IslaOnline 13 Maart 2024

Prome Minister ta atendiendo reunionnan na Nacionnan Uni

"MI COMPROMISO TA PA SIGUI TRAHA NA BIENESTAR DI NOS HENDE MUHENAN"

Riba e di dos dia na Nacionnan Uni, Prome Minister Evelyn Wever-Croes a atende varios reunion, y a papia na diferente conferencia, treciendo punto di bista di Aruba y di Reino padilanti, di kico Gobierno ta haciendo na Aruba y unda e isla mester di mas atencion.

Prome Minister a indica cu na Aruba, compara cu otro paisnan presente na Nacionnan Uni, e posicion di hende muhe ta hopi bon. Gobierno ta consCiente si, cu tin espacio pa mehoracion, y lo traha riba esakinan tambe. Pa por yega na un nivel di igualdad, Gobierno lo traha riba empodera nos mucha muhenan mas, pa asina nan tin mas oportunidad den bida. Tambe lo guia nan y duna nan e informacionnan necesario, cu e meta pa crea interes den nan pa sigui nan educacion den e area di STEM, cu ta e area technico, garantisando asina mas oportunidad laboral den futuro. Gobierno lo traha tambe na empodera e mucha muhenan cu mas oportunidad economico, y traha riba proteccion di e ser femenino contra abuso y violencia.

Durante e reunionnan na Nacionnan Uni, Prome Minister a haya di UN Women, e resultado di e revision cu nan a haci di e sistema na Aruba, y nan a duna e puntonan, na unda nan ta wak cu por bin mehoracion. Prome Minister a indica cu e bon di tur esaki ta, cu UN Women ta dispuesto pa yuda Aruba y a duna fondo pa cu esaki.

"Mi dianan na Nacionnan Uni ta yena di informacionnan valioso, y hopi inspiracion. Cu esaki mi lo bolbe bek Aruba, cu e compromiso, pa sigui traha pa mehora e posicion pa nos mucha muhenan, y hende muhenan na Aruba", Prome Minister a expresa.

Prome Minister Evelyn Wever-Croes: 13 DI MAART TA 4 AÑA PASA CU ARUBA A

WORDO ENFRENTA CU COVID-19

“Awe, como pueblo, nos ta para firme, despues di a pasa den e tormenta aki y a sali victorioso”

Un diabierna 13 di maart 4, aña pasa, Aruba tawata den suspenso y observando e desaroyo di Covid 19 rond mundo. E sentimento di incertidumbre a biba den nos pueblo mientras e virus tawata causando hopi daño y cobrando bida di hopi hende. Ya di hopi tempran, e virus a wordo considera uno devastador y tawata mustra cu no por wordo deteni. Y riba e fecha aki, un diabierna, a marca un momento importante den nos historia, Aruba a wordo confronta cu e prome casonan di Covid-19.

Prome Minister Evelyn Wever-Croes e diabierna ey, mesora a yama un conferencia pa notifica pueblo di Aruba riba e noticia cu, apesar cu Gobierno a bin ta haciend tur esfuerso, tawata inevitabel pa e virus drenta. Aruba, pa casi tres luna despues di e prome noticianan di Covid-19, a haya e prome 2 casonan. E accionnan y medidanan cu Gobierno di Aruba a tuma, bou liderazgo di Prome Minister, tawata crucial pa contene y stop e virus di plama y pa protehe nos pueblo.

Laga nos refleha riba e ultimo 4 añanan desde cu Covid a drenta Aruba, y recorda e resiliencia y union cu nos pueblo a mustra durante e pandemia. Apesar di reto y dolor causa na hopi hogarnan cu perdida di sernan keri, nos a uni y reafirma

nos compromiso pa construi un Aruba mas fuerte y mas resiliente.

