IslaOnline 15 Mei 2023

Gradicimento na tur cu a haci e prome Caribbean Climate Energy Conference 2023 posibel

PROME MINISTER TA GRADICI MINISTER ROB

JETTEN COMO CO-HOST DI E PROME CARIBBEAN CLIMATE ENERGY CONFRENCE

Siman pasa, dianan 10-12 di Mei 2023 tawata un siman hopi importante pa e maneho y desicionnan cu lo tuma pa loke ta trata Transicion di Energia, Adaptacion di Clima y e Financiamento pa esaki. E prome Caribbean Climate Energy Conference 2023 (CCEC2023) na Aruba tawata un exito na unda cu por bisa palabracionnan concreto a wordo haci entre e diferente delegacionnan di Aruba y Internacional cu tawata presente. Energia lo bira un pilar economico importante y tin hopi oportunidad pa Aruba mes, pero tambe oportunidadnan como pais hunto den Reino.

Durante e conferencia, un MoU a wordo firma entre Hulanda, Aruba y Sint Maarten cu ta un paso importante cu ta enfoca riba diferente tecnologia di energia renobabel. E deseo y determinacion pa bin cu cambio berdadero ta rekeri esfuersonan mutuo y hunto so lo logra e meta proponi.

Den nomber di Gobierno di Aruba, Prome Minister Evelyn Wever-Croes ta gradici e organisadornan cu a haci e conferencia aki posibel y exitoso, un danki na cada orador.

Danki na cada delegacion di Aruba y demas paisnan den Reino y tur otro participante internacional. Hulanda y Aruba,

a traves di e conferencia aki kier a promove colaboracion riba accionnan di clima entre islanan chikito na nivel global. Y na final di e conferencia e compromiso di tur a keda cu nan lo traha hunto pa e meta cu cada un tin den comun.

Danki na e Gobierno di Hulanda pa tur e cooperacion pa cu e organisacion di e conferencia aki. Danki special na Minister di Energia y Clima di Hulanda, señor Rob Jetten cu tabata e "cohost" di e conferencia. Su enthusiasmo y boluntad pa apoya e islanan chikito ta bay mas leu cu su mesun pais cu awo ta haci un influencia den region di Caribe y America Central. Danki na Vice Premier di Aruba, Ursell Arends, Minister Glenbert Croes, Gobierno di Aruba y instituto y organisacionnan concerni di Aruba, kendenan ta trahando duro y cu determinacion pa bin cu solucionnan pa nos pais y ta comprometi na e movimiento contra Cambio di Clima Global.

“Esaki ta solemente e prome Caribbean Climate Energy Conference. E siguiente CCEC lo wordo anunicia pronto y mi ta spera di mira progreso real riba tur loke a wordo discuti durante e prome CCEC aki,” Prome Minister a expresa.

Gobierno di Aruba:

TRABOU PA REFORSA APARATO

GUBERNAMENTAL DI PAIS ARUBA TA SIGUI

Den cuadro di e ‘Landspakket’ y trabou pa reforsa aparato gubernamental di Pais Aruba, a inicia na december 2022 un destaho publico pa haya diferente proposicion di companianan cu lo por asisti Pais Aruba den e trayecto aki. E destaho publico a tuma luga conforme legislacion Europeo. Como resultado di esaki, e siman di 8 di mey a inicia e asina yama 'toelichtingsgesprekken' unda cu companianan cu a participa na e destaho tabata presente na Aruba pa contesta pregunta y specifica e proposicionnan cu a trece dilanti. E proceso di 'toelichtingsgesprekken’ a tuma luga den un colaboracion entre Hulanda y Aruba y a wordo guia door di ‘Uitvoeringsorganisatie Bedrijfsvoering Rijk’.

Por bisa cu e reunion a bay den bon forma y actualmente e processo pa sigui e trayecto aki ta andando.

