KIWANIS CLUB OF ARUBA A ENTREGA E “CLINT
WHITFIELD OUTSTANDING STUDENT AWARD 2024”
“Laga
e legado di sr. Whitfield inspira boso pa soña mas grandi, traha mas duro, y haci un impacto
duradero riba e mundo rond di boso”
Diaranson anochi, 10 di juli na Aruba Surfside Marina, Kiwanis Club of Aruba a haci entrega di e “Clint Whitfield Outstanding Student Award 2024”. E premio aki ta honra studiantenan di Colegio Arubano cu a sobresali durante e aña escolar 20232024.
E reconocimento ta nombra na memoria di señor Clinton Whitfield, miembro di Kiwanis Club of Aruba den feliz memoria, cu a traha cu amor y dedicacion durante hopi aña pa sirbi e comunidad di Aruba.
Prome Minister Evelyn Wever-Croes presente pa e ocasion bunita aki a expresa su orguyo pa por celebra no solamente e studiantenan excelente, cu a sobresali cu nan esfuersonan academico, sino tambe e legado di señor Whitfield cu su vision y dedicacion a inspira generacionnan, motivando e hubentud pa lucha pa excelencia y contribui positivamente na e sociedad. Durante su discurso, Prome Minister a dirigi su mes na e ganadonan di e “Clint Whitfield Outstanding Student Award 2024” mencionando cu esaki ta e resultado di nan trabou duro, dedicacion y perseverancia y e premio aki ta un testimonio cu nan esfuerso no ta pasa desapercibi.
Prome Minister:
“E mundo tin mester di boso talento, vision y impulso. Boso no ta solamente studiantenan prometedor, sino tambe lidernan. Corda cu esaki ta djis e cuminsamento. Probecha e oportunidadnan cu tin boso dilanti, sigui amplia boso potencial, y sigui cu e spirito di excelencia y servicio di señor Whitfield. Laga su legado inspira boso pa soña mas grandi, traha mas duro, y haci un impacto duradero riba e mundo rond di boso. Mi ta expresa mi mas profundo gratitud na Kiwanis Club di Aruba pa nan sosten continuo y dedicacion na nos hobennan. Un biaha mas mi ta felicita tur e studiantenan sobresaliente. Laga boso luz sigui briya y inspira otro cu boso logronan.”
Prome Minister Evelyn Wever-Croes: PROME MINISTER A RICIBI PROPUESTA DI E MANEHO NOBO DI E K9 UNIT DI GOBIERNO
“Un ehempel di ora traha hunto y atende retonan mesora, ta yega na solucionnan na bienestar di nos tur”
Diahuebs 11 di juli, Prome Minister Evelyn Wever-Croes a reuni cu DRH y representantenan di Aduana, KIA y Cuerpo Policial referente e K9 Unit di Gobierno di Aruba.
Prome Minister a splica cu ya pa hopi aña Aruba tin un K9 Unit. Actualmente Gobierno di Aruba tin 23 cacho cu ta duna servicio na e comunidad. Nan ta traha cu Aduana, KIA y Cuerpo Policial. Cada departamento tin su propio maneho cu su propio reglanan y algun mas beneficioso cu otro. Prome Minister a duna di conoce cu algun siman pasa el a wordo notifica di reto- y problemanan cu tin bou ehecucion di maneho actual y di biaha a reuni pa trata esaki. DRH (Departamento di Recurso Humano) a lidera e trabounan pa un maneho nobo hunto cu sindicatonan di Polis, Aduana y KIA.
Prome Minister ta indica riba e dia di awe e tawatin e honor di a ricibi e proposicion di e maneho nobo y a keda hopi satisfecho cu ne. Un motibo principal pa e maneho nobo ta pa pone e bienestar di e cacho na prome luga. Aruba tin un Ley di Cacho y tur animal na Aruba mester wordo trata na un forma digno y esey tambe ta conta pa e cachonan cu ta den servicio di Gobierno di Aruba, y cu e maneho nobo aki lo garantisa esey tambe.
“Mi ta gradici KPA, Aduana, KIA, e sindicatonan SADA, SPA, SEPPA, y DRH cu a traha hunto riba e maneho nobo aki y awe a presenta e proposicion. Awor nos ta buscando e consehonan huridico y financiero pa asina finalisa esaki. Esaki ta un ehempel di cu ora traha hunto, cera cabes y atende cu retonan mesora, nos ta yega na solucionnan cu ta na bienestar di nos tur”, Prome Minister a remarca.