“Mi ta gradici cada ciudadano pa e resiliencia y solidaridad demostra pa cada un di boso. For di momento cu e prome casonan di e virus a drenta, nos a demostra cu union ta nos forsa. Hunto nos a enfrenta circumstancianan dificil. Sinembargo, door di determinacion inkebrantabel y un compromiso comun pa otro, nos a sali mas fuerte y mas resiliente cu nunca. Awe, como pueblo, nos ta para firme, despues di a pasa e tormenta Covid y a sali victorioso. E forsa uni, determinacion y perseverancia di nos Gobierno, profesionalnan di cuido, tur frontliners, y comunidad ta loke a yuda pa nos surpasa e retonan di e pandemia.

Awe Aruba ta wak den futuro cu speransa y optimismo. E lesnan cu nos a siña di e pandemia, sin duda a yuda pa construi un nacion mas fuerte y mas prepara. Danki Aruba, danki na cada ciudadano di nos pais pa e determinacion pa saca Aruba for di e pandemia. Hunto nos a logra y hunto nos lo logra tur obstaculo cu presenta”, Prome Minister Evelyn Wever-Croes a enfatisa.

Minister Maduro na ocasion di celebracion di Dia Internacional di Hende Muhe:

INCLUI BO MES SEMPER Y NO LAGA BO

PENSAMENTO LIMITA BO

Diabierna pasa Dia Internacional di Hende Muhe, Minister Maduro di Finansa y Cultura tabata tin e placer pa haci apertura di e conferencia dedica na e hende muhenan di Aruba cu e siguiente discurso.

Bon Bini na e Conferencia di Hende Muhe 2024, awe riba nos dia special, Dia internacional di Hende Muhe.

Un dia importante pa reflexiona, reconoce e balor, celebra e exito y contribucion di e hende muhe na Aruba y rond mundo. Ta un dia pa reflexiona riba e caminda pa yega na mas inclusion, fortificacion y igualdad.

Como hende muhe y mandatario di nos Pais, e ta un honor pa mi ta para dilanti di boso y trata e tema di e aña aki cual ta, "Inspira Inclusion pa Hende Muhe”.

Un tema cu e mensahe poderoso pa nos no basila y bay den accion di biaha pa percura pa inspira tur hende rond di nos pa inclui e hende muhe den tur esfuerso pa logra un miho mundo pa nos tur. E hende muhe tin cualidades importante manera resiliencia, bondad, creatividad, forsa mental, conocemento, hermandad y corahe pa logra metanan proponi. E ta e tarea di un y tur pa percura pa crea un ambiente unda e hende muhe independiente di nan antecedente, identidad of circumstancia, ta sinti'e respeta, balora y empodera den nos comunidad.

NOS MENTE Y PENSAMENTO

Inclusion ta cuminsa cerca nos mes y den nos mente. Nos pensamento y nos accionnan ta locual ta refleha con hopi balor nos ta duna na inclusion di e hende muhe. Pesey ta bon pa prome cu tur cos, nos ta honesto cu nos mes, wak den spiel y puntra nos mes, con inclusivo nos mes ta na e momentonan aki nan.

Mayoria di nos a wordo educa pa pensa na cierto manera como parti di nos cultura. Nos mente ta yena cu prehuicio inconsientemente. Por ehempel, puntra bo mes si bo ta huzga un hende muhe a base di su color di cuero, su preferencia sexual, su forma di peña of su peso. Presta atencion ora bo mira un hende muhe diferente na abo of cu bo a custuma di mira. Kico ta locual ta prome cos cu ta bini na bo mente? Bo ta cera porta pe of bo ta habri porta pa inclui e hende muhe aki? Con consciente bo ta di locual ta pasa den bo mente, e prehuicio pa cu otro?

Ta locual nos ta pensa y kere ta locual ta crea nos realidad y ta determina nos accionnan. Pa e motibo aki, ta bon pa cada un di nos cultiva un mentalidad di abundancia, resiliencia y confiansa den nos mes. Tene na cuenta, e limitacionnan cu nos ta percibi specificamente, ta imponi door di nos mes y ta den nos man pa surpasanan. Ta nos mes mester crea aceptacion pa nos mes pa asina nos por acepta y inclui otro.