Tambe por indica cu e trayecto di destaho publico ta crea e oportunidad pa intercambia experticio, e ekipo di pais Aruba

ta haya mas conocemento riba e tema di destaho y maneho di contractnan y e ekipo Hulandes ta haya mas conocemento di ehecucion den contexto local.

Den transcurso di tempo Pais Aruba lo duna mas informacion di e destaho aki cu tin como meta reforsa e aparato gubernamental di Pais Aruba y ekip’e cu instrumentonan pa por sigui brinda servicio na comunidad.

MINISTER MADURO DI FINANSA TA

PREPARANDO PA PRESENTA NOTA DI COMIENSO DI AÑA 2023 Y PRESUPUESTO

2024, Y TA PREPARA PA EVALUACION DI ARUBA DOOR DI IMF

Trabounan pa mehora Aruba su finansa publico

Den e dianan aki Minister di Finansa ta prepara pa asina por brinda informacion riba finansa publico di Aruba. Recientemente e mandatario a reuni cu Banco Central, Departamento di Finansa y Departamento di Impuesto pa asina repasa y alinea algun informacion riba finansa publico di nos Pais. Denter di poco Minister Maduro lo ta presentando e prome Nota di Comienso di Aña na Parlamento di Aruba pa asina na un manera hopi tempran den aña caba Parlamento wordo poni na altura di e cambionan cu por tin den maneho hiba pa Gobierno cu por resulta den un cambio den Presupuesto 2023.

Trabounan ta wordo haci tambe pa por hinca Presupuesto 2024 den otro y presenta esaki na ora prome cu dia 1 di september 2023. Fuera di esaki ta importante pa Minister di Finansa por a reuni cu e instancianan concerni pa por prepara debidamente pa e 'on-site visit' di IMF pa su 'Article IV evaluation of Aruba' cu ta tuma luga den luna di mei. Tur e trabounan aki ta exigi un bon coordinacion entre Minister di Finansa, Banco Central y Departamentonan di Finansa y Impuesto. Den e dianan nos dilanti Minister Maduro lo brinda mas informacion riba e trabounan haci pa por mehora e finansa publico di Aruba.

E ESTUDIO DI “DOKTERASSISTENT” MBO UN

BIAHA MAS TA DISPONIBEL NA ARUBA

Den cuadro di mehoracion den cuido Minister di Turismo y Salud Publico sr. Dangui Oduber ta anuncia cu a percura un biaha mas pa Aruba tin su propio estudio di “Doktersassistent”. Maneho di Minister Oduber ta dirgi riba mehora e calidad di cuido y servicio, haci inversionan den cuido y percura pa nos reenforsa e prome linea di cuido.

Recientemente a bira posibel atrobe pa e assistent di dokter por haya nan MBO diploma den “Doktersassistent” aki na Aruba mes. Minister Oduber a duna di conoce cu esaki ta un iniciativa di HAVA cu ya pa algun tempo caba nan tabata purba pa cuminsa cune pero door di e landspakket y e cortamento di 60 miyon florin pa aña den cuido esaki no tabata posibel. Esaki a bira posibel awor danki na e palabracionnan cu Minister Oduber a haci na aña 2022 cu e “Tijdelijke Werkorganisatie” (TWO) durante e tratamento di e “Landspakket”. A mustra TWO riba locual ta e “roadmap” y a pone e estudio aki como un prioridad. Esaki a conduci cu awe AZV a reserva e fondo pa asina aporta na e proyecto importante aki, caminda ta crea e posibilidad pa profesionalisa aun mas e rol di assistent di dokter.

ROC Mondriaan College Den Haag cu e proposito pa por logra ofrece e estudio di “Doktersassistent” aki na Aruba. E estudio di MBO aki lo tin un duracion di 2 aña y e programa lo wordo coordina pa Colegio EPI mes y lo duna les conhuntamente cu e dokternan di cas, specialistanan y otro profesionalnan den cuido. Actualmente tin un grupo di 18 assistent cu ta atendiendo e estudio aki.

