SEÑORA LEONE JANSEN A RICIBI RECONOCEMENTO
PA 27 AÑA DI DEDICACION DEN SECTOR DI TURISMO
“Un hende muhe fuerte y luchado y ta un inspiracion pa henter e pueblo di Aruba”
Durante e apertura di e Recruitment Office di Secrets na San Nicolas, Gobierno di Aruba a duna un merecido reconocemento na señora Leone Jansen.
Señora Leone Jansen, a traha 27 aña den e sector hotelero di Aruba. Prome na Holiday Inn Hotel y despues na Concorde Hotel. Señora Leone ta biba pariba di brug y tur dia tawata bay traha te na Holiday Inn Hotel y Concorde Hotel pa tur e añanan di su carera. Señora Leone tin ocho yiu y ta bendiciona cu hopi nieto, bisanieto y tataranieto.
“Ta un honor pa Gobierno di Aruba reconoce e gran persona aki awe pa su contribucion den e sector di turismo di Aruba. E ta un ehempel di un hende muhe fuerte, luchado, cu ta lanta mainta cu gana di traha y a pesar di e distancia di su cas pa su trabou y cu tur dia e mester tuma transporte pa bay y bin bek cas, a sa di hiba su famia padilanti.
Mi ta gradici y reconoce señora Leone den nomber di Gobierno di Aruba. E ta un inspiracion pa hopi y sigur pa mi persona y pa hopi hende muhe pa su dedicacion tanto na su famia como na su trabou”, Prome Minister a expresa.
Prome Minister Evelyn Wever-Croes: APERTURA DI RECRUITMENT OFFICE DI SECRETS ARUBA
Secrets
ta crea oportunidad di empleo specialmente pa esnan cu ta biba na San Nicolas
Diabierna 9 di augustus Prome Minister Evelyn Wever-Croes tawata presente pa e apertura di e Recruitment Office di Secrets Aruba. E oficina aki ta situa na e edificio di Arubus San Nicolas. Akinan un ekipo local profesional lo atende tur esnan cu ta bin solicita pa e trabounan cu Secrets ta ofrece.
Secrets lo habri fin di 2024 y ta crea oportunidad di empleo specialmente pa esnan cu ta biba na San Nicolas. E cadena di hotel aki ta uno reconoci rond di mundo, y ta un tremendo oportunidad di empleo cu bon beneficionan pa e trahadonan.
Prome Minister ta haci un invitacion na henter e comunidad pariba di brug pa pasa e recruitment center, busca informacion di e trabounan cu Secrets ta ofrece y entrega un aplicacion pa asina abo tambe por forma parti di e hotel prestigioso aki.
“Cu Secrets ta cuminsa un capitulo nobo pa San Nicolas. E desaroyo di San Nicolas ta locual lo hiba e desaroyo di Aruba na e siguiente nivel y lo nifica e diversificacion di e economia di Aruba. Mi ta haci un apelacion na e comunidad pariba di brug pa bin solicita. Aruba mester di bo labor na Secrets, e exito di e hotel aki ta bay depende di boso cu lo labora eynan. Mi deseo ta pa den algun luna ora e hotel habri nos por mira caranan di nos propio yiunan di tera laborando na Secrets.
Mi palabra di gradicimento na Secrets pa pone nan confiansa den Aruba den bon y den menos bon tempo. Mi ta desea Grupo Martinon, pero specialmente cada un persona cu ta bay traha na Secrets hopi exito”, Prome Minister a expresa.
Prome Minister Evelyn Wever-Croes: PROME BISHITA DI TRABOU DI SECRETARIO
DI ESTADO NOBO DI RELACIONNAN DI REINO
SEÑOR ZSOLT SZABÓ
Dialuna mainta 12 di augustus, Prome Minister Evelyn WeverCroes a reuni cu e Secretario di Estado nobo di Relacionnan di Reino y Digitalisacion, señor Zsolt Szabó. Recientemente ya e dos mandatarionan a cera conoci via un reunion virtual, pero esaki tawata e prome biaha cu Prome Minister y e Secretario di Estado a topa personalmente.
