IslaOnline 16 April 2024

Relaciona cu e añanan di castigo pa abuso sexual di mucha

DESDE 2020, GOBIERNO A HISA E CASTIGO PA ABUSO SEXUAL DI MENOR NA E MAXIMO DEN REINO

Manera ta conoci, Gobierno di Aruba a decreta luna di April como Luna Nacional di Conscientisacion Contra Abuso di Mucha, cu e meta pa comparti informacionnan relevante, y crea conscientisacion riba e topico importante aki.

Prome Minister Evelyn Wever-Croes a expresa, cu ta importante pa remarca cu ainda tin hopi hende ta cuestiona e maneho di gobierno pa loke ta castigo, en conexion cu abuso sexual di menor. E mandatario a splica cu na inicio di gobernacion di Gabinete Wever-Croes, Gobierno a bin ta traha constantemente riba diferente ley y procedura pa percura cu e castigo p'e abusado ta bira mas severo.

Na aña 2020, Gobierno a logra na hisa e castigo pa esnan cu ta comete a acto aki, te na e maximo cu e por wordo hisa den Reino. Ta asina leu cu si tin un morto pa motibo di un abuso, e castigo lo ta di 24 aña. Pero mirando e severidad di e problema aki, Gobierno ta trahando pa huesnan por hisa e castigo aki aun mas.

Pa Prome Minister e topico aki, ta y lo keda uno importante, y pa e motibo aki a compromete su mes pa sigui traha hunto cu e profesionalnan den e veld, pa logra combati abuso contra nos muchanan.

Prome Minister Evelyn Wever-Croes: Prome Minister ta invita scolnan pa participa na e proyecto di inovacion; EduTech

DEADLINE PA SCOLNAN

INSCRIBI PA CICLO 7 DI EDUTECH TA 18 DI APRIL 2024

Recientemente, Gobierno di Aruba hunto cu Futura a anuncia di a habri e inscripcion pa ciclo 7 di Edutech, dunando asina oportunidad na scolnan pa uni na e revolucion educativo. Gobierno di Aruba ta haci un yamado na tur scolnan pa tuma e oportunidad aki y inscribi bo scol entregando un plan di proyecto y bira parti di e iniciativa inovativo di EduTech.

Manera ta conoci, EduTech ta un proyecto di Gobierno di Aruba hunto cu Futura den cual ta pone Awg. 400.000 disponible pa proyectonan di innovacion na scolnan. E proyecto di Edutech ta duna oportunidad na tur scol pa bin cu nan mesun proyecto y tin e oportunidad di gana recursonan financiero of material pa ehecuta e proyecto.

Mirando e oportunidad grandi aki, Prome Minister Evelyn Wever-Croes ta invita tur scol pa inscribi y haci nan soño bira realidad, adkiriendo materialnan inovativo pa engrandece nan sistema di educacion.

Scolnan por inscribi na: https://www.edutecharuba.org/submit-application Deadline pa inscripcion ta April 18, 2024

PROYECTO DI AGROFORESTERIA NA ST. PAULUS SCHOOL TA YUDA CULTIVA CAMBIO

Den un esfuerso colaborativo entre e scol basico St. Paulus y e Ministerio di Sector Primario, un hardin di alimentacion nobo lo ser planta diasabra awor 20 di april 2024, di 7’or di mainta te cu 1’or di merdia. E iniciativa aki ta parti di un proyecto mas amplio di agroforesteria na scolnan basico, cu e meta pa inculca e importancia di autosuficiencia y plantamento bou di e siguiente generacion.

Durante e evento, maestronan, studiantenan, y boluntarionan lo bini hunto pa planta un variedad di fruta, berdura, y simia, simbolisando e desaroyo di un modelo educativo enfocando ariba siguridad di alimentacion y conservacion ambiental.

"E proyecto di agroforesteria na St. Paulus School no ta solamente tocante agricultura; e ta un klas interactivo. Nos muchanan ta siñando lesnan valioso tocante siguridad di

alimentacion, sostenibilidad, y e importancia di cuida nos planeta," segun Minister Ursell Arends.

E dia di plantamento ta diasabra 20 di april, apenas algun dia prome cu Dia di Mama Tera, un momento dedica globalmente na proteccion ambiental. Door di aporta na e plantamento di St. Paulus School, comunidad por celebra e dia aki cu un accion di bon boluntad. E envolvimento comunitario lo yuda planta simia cu lo crece den un futuro sostenibel pa Aruba.

Minister Arends ta extende un invitacion pa uni forsa diasabra 20 di april 2024 7’or di mainta te cu 1’or di merdia na St. Paulus School na Jim Blue Jacketstraat 2, San Nicolas. E proyecto aki ta representa mas cu solamente un actividad agricola; e ta un compromiso cu nos planeta y futuro generacionnan.

MINISTER DANGUI ODUBER TA CONTESTA

PREGUNTANAN INFUNDA Y INCORECTO DI MIKE EMAN Y MERVIN WYATT-RAS TOCANTE

CANTIDAD DI PERSONANAN CU A FAYECE DEN E ULTIMO AÑANAN

Diamars mainta Minister di Turismo y Salud Publico sr. Dangui Oduber ta contesta preguntanan y presenta datos di CBS di e cantidad di personan cu a fayece na Aruba e ultimo añanan. Recientemente Minister Oduber a ricibi algun pregunta di miembronan di fraccion di AVP sr. Mike Eman y Sra. Merwin Wyatt-Ras, y awe Minister Dangui ta contradeci tur e ponencianan infunda y incorecto haci pa e miembronan di fraccion di AVP.

Si nos tuma nota di estadisticanan di e cantidad di personan cu a fayece e ultimo añanan nos por conclui cu hustamente tin un bahada di e cantidad di personan cu a fayece. Minister Dangui ta lamenta cu sr. Eman y sra. Wyatt-Ras ta mal informa comunidad y crea panico innecesario siendo cu e cifranan mes ta contradeci nan ponencianan.

Estadisticanan di CBS ta demostra cu e Cantidad di personan cu a fayece e ultimo añanan ta como lo siguiente:

• Aña 2021: 964

• Aña 2022: 879

• Aña 2023: ta proyecta 800 (te cu di 3 kwartaal di 2023 - 611 persona a fayece)

Un otro ponencia cu Minister Dangui a contradeci ta cu segun fraccion di AVP, e gobierno aki lo ta cortando den cuido medico. Hustamente e aña aki, esta aña 2024, ta invertiendo 13.5 miyon florin extra den mehoracion di calidad di cuido y servicio. E 13.5 miyon florin cu a inverti den cuido medico a wordo reparti como lo siguente:

• 5.1 miyon florin extra pa Hospital

• 4.1 miyon extra pa ImSan

• 1.8 miyon pa Stichting BOB haci bevolkingsonderzoeken pa early detection di cancer di pecho

• 1 miyon pa respaldo pa asina tuma mas profesionalnan

• 1.5 miyon pa reenforsa e prome liña di cuido y tambe pa digitalisacion di cuido medico

Minister Dangui Oduber a contesta tur e preguntanan cual e lo bay entrega na e miembronan di fraccion di AVP. Minister Dangui Oduber ta pone e preguntanan y e contestanan aki pa comunidad por lesa, pa asina na un forma habri y transparente informa communidad di Aruba debidamente.

MINISTER ENDY CROES TA FELICITA SR. IVAN

JANSEN CU SU IMPRESIONANTE DOCUMENTAL

Diaranson anochi na Cas di Cultura, Minister Endy Croes acompaña pa su kerida esposa Dilailah Croes – Odor a presencia estreno di documentario di e artista y musico Arubiano Sr. Ivan Jansen titula: Documental Ivan Jansen, produci door di nos yiunan di tera. Sr. Jansen no ta un persona desconoci den nos comunidad. Ivan ta musico, guitarista clasico y di jazz, productor, compositor, areglista, educado, lider di banda y empresario.

Minister Endy Croes a expresa cu esnan presente por a siña hopi mas di e impresionante carera di Sr. Ivan Jansen. Ivan a siña, traspasa su conocemento y a inculca e amor pa musica di foklore na hopi hoben y musico cu awe ta musiconan exitoso. Cu e documental aki nos ta cera conoci cu e musico Ivan hopi mas di cerca. Ivan ta comparti historia di su carera musical, su conocemento, produccionnan, su contribucion na diferente musico y/of artista local, su logronan local y internacional y e retonan cu el a encontra durante su carera musical.

Den nomber di Gobierno di Aruba, Minister di Cultura Sra. Xiomara Maduro a otorga Sr. Jansen un reconocemento pa su contribucion significante na e herencia cultural musical di Aruba. Pa conclui, Minister Endy Croes ta felicita Sr. Ivan Jansen y famia. Alabes ta gradici nan pa tur loke cu nan a haci pa Aruba. Danki pa contribui na nos herencia cultural y musical.

MINISTER ENDY CROES TA HACI UN RECAPITULACION DI SU EXITOSO BIAHE DI TRABOU

Diabierna mainta, Minister di Enseñansa y Deporte Endy Croes a haci un recapitulacion di su biahe di trabou na Curaçao, unda a trata diferente aspecto di enseñansa y a atende apertura y clausura di Weganan Interinsular 2024.

Primeramente, Minister Endy Croes hunto cu Minister President di Curaçao Gilmar Simon (Pik) Pisas, Minister di Enseñansa, Ciencia, Cultura y Deporte di Curaçao Sithree van Heydoorn, diferente instancia di Hulanda y delegacion di Aruba y Curaçao a acudi na Universidad di Curaçao. Durante e encuentro aki na Universidad di Curaçao, a debati riba diferente tema pa crea plataforma pa e studiantenan por ta mas exitoso. Tanto studiante di Hulanda y Curaçao a participa den e debate aki, unda a comparti nan experencia di estudio. Cu esaki, por evalua miho e forma pa keda brinda e studiantenan oportunidad pa ta exitoso.

Siguiente, Minister Endy Croes hunto cu Minister Dijkgraaf y e mandatarionan di Curaçao a habri e prome scol cu a wordo renoba na Curaçao cu e 30 miyon euro cu Hulanda a duna pa renobacion di e scolnan. E mandatarionan a haci entrega oficial di e yabi di e scol den un bachi completamente nobo. Despues di e esaki, a regresa Universidad di Curaçao unda a conclui e conferencia di trabou den su totalidad. Minister di Enseñansa di Hulanda Robbert Dijkgraaf a haci entrega di BSN nummer na e prome studiante di Caribe na Curaçao. Esaki sigur ta otro logro grandi. Desde e aña aki e studiantenan por ricibi nan BSN nummer prome cu nan biaha na Hulanda. Esaki lo facilita e proceso di e studiantenan na nan yegada na Hulanda. Cu BSN nummer e studiante por entre otro, inscribi pa un camber, por habri un cuenta di banco y aplica pa seguro.

Banda di esaki, diabierna tabatin e grandioso apertura di Weganan Interinsular 2024, unda cu Minister Endy Croes hunto cu e mandatarionan di Curaçao tabata presente. Despues di un dia di diferente wega deportivo, Weganan Interinsular 2024 a conclui diasabra anochi na cas di Gobernador di Curaçao cu un cena pa tur e participantenan. Despues di esaki, a acudi na e ceremonia oficial cu a tuma luga na Plaza Luis Brion pa entregamento di premio, unda cu Aruba a gana e premio di oro den tur nuebe (9) deporte.

Diadomingo, Minister Endy Croes a compaña Minister Sithree van Heydoorn na Parada di SEÜ. Un bunita parada, unda alrededor di 40 grupo a participa. Minister Endy Croes hunto cu Minister President di Curaçao Gilmar Simon Pisas a haci e conteo pa duna inicio na e parada. Pastor Curtis tabata presente pa haci un bunita oracion pa e Parada di SEÜ.

Finalmente, Minister Endy Croes a gradici e mandatarionan di Curaçao cu a ricibie cu un caloroso bonbini. Un fin di siman fructifero cu varios logro grandi riba tereno di enseñansa y deporte. Cu deseo, disciplina, dedicacion y determinacion ta logra.

MINISTER THIJSEN INVITADO SPECIAL NA

ENCUENTRO ALUMNI FEF

Un grupo di alumni di FEF – e facultad Financiero Economico di Universidad di Aruba a bin recientemente hunto. Aki ta trata ta ex studianten di FEF cu sea ta studiando of ta traha na Hulanda. Pa e ocacion aki Minister Plenipotenciario mr. Ady Thijsen a keda invita pa tene un discurso cortico na e grupo.

Minister Thijsen a bisa cu ta bunita pa mira con hopi alumni di FEF a scohe pa topa cu otro. Esaki ta mustra cu tin un unidad hopi grandi. Tambe ta bunita pa tende cu hopi studiante di FEF ta ocupa posicionnan importante na Hulanda y tambe na otro paisnan. ‘Esaki ta reflexiona e exito di FEF, cu ta e facultad mas grandi di Universidad di Aruba. Pa chikito cu nos pais ta, nos por tin logronan grandi,’ asina sr. Thijsen a bisa.

Despues e mandatario a sigi den su discurso cu un introduccion di su mes. Esaki a sigi cu un splicacion di su funcion como Minister Plenipotenciario y Representante di Aruba na Union Europeo. ‘Dos funcion importante pa loke ta e relacion cu Hulanda y busca oportunidad pa Aruba na Union Europeo. Alabes nos a bin cu maneho pa haci Aruba mas visibel na Hulanda, den Reino Hulandes y Union Europeo. Den esaki nos no ta concentra unicamente riba Den Haag, pero nos ta papia cu diferente municipio, provincia, hogescholen, Universidad y sector commercial. Tambe nos ta buscando cooperacion

cu diferente embahada, pa mira unda esaki por conduci na beneficionan pa Aruba.’

‘Gabinete di Aruba tambe ta pa nos hendenan; nos studiantenan, Arubianonan cu a bin pa tratamento medico, of a bin traha y biba na Hulanda. Un aspecto importante di esaki ta pa logra cu mas Arubiano bai bek Aruba. Awor cu economia di Aruba a pick up hopi bon despues di e pandemia, tin un necesidad grandi na personal. Como gobierno nos kier stimula esaki. Pa e motibo aki durante di Arubadag 21 di April proximo lo tin un job fair, unda entre otro departamento di Labor (DPL) y di Recurso Humano (DRH) lo tey pa representa e sector publico y asina duna informacion na esnan cu tin interes pa regresa nan pais. Esaki ta nifica si cu tanto sector publico como priva lo mester bin cu mas incentivo pa interesadonan. Pensa den banda di salarionan atractivo, tambe bon condicionnan secundario. Un forma con pa hinca esaki den otro ta un asina yama “sociaal akkoord”,’ tabata palabra di Minister Plenipotenciario di Aruba mr. Ady Thijsen.

Riba e ultimo punto aki tabata tin hopi reaccion positivo di esnan presente, indicando cu den caso di un “sociaal akkoord” tin persona cu lo considera pa regresa Aruba.