Como parti di e ekipo di un consultorio, e assistent tin un rol clave den con e consultorio ta funciona. Nos assistentnan ta competente y capacita pa determina e urgencia door di haci pregunta na e pashent segun e sistema di triage. Tambe nan mes por haci cierto trabou nan, manera paptest, inyeccion, cuido di heridanan pa menciona algun.

Minister Dangui Oduber semper a sostene iniciativanan cu ta aporta na mehoracion di e calidad di cuido y servicio aki na Aruba y un biaha mas esaki a keda demostra. Minister Oduber kier a gradici AZV pa e parti financiero y HAVA pa bin cu e iniciativa, tambe un danki na Colegio EPI y tur e profesionalnan cu a aporta na e proyecto aki. Finalmente Minister Oduber kier a desea e grupo di 18 assistent tur clase di exito den nan estudio.

PROSPERIDAD DI SAN NICOLAS MAN DEN

MAN CU SU CONEXION CU LAMA CARIBE

Den un presentacion na Minister di Asunto Economico, Geoffrey Wever, arkitecto Raffy Kock a presenta e prome imagennan di un plan ambicioso di infrastructura pa e area cu ta conecta maintstreet pariba y pabou na San Nicolas.

“Estudionan a desmostra cu ciudadnan cu ta conecta na lama tin beneficionan economico y turistico”, segun e mandatario. Socialmente, e ta haci e area uno mas agradabel pa biba y tambe recrea. Despues di a papia cu stakeholders y expertonan, por conclui cu prosperidad di e ciudad di San Nicolas ta conecta na su conexion cu lama Caribe. Esaki ta netamente loke e centro di San Nicolas ta falta di dje. Conectando centro di San Nicolas cu e lama Caribe lo tin un impacto positivo riba e area, y lo nifica un shift tecnonico di posibilidadnan social-economico pa e area, atraendo mas interes pa inversion.

Despues cu a ricibi input di e diferente stakeholders, arkitecto ir. Raffy Kock a crea e prome diseñonan pa centro di San Nicolas. E accento ta pa sigura cu San Nicolas ta keda cu su elemento y influencianan cual ta haci’e unico. E sentido cultural autentico, cu influencianan Caribense introduci mas di un siglo atras door di migrantenan lo por y mester florece.

Tin plania pa inclui areanan di recreacion pa famia. Pa hobennan cu ta gusta practica deporte den aire liber, adultonan cu ta reuni cu otro pa comparti momentonan agradabel, tur ta elementonan esencial den e Fase 1 di Revitalisacion di San Nicolas, cual ta forma parti di e diseñonan presenta pa e arkitecto.

“Pa bin cu un modelo economico nobo pa Centro di San Nicolas no ta uno facil, pero sigur ta un prioridad y tin nos atencion completo”, segun minister Wever. “Importancia di busca un modelo economico nobo pa cual revitalisacion mester resulta den inversion pa San Nicolas ta e punto di salida principal.” Den e diseñonan presenta a percura pa crea un area cu tur e elementonan necesario pa localnan por biba y recrea den un ambiente safe, bunita, y cu ta brinda acceso na tur e facilidanan di e area.

Ta ideanan cu minister Geoffrey Wever, conhuntamente cu stakeholders y expertonan ta explorando pa asina yega na un modelo cu tin mas beneficio social-economico posibel pa San Nicolas. “Aki ta papia di desaroyo sostenibel cu ta tene na cuenta e medio ambiente y tambe beneficionan economico cu por ta duradero pa futuro generacionnan”, Minister Geoffrey Wever a conclui.

Minister Geoffrey Wever: PRESENTACION DI RESULTADO DI ESTUDIO

RIBA E IMPACTO ECONOMICO DI VACATION HOME RENTALS NA ARUBA

Den luna di februari 2023, Economisch Bureau Amsterdam a cuminsa cu un estudio, financia pa minister Geoffrey Wever, riba e impacto economico di “AirBnB” na Aruba. Door di falta di informacion y maneho riba “vacation rental” priva, Minister Geoffrey Wever algun luna pasa a haya aprobacion di Conseho di Minister pa asina cuminsa e estudio aki. E promer fase a keda cla y recientemente e mandatario a ricibi for di Economisch Bureau Amsterdam e resultado di e estudio aki.