Secretario di Estado Szabó a wordo acompaña pa un delegacion di Hulanda y tambe tawata presente representante di VNO (Vertegenwoordiging van Nederland in Oranjestad), señor Vincent Storimans, y representante di VNACS (Vertegenwoordiging van Nederland in Aruba, Curaçao en Sint Maarten), señor Edson Hato.
Despues di e reunion cu Prome Minister, a sigui un reunion cu Conseho di Minister di Aruba y despues a duna un presentacion di e Landspakket na e Secretario di Estado. Ademas di e reunion cu Prome Minister di Aruba y Conseho di Minister, Secretario di Estado Szabó tambe a reuni durante su bishita na Aruba cu Gobernador di Aruba, S.E. Alfonso Boekhoudt, cu Presidente di Parlamento señor Edgard Vrolijk y lidernan di fracionnan den Parlamento.
Esaki ta e prome bishita di trabou di e Secretario di Estado nobo na e islanan di Reino den e parti Caribeño. E prome bishita aki ta principalmente pa e Secretario di Estado conoce e islanan y e mandatarionan. Secretario di Estado Szabó ta na Aruba for di 11 pa 13 di augustus y despues lo biaha pa Corsou y Boneiro.
SECRETARIO DI ESTADO ZSOLT SZABÓ TA HIBA UN BON IMPRESION DI ARUBA
Secretario di Estado Szabó a expresa di ta impresiona con Prome Minister ta wak e futuro di Aruba, esaki cu un punto di bista riba termino largo cual ta algo cu su persona tambe ta haci na Hulanda.
“Secretario di Estado Szabó a remarca cu e ta hopi agradecido na Aruba pa e hospitalidad. El a conoce y combersa cu hopi hende amabel y esey a dun’e diferente perspectiva riba varios punto importante. E reunionnan a bay hopi bon. A haci palabracionnan di con den futuro lo bay traha y comunica cu otro, sperando cu lo sigui cu e bon relacion di trabou y e cooperacion entre e dos paisnan”, Prome Minister a indica.
KICO TA PUBLICO.AW?
Gobierno tin e deber di informa Pueblo activamente tocante su maneho. E website di Publico.aw ta un proyecto piloto di Ministerio di Integridad pa percura pa Transparencia Activo den Gobernacion, dunando pueblo informacion gubernamental na un forma accesibel y innovativo.
Actualmente bo por haya hopi informacion di Ministerio di Transporte, Integridad, Naturalesa y Adulto Mayor. Por ehempel, e edificionan cu e ministerio ta uza, cuanto ta paga na huur, gasto di personal di cada departamento, documento di maneho, rapport y mas. Tambe por wak e funcionnan na cada departamento di Gobierno.
Publico.aw ta habri pa tur ministerio, y e team di Publico.aw lo sigui haci esfuerso pa yega na mas informacion, pa sigui structura, amplia y desaroya Publico.aw como e standard nobo den transparencia gubernamental.
Si bo tin sugerencia of comentario, bo por haci uso di e formulario di contacto riba Publico.aw. Asina bo feedback por wordo considera den e desaroyo di e proyecto aki. Hunto nos por haci Publico.aw e sitio principal pa Gobierno di Aruba eherce #TransparenciaActivo.
MINISTER MADURO TA FELICITA SR. RICHENEL
BELLO PA SU 25 ANIVERSARIO DEN SERVICIO DI GOBIERNO DI ARUBA
Diahuebs ultimo Minister Maduro di Finansa y Cultura a ricibi sr. Richenel Bello hunto cu su señora y yiu pa felicit'e pa su 25 aniversario den servicio di Gobierno di Aruba. Richi, manera e ta wordo yama pa su coleganan, ta traha na Departamento di Finansa y pesey pa e ocasion festivo aki tabata presente Director di Departamento di Finansa, sr. Derrick Werleman y Hefe di Presupuesto sra. Jo-Anne Kock.
Minister Maduro a felicita y gradici Richi pa su loyalidad pa traha ya pa 25 aña den Gobierno na bienestar di comunidad. Ultimo añanan Richi ta percura pa e presupuesto di Ministerio di Justicia y Asunto Social cual ta un trabou dificil cu Richi ta domina na manera hopi profesional. Su coleganan a expresa
di ta aprecia masha hopi e manera calmo cu Richi ta atende cu tur reto di trabou y cu Richi semper dispuesto pa yuda pa busca un solucion pa problemanan cu ta presenta.