MARC ODUBER A CUMPLI 25 AÑA DEN SERVICIO
DI GOBIERNO DI ARUBA
Minister Maduro a ricibi'e den cuadro di e aniversario aki
E siman aki
Minister Xiomara Maduro a ricibi sr. Marc Oduber kende a cumpli 25 aña den servicio di Gobierno. Marc a cuminsa traha como meteologo na Departamento di Meteologico di Aruba y awo ta trahando na e Secretariado di e Comision di UNESCO Aruba como specialista/liason encarga cu e programa di ciencia.
Den cuadro di e trabounan di UNESCO, Marc ta representa Aruba riba e tarima internacional como e Presidente di IOCARIBE su subcomision di 'Intergovernmental Oceanographic Committee' pa Caribe (incluyendo Merca y Brazil). Marc ta miembro tambe di e Comite Oceano Nacional di Reino. Nos ta felicita y gradici sr. Marc Oduber pa su 20 aniversario di trabou dedica na bienestar di comunidad.
MINISTER MADURO DI CULTURA TABATA DI BISHITA
NA SNOA Y E MUSEO HUDIU NA CORSOU
Siman pasa Minister Maduro di Cultura tabata na Corsou pa asina representa Conseho di Minister di Aruba na e celebracion di e 40 aniversario di Dia di Bandera di Corsou. E mandatario a haci uzo di e momento festivo pa asina por a pasa bishita algun museo na Corsou. Entre nan, Minister Maduro a pasa bishita e monumento historico Sinagogo Mikvé Israel-Emanuel miho conoci como SNOA y e Museo di Hudiu na Corsou. Motibo di e bishita tabata pa e mandatario di Cultura por haya sa mas di e cultura Hudiu y tambe di e descendencia Spaño y Portugues di un grupo grandi di cuidadanonan na Corsou y Aruba. E SNOA y e Museo ta conta nos un parti special di e historia di hopi famia cu awe ainda ta forma parti di e comunidad na Corsou y Aruba.
SNOA
Minister Maduro a wordo ricibi y guia cariñosamente pa sra. Michèle Russel-Capriles hunto cu otro miembro di e directiva sr. Sinuhe Oomen y Rabbi Martin Hirsh, kendenan a duna e mandatario un splicacion den e tempel. E SNOA na Corsou a wordo consegra na aña 1732 y ta e sinagogo mas bieu den uzo continuo na e continente Americano. E monumento historico aki ta forma parti esencial di e historia di e Hudiunan cu a scapa fo'i Spaña y Portugal den e añanan 1500 y cu via Hulanda a bin establece nan mes na Corsou y den e region. E edificio ta den arkitectura Hulandes y ta conta cu meubles di mahony, bunita candelaria y adorno di koper y plata, y un piso
di santo cu ta haci e tempel uno masha special, ya cu masha poco sinagogo na mundo tin un piso di santo.
Museo di Hudiu
Despues di e bishita na e SNOA, Minister Maduro a haya un recorido den e Museo di Historia y Cultura Hudiu na unda sra. Michèle Russel-Capriles kende ta Presidente di e museo, a splica mas di e historia di e Hudiunan cu a bin via Hulanda na Corsou y Aruba. Den e patio di e museo a haya informacion di e cementerio Hudiu Bet Haim cu ta esun mas antiguo di Caribe y di e Hemisfera Oeste. E mandatario por a admira e lapidanan riba cual tin obra di arte cu ta conta e storia di ken e defunto tabata na bida, di cual famia e ta bin y kico tabata su profecion of di kico ela fayece. Den e museo por aprecia e artefactonan di diferente ritual di e religion Hudiu y por haya un bista di e bida cotidiano di e comunidad Hudiu na Corsou. Como cu ta un museo bibo, cada bes por haya sa mas di e bida y e logronan di diferente Hudiunan prominente di Corsou. Den e museo ta resalta un obra di sra. Michèle Russel-Capriles cu ta conta e storia di e Hudiunan Sefardita cu mester a scapa di e Peninsula Iberico debi na e Inquision Spaño cu tabata obliga nan conberti den Catolico. E obra ta inspira pa su querida Mama cu tabata tin e custumber Hudiu di warda e yabinan di tur e casnan cu nan a biba aden. Esaki basa riba e leyenda cu ora a scapa di Spaña, e Hudiunan a hiba e yabinan di nan cas y ainda ta conserva nan pa si un dia nan bolbe bek.