E necesidad pa e estudio aki ta basa riba e hecho cu cada cas cu wordo ofreci como “vacation rental” ta nifica cu tin menos cas pa nos propio localnan. E cantidad di casnan pa localnan ta baha door cu personanan cu no ta biba na Aruba ta cumpra casnan den zona residencial cu e meta di hasi esaki un “AirBnB”. Cu menos cas obtenibel door di e desaroyo aki pero cu un demanda grandi pa cas, e prijs pa cas ta sigui subi y bira impagabel pa nos mesun hendenan. Tambe cada cas cu wordo ofreci como “vacation rental” ta nifica cu eherce un actividad economico of negoshi, pa cual mester cumpli cu tur rekisitonan legal. Falta di cumpli cu ley ta crea competencia inhusto cu un impacto negativo riba nos economia.

“Ta nos deber como gobierno pa percura cu tin un balans husto”, segun Minister Wever. Maneho economico y desaroyo sostenibel di minister Geoffrey Wever ta basa riba stimula comercio, stimula competencia husto y stimula participacion di tur ciudadano den desaroyo di Aruba, den cual cada persona por participa y logra su metanan. Cada negoshi mester por florece pero semper cumpliendo cu tur rekisitonan. Cada local mester por logra yega na su propio cas.

Awor cu e estudio riba e impacto economico di “AirBnB” na Aruba a wordo finalisa, ta necesario den cuadro di transparencia, presenta e resultado di e estudio aki na tur stakeholders. Lo duna stakeholders e oportunidad pa duna nan reaccion por escrito pa asina por tuma esaki den consideracion ora cu e beleid wordo traha. “Nos kier ta sigur cu ora e beleid ta cla, tur stakeholders a haya oportunidad pa duna nan input y cu e beleid

ta uno cu lo haya acceptacion y lo ta uno husto y inclusivo”, segun Minister Wever.

P'esey Minister Geoffrey Wever ta invita miembronan di prensa y interesadonan pa asisti na e presentacion di e resultado di e estudio pa midi e impacto economico di Vacation Home Rentals na Aruba. Economisch Bureau Amsterdam, despues di a finalisa y entrega e rapport final, lo duna un presentacion virtual di e resultado na stakeholders, prensa y publico.

E presentacion di e resultado di e estudio lo tuma lugar riba 22 di mei 2023 di 11:00 AM pa 01:00 PM den Aula di Universidad di Aruba.

HUNTO CU COLEGA MINISTER ROCCO TJON LO INSTALA CAMARA DI SIGURIDAD NA

E.P.B. Y S.P.O.

Minister di Enseñansa y Deporte Endy Croes hunto cu colega Minister di Husticia y Asuntonan Social Rocco Tjon ta trahando den colaboracion pa atende cu problema di siguridad na e scolnan E.P.B. Oranjestad, E.P.B. San Nicolas, S.P.O. Santa Cruz y S.P.O. Brazil. Hunto a evalua con por tin un miho maneho riba e hobennan cu tin problema di comportacion y ta causa problema na scol. Tin un plataforma mas grandi cu ta trahando caba via Veiligheidshuis pa tin un solucion mas structural pa e alumnonan aki. Banda di esaki, Minister Endy Croes hunto cu Minister Rocco Tjon a traha un plan integral pa atende cu e asunto aki di inmediato.

A desemboca un team cu ta atende cu e camaranan di siguridad pa haci un evaluacion na E.P.B. Oranjestad, E.P.B. San Nicolas, S.P.O. Santa Cruz y S.P.O. Brazil, unda e cuater

(4) scolnan aki lo ta conecta riba un sistema di camara cu ta bou di vigilancia di Cuerpo Policial. Pues, ta bay tin un control severo na e scolnan aki, pa minimalisa violencia na scol.