E mandatario a presenta Richi cu su Decreto Gubernamental, carta di felicitacion y hunto un recuerdo y un regalito chikto pa recorda e aniversario importante aki. Di parti di su coleganan, sr Werleman a presenta Richi cu un plakaat como aprecio pa su 25 aniversario di trabou.
Minister Maduro ta felicita Richi y su famia pa tur esfeurso haci den e ultimo 25 aña y ta spera cu Gobierno por keda conta algun aña mas cu e trabou di Richi na bienestar di Aruba.
MINISTERIO DI SALUD PUBLICO TA ANUNCIA CU TA DEN ULTIMO FASE PA LOGRA IMPORTACION
DI CARNI DI BACA FOR DI COLOMBIA
Minister di Turismo y Salud Publico, sr. Dangui Oduber, tin e placer di anuncia cu ta den e fase final di evaluacion pa por reanuda importacion di carni di baca for di Colombia. Pa por a yega na e fase aki a sigui un proceso amplio y responsabel pa por garantisa e seguridad sanitario di e carni. Actualmente por importa solamente carni for di abattoirnan di Merca of paisnan miembro di Union Europeo, of for di abattoirnan cu ta autorisa pa exporta pa Merca of Union Europeo.
Den cuadro di e evaluacion pa por reanuda importacion di carni di baca for di Colombia, na mei aña pasa representantenan di Ministerio di Turismo y Salud Publico a forma parti di e Mision Comercial cu a bishita Colombia, cual a ser organisa pa Ministerio di Asuntonan Economico, Comunicacion y Desaroyo Sostenibel, conhuntamente cu Camara di Comercio di Aruba, den cooperacion cu Embahada di Reino y Holland House na Bogota.
Durante e Mision Comercial a tene reunionan cu entre otro e instancianan concerni, esta e Instituto Nacional de Vigilancia y Alimentos (INVIMA), y e Instituto Colombiano Agropecuario (ICA). Tambe a haya varios presentacion di representantenan di e sector agropecuario y a bishita entre otro un laboratorio moderno cu ta haci pruebanan pa garantisa seguridad y calidad di carni.
Durante dicho bishita por a constata a prima vista cu Colombia den transcurso di añanan a construi un sistema di supervision di seguridad y calidad di carni pa consumo humano di alto nivel, y a base di esey ta exporta pa como 84 pais rond mundo, incluyendo nos hermana isla Corsou. Tambe a constata cu varios compania cu tin abattoir y ta exporta desde Colombia, ta companian multinacional cu standardnan halto di calidad cu ya ta exporta varios otro producto alimenticio pa Aruba y/of ta exporta carni pa Aruba for di nan plantanan estableci den otro paisnan.
Continuacion MINISTERIO DI SALUD PUBLICO TA ANUNCIA CU TA DEN ULTIMO
Den cuadro di e evaluacion pa por reanuda importacion di carni di baca for di Colombia, recientemente representantenan di Ministerio di Turismo y Salud Publico, y di Departamento Veterinario, a forma parti como observador di un auditoria di e Organisacion Ehecutivo di Asuntonan Veterinario di Corsou, di abatiornan na Colombia. Den cuadro di e auditoria aki e Organisacion a wordo asisti pa un experto di e “Nederlandse Voedsel en Warenautoriteit”. A base di e bishita ey por a confirma hunto cu expertonan for di Reino Hulandes e calidad di e sistema di supervision di Colombia pa cu e seguridad y calidad di carni pa consumo humano. Ademas tin un otro desaroyo relevante: Colombia a avansa medio juli 2024 di “Step 3B” pa “Step 4” di e evaluacion di USDA (cu ta consisti di 6 “Steps”), cual ta demostra cu Colombia ta avansando den su esfuersonan continuo pa den un futuro lo por bay exporta carni pa e mercado Mericano.