CONOCE Y KERE DEN BO MES

Pa bo por inspira otro, ta importante pa bo conoce y kere den bo mes prome. Conoce bo mes di berdad, honra bo forsanan, reconoce bo debilidadnan y cultiva compasion pa cu nos mes. No limita bo mes basa riba expectativanan social. Tribi pa soña y busca pa sa kico ta bo proposito den bida. Conociendo bo mes, bo ta sinti bo mas sigur y esey ta locual lo yuda pa inspira otro pa nan tambe cera conoci y kere den nan mes. Di e manera aki nan no lo sinti diferente y exclui, sino sigur di sa cu nan ta inclui desde e momento cu den nan mente nan dicidi esey.

Ta na momento cu nos conoce nos mes, nos por fomenta activamente inclusion y empodera hende muhenan pa reconoce nan potencial y construi un futuro miho pa nos tur. Un mundo unda e muhenan ta sintinan respeta, balora, scucha y empodera pa progresa.

INCLUSION TA INVERSION

Inclusion ta inversion den bo mes. Educa bo mes. Desaroya bo mes personal y profesionalmente. Busca semper un oportunidad pa crece y sali for di bo zona di confort pa logra bo metanan. Disfruta di bida. Practica un hobby, pasa tempo cu bo sernan keri, trece alegria y satisfaccion den bo bida, aprecia e beyesa rond di bo. Duna bo mes amor y cuido. Den persigui nos meta y aspiracionnan, no lubida e importancia di cuido personal, descanso y recuperacion. Puntra bo mes, "Mi ta tuma e descanso cu mi merece? Mi ta permiti mi mes descansa?" Tene na cuenta, fortificacion di berdad ta bin for di un luga di balansa y consciencia di nos mes. Pa practica inclusion bo mester ta consciente di locual ta sucede den bo.

It’s hard to keep an open mind if you do not have an open heart. Ta dificil pa mantene un mente habri si bo no tin un curason habri.

INCLUI BO MES SEMPER

Inclusion tin di haber cu nos mentalidad.

Inspira inclusion ta un proceso continuo cu ta rekeri esfuerso y compromiso continuo di cada un di nos y tambe di organisacionnan den nos comunidad. Pa nos por extende nos man pa inclui otro, nos mester inclui nos mes prome. Inclusion ta cuminsa cerca cada un di nos. Laga nos keda firme, papia cla y traha e caminda pa un futuro unda cada hende muhe ta sinti su mes fortifica, respeta, balora y inclui. Ta na momento cu nos conoce y inclui nos mes, nos por inspira otro y crea un ambiente di inclusion pa otro. Pesey riba e Dia aki internacional di Hende Muhe, laga nos compromete nos mes pa semper inclui nos mes prome pa asina nos por ta habri pa inclui otro. Den e bida aki, ban inclui y no limita nos mes.

Y pensando riba mi mes, laga mi caba e discurso aki ta inclui mi mes ta canta, aunke mi mes no ta un cantante. Y ya cu Barbie ta na moda y den mi cabes mi mes ta un Barbie, laga mi no limita mi mes y canta.

Mami sweet su barbie bon lanta

Mi coloña ta parce Miss Dior, Mi sa ki e conan ta Nan ta yama mi Xiomara, Mi so, mi’n falta nada… Nada….

Mi mes ta nabega….

Pabien na tur hende muhe, e ser balente cu nos nos bon Dios a crea. Y na hende homber danki pa boso sosten di semper. Nos ta stima boso.

Minister Maduro di Finansa ta informa:

FITCH TA 'UPGRADE' ARUBA CU UN 'POSITIVE OUTLOOK' DEN NAN EVALUACION ECONOMICO Y FINANCIERO

Ta reconoce e trabou serio pa recobra e credibilidad financiero di nos Pais

Diaranson Minister Maduro di Finansa a ricibi e grato noticia cu e compania di rating Fitch Ratings ta revisa nan mira riba Aruba, di stabiel pa positivo. Esaki ta un 'upgrade' cu ta refleha e bon direccion di Aruba su economia y finansa publico.

