APERTURA OFICIAL AÑA ACADEMICO 2024-2025
DI UNIVERSIDAD DI ARUBA
Recientemente Prome Minister Evelyn Wever-Croes a atende apertura oficial di e Aña Academico 2024-2025 di Universidad di Aruba. E anochi importante aki a conta cu presencia di Gobernador di Aruba, S.E. Alfonso Boekhoudt, Prome Minister Evelyn Wever-Croes, Minister di Enseñansa Endy Croes, invitadonan special y e comunidad di Universidad di Aruba.
Durante e anochi aki Minister di Enseñansa Endy Croes a duna un discurso elocuente unda tambe el a anuncia e bon noticia cu e aña academico 2024-2025 lo conta cu 300 studiante nobo. Tambe e anochi aki Dr. Glenn Thode a duna un discurso interesante caminda el a hiba e presentenan den un biahe pa aña 2050; “A UNIVERSITY OF ARUBA ODYSSEY”, mustrando unda Universidad di Aruba lo mester ta na e momento ey como un partner strategico pa henter comunidad, atendiendo y investigando retonan cu e comunidad lo ta atravesando.
Universidad di Aruba ta conta na e momento aki cu e edificio y Monumento Maria Convent cual a wordo totalmente renoba y inaugura den luna di Mei 2024. E edificio aki ta aloca e Facultad di Sustainable Island Solutions through Science, Technology and Mathematics (SISSTEM) di Universidad di Aruba. E ta un facultad cu ta duna solucionnan pa islanan chikito y basa riba esey ta atrae hopi studiante di exterior, asina exportando conocemento cua ta e Economia di Conocemento cu sigur ta di importancia pa Aruba.
“E inversion di e renovacion di e edificio di Maria Convent tawata un inversion di Union Europeo y Gabinete Wever-Croes semper a apoya e proyecto aki unda awor ta aloca e facultad di SISSTEM. Hopi exito na e studiantenan y docentenan cu e aña academico nobo. Mi ta convenci cu e aña academico aki tambe lo ta uno exitoso”, Prome Minister a expresa.
PANORAMA COOPERATIVO DURANTE DIALOGO
CU TAXISTANAN
18 di September 2024 - Minister Ursell Arends a tene un reunion productivo cu taxistanan pa elabora riba nan rol den e desaroyo continuo di transporte publico. E dialogo a enfoca riba crea un ambiente di cooperacion pa asegura cu futuro di e industria di taxi ta den harmonia cu e reforma di transporte publico.
Durante e reunion, a presenta un posibel uzo di taximeter via un aplicacion. Esaki ta asegura mas transparencia y prijs husto, calculando e tarifa segun distancia y tempo. E metodo aki lo duna mas confiansa na pasahero, eliminando disputa di costo, mientras cu taxistanan lo ricibi compensacion husto y cumpli cu regulacionnan.
Manera a bin presenta caba e prioridadnan clave pa maneho di Transporte Publico ta lo siguiente:
• Integridad, seguridad y oportunidad igual den e sistema
• Accesibilidad y Pagabel
• Sostenibel y duradero den harmonia cu Medio Ambiente
Minister Arends a trece un proposicion dilanti pa ahusta e lista di tarifanan di taxi, tumando na cuenta e aumento di costo di bida (inflacion). A invita taxistanan pa entrega nan proposicionnan riba e lista di prijs pa sigui mantene e dialogo abierto. Ademas, Minister Arends a apela na representantenan di taxi pa duna nan comentario riba e Overgangstoetsingskaders, por escrito via nan representante legal. E documentonan relaciona, hunto cu e bijlagen, ta disponibel pa publico via e website di publico.aw.
Pa finalisa, Minister Arends a informa taxistanan di desaroyo positivo pa loke ta trata plan di pension, y cu e Pension Fund Tourism Sector Aruba (PFTSA) ta pone nan mes disponibel
pa sinta na mesa cu representantenan di taxi pa explora posibilidadnan na beneficio di e sector.
Minister Arends ta gradici tur representante di taxista y nan representante legal pa nan cooperacion durante e reunion. Minister ta enfatisa cu e dialogo constructivo lo sigui, buscando solucionnan pa tur partido envolvi y pa e desaroyo di transporte publico na Aruba.
Minister Ursell Arends: SEGUNDO (Y ULTIMO) OPORTUNIDAD PA REINSCRIPCION DI
PETICION PA PERMISO DI TAXI
Minister encarga cu Transporte Publico, den colaboracion cu Bureau Interne Diensten (BID) y Departamento di Transporte (DTP), ta anucia e segundo, y alabes ultimo oportunidad pa re-inscripcion di peticion pa permiso di Taxi.
E oportunidad aki ta cuminsa 30 di september 2024 y lo termina 14 di october 2024.
E posibilidad aki ta aplica pa tur esnan cu den pasado a entrega un peticion pa un permiso di taxi y cu no a haci uzo di e prome oportunidad pa re-inscripcion via e portal di BID cu a tuma luga entre november 2023 y 1 di februari 2024.
Minister Arends ta enfatisa cu e formulario digital ta disponibel solamente pa esnan cu ya a entrega un peticion pa permiso di taxi den pasado, mirando cu esaki ta e tipo di permiso mas pidi. Pa medio di e formulario digital, lo traha un lista di tur peticion pendiente a base di fecha cronologico. Lo sigui traha pa modernisa e servicionan y haci nan mas accesibel na comunidad.
Unabes cu cera e ultimo oportunidad pa re-inscripcion lo cuminsa e proceso di inventarisa y pone tur peticion den secuencia a base di e fecha di e prome peticion (segun e documentonan cu a wordo entrega por medio di e portal digital). Unabes esaki a tuma luga lo informa cada ken ki number nan a haya y lo publica e lista tambe riba publico.aw. Di e forma aki cada ken sa na ki momento su peticion ta na turno.
Entrante 1 di december 2024 ta cuminsa tuma peticion pa
permiso di taxi nobo, esakinan mester bai via e portal digital di BID www.bid.aw Lo no acepta ningun peticion manual mas.
Minister Arends, como e mandatario encarga cu transporte publico, a bin encontra various retonan den transporte publico. Un di e retonan cu a wordo presenta ta e proceso di pidi permiso pa transporte publico, entre otro, TX-, T- y O-vergunning.
Hunto cu Bureau Interne Diensten (BID) ta trahando duro pa digitalisa e procesonan di DTP pa asina brinda mas claridad riba e proceso di atende cu peticion p.e. esnan concerni por busca e status di nan peticion haci na DTP. Esaki ta forma parti di esfuersonan pa aporta na trece transparencia den procesonan andando.
A cuminsa cu e proceso pa pidi TX-vergunning 29 di november 2023. Ministerio di Transporte a lansa un formulario digital pa esnan cu a haci peticion pa permiso di taxi den pasado, pa asina por confirma nan interes actual. E prome oportunidad pa re-inscripcion di peticion pa permiso di Taxi a tuma luga den e periodo di december 1, 2023 te cu februari 1, 2024.
E siman aki BID a cuminsa manda un “zaak-nummer” na tur esnan cu a haci uzo di e oportunidad aki, esnan cu no a ricibi esaki ainda por tuma contacto cu BID. E segundo, y alabes ultimo, oportunidad pa re-inscripcion di peticion pa permiso di Taxi ta cuminsa 30 di september 2024 y lo termina 14 di october 2024.
E meta ta pa centralisa e peticionnan bou di Departamento di Transporte Publico (DTP) pa yuda trece mas structura y claridad den e proceso di peticion di permiso. E formulario aki lo ta disponibel riba http://www.bid.aw .
Pa asistencia cu e formulario por tuma contacto cu oficina di BID pa traha un cita telefonicamente via tel: 583-4114 of via email na bid@aruba.gov.aw .
"Nos compromiso ta pa trece transparencia y eficiencia dentro di proceduranan gubernamental, y e introduccion di e formulario digital ta un parti importante di e avancenan cu nos ta realisando den e tereno aki," segun Minister Ursell Arends.
MINISTER MADURO DI CULTURA TA INFORMA CU TRABOUNAN LO START PA RESTAURA CAS VENERANDA
COMO UN MOMUMENTO DI PAIS ARUBA
Un otro monumento lo wordo restaura pa conta nos su historia y historia di nos Pais
Riba Dia di Monumento Monumentenfonds Aruba a anuncia cu e trabounan di restauracion di e monumento Cas Veneranda ta bay cuminsa. Poco tempo pasa Monumentenfonds a cumpra e cas di e herederonan di Famia Machi Arends y su sra. Maria Veneranda Arends-Lacle pa asina restaura esaki pa e por bay den uzo pa, entre otro, Departamento di Asunto Economico. Un bes restaura Cas Veneranda lo ta un otro monumento cu lo conta su historia y historia di nos Pais.
Minister Maduro di Cultura tabata presente pa e anuncio y pa despues hunto cu e publico presente por a scucha e lider di e proyecto sra. Daphne Every splica riba e historia di e cas y e trabounan cu lo wordo haci pa restaura Cas Veneranda den su gloria. Dentro di poco Cas Veneranda lo haya tambe su seyo como monumento protehi di Aruba.
Na forma virtual
MINISTER MADURO DI CULTURA A HIBA
PALABRA NA E APERTURA DI E “SEMANA DE INTEGRACIÓN CULTURAL Y LINGÜÍSTICA CON EL GRAN CARIBE” NA RIOHACHA, COLOMBIA
Den cual sr. Ramon Todd Dandaré a ofrece charla y tayer di Papiamento
Minister Xiomara Maduro di Cultura tabata tin e honor di dirigi algun palabra durante e apertura di e “Semana de Integración Cultural y Lingüística con el Gran Caribe”, cu ta tuma luga dianan 10 pa 13 di september 2024 na Riohacha, Colombia. Durante e siman aki e linguista sr. Ramon Todd Dandaré tabata un invitado special pa ofrece algun tayer y charla tocante di Papiamento.
Den su discurso Minister Maduro a acentua e lasonan estrecho cu ta existi desde miles di aña entre Aruba y Tiera Firme na unda e lama Caribe ta conecta y facilita nos comunicacion cu otro y e migracion entre e continente y e islanan. E distancia a facilita lasonan comercial, social y cultural entre e pueblonan te dia di awe, y e evento di e siman di integracion cultural y linguistico cu e Gran Caribe, ta prueba di e lasonan aki.
E mandatario a splica cu e presencia di sr. Ramon ‘Monche’ Todd Dandaré ta simbolisa na perfeccion e lasonan fuerte cu ta existi entre Riohacha/ La Guajira y Aruba. Ramon ta un Riohachero di nacimento y un Arubiano di formacion cu atraves di su trabounan y personalidad a sa di alimenta e spirito historico, social, cultural y linguistico entre nos pueblonan, locual ta contribui na e integracion di e Gran Caribe.
Na final di su discurso Minister Maduro a gradici sr. Ramon Todd Dandaré y organisacion pa e bunita intercambio cultural aki y a dirigi su mes den nos dushi Papiamento na tur cursista pa desea nan un siman frutifero yena di hermandad.
UN OTRO LOGRO BUNITA PA ARUBA CU 4 AMBULANCE NOBO
Diaranson atardi Minister di Turismo y Salud Publico sr. Dangui Oduber a atende e ceremonia na ImSan pa entregamento di 4 ambulance nobo. Minister Dangui Oduber su enfoke y vision ta pa transforma y innova e sector di cuido medico na Aruba. Inversionnan grandi a wordo haci pa ImSan por sigui mehora e calidad di cuido y servicio na Aruba.
Inversionnan den cuido medico a percura pa cumpra 4 ambulance nobo. E 4 vehiculonan di ambulance ta hopi moderno den technologia. Minister Oduber a señala cu na 2025 ImSan lo ricibi bijscholing pa e personal di ambulance y tambe nan lo haya curso di chauffeur, pero tambe curso di enfermero. Personalnan di ambulance tin un responsabilidad sumamente grandi pa brinda servicio na comunidad y pa salba bida di hende. Entrega di e 4 ambulance nobo aki sigur ta un noticia sumamente positivo den cuadro di mehoracion di cuido na Aruba.
Na aña 2022 tabata un aña cu hopi reto den salud publico caminda mester a sosode varios recorte. Sin embargo danki na e entrada di turismo, Aruba a conoce un recuperacion economico accelera cu a surpasa tur expectativa. Esaki a trece e espacio financiero cu a haci posibel cu AZV por a financia y cumpra ambulancenan nobo y cu tecnologia moderno.
Finalmente Minister Dangui Oduber kier gradici e personal di ambulance y tambe e personal di ImSan pa tur e trabounan cu nan ta haci pa comunidad salbando bida di hende tur dia.
CARBON TRADING TA MUSTRA PROMETEDOR PA
MODELO ECONOMICO SOSTENIBEL DI ARUBA
SEGUN SONDEONAN
Recientemente, Metabolic Foundation a completa e un sondeo pa explora opcionnan accesibel pa carbon trading na Aruba. Den un paso notabel pa un modelo economico sostenibel y inclusivo, Minister Geoffrey Wever a laga investiga e beneficionan potencial di "carbon trading", un iniciativa clave den e Plan di Accion 2023-2025: Aruba su transicion pa un modelo economico sostenibel y inclusivo. E enfoke innovador aki tabata dirigi pa analisa e oportunidadnan y bentaha di compra y benta di carbon credits na Aruba, cu por te asta sirbi como un entrada adicional pa pais Aruba.
E sondeo tabata tin como meta pa determina cuanto CO2 credits (1 credit = 1 ton CO2) Aruba por produci via diferente projectonan sostenibel, y kico su balor ($) por ta, tanto actualmente como den futuro, pa asina por midi e factibilidad pa cumpra y bende esakinan cu individualnan y/of organisacionnan internacional.
Carbon trading ta basa riba e concepto cu individuonan of companianan responsabel pa emision di CO2 por cumpra "carbon credits" di entidadnan cu ta contribui activamente na practicanan sano pa medio ambiente, y asina mitiga nan propio impacto riba cambio climatico.
Carbon credits ta ser acumula por medio di desaroyo di e.o. proyecto di energia via panelnan solar of molina di biento, preservacion di reservanan natural. Mangroven y yerba di lama tambe ta importante pa preserva pasobra nan ta absorba un cantidad mas grandi di CO2 compara cu matanan regular (of mondi) riba tera. Otro iniciativanan tecnologico cu ta sea reduci emision di CO2, of porta te asta absorba esaki ("Carbon Capture") tambe ta yuda acumula carbon credits.
Basa riba e resultadonan inicial prometedor di e sondeo, a bira cla cu carbon trading ta un opcion viable pa Aruba. E siguiente fase lo mester ta e preparacion di un plataforma di compra y benta di carbon credits. E trabounan preparatorio pa e siguiente fase lo sigui awo.
Uzo di carbon trading ta contribui na un desaroyo mas sostenibel door di stimula practicanan cu ta reduci CO2 y inversion den energia renobabel. "Carbon trading no ta solamente un strategia economico; e ta representa un compromiso pa un futuro mas sostenibel y responsabel, aliniando crecemento economico cu cuido ambiental, pa cual nos ta spera Aruba por sigui explora den futuro" - Minister Wever.
NOS DEPORTISTANAN POR HACI UZO DI E
VLOER ULTRAMODERNO Y COMPLETAMENTE RENOBA DI CENTRO DEPORTIVO LIBERTADOR
BETICO CROES
Diamars anochi, Aruba Sport Unie (ASU) a inaugura e vloer nobo y ultramoderno di Centro Deportivo Libertador Betico Croes na Santa Cruz. Manera ta conoci, e vloer di e sporthal tabata den un condicion deplorabel. Durante pandemia e sporthal a wordo uza como centro di vacunacion y a acorda cu Gobierno di Aruba lo percura pa renobacion di e vloer. Pues, pa hopi tempo no por a uza e sporthal pa eventonan deportivo. Den luna di juli, e container cu tur material a yega Aruba, unda cu e trabounan di renobacion a inicia y recien keda finalisa.
Minister Endy Croes acompaña pa su kerida esposa Sra. Dilailah Croes – Odor a acudi na e ceremonia di apertura. Durante e ceremonia a cende e “signage” nobo y moderno di Centro Deportivo Libertador Betico Croes. Despues Minister Endy Croes y presidente di ASU Sra. Soraida Boekhoudt a corta e sinta pa asina inaugura oficialmente Centro Deportivo Libertador Betico Croes. E mandatario di Deporte y Sra. Boekhoudt a haci e sake di bala den un wega di amistoso entre e seleccionnan di volleyball di Aruba. Fuera di esaki, ASU a reuni cu su miembronan, unda cu a presenta dos (2) proyecto nobo, esta un veld chikito di futbol y un “atletiekbaan”. E miembronan a keda hopi contento cu e noticia aki.
Pa conclui, Minister Endy Croes ta gradici Gabinete Wever – Croes II, Prome Minister Evelyn Wever – Croes cu a pone e fondonan disponibel a traves di BRA, Dienst Openbare Werken (DOW), Arubaanse Wegenbouw Maatschappij (AWM), Herculan y tur stakeholder cu a haci e proyecto aki posibel. Un cancha certifica pa e weganan di, entre otro basketball y volleyball. “Nos curason ta bati pa deporte. Pabien na e directiva di ASU, e federacionnan y nos deportistanan”, Minister Endy Croes a finalisa.
MINISTER ENDY CROES A BISHITA COLEGIO ARUBANO PA HACI UN INVITACION PA E ANOCHI INFORMATIVO DIA 26 DI SEPTMEBER
Lo trata estudio y vivienda pa studiante cu ta pensando di sigui cu nan estudio avansa na Hulanda
En conexion cu e proyecto di Studentenkamer, Minister Endy Croes a bishita e alumnonan di havo 4, 5 y vwo 5,6 di Colegio Arubano na Playa pa invita nan pa un sesion informativo dia 26 di september proximo. Durante e sesion diferente orado lo comprati y brinda informacion di, entre otro alohamento (huisvesting) na Hulanda.
Tambe, e expertonan di Seccion Facilidad pa Estudio di Departamento di Enseñansa di Aruba (DEA), Realign Caching, Consultancy & Services, Fundacion Plan di Bida, Kabinet di Aruba, Sr. Franklin Seute y e mentornan lo comparti informacion y tips valioso cu e studiantenan cu tin interes pa continua cu nan estudio avansa na Hulanda of Merca. E meta ta pa yuda y motiva e studiantenan pa inscribi pa camber (studentkamer) na tempo.
Rector di Colegio Arubano Sr. Tim Croes a gradici Minister Endy Croes pa bishita Colegio Arubano y pa trece informacion valioso pa e alumnonan cu ta biahando pa Hulanda e proximo aña. “Nos ta gradici Sr. Tim Croes, decaan, docente- y alumnonan pa e caluroso recepcion. Nos ta warda e studiantenan mas un (1) mayor dia 26 di september proximo pa 6 ‘or di atardi na IMAX Gloria”, Minister Endy Croes a conclui.