Acceso na historia comparti
Minister Maduro ta gradici sra. Michèle Russel-Capriles y henter e ekipo di e SNOA y Museo Hudiu pa e bishita informativo aki. E mandatario na final di su bishita a expresa su deseo pa informacion riba e herencia cultural Hudiu na Corsou tambe por forma parti un dia di e plataforma digital pa conserva nos herencia cultural, Coleccion Aruba, pa asina e descendientenan Hudiu na Aruba tambe por tin acceso na forma digital na e historia comparti aki. En conexion cu Dia di Bandera di Corsou:
RELATO ANUAL DI SETAR N.V. CU RESULTADO
POSITIVO APROBA
Recientemente Minister di Asuntonan Economico, Comunicacion y Desaroyo Sostenibel, mr. Geoffrey Wever, a reuni cu gerencia y hunta di supervision di Setar N.V. na unda a aproba e jaarrekening pa 2023.
E relato anual 2023 di Setar N.V. ta mustra un resultado positivo. 'Aprobacion di jaarrekening di un compania ta algo esencial pa funcionamento di e compania. Setar N.V. ta un actor importante den desaroyo di Aruba su economia diversifica y moderno brindando e servicio y desaroyo tecnologico di comunicacion', segun Minister Geoffrey Wever a comenta.
Den 2024 Setar N.V. lo sigui inverti den conectividad cu
inversionnan den Fiber Optic pa conecta tur cas na Aruba, kabel subteraneo y implementacion di 5G. Mirando e importancia di sostenibilidad, riba peticion di minister Geoffrey Wever, Setar N.V. lo inverti tambe den sostenibilidad y a agrega un di 6 pilar strategico na Setar N.V. esta “Responsable Connectivity”, haciendo Setar N.V. asina un empresa cu ta contribui na un miho medio ambiente na Aruba.
Como minister di Comunicacion, Minister Geoffrey Wever ta aplaudi cu Setar N.V. como compania estatal a entrega na tempo e relato anual 2023, y ta gradici e gerencia, personal y miembronan di e hunta di supervision cu a haci esaki posibel.
Minister Geoffrey Wever: TA INSTALANDO BAKINAN NOBO CU DOBEL CAPACIDAD ROND DI NOS CENTRO DI CIUDAD
Como parti di esfuersonan di revitalisacion di Oranjestad, ta haciendo un serie di trabounan di mantencion y mehoracion den nos centro di ciudad. Awo a toca turno pa expande e capacidad di coleccion di desperdicio, pa asina yuda mantene nos centro di ciudad limpi, contribuyendo na eleva e higiena y estetica. Tur e esfuersonan aki na final ta pa sostene e factibilidad comercial di e area.
Mester nota cu limpiesa ta keda un factor cu mester keda atende cu'ne constantemente. Recientemente, den luna di juni, trabou di mantenecion y limpiesa general a wordo realisa na Caya G.F. Betico Croes, caminda e.o a trim matanan cu tabata "long overdue". Un di e kehonan tambe tabata cu barinan di sushi tabata yena lihe y tin biaha bai over, cual ta un mahos bista pa tur cu ta bishita y frecuenta e area.
E barinan di sushi ta traha completamente di plastico recicla, y ta un colaboracion cu Plastic Beach Party, un instancia nonprofit cu ta recicla plastico na Aruba. Cu instalacion di e barinan nobo, e meta ta pa no solamente aumenta e capacidad di carga, pero tambe pa introduci e concepto di separacion di desecho, ofreciendo un vak separa pa sushi di plastico. Esaki ta un inversion di mas di 70 mil florin di parti Ministerio di Asunto Economico, Comunicacion y Desaroyo Sostenibel.
'Den futuro lo tin mas opcionan di separacion, pero esaki ta un bon comienso', segun minister Geoffrey Wever. 'Nos a compromete pa haci Oranjestad un lugar mas limpi, accesibel, y vibrante pa tanto residente como bishitante. E instalacion di e barinan nobo ta parti di un iniciativa mas amplio pa mehora e experiencia general den nos ciudad. Mantene limpiesa ta crucial pa e bienestar di nos comunidad', segun e mandatario.
Nos ta aprecia e apoyo y cooperacion di nos comunidad mientras nos ta sigui paso-pa-paso cu e trabounan di mantencion y mehoracion importante aki.
RECAPITULACION DI PROGRESO- Y LOGRONAN DEN
ENSEÑANSA DURANTE AÑA ESCOLAR 2023-2024
A stipula 3.2 miyon extra pa normbedrag
Recientemente, Minister di Enseñansa y Deporte Endy Croes a haci un recapitulacion di algun progreso y logronan den enseñansa durante aña escolar 2023 2024. Minister Endy Croes ta contento cu tur e trabounan cu a haci caba den enseñansa y ta gradici Gabinete Wever-Croes II y departamentonan di Enseñansa pa nan contribucion.
A STIPULA 3.2 MIYON EXTRA PA NORMBEDRAG
Dia 4 di september 2023 den e tratamento di “voorjaarsnota”, Parlamento di Aruba a aproba 50%, esta 3.2 miyon florin. Den luna di december aña 2023, ora cu Parlamento di Aruba a trata Presupuesto di Pais Aruba a aproba e otro 50%, esta 3.2 miyon florin. Pues, un total di 6.4 miyon florin a haal in te cu aña 2023. Normbedrag” ta ancra den ley y ta e compensacion cu schoolbesturen ta ricibi a traves di “exploitatiesubsidie”. E “normbedrag” ta cubri costo di, entre otro, mantencion y seguro di e edificio di scol y lokaal, limpiesa di edificio y lokaal, coriente, awa y gas, mantencion di mueble di e scolnan, inversion den material di desaroyo “hulpmiddel” y necesidadnan di scol, lesmateriaal y admistracion.
Beca di Reino (Koninkrijksbeurs)
A firma un acuerdo cu Colegio EPI pa nuebe (9) studiante cu lo haci uzo di e prome Beca di Reino. Entrante 1 di september proximo e studiantenan lo cuminsa cu nan intercambio di estudio of pasantia na un di e paisnan den Reino Hulandes. Minister di Enseñansa saliente di Hulanda Sr. Robbert Dijkgraff tabata na Aruba, unda cu a anuncia e proyecto di Beca di Reino. “Hulanda a aproba 500 mil euro pa aña pa e Koninkrijk Mobiliteit Beurs. E intercambio aki ta brinda e studiantenan di EPI y Universidad di Aruba e oportunidad pa haci nan pasantia of intercambio di estudio di seis (6) luna na Hulanda.
Sistema di Data
Dienst Publieke Scholen (DPS) tabata e unico “schoolbestuur” cu no tabatin un sistema di data. Durante aña 2023, tur sistema lo ta conecta via cloud. Unabes cu DPS tin tur 20 scol conecta riba e sistema, por tuma decision a traves di data. Tambe, lo conecta tur 20 scol di DPS cu Departamento di Enseñansa via “interface”. Despues di esaki, ta prepara pa e siguiente stap, cu ta pa entrega e data di tur “schoolbestuur” na Departamento di Enseñansa pa asina tur 85 scol di Aruba ta riba un solo sistema. Esaki sigur lo yuda y facilita Gobierno di Aruba pa
tuma decision den futuro a traves di data.
Avancenan di proyecto di modernisacion di leynan Tin avancenan grandi riba e proyecto di modernisacion di leynan di enseñansa. Esaki ta encera pa modernisa e leynan di scol preparatorio, scol basico y scol secundario. Pero tambe ta encera pa traha e leynan nobo pa enseñansa profesional (Beroeps Onderwijs), enseñansa superior (Hoger Onderwijs), enseñansa special (Speciaal Onderwijs) y Landsverordening Onderwijstoezicht (LOT). Aña pasa a cuminsa traha e Landsverordering pa Inspeccion di Enseñansa, cual ta e ley di LOT. A traha riba e maneho, artikel den ley y memorie van toelichting y a presenta e ley aki a tur stakeholder pa asina nan tambe duna nan input. A entrega e ley di LOT na Directie Wetgeving en Juridische Zaken (DWJZ) y den e luna di juni e ley aki lo ta na Parlamento di Aruba. Mientrastanto a inicia cu e e ley pa enseñansa profesional.