Na februari Fitch Ratings tabata na Aruba pa asina por haci un evaluacion economico y financiero di nos Pais. Nan a reuni cu varios persona y instancia pa asina por formula nan opinion cu ta keda refleha den e rapport cu a keda publica diaranson 13 di maart 2024 cu ta disponibek via https://www.fitchratings.com/ research/sovereigns/fitch-revises-aruba-outlook-to-positiveaffirms-at-bb-13-03-2024.

Den su rapport Fitch Ratings ta duna reconocemento na e trabou serio cu ta wordo haci pa Aruba por recobra e credibilidad financiero cu a keda afecta den e añanan di e pandemia. Fitch ta duna Aruba credito pa e desicionnan fiscal cu a wordo tuma pa stabilisa Aruba su finansa publico. Fitch ta positivo tambe riba e manera cu Aruba a bin ta maneha e debe y e disciplina financiero hiba pa por baha debe di Aruba. Ta pasonan

importante cu ta hiba Aruba mas cerca di e 'investment rating' cu nos Pais tabata goza di dje cerca Fitch net prome cu e pandemia.

Minister Maduro ta gradici tur persona y instancia cu a reuni cu Fitch, specialmente e ekipo di Departamento di Finansa cu a haci un trabou grandi pa percura pa e trabounan haci por a keda splica y prueba na Fitch Ratings. Masha danki y pabien na Pueblo di Aruba cu e logro bunita aki na bienestar di Aruba.

MINISTERNAN ENDY CROES Y GEOFFREY WEVER

A FIRMA MOU CU STENDEN UNIVERSITY

Dialuna 11 di maart 2024 tabata tin un encuentro entre representantenan di Stenden University hunto cu minister Endy Croes y Minister Geoffrey Wever.

E Ministerio di Asuntonan Economico y e Ministerio di Educacion a uni forsa cu e universidad pa lansa un programa di intercambio di studiante universitario for di Hulanda. E Memorandum di Entendemento (MoU), ta traha e caminda pa studiantenan di Stenden University bin biba y studia na Aruba.

"Nos ta buscando pa duna mas bida na nos centro di ciudad, y cu un intercambio di studiantenan manera esun aki, nos centro ta bira un luga unda educacion y diferente cultura ta encontra y convivi," Minister Geoffrey Wever a menciona, sperando cu esaki lo yuda mas aun trece mas movecion y energia den curason di Oranjestad.

Gobierno di Aruba recientemente a inicia e proceso pa transforma e ex-edificio di Ministerio Publico (OM) den Oranjestad den un compleho di apartamento pa studiante, como parti di diferente iniciativanan di Minister Wever pa revitalisa e centro di Oranjestad. Parti di e vision di Minister Geoffrey Wever ta pa mas hende cuminsa biba den centro di Oranjestad y pa edificionan bandona wordo renoba, especialmente cu destino pa studiante. "Nos kier trece mas hende biba den centro, e MoU ta a reitera e vision aki".

Minister Geoffrey Wever: TRABOUNAN DI RESTORACION DI CAS VENERANDA DEN CENTRO DI ORANJESTAD A START

“Cas Veneranda ta un di e edificionan mas iconico di Aruba y semper a duel mi cu e tabata den deterioro. Ora mi a bira Minister di Economia e restoracion di Cas Veneranda tabata un di nos prome proyectonan. Mi vision 'from day one' tabata pa crea e sinergia necesario pa subi cantidad di persona cu ta frecuenta den Oranjestad, y cu esaki, e restauracion di Cas Veneranda tabata un di e puntonan focal. Sinembargo, pa realisa esaki no tabata facil.”

Ministerio di Economia a asigna fondo for di su mesun presupuesto pa inverti den e proyecto aki, y lo logra reubica e Departamento di Asunto Economico pa Cas Veneranda. E paso aki a haci e restauracion posibel. "Mi ta hopi contento cu despues di henter e esfuerso di e ultimo dos añanan awe nos por bisa cu e restauracion di Cas Veneranda ta cuminsa," segun Minister Geoffrey Wever. E renovacion ta refleha e dedicacion di e Ministerio di Economia, Comunicacion y Desaroyo Sostenibel pa inverti den centro di Oranjestad.