Awo Ministerio di Turismo y Salud Publico a yega na e fase final, cual ta stipula e terminonan di exportacion a base di un acuerdo bilateral (“Protocol Sanitario”) den cual ta acorda e exigencianan pa por garantisa e proceso di exportacion conforme standardnan halto di calidad y seguridad. Ministerio di Turismo y Salud Publico ta den e fase final di e proceso aki, y ta den dialogo cu tur e instancianan concerni pa finalisa y logra e cambio aki.
Pues Ministerio di Turismo y Salud Publico, den cooperacion cu Ministerio di Asuntonan Economico, Comunicacion y Desaroyo Sostenibel, y den consulta cu varios instancia Gubernamental den Reino Hulandes y di Colombia, ta sumamente avansa riba tema di importacion di carni di baca for di Colombia, y ta premira cu, despues di como 20 aña, pronto lo por reanuda esaki.
E iniciativa pa importa carni di baca for di Colombia tawata pa largo tempo un e deseo di Minister Dangui Oduber y Gabinete Wever-Croes, pa asina e mercado lo por ofrece carni na un miho prijs na e comunidad di Aruba. Pa medio di e cambio den e maneho di importacion, pues ta bai logra ofrece un opcion mas di unda carni di baca lo por wordo importa, asina creando variedad y yuda na baha e costo di bida pa varios hogar aki na Aruba.
FASE
....
KICO TA FINTECH Y KICO TA E BENEFICIO PA ARUBA?
Manera anuncia algun tempo atras Minister di Economia, Comunicacion y Desaroyo Sostenibel di Aruba Sr. Geoffrey Wever a sera un partership strategico cu e Comision di Economia di United Nations pa Latino America y Caribe (UNECLAC). E colaboracion aki tin como meta pa explora e potencial di sector Fintech y su impacto riba economia di Aruba.
Kico ta e Sector Fintech?
E sector Fintech ta inclui innovacion tecnologico den servicionan financiero. Esaki ta inclui avancenan di online banking, systema nan di haci pago online, di maneha inversion nan y mas. E tecnologia principal den Fintech ta blockchain y cryptocurrency. Blockchain ta un grootboek digital descentralisa cu ta aumenta seguridad y transparensia di transaccion nan, mientras cu cryptocurrency ta e moneda digital cu ta ofrese maneranan nobo pa realisa transaccion nan y invercionan.
afortuna, promocionando inclusividad y iqualdad economico.
Beneficio di Fintech pa Economia di Aruba:
1. Cresemento Economico: Adoptando e innovacionan di Fintech por boost e sector di servicio financiero di Aruba, creanando oportunidad di negocio nobo y atrae invercionan nobo..
2. Mas eficiente: Fintech ta streamline transaccion nan financiero, reduce costonan, y mehora eficiensia entre empresa y consumidor
3. Inclusion financiero: E innovacion di Fintech por ofrece mas accesesibilidad di servicionan finaciero na esnan menos
4. Competitivo Globalmente: Adoptacion di e tecnologia emergente aki lo posiciona Aruba como un economia cu ta pensa pa futuro y atrayendo negoshinan international.
5. Maneja di Risico: Investigation profundo lo yuda Aruba pa indentifica y mitiga risiconan asocial cu tecnologia di Fintech, asegurando un ambiente financiero stabil y sigur.
Minister Geoffrey Wever a enfatisa, “Nos partership ku UNECLAC ta representa un paso crucial den usa e potencial di Fintech pa guia crecemento economico di Aruba. Nos ta compremeti pa uza y beneficia di e tecnologia aki, pa crea un economia mas inclusivo y robusto.”
Minister Geoffrey Wever: MAS APLICANTENAN PA PRESTAMONAN NA
INTERES ABAO VIA AGRI FUND ARUBA
Pa soluciona e necesidad pa acceso na financiamento atractivo pa empresarionan den Agricultura comercial, gobierno hunto cu Qredits a establece un fondo yama Agri Fund. Meta di e Agri Fund ta pa facilita financiamento na un interes atractivo pa (futuro) empresarionan den e sector di agricultura di Aruba. Cu e Agri Fund, Aruba ta pionero den maneho pa stimula na un manera concreto e potencial economico di e sector aki.
E Agri Fund lo ofrece financiamento na un interes reduci di 2% pa sumanan entre Afl. 5.000 y Afl. 200.000. E suma total den e fondo ta 3 miyon florin pa financia e sector di agricultura comercial.
Desde inauguracion di e fondo agricola Agrifund na maart 2024, seis (6) comerciante agricultor a ricibi conhuntamente AFL 935,000 Florin na fiansa, na un interes sumamente abou di 2%. Actualmente tin 8 aplicante den proceso pa un suma di Afl. 821.000. Esaki ta demostra cu e Agrifund ta un oportunidad pa comerciantenan agricultor haya fianza na un interes sumament abao.
E aplicacionan pa prestamonan na un interes sumamente abao den e sector di agricultura comercial e AgriFund como instrumento di maneho ta demostra cu poco fondo financiero por logra concreto na beneficio di Aruba segun minister Geoffrey Wever.
Minister Geoffrey Wever ta gradici Qredits Aruba pa e confianza y bon cooperacion di semper y alabes ta invita tur comerciantenan agricultor pa haci uzo di AgriFund via Qredits Aruba.
REUNION STRUCTURAL CU SINDICATO DI POLIS
DI ARUBA TOCANTE VARIOS TOPICO PA CU
CUERPO POLICIAL DI ARUBA
Diabierna mainta, Minister di Husticia y Asuntonan Social sr. Rocco Tjon, a reuni cu Sindicato di Polis di Aruba (SPA), un reunion sumamente positivo caminda a duna splicacion riba diferente punto, principalmente uniform pa Cuerpo Policial.
Manera ta conoci, tur diabierna Ministerio di Husticia y Asuntonan Social tin e espacio habri, pa reuni cu SPA, pa delibera diferente puntonan. A toca e parti di uniform pa Cuerpo Policial, cual ta un punto di preocupacion pa SPA, di cual a haya un splicacion amplio di e proceso pa loke ta trata e parti aki. Recientemente e pago a wordo haci na e compania di Hulanda cu a gana e destaho, y a conta cu e preferencia di Cuerpo Policial. Pues, si tur cos cana segun planeamento, pa december di e aña aki, e uniformnan aki lo wordo entrega.
Tur e midinan a wordo manda pa e compania, pa asina nan por cuminsa fabrica e uniformnan. Otro topico cu a toca, ta e parti di trafico, e proyecto di “takel en bewaardienst” ta andando, caminda un compania externo ta bay maneha henter e proceso aki pa Cuerpo Policial. Di e forma aki, ora un Agente Policial tuma nota cu un auto no ta cumpli cu e rekisitonan nan por kita e auto aki for di caminda y e ta wordo hiba na e compania aki, cu ta cumpli cu tur e criterianan segun ley. Asina lo bay
garantisa mucho mas siguridad den trafico, e contract ta cla y lo wordo revisa aworaki.
Ademas a papia tocante e mobile dataterminals. Manera ta conoci, Cuerpo Policial a haya vehiculonan completamente nobo, y un di e puntonan cu a percura pa hinca den e destaho ta, pa por bay instala e mobile dataterminals, cual ta computernan cu lo wordo instala den e autonan di Polis, pa asina nan por brinda un miho servicio y alabes ricibi mas informacion pa di e forma ey eleva nan propio siguridad. E proceso aki a cuminsa caba, caminda e oferta pa loke ta trata e proyecto piloto a wordo entrega y dentro di poco lo cuminsa cu e instalacion di e prome vehiculonan cu e mobile dataterminals.
Por ultimo, a papia tocante e proyecto di portofoon, cual ta uno sumamente importante tambe pa Cuerpo Policial y ta forma parti tambe di e Operation Command Center. Tur cos ta canando segun planeamento y e comision cu a cana henter e proceso aki, a haci nan escogencia y pa oktober di e aña aki tur portofoon lo wordo entrega na Cuerpo Policial. Pa prome bes a scoge esaki, caminda cada Agente Policial lo haya su propio portofoon pa asina por garantisa mas integridad pa loke ta trata e aspecto aki pa e Agentenan Policial.
A TRATA DIFERENTE PUNTO IMPORTANTE
DURANTE E REUNION CU DEPARTAMENTO DI ENSEÑANSA
ARUBA
Recientemente, Minister di Enseñansa y Deporte Endy Croes a comparti informacion di e reunion semanal cu directora di Departamento di Enseñansa Aruba Sra. Anne-Marie Proveyer – Groot, directora suplente Sra. Sheila Maduro y Sra. Gina Ras – de Kort, unda a trata diferente punto importante relaciona cu enseñansa di Aruba. Tambe a alinea e maneho di enseñansa den su totalidad den preparacion pa e aña escolar 2024 -2025. Ademas di esaki, a trata diferente proyecto entre otro, e “Honden Project” cu lo wordo lansa den luna di september proximo.
Den transcurso di e simannan nos dilanti lo duna mas informacion di e proyecto aki. Tambe a trata e proyecto di Maneho di Idioma, unda cu e alumnonan di klas 1 di scol basico entrante e aña escolar nobo lo siña lesa y skirbi na Papiamento. Ademas di esaki, a trata diferente peticion cu ta
pega entre otro, Xavier University School of Medicine Aruba, unda a trata e inkietud aki pa trece un solucion. Fuera di esaki, a trata e proyecto di digitalisacion, unda cu na inicio di luna di september proximo DEA tin un reunion cu FUTURA pa trata e parti di digitalisacion y tecnologia pa alinea e vision den totalidad.
Tambe a repasa diferente punto di interes di e Doorlichting Rapport menera, e avancenan di e leynan cu ta den proceso di modernisacion. Sr. Luutsen de Vries ta trahando riba e proyecto di modernisacion di nos leynan di enseñansa, cual ta recomendacion 11 di e Doorlichting Rapport. A repasa e puntonan di interes pa e di dos mita di aña, esta di luna di augustus te cu december 2024 “Sigur por mira atras riba un otro reunion fructifero hunto cu DEA al respecto di e maneho di enseñansa den su totalidad”, Minister Endy Croes a finalisa.
Minister Endy Croes: FUNDACION LOTTO PA DEPORTE TA LOGRANDO PASONAN GRANDI Y
HISTORICO CU TA BENEFICIA
DEPORTE DI ARUBA Y NOS DEPORTISTANAN
Recientemente, Minister di Enseñansa y Deporte Endy Croes a asisti na un reunion di Hunta di Supervision hunto cu e bestuur di Fundacion Lotto pa Deporte. Durante e reunion, e bestuur a confirma cu a finalisa Cuenta Anual (Jaarrekening) 2020, Cuenta Anual 2021 y Cuenta Anual 2022. Nan a splica cu e manera cu nan a ricibi Lotto pa Deporte di e maneho anterior na aña 2021, a costa nan hopi trabou. Mirando cu tabatin dos (2) diferente administracion, tabata dificil pa pone nan hunto pa tin e cuentanan anual na tempo.
Pues, nan ta sumamente contento cu e maniobra cu nan a haci pa haal in e trabounan atrasa. Tambe, nan a haci un promesa cu dentro di dos (2) luna Cuenta Anual (Jaarrekening) 2023 lo ta cla y aproba. Fuera di esaki, nan a garantisa cu desde otro aña den e luna di juni, Cuenta Anual 2024 lo ta cla, cumpliendo cu e Statuut. Nan a splica cu e maneho anterior di Lotto pa Deporte tabatin “credit line” na banco y tabata constantemente den cora. Un total di 1.6 miyon florin den cora, cual tabata costa Lotto 15 mil florin di interes pa luna. Den transcurso di 1 aña y mey, a logra bah’e na 0 bek. Actualmente nan no ta uzando “credit line” y tin un maneho coherente cu ta scapa hopi placa cu por uza pa deporte.
Fuera di esaki, nan a splica loke nan tin reserva pa e proyectonan y pa Stichting Sportsubsidie Aruba (SSA). E aña aki SSA a ricibi pa prome biaha den historia 4.3 miyon florin. Pues ta logrando pasonan grandi y historico. E mandatario di Deporte a expresa cu e ta hopi contento cu e presentacion cu el a ricibi y ta felicita nan pa e fase nobo cu nan ta bayendo aden cu e traspaso di Lotto den su totalidad, di acuerdo e contractnan firma cu CBN. Finalmente, Minister Endy Croes ta felicita Fundacion Lotto pa Deporte pa e gran trabou cu nan ta haciendo.
MINISTER DI ENSEÑANSA Y DEPORTE TA MIRA
ATRAS RIBA UN REUNION FRUCTIFERO CU SVGA
Minister di Enseñansa y Deporte Endy Croes a reuni cu director Sra. Els van Homelen y Sr. Dennis Conradus di Stichting Voor Verstandelijk Gehandicapten Aruba (SVGA). Director di Dienst Uitvoering Onderwijssubsidies (DUOS) Sr. Hervé Ruiz tambe tabata presente den e ocasion aki. Durante e reunion a dialoga tocante algun peticion pendiente di SVGA. A haci un peticion special pa un programa di LVS Doen In, cual ta un programa traha specialmente pa tipo di scolnan aki.
E mandatario di Enseñansa a indica cu e programa aki tin su gastonan cu ne y tabata buscando espacio pa acomoda esaki y a priminti di lo yega na un solucion pa esaki. Ademas di esaki, pa e prowise borden cu SVGA a ricibi den e proyecto di Edutech di Futura, mester un persona interno cu por atende y maneha esaki. SVGA tin e personal adecua y a presenta un solucion budget neutral, pero tin mester un aprobacion pa por logra hasi esaki di tal manera.
Durante e reunion a informa e mandatario di Enseñansa cu AFAS Software Aruba a yuda nan pa traha un tuinhuis, specialmente pa e tipo di scol aki. Final di augustus lo bolbe reuni pa sigui avansa, soluciona y clarifica tur aspecto pa cu aña escolar nobo 2024-2025 por continua sin ningun inkietud. Finalmente, e mandatario di Enseñansa ta informa cu e opendag di SVGA lo tuma luga dia 19 di september 2024 y ta invita Pueblo di Aruba pa pasa bishita e scol.
MINISTER ENDY CROES TA FELICITA SELECCION DI ARUBA CU A TITULA CAMPEON DI CONCACAF GIRLS U15 TOURNAMENT
Diadomingo mainta, tabata reina un ambiente total den Stadion GPT na Dakota, unda cu a tuma luga e partido final di futbol Concacaf Girls U15 Tournament organisa pa Concacaf. Minister Endy Croes acompaña pa su kerida esposa Dilailah Croes - Odor a presencia e suspenso di e wega final entre Seleccion di Aruba y Seleccion di St. Lucia cu a bataya duro pa conkista e titulo maximo di e torneo.
Pa prome bes den historia, Concacaf Girls U15 Tournament a tuma luga na Aruba, unda cu 11 pais a competi. E torneo a inicia dia 1 di augustus y a clausura dia 11 di augustus. Un publico grandi tabata presente pa duna Team Aruba apoyo y sosten. Un tremendo y emocionante partido cu a termina 1-1 den tempo reglamentario. Den extra tempo, Zyana Rogers ta score e gol ganado, unda cu Aruba a gana 2-1 y a titula campeon di Concacaf Girls U15 Tournament na cas. E Most Valuable Player (MVP) di e torneo ta Zyana Rogers.
“Masha pabien na Seleccion di Aruba, coaching staf, fanaticada y e mayornan. Palabra di danki na Arubaanse Voetbal Bond (AVB) pa tuma e curashi pa organisa e campeonato internacional aki y danki na tur cu a aporta pa logra e “milestone” bunita aki den un stadion cu ta den e fase final di renobacion. Deporte ta den desaroyo y Aruba ta avansando den tur sentido”, Minister Endy Croes a expresa. Cu deseo, disciplina, dedicacion y determinacion boso a logra. Aruba ta sumamente orguyoso di boso!
DAO TA CONMEMORA ‘DIA INTERNACIONAL DI
HUBENTUD’ Y TA PRESENTA DATOS MAS RECIEN DI HOBEN ACTIVE RIBA ARUBA SU MERCADO LABORAL
12 di Augustus, Dia Internacional di Hubentud, ta e fecha unda mundialmente ta celebra hende hoben. Den cuadro di Aruba su compromiso haci pa cu e accionan necesario pa logra e Sustainable Development Goals (SDGs), Directie Arbeid en Onderzoek (DAO) ta conmemora ‘Dia Internacional di Hubentud 2024’ y alabes ta comparti algun datos riba e contribucion importante haci pa hobenman na Aruba. E SDGs ta consisti di 17 meta formula cu e proposito pa trece desaroyo balansa na paisnan. DAO ta ilustra cu e siguiente datos e importancia di Goal 8 Decent Work and Economic Growth.
Desde aña 1999, United Nations (UN) a proclama 12 di Augustus como ‘Dia Internacional di Hubentud’. E tema pa aña 2024 ta ‘From Clicks to Progress: Youth Digital Pathways for Sustainable Development’. E tema aki ta enfatisa e hobennan su contribucion crucial haci pa locual ta e conexion clave entre digitalisacion y e aceleracion di e progreso necesario pa logra e metanan sostenibel (e SDGs).
UN ta elabora cu tecnologia manera cellular, plataformanan digital, y innovacion emergente riba tereno di inteligencia artificial, tin un efecto crucial riba e progreso di e SDGs. E data cu ta wordo genera for di interaccion ta fundamental pa locual ta e transformacion digital, y ta permiti tambe pa decisionnan importante wordo tuma abase di evidencia cientifico. UN ta comparti un hecho indicando cu tecnologia digital y data ta contribui por lo menos cu 70% na e 169 SDG targets existi. Esaki ta trece cu ne un impacto profundo (y positivo) pa e dimensionan economico, social y di medio ambiente.
Hobennan ta wordo considera e ‘digital natives’, nan a lanta y crece cu e tecnologianan aki. E habilidad pa adopta y inova tecnologianan nobo ta un talento remarcabel di hobennan. Segun cu e deadline pa locual ta e SDGs ta aserca (aña 2030), UN ta enfatisa cu ta e grupo demografico di hoben cual lo haci uzo di e poder transformativo di tecnologia pa asina atende cu e retonan cu nos mundo moderno ta enfrenta.
Pa locual ta e Goal 8. Decent Work and Economic Growth e cifras mas recien ta ilustra algun desaroyo positivo pa hobennan (esnan 15 pa 24 aña di edad). Segun e Encuesta Forsa Laboral di 2023, e tasa di participacion ta 40.2%, un aumento di 5.2% compara cu e aña anterior. E tasa di inactividad pa 2023 ta 59.8%, un reduccion di 4.7% cual ta indica un crecemento di e cantidad hobennan riba e mercado laboral.
E tasa di desempleo segun e Encuesta Forsa Laboral di 2023 pa hende hoben riba e mercado laboral ta 11.1%. E trahador hoben ta mas vulnerabel turbulencia economico, compara
cu e trahadornan cu mas añas di experiencia y servicio. Un ehempel di e vulnerabilidad aki ta cu den aña 2020 e grupo mas impacta pa desempleo tawata e esnan di 15 pa 24 aña di edad cu a yega un cifra di desempleo di 25.9%.
Tambe e tasa di e hobenan cu no ta den empleo,ni training o educacion, esaki ta e asina jama NEET rate (Not in Employment, Education or Training) aña 2023 a wordo midi na 7.8% Na aña 2019 esaki tawata 10.7% y na aña 2022 esaki tawata 7.4%. E grupo aki ta uno vulnerabel y ta rekeri mas atencion y guia pa locual ta nan desaroyo. Nan contribucion ta esencial pa progreso di e comunidad cu nan ta forma parti di dje.
E siguiente illustracionan ta duna un bista amplio riba e sectornan unda hobennan ta labora y cual funccion nan ta eherce riba e mercado laboral. Por mira den e siguiente ilustracion e sectornan (abase di e categorisacion di International Labor Organization) unda cu esnan 15 pa 24 aña ta mastanto emplea.
Nos sector di hotel y restaurants (accommodation and food services), cu ta e sector mas grandi di empleo na Aruba, ta duna rond 10% di nos hobennan empleo. Den e siguienta illustracion por mira cu un parti grandi (20%) di e hobennan di 15 – 24 aña ta elabora den e grupo di funcion: ‘service and sales workers’.