BSN Nummer
April ultimo, Minister Endy Croes tabata na Corsou hunto cu Minister di Enseñansa di Hulanda Robbert Dijkgraaf, kende a haci entrega di BSN nummer na e prome studiante di Caribe na Curaçao. Esaki sigur ta otro logro grandi. Desde aña aki e studiantenan por ricibi nan BSN nummer prome cu nan biaha na Hulanda. Esaki lo facilita e proceso di e studiantenan na nan yegada na Hulanda. Cu BSN nummer e studiante por entre otro, inscribi pa un camber, por habri un cuenta di banco y aplica pa seguro.
Pa finalisa, Minister Endy Croes a indica cu e ta contento cu e cantidad di graduadonan. Resaltante tabata e alegria y emocion di cada schoolbestuur cu a celebra den un contexto unico. Esaki sigur ta refleha bek riba e aña escolar exitoso cu ta tras di lomba. Tur e trabou cu a haci ta “pay off” ora mira e graduadonan ricibi nan diploma. Minister Endy Croes a felicita e docente, maestro y tur esnan cu ta traha den e veld di enseñansa pa e trabou grandi cu nan ta haci. Ta aprecia e trabou cu boso ta haci pa educa cu pasion y amor. Tur esaki ta contribui pa engrandece e educacion di nos comunidad. Den nomber di Gobierno di Aruba y Ministerio di Enseñansa ta desea tur cu ta traha den e tereno di enseñansa un dushi vakantie.
Minister Endy Croes:
E PROME GRUPO DI ABO 2 DI E.P.B. ORANJESTAD A RICIBI NAN DIPLOMA
Diadomingo ultimo, Minister di Enseñansa y Deporte Endy Croes tabata presente na Ceremonia di Graduacion di E.P.B Oranjestad. A inicia e anochi cu Himno Nacional di Aruba, interpreta pa e alumnonan di klas E4D1, juffrouw Tromp y Jufrrouw Trimon. E mandatario di Enseñansa a hiba palabra y a enfoca riba e importancia pa aplica e cuater (4) C-nan di e habilidadnan di Siglo 21, cual ta comunicacion, colaboracion, capacitad di pensamento critico y creatividad. Ademas di esaki, ex-studiante Justin Franca, kende ta un hoben entrepreneur a conta su storia inspirativo e anochi aki y a motiva e graduadonan pa kere den nan mes y sigui nan soñonan. E aña aki un total di 55 alumno a gradua di e Sector Techniek. Durante e ocasion special aki, Sr. Erwin Lopez a duna un discurso emocional. Un momento hopi special tabata ora cu tur alumno a lanta para pa brasa y duna danki na esnan cu contribui den e trancurso di nan estudio.
Minister Endy Croes tabatin e honor di haci entrega di diploma na e prome graduadonan di ABO 2 di Sector Techniek. Fuera di esaki, e graduadonan di Electro, Onderhoud, Timmeren y Bouw tambe a ricibi nan diploma e anochi aki. Durante ocasion special aki, a reconoce e miho graduadonan, esta Xeron Vrolijk, Jesseline Trenidad, Xsyran van Trigt, Luis Jimenez, Nelshon Giel, Angel Bolivar y Kenzo Luidens. Despues di esaki a anuncia e “overall best geslaagde” di cada nivel, esta Xeron Vrolijk di ABO 2, Jesseline Trenidad di Arbeidsmarkt, Nelshon Giel di Uitstroom y Kenzo Luidens di Doorstroom.
Minister Endy Croes ta gradici director Sr. Erwin Lopez, unitmanager Sra. Albertina Albertsz, staf, docentenan di E.P.B. Oranjestad pa aporta den e desaroyo di e alumnonan. Pa conclui, Minister Endy Croes ta felicita tur studiante cu a haal nan diploma y ta desea nan hopi exito den nan siguiente etapa.
Minister Endy Croes: DESPUES DI 32 AÑA A INAUGURA E CANCHA DI BASKETBALL DI
CENTRO DI BARIO Y DEPORTE DAKOTA
Pabien Dakota cu Cancha di Basketball di Centro di Bario y Deporte Dakota completamente renoba
Minister di Enseñansa y Deporte Endy Croes acompaña pa su kerida esposa Sra. Dilailah Croes y Parlamentario Hendrik Tevreden a acudi na apertura oficial di Cancha di Basketball di Centro di Bario y Deporte Dakota. Pa varios aña caba, e cancha di basketball no tabata den funcion. Diaranson ultimo, despues di 32 aña a inaugura Cancha di Basketball di Centro di Bario y Deporte Dakota den un bachi completamente nobo.