Renobacion di Cas Veneranda lo brinda no solamente espacio nobo pa oficina pero tambe lo ta ekipa cu panelnan solar pa reduci e gastonan mensual di coriente, aire condiciona eficiente y insulacion— tur esakinan necesario pa transforma e edificio den uno mas sostenibel y “environmentally friendly” posibel. Adicionalmente, lo tin un espacio pa huur pa un restaurant, y tambe lo tin area pa reunion y conferencia.

Durante ultimo lunanan, trabounan preparativo a ser ehecuta den preparacion pa e restauracion, poniendo gran enfasis riba conservacion di e integridad structural y e balor historico di e edificio.

Minister Wever ta subraya cu e reubicacion di e departamentonan di gobierno pa e centro di Oranjestad ta un di e strategianan pa yuda atrae mas bishitante durante oranan di oficina, y di e manera aki, ta beneficia e establicimentonan comercial den e bisindario tambe. Durante su discertacion, Minister di Asunto Economico, Comunicacion y Desaroyo Sostenibel, Sr. Geoffrey Wever, a enfatisa cu e proyecto aki ta un paso importante den e plan di revitalisacion di Oranjestad.

CUERPO POLICIAL DI ARUBA A RICIBI NAN

VEHICULONAN NOBO

Diamars merdia, conhuntamente cu Cuerpo Policial di Aruba, Minister di Husticia y Asuntonan Social sr. Rocco Tjon a haci entrega di e vehiculonan nobo pa Cuerpo Policial. Un pabien na henter e ekipo di Cuerpo Policial, Yrausquin & Sons y Ministerio di Husticia y Asuntonan Social cu a lidera e proyecto aki.

Cuerpo Policial t'ey pa garantisa siguridad. Recien ainda, un investigacion a mustra con criminalidad a baha y cu Aruba ta e pais mas 'safe' den nos region.

Pa logra esaki Ministerio di Husticia y Asuntonan Social ta inverti den tres pilar. Na prome luga, ta percura pa e organisacion ta uno dinamico pa por combati criminalidad, p'esey tin un reorganisacion andando. Na di dos luga ta crea condicionnan

di trabou adecuado, p'esey diferente renobacion a tuma luga y edificionan nobo a wordo adkiri pa Cuerpo Policial.

Por ultimo, e di tres pilar cu ta inverti den dje ta percura pa cumpra materialnan pa e Agentenan Policial por eherce nan trabou. Asina a inverti den proyecto di camara, radar, portofoons, ICT, bulletproofvests y computers.

Awe nan ta haya nan fleta nobo pa por brinda un bon servicio na nos comunidad pero na mes momento garantisa nan propio siguridad mucho mas miho.

Danki na tur e Agentenan cu a participa den e rondanan di consulta, danki pa boso aporte y feedback pa cu e escogencia di e vehiculonan aki.

PA PROME BIAHA ARUBA TABATA E

ANFITRION DI ASAMBLEA DI CONFEDERACION CENTROAMERICANO Y DI CARIBE DI FIBA

Diadomingo ultimo, Minister di Enseñansa y Deporte Endy Croes a acudi na Asamblea di Confederacion Centroamericano y di Caribe di Fédération Internationale de Basketball (FIBA) cu a tuma luga na Hyatt Place Aruba Airport. Pa prome biaha Aruba tabata e anfitrion di un asamblea di e magnitud aki, unda 21 pais a participa. Varios presidente y secretario general di region tabata presente den e ocasion aki.

Minister Endy Croes y secretaria general di Comite Olimpico Arubano Sra. Nicole Hoevertz a duna un discurso na e apertura. Durante e evento aki a duna Sr. Yamil Bukele bonbini, kende ta ruman homber di presidente di El Salvador. Ademas, Sr. Yamil Bukele ta Minister di Deporte na El Salvador y ta forma parti di e organisacion di FIBA. Pa finalisa, Minister Endy Croes a gradici Aruba Basketball Bond cu a organisa e tremendo asamblea aki cu sosten di Lotto pa Deporte, SSA y Gobierno di Aruba y a desea tur participante hopi exito.