Tambe, Departamento di Asunto Social lo atende cu famia di e alumnonan cu ta causa problema na scol, pa asina trece trankilidad y mitiga violencia na scol. Pa finalisa, e proyecto ta den proceso y ta planifica pa dentro di dos (2) luna instala camara di siguridad na e scolnan aki.

DIA 4 DIA MEI, A CONMEMORA ESNAN CU A PERDE NAN BIDA DURANTE SEGUNDA GUERA MUNDIAL

Dia 4 di mei 2023, Minister Endy Croes a atende e ceremonia conmemorativo, Dodenherdenking. Tambe presente na e ocasion aki tabata Su Excelencia Gobernador di Aruba

Alfonso Boekhoudt, Prome Minister Evelyn Wever-Croes, Minister Endy Croes, Minister Ursell Arends, Minister Rocco Tjon y Presidente di Parlamento Edgard Vrolijk. Anualmente e paisnan di Reino Hulandes ta considera dos (2) minuut di silencio pa conmemora esnan cu a fayece durante segunda guera mundial.

E ceremonia a tuma luga na e herdenking plaat na Adriaan Lacle Blvd, unda Prome Minister Evelyn Wever-Croes hunto cu Minister Endy Croes, Minister Ursell Arends y Minister Rocco Tjon a coloca un krans na honor di esnan cu sacrifica y perde nan bida pa nos durante segunda guera mundial. A pasa 78 aña cu segunda guera mundial a termina y semper nos lo keda recorda e sacrificio di esnan cu buscando paz a perde nan bida pa nos.

MINISTER ENDY CROES TA FELICITA TUR E COREDONAN CU PARTICIPA DEN E 31 EDICION DI RONDE VAN ARUBA

Diabierna ultimo, tabatin e di 31 edicion di Ronde Van Aruba. Un magno evento deportivo cu rond di 700 coredo cu a participa y un total di 206 ekipo di entre otro, single, duo y estafette. Minister di Deporte Endy Croes a duna un discurso, deseando tur e participantenan exito. Pa exactamente 8 or di anochi, mandatario di Deporte a tira e “cannonshot” na Marinierskazerne pa duna inicio na e recorido di 72 km rond di Aruba.

Tabatin hopi ambiente banda di caminda, unda cu famia, colega y amistadnan di e coredonan a bay duna sosten y apoyo. Minister Endy Croes ta felicita Sr, Johan de Rover y su team di Marinierskazerne cu a organisa e gran evento deportivo aki. Tambe, na Cuerpo Policia, Cruz Cora y tur cu a contribui pa haci e careda aki exitoso. Ademas di esaki, e mandatario di Deporte ta aplaudi tur esnan cu a participa den Ronde van Aruba 2023. Masha pabien na tur e ganadonan! Cu disciplina, deseo, dedicion y determinacion ta logra.

MINISTER ENDY CROES TA ATENDE SISSTEM SYMPOSIUM NA UNIVERSIDAD DI ARUBA

Diaranson ultimo, Minister Endy Croes hunto cu Minister Geoffrey Wever a atende SISSTEM Symposium na Universidad di Aruba.

Minister Endy Croes a duna un discurso, expresando su alegria pa celebra otro logro, resultado di un bunita colaboracion cu a inicia algun aña atras entre Union Europeo, Universidad di Aruba y Universidad di Leuven, cu a establece “Faculty for Sustainable Island Solutions through Science, Technology, Engineering and Mathematics”.

Minister Endy Croes a expresa cu ta yen’e di alegria di mira con leu e colaboracion aki a hiba nos den un tempo corto y ta orguyoso di Universidad di Aruba cu a percura pa promociona practica sostenibel y consciencia ambiental na Aruba. Un tremendo simposio, unda a reuni investigado di diferente universidad hunto, buscando solucion pa islanan chikito den Caribe. Minister Endy Croes ta desea tur participante hopi exito y cu ohala cu por extrae un bon resultado di e simposio pa bienestar di Aruba y e otro islanan den Caribe.

CCEC 2023 TA LOGRA 100 MIYON EURO PA

ARUBA, CORSOU Y SINT MAARTEN PA TRECE TUR PAIS HUNTO RIBA UN SOLO DIRECCION

Aruba siman pasa tabata anfitrion di e prome Caribbean Climate & Energy Conference. Un iniciativa di nos Minister President cual mesora a wordo aproba y apoya pa Minister di Clima & Energia di Reino, Sr. Rob Jetten.

Un conferencia cu a dura 3 dia largo cu participacion di tur pais den Reino como tambe Mexico, Spaña, Marshall Islands, Barbados, Belize, Merca, Belgica, Surnam, St. Lucia, Merca, Grenada, Panama y instancianan internacional manera IMF, UN y Caribbean Development Bank.

Durante e prome dia di Reunion a toca temanan cu ta di importancia pa y den Reino Hulandes. Ambos CAS y Islanan BES a comparti nan preocupacion riba e consecuencia cu cambio climatico por tin pa nos respectivo islanan. Na mes momento a enfatisa riba e importancia di tuma decisionnan crucial awo, pa e cambio energetico sostenibel y limpi, pa futuro generacionnan.

Aki ta unda Minister Rob Jetten, reconociendo e retonan cu e islanan tin riba nivel financiero pa por carga inversionnan di e magnitud aki, a compromete di lo yuda nos islanan cu 100 miyon Euro pa sigura cu Reino completo ta riba e mesun caminda energetico pa combati cambio climatico y tambe apoya e transicion energetico manera e.o. Aruba Hydrogen Valley.

E prome CCEC tabata organisa na nivel di Gobierno, pa hunto como Reino yega na un roadmap Climatico y Energetico.

Minister Glenbert Croes:

CU CCEC 2023 ARUBA TA DEMOSTRA DI TA

PONE ACCION TRAS DI SU PALABRANAN

Caribbean Climate and Energy Conference 2023 a culmina diabierna ultimo. Tres dia sumamente efectivo na negociacion-, palabracion y pasonan concreto pa prepara e parti Caribense di Reino Hulandes pa e efectonan di cambionan climatico y e transicion energetico necesario pa nos futuro generacionnan.

E mandatario di Energia pa ilustra e importancia di transicion energetico a inicia su disertacion splicando “e importancia di pone accion tras di nos palabranan, e importancia di laga nos accion- y decisionnan di awe, resona mas duro cu nos palabranan”.

E ultimo dia di conferencia tabata e dia dedica na Energia. Durante e dia aki tabatin presentacion di WEB Aruba, EAGLE LNG, presentacion di e proyecto di energia di biento y presentacion di e importancia di Aruba Hydrogen Valley.

Repasando e 3 dianan di CCEC2023, Minister Glenbert Croes a comparti riba e ultimo dia di conferencia, su pensamentonan di e importancia di e conferencia cu a tuma lugar na Aruba. Locual cu COP UN (Conference of Parties on Climate Change) ta pa mundo, CCEC lo nifica pa region Caribense. Como pais chikito hopi biaha bo ta soña grandi. Pero tur soño pa grandi cu e por ta, ta cuminsa cu pasonan chikito. Y na opinion di e mandatario esey ta hustamente locual cu Aruba ta haciendo cu e conferencia CCEC2023. E conferencia aki mester ta e bos fuerte di speransa pa mundo. Nos lo mantene presion positivo riba otro paisnan pa nan tambe cana e caminda di nan palabranan. “Fracasa no ta un opcion pa nos. Mas bien

nos kier inspira otro paisnan.” Y durante e sesion di Reino riba e prome dia di conferencia Minister Glenbert Croes a cita un acontecimento cu a inspira henter mundo: “one small step for men, one giant leap for mankind”, tabata e palabranan di Neil Armstrong, e prome persona cu a pone pia riba luna.

Humanidad ta invirtiendo cuantiosamente buscando contesta den espacio en bes di inverti den rescata nos propio planeta. “Nos mester rescata nos planeta pa nos planeta por rescata nos. Nos mester proteha nos naturalesa pa naturalesa por proteha nos. Nos tin cu preserva nos medio ambiente pa nos medio ambiente por preserva nos.” Ta decisionnan cu nos mester tuma awo pa nos yiunan, nan yiunan y nan yiunan por tin e oportunidad na e calidad di bida cu nos por a gosa di dje awe. “Locual cu mas mi ta desea ta pa por ta un persona cu ta haci e diferencia. Y nos tur awe presente tin e oportunidad pa haci un diferencia.” Minister Glenbert Croes a clausura su discurso invitando tur presente pa hunto tuma e salto grandi na bienestar di nos respectivo paisnan.

MINISTER THIJSEN NA CLAUSURA DI CONFERENCIA CARIBENSE DI CLIMA Y ENERGIA

Minister Plenipotenciario mr. Ady Thijsen a atende e di tres dia di e CCEC – Caribbean Climate and Energy Conference 2023 na Renaissance Convention Center.

E di tres dia tambe tabata e clausura di e conferencia y e programa tabata carga e titulo di “ShowCase Aruba” na unda tabata tin presentacionnan di WEB Aruba NV, Windfarm, Eagle LNG y Aruba Hydrogen Valley.

Na final di e programa di e mainta ey Prome Minister mr. Evelyn Wever-Croes y Minister pa Clima y Energia di Hulanda Rob Jetten a tene un discurso unda a elabora riba e puntonan cu a keda trata durante e conferencia; ki accion mester tuma pa implementa loke a wordo papia pa yega na solucionnan concreto pa e paisnan y islanan den Reino Hulandes riba e tereno di transicion na energia sostenibel.Tambe a papia cu e

no ta ked ana e conferencia aki so, pero cu e paisnan den Reino a compromete cu lo bin e asina yama “vierlanden overleg” pa sigi trata e asunto aki.

Tambe ambos mandatario a expresa nan aprecio cu tanto pais di Caribe, America Central, Norte America, Europa y paisnan Pacifico a bin Aruba pa cu e conferencia. Tambe cu tabata tin institutonan cu a presencia e conferencia pa contribui na e discussion pa logra e metanan cu mester yuda na principalmente paisnan chikito ta enfrenta pa motibo di e cambio di clima.

Tur esaki segun premier Wever-Croes y Minister Jetten a mustra e importancia di e prome CCEC cu a tuma lugar na Aruba y cu e intencion ta pa bin cu mas di e conferencia aki pa e region di Caribe y di mundo.

Dia Mundial di Parhanan Migratorio 2023

AWA TA SOSTENE BIDA DI PARHA

Awa ta e fuente di mas importante pa sostene bida di parhanan migratorio. Esaki tambe ta e tema pa cu e observacion bianual di parhanan migratorio 2023. Dia mundial di parhanan migratorio, World Migratory Bird Day, ta observa oficialmente riba dia 13 di mei y tambe na october 14, 2023.

Dicon a scoge e tema di awa pa e dia aki ? Pasobra calidad y cantidad di awa na alcanse di parhanan ta bou di menasa na diferente parti di mundo. P’esey e organisacionnan a uni y a bin cu un campaña strategico pa trece mensahenan clave pa e dia Mundial di Parhanan Migratorio. E organisacionnan ta consisti di: The Convention on the Conservation of Migratory Species of Wild Animals (CMS), the African-Eurasian Migratory Waterbird Agreement (AEWA), the non-profit organization, Environment for the Americas (EFTA) and the East-Asian Australasian Flyway Partnership (EAAFP). E deseo di e unificacion aki ta pa eleva conscientisacion pa parhanan migratorio y nan necesidadnan. Cu esaki tambe ta desea mas cooperacion internacional pa conserva no solamente di e parhanan, pero tambe nan habitat. Directie Natuur en Milieu (DNM) ta reconoce e importancia di nos bahianan of tambe saliñanan aki na Aruba pa e parhanan migratorio cu ta bin aki pa descansa, come y broei. E condicionnan mester keda faborabel na e sitionan cu ta fuente di bida pa parhanan, asina nos por keda brinda e servicionan.

Parhanan migratorio ta depende di diferente fuente di awa manera, lama, lagun, rooi, dam y bahia. Y manera na paisnan mas grandi cu tin otro fuentenan di awa manera: lagonan, marshes y pantanonan (swamps). Na e sitionan aki siguramente lo tin matanan cu ta brinda lugar pa alimenta, broei, sosega y sconde. E areanan unda tin awa y mata ta forma habitat ideal pa parhanan. E areanan aki ta importante pa nan descansa pa haya forsa despues di nan biahe largo y tambe temporada friu na otro parti di unda no ta originalmente. Pero nan habitat y ecosistema acuatico ta bou menasa door di factornan humano y demanda pa awa y espacio. Algun factornan adicional cu ta forma menasa ta entre otro polucion, cambio climatico y scarcedad di awa.

RETONAN LOCAL

Aki na Aruba tambe nos tin areanan cu ta bira habitat pa parhanan manera bahia, saliña, dam y rooi. E lugarnan aki hopi biaha a bira drumidera di parhanan local y esunnan cu ta di bishita. Manera tur caminda aki na Aruba tambe nos por mira e factornan cu a bira retonan local, manera scarcedad di awa pasobra ta temporada di secura, nos damnan ta seco, tin demanda halto pa espacio pa vivienda. Nos saliñanan natural tambe ta seco. Ta un solo lugar cu tin awa na abundancia ta na Bubali Plas y aki tambe por wak mas parhanan tambe.

RETONAN INTERNACIONAL

Na otro pais tambe tin retonan na escala grandi, por ehempel

den e Basin na Asia (Amuye Heilong), tin reto door di cambio di clima y destruccion di habitat. Na Merca, na e estado di Utah, e Great Salt Lake ta bou menasa di desaparicion completo den e siguiente 5 añanan. Na Africa tin retonan di disertificacion, deforestacion, secura extremo, perdida di suelo y vegetacion den regionnan semi-arido manera na Sahel Africa. Por a tuma nota cu na Francia na e region na costa, Pirineo Oriental a declara oficialmente secura. Debi na esaki Francia a pone restriccion na hende pa no uza awa pa laba auto of muha mata den cura, pavia di scarcedad di awa.

Dia mundial pa parhanan migratorio ta un yamada internacional pa tuma accion pa proteccion di parha. Dia 13 di mei ta e prome dia di observacion pa parhanan migratorio pa 2023. Na october lo ta e otro debi cu e ciclo natural di migracion di parhanan ta tuma lugar na diferente momento den e parti di mundo cu ta e hemisferio zuid y e otro nort. Den e dianan aki rond mundo tin eventonan organisa cu ta yuda conscientisa riba e temanan di parha migratorio y e importancia di awa. Por pensa riba actividadnan na scolnan, manera charla informativo cu muchanan di scol, accionnan di limpiesa den areanan cu ta habitat pa parha, y asociacionnan no-gubernamental cu ta vocifera pa naturalesa.

DNM ta haci apelacion na comunidad pa eherce cautela ora ta trata cu parhanan salvahe local y migratorio. Nos ta enfoca riba e ley proteccion di sortonan (Landbesluit beschermde flora en fauna) y por consulta esaki via nos website dnmaruba.org asina bo ta na altura cua ta e avifauna (parhanan) protegi den e ley aki. Nos ta desea tur hende Feliz dia Mundial pa Parhanan Migratorio 2023, y ta preferibel observa y laga den trankilidad tur parha salvahe. Si ta desea di pone awa accesibel pa parha por haci esaki, pero no ta deseabel pa alimenta parhanan.