Secretario di Estado pa Asuntonan di Reino Zsolt Szabó a firma e registro di condolencia na Gabinete di Aruba pa exprome Minister Henny Eman kende riba 6 di Januari ultimo a fayece na e edad di 76 aña.
Diparti di Ministerio di Asuntonan Interno y Relacionnan di Reino (BZK) Roald Lapperrre, director di Directorado Relacionnan di Reino di BZK tambe a firma e registro di condolencia.
Jan Peter Balkenende, ex-prome minister di Hulanda y Minister van Staat a presencia den nomber di Gobierno di Hulanda di entierro di Henny Eman na Aruba.
CONDOLENCIA
VICE PRESIDENTE RAAD VAN STATE THOM DE GRAAF A FIRMA REGISTRO DI CONDOLENCIA
Vice presidente di Raad van State Thom de Graaf a firma e registro di condolencia na Gabinete di Aruba pa ex-prome Minister Henny Eman kende riba 6 di Januari ultimo a fayece na e edad di 76 aña.
Na mesun momento Ron van der Veer cu ta Raadadviseur na Raad van State tambe a firma e registro di condolencia.
STAATSRADEN NA RAAD VAN STATE PA REINO A FIRMA REGISTRO DI CONDOLENCIA
E “Staatsraden” na Raad van State pa Reino a firma e registro di condolencia na Gabinete di Aruba pa exprome Minister Henny Eman kende riba 6 di Januari ultimo a fayece na e edad di 76 aña.
Esaki ta encera Paul Comenencia cu ta Staatsraad pa Curaçao, Maria van der Sluijs-Plantz cu ta Staatsraad pa Sint Maarten y Andy Lee cu ta Staatsraad pa Aruba.
MINISTER THIJSEN NA DEBATE DEN TWEEDE KAMER CU SECRETARIO DI ESTADO SZSABÓ
Demisionario Minister Plenipotenciario mr. Ady Thijsen a presencia e debate den Tweede Kamer awe cu Secretario di Estado pa Asuntonan di Reino Zsolt Szabó. Tambe presente na e debate tabata Minister Plenipotenciario di Sint-Maarten mr. Gracita Arrindell.
E debate riba diferente topico cu ta regarda e paisnan Caribense di Reino Hulandes tabata cu e Comision pa Asuntonan di Reino di Tweede Kamer.
MINISTER THIJSEN A FIRMA REGISTRO DI
CONDOLENCIA PA HENNY EMAN
Minister Plenipotenciario demisionario mr. Ady Thijsen a firma e registro di condolencia na Gabinete di Aruba pa ex-prome Minister Henny Eman kende riba 6 di Januari ultimo a fayece na e edad di 76 aña.
Despues director di Gabinete di Aruba Joselin Croes LL.M/M.Sc a firma e registro di condolencia, sigi pa personal di Gabinete di Aruba.
Gabinete di Aruba a habri e registro di condolencia pa ex-prome Minister Henny Eman pa brinda persona nan na Hulanda e oportunidad pa expresa nan palabranan di pesame na famia di Henny Eman.