Minister Endy Croes a hiba palabra den ocasion special aki. Locual ta bunita di e proyecto aki ta cu varios persona y compania a contribui gratuitamente den e renobacion di e cancha di basketball. Ora bo ta traha den ekipo bo ta logra cosnan grandi. Minister Endy Croes a haci un peticion pa hunto nos cuid’e y mantene den bon condicion pa nos muchay hobennan di bario por sigui practica deporte. Durante e apertura, a reconoce tres (3) atleta di Dakota cu a desteca enormemente den nan tempo, esta Sra. Rishenella Richardson, Sra. Gwendoline Kock y Sr. Luis Tromp.
Minister Endy Croes ta gradici Gobierno di Aruba, Ministerio di Deporte, directiva di Centro di Bario y Dakota y nan presidente dinamico Sr. Carl Michael Bikker cu a contribui den e renobacion di e cancha di basketball. Ademas di esaki, e mandatario di Deporte ta gradici tur stakeholder cu a contribui boluntariamente den e renobacion di e cancha di basketball entre otro, Sr. Lito Abath. Sr. Gilmar Croes, Sr. Pancho Jansen di Jansen Construction y Sr. Alwin Boekhoudt di Quick Electrical Services N.V. cu a percura pa e luznan di cancha. Pa finalisa, Minister di Deporte Endy Croes ta felicita e bario di Dakota cu nan cancha di basketball competamente renoba y ta motiva e mucha- hobennan di bario pa practica deporte y keda activo.
MINISTER ENDY CROES A PRESENCIA E MOMENTO HISTORICO, UNDA CU E PROME 28
GRADUADONAN DI MON PLAISIR COLLEGE HAVO
A RICIBI NAN DIPLOMA
Diasabra den un esfera festivo na Hilton ballroom, a tuma luga e prome Ceremonia di Graduacion di Mon Plaisir College Havo. E mandatario di Enseñansa y Deporte Endy Croes, mayor-, famia-, docente- y amistad tabata presente pa celebra e momento historico, unda cu e prome 28 graduadonan a ricibi nan diploma di Havo. Un momento bunita y emocionante tabata ora e graduadonan a drenta e sala den nan toga pa ricibi nan diploma. Durante e Ceremonia di Graduacion, Minister Endy Croes a hiba palabra. Den nomber di Gobierno di Aruba, e mandatario di Enseñansa y Deporte a felicita e graduadonan cu nan logro.
“Den bida tin hopi momento cu nos ta celebra, desde cu bo a nace, bo cumpleaño y mas cu claro ora cu bo ricibi bo diploma. E ta un momento cu ta trece hopi alegria y sigur di celebra. Boso mayor y famia ta hopi orguyoso di loke cu boso a logra awe. Pues sinti bo orguyoso di e trabou cu bo a eherce, paso e no tabata facil. Nos sa cu den e proceso kisas un mas cu otro tabatin mester di un sosten y motivacion. Na e momento ey, e mayor ta hunga un rol hopi grandi”, e mandatario di Enseñansa a subraya. “Na e mayornan pabien di boso yiu y danki pa e sosten cu boso a brinda nan pa nan por a keda desaroya y prepara nan mes pa futuro. Fuera di esaki, mi ta gradici e docentenan y ekipo completo di Mon Plaisir College Havo cu a traha hunto pa yuda e alumnonan etala y finalisa nan estudio. Na e graduadonan masha pabien cu boso diploma. E diploma cu boso a ricibi ta di bo, bo determinacion, perseverancia y trabou duro a hiba bo na e logro aki.
E diploma cu bo a ricibi, ningun hende por kit’e di bo. Den bida bo por perde un amistad, auto of cas, pero e diploma ta pa semper di bo. Sigui bo curason, sigui bo soño, paso educacion ta e arma mas poderoso cu por uza pa cambia mundo y cambia bo pais. Mas miho bo ta prepara, mas miho pa bo mes,” Minister Endy Croes a expresa. Finalmente, Minister
Endy Croes ta gradici S.P.C.O.A., rector di Mon Plaisir College Havo Sra. Richelle Noël, docente- y mayornan cu a contribui den e logro di e graduadonan y ta desea tur graduado hopi exito den futuro.