MINISTER ENDY CROES A ATENDE E CONFERENCIA DI HENDE MUHE 2024

Dia 8 di maart ultimo en conexion cu Dia Internacional di Hende Muhe, Minister Endy Croes acompaña pa su kerida esposa Dilailah Croes - Odor a atende e conferencia dedica na e ser femenino. Despues di 4 aña Gobierno di Aruba a organisa e conferencia cu e aña aki a hiba e tema “Inspira Inclusion di Hende Muhe”. Un mainta educativo cu a conta cu alrededor di 850 participante y diferente orado. Durante e encuentro aki diferente lider femenino a hiba palabra y a comparti informacion valioso relata na inclusion di hende muhe den nos sociedad. Minister Xiomara Maduro, Minister President Evelyn Wever –Croes a hiba discurso elocuente pa inspira e hende muhenan.

Tambe, tabatin video di hopi emotivo di Parlamentario Setty Christiaans – Yargazaray, unda cu el a comparti su motibonan pa drenta politica, el a conta di su lucha cu e malesa autoinmunologico y su determinacion pa surpasa e retonan di e malesa. Sigur un di e “highlight” di e mainta tabata e momento cu Jeon subi escenario y dedica e cancion Miss Dior como un serenata pa e damanan. Un programa amplio for di cuminsamento te final cu canto, discurso, panel, pero tambe a inclui presentacion y video hopi informativo, emocional y impactante. E mainta a clausura cu presentacion espectacular di e percusionista Sra. Jennifer van der Biezen, kende a pone un tremendo ambiente riba e scenario, esnan presente por a balia riba e tono di su musica. Pa finalisa, Minister Endy Croes ta felicita Minister President Evelyn Wever – Croes y e comision organisando pa organisa un exitoso conferencia.

MINISTER ENDY CROES A BISHITA FATIMA COLLEGE NA DAKOTA

En conexion cu nos Dia Nacional 18 di maart 2024

Minister Endy Croes a continua cu su bishita escolar en conexion cu nos celebracion di Himno y Bandera. Diaranson mainta, Minister Endy Croes a bishita scol basico Fatima College na Dakota. Na yegada e mandatario di Enseñansa y Deporte a ricibi un caluroso bonbini pa cabesante suplente di e scol Sra. Swinda Roga, staf, alumno – y maestronan. E alumnonan a haya e oportunidad pa saluda e mandatario y canta nan himno di scol.

Despues di esaki, Minister Endy Croes a bishita klas 3 y 6 unda cu el a duna un charla y a comparti un rato ameno cu e alumnonan. Minister Endy Croes a enfatisa riba e importancia di e celebracion di nos Himno y Bandera. Nos simbolonan cu ta yena nos cu orguyo. Minister Endy Croes a keda sorprendi cu varios pregunta cu el a ricibi y cu amor el a contesta tur e

preguntanan. Tambe, Minister Endy Croes por a aprecia loke e alumnonan di klas 6 a traha en conexion cu Dia di Himno y Bandera. Ademas di esaki, e mandatario a informa e alumnonan di diferente actividad cu ta tuma luga dia 18 di maart.

Sra. Merveline de Cuba, kende ta maestra di Fatima College a expresa di ta contento cu e bishita di Minister Endy Croes na nan scol. Sra. de Cuba a enfatisa cu e dia a bay hopi bunita, e alumnonan tabata hopi curioso y a haci e mandatario hopi pregunta relaciona cu nos Himno y Bandera pa asina nan conoce un poco mas di nos historia. Pa conlcui, Minister Endy Croes ta gradici cabesante suplente Sra. Roga, alumno- y maestronan pa e bunita recepcion. Alabes ta desea nan un feliz Dia di Himno y Bandera.