Dialuna 20 Juni 2022
Pagina 1
Dialuna 20 Juni 2022
Email: IslaOnline@gobierno.aw Tel: 528-4952
Pagina 2
Dialuna 20 Juni 2022
PROME REUNION CU SECRETARIO DI ESTADO VAN HUFFELEN “Pa Aruba esaki ta hopi importante pasobra nos meta ta pa sali for di e crisis aki mas fuerte y mas resiliente” Diasabra anochi 18 di juni, e prome reunion riba nivel di Gobierno di paisnan den Reino y Secretario di Estado Alexandra Van Huffelen a tuma luga. E prome reunion aki tawata entre Aruba y Hulanda. Pa Aruba tawata presente Prome Minister Evelyn Wever-Croes y Minister Xiomara Maduro y pa Hulanda Secretario di Estado Van Huffelen y e respetivo delegacionnan. E punto di agenda tawata temanan financiero. Entre otro Presupuesto 2022 y Rijkswet Aruba Financieel Toezicht, (RAFT). Riba RAFT a delibera extensamente y Aruba a accentua e preocupacionnan cu tin y Hulanda tambe a trece dilanti nan puntonan. A haci palabracionnan concreto di e siguiente pasonan cu lo tuma riba RAFT. Diadomingo anochi, e di dos reunion lo tuma luga hunto cu Premier di Corsou Gilmar Pisas y Premier di Sint Maaten Silveria Jacobs. Presente tambe lo ta Vice Premier di Corsou Ruthmilda Larmonie-Cecilia y Minister di Finansas di Sint Maarten Ardwell Irion y demas delegacionnan. Dialuna lo continua cu e reunionnan henter dia. E puntonan di agenda ta e recorte di salario di 12,6 %. E topico aki, a bin riba agenda na ultimo momento riba peticion di Corsou y Sint Maarten cu ta den situacionnan poco diferente cu di Aruba. Pa Aruba esaki ta hopi importante pasobra Secretario di Estado Van Huffelen lo pone e punto aki riba agenda di e Conseho di Minister di Reino diabierna awo pa asina Aruba por cumpli cu e condicionnan y por paga e 5% cu Gobierno kier paga na juli. COHO tambe ta riba agenda como tambe e futuro relacionnan den Reino. “Nos tin dianan pisa di reunionnan nos dilanti, pero importante ta cu nos ta dialogando y deliberando riba e futuro di e ‘Consensus Rijkswetten’ y con lo sigui traha hunto. Pa Aruba esaki ta hopi importante pasobra nos meta ta pa sali for di e crisis aki mas fuerte y mas resiliente. Pa esaki nos tin palabracionnan haci, implementa reformanan pa logra esaki y nos ta cumpliendo cu e Landspakket pa esaki. Nos kier tin claridad di e trayecto cu
tin nos dilanti pasobra nos kier sali mas lihe cu ta posibel for di e crisis pero sigur mas fuerte y mas resiliente”, Prome Minister a enfatisa.
Pagina 17
Dialuna 20 Juni 2022
Prome Minister Evelyn Wever-Croes: Premiernan di Aruba, Corsou y Sint Maarten
TA SATISFECHO CU E REUNIONNAN CU SECRETARIO DI ESTADO DI REINO TA REUNI
E reunionnan extenso na unda cu pa e di prome biaha Premier di Aruba, señora Evelyn Wever-Croes, Premier di Corsou, señor Gilmar Pisas, Premier di Sint Maarten, señora Silveria Jacobs y Secretario di Estado di Reino señora Alexandra Van Huffelen tawata hunto presente na Aruba, a termina cu un conferencia di prensa na unda cu prensa di e 4 paisnan den Reino por a dirigi nan preguntanan na e premiernan y na Secretario di Estado di Reino. Ya for di diasabra 18 di juni e reunionnan a cuminsa na unda cu Premier di Aruba y Minister di Finansa y delegacion a reuni cu Secretario di Estado di Reino van Huffelen y su delegacion. Diadomingo 19 di juni anochi, e reunionnan a continua cu Premiernan di Corsou y Sint Maarten tambe hunto cu nan delegacionnan. Y dialuna henter dia e reunionnan a continua sigui pa un conferencia di prensa en conhunto. Premiernan di Aruba, Corsou y Sint Maarten a expresa cu nan ta satisfecho con e reunionnan cu secretario di Estado van Huffelen a bay. Secretario di Estado tambe a expresa di ta contento con e reunionnan na e nivel aki a tuma luga. Na final di e conferencia, Prome Minister Evelyn Wever-Croes
a gradici Coleganan Premier di Corsou y Sint Maarten y Secretario di Estado di Reino pa nan presencia y cooperacion den e reunionnan hopi positivo tras di lomba na unda a tuma luga dialogonan hopi constructivo. Tambe Prome Minister a gradici Ministernan presente di e diferente gabinetenan como tambe e delegacionnan y tur esnan cu a haci e reunionnan posibel. Prome Minister a enfatisa cu Gobierno di Aruba su meta ta pa sali for di e crisis aki mas lihe posibel y sigur mas fuerte y mas resiliente y ta trahando duro tambe pa logra esaki pasobra esaki ta e compromiso cu e pueblo di Aruba. “Aruba ta comprometi pa haci e reformanan cu nos a compromete nos mes pa haci. No tin duda cu Covid a dal nos hopi duro pa e motibo aki tambe nos ta reconoce y nos ta gradicido pa e ayudo cu nos a haya di Hulanda y for di awo en adelante nos ta compremeti pa percura pa haci miho posibel pa reforma pa asina Aruba por sali mas fuerte y mas resiliente y asina garantisa progreso y bienestar pa tur ciudadano di nos pais”, Prome Minister Evelyn Wever-Croes a expresa.
Pagina 11
Dialuna 20 Juni 2022
Prome Minister Evelyn Wever-Croes:
PROME BIAHA CU E MINISTERNAN DI ARUBA, CORSOU Y SINT MAARTEN Y SECRETARIO DI ESTADO DI REINO TA REUNI “Aruba, Corsou y Sint Maarten tin e meta comun pa sali for di e crisis aki mas lihe posibel y sigur mas fuerte y mas resiliente”
Diadomingo 19 di juni anochi, a continua e reunionnan cu Premier di Aruba, señora Evelyn Wever-Croes, Premier di Corsou, señor Gilmar Pisas, Premier di Sint Maarten, señora Silveria Jacobs y Secretario di Estado di Reino señora Alexandra Van Huffelen. Esaki ta e prome biaha cu e Ministernan di Aruba, Corsou y Sint Maarten y Secretario di Estado di Reino ta reuni, reunionnan cu ta tumando lug ana Aruba. E reunionnan aki a cuminsa desde diasabra nochi na unda cu Prome Minister di Aruba y Minister di Finansa Xiomara Maduro y delegacion di Aruba a reuni cu Secretario di Estado di Reino y su delagacion. Diadomingo e delegacionnan di Corsou y Sint Maarten a yega Aruba y e encuentro a tuma luga den oranan di anochi. E anochi aki a delibera riba diferente aspecto, entre otro riba reunionnan cu lo tuma luga henter dia dialuna tocante di COHO y tocante relacion den Reino. Tambe a delibera riba e recorte di 12.6%. “Reunionnan ta bayendo bon, no ta temanan facil pero e deliberacionnan ta bayendo bon”, Prome Minister a expresa. Reunionnan intenso riba topiconan relevante pa e tempo dificil cu paisnan di Reino ta enfrentando pa motibo di Covid. Diasabra a toca e tema di RAFT, diadomingo a toca e tema di 12.6% y dialuna ta toca e tema di COHO y futuro relacionnan den Reino y lo termina cu un conferencia di prensa. Pa Aruba,
Corsou y Sint Maarten e reunionnan aki ta importante tambe pasobra tur tin e meta comun pa sali for di e crisis aki mas lihe posibel y sigur mas fuerte y mas resiliente. Prome Minister a remarca cu esaki ta e prome biaha cu e Ministernan di Aruba, Corsou y Sint Maarten y Secretario di Estado di Reino ta reuni. Na Aruba a yega di tuma luga reunionnan tripartiet entre Prome Ministernan di Aruba, Corsou y Sint Maarten y awor pa prome biaha Secretario di Estado van Huffelen ta presente. Dialuna atardi, por sintonisa e conferencia di prensa Live via TeleAruba y riba pagina di Facebook di Gabinete Wever-Croes.
Pagina 8
Dialuna 20 Juni 2022
Prome Minister Evelyn Wever-Croes:
INAUGURACION DI WEGANAN ESCOLAR Prome Minister ta felicita Minister Endy Croes, IBISA, stakeholders y tur scol cu ta participa
Diabierna 17 di juni a tuma luga den Stadion Guillermo Prospero Trinidad, e apertura di Weganan Escolar, WE Aruba. Prome Minister Evelyn Wever-Croes tawata presente na e evento bunita aki na unda cu el a haya e oportunidad pa dirigi palabra durante e ceremonia cu a tuma luga. Presente tambe tawata Presidente di Parlamento señor Edgard Vrolijk, parlamentarionanan, ministernan, invitadonan y e invitado special Ser. Denzel Dumfries. Pero ta tur nos muchanan presente tawata mas importante durante henter e evento. Despues cu algun tempo pasa cu Minister Endy Croes a anuncia cu Weganan Escolar lo cuminsa den juni, e entusiasmo a cuminsa crece wardando e dia aki yega. Den nomber di Gobierno di Aruba, Prome Minister a gradici especialmente minister di Enseñansa y Deporte Endy Croes, pa su vision y determinacion den haci e soño aki posibel. Prome Minister a gradici IBISA, scolnan y diferente stakeholder pa organisa e tremendo Weganan Escolar bou di e nomber We ARUBA. Prome Minister ta felicita y gradici tambe e 35 scolnan cu a clasifica y lo competi contra otro den 8 diferente disciplina. “Deporte ta trece nos tur hunto, pasobra ora nos mira nos muchanan, nos hobennan, nos adultonan den deporte, bo ta mira cu no tin distincion. Tin union. Y e union aki den deporte y den eseñansa ta locual cu nos kier logra. Uniendo forsa nos
por logra mucho mas! E tempo di Covid tabata un tempo dificil pa nos tur, especialmente pa nos muchanan y deportistanan. Muchanan mester a keda cas, no por a bay scol, no por a practica deporte. P’esey, saliendo for di e pandemia di Covid, mi kier pidi un y tur, ban haci uzo di e forsa di deporte pa brinda nos muchanan speransa y perspectiva y duna nan e balor y importancia pa comparti alegria, fomentando deporte”, Prome Minister a expresa. Na final di su disurso, Prome Minister a dirigi palabranan na Hulandes y a gradici e strea di futbol di Inter Milan Italia y Seleccion di Hulanda, señor Denzel Dumfries cu tambe tawata presente na e apertura di We Aruba. “Aruba ta considera bo un hereo nacional. Bo ta un inspiracion pa nos muchanan. Mi ta spera cu hopi di nan lo sigui bo ehempel di pasion, trabou duro y disciplina. Danki pa tur cos y pa ta presente”. Prome Minister ta haci invitacion pa Aruba henter, mayornan muy especial, pa apoya nos muchanan henter e siman aki di 17 pa 25 di juni durante e gran campeonato di Weganan Escolar. Prome Minister ta desea tur scol, tur atleta hoben, tur docente y tur mayor, hopi exito den e Weganan Escolar. “Nos ta hopi orguyoso di boso caba”.
Dialuna 20 Juni 2022
Continuacion INAUGURACION DI WEGANAN ESCOLAR....
Pagina 9
Pagina 6
Dialuna 20 Juni 2022
Minister di Finansa den reunion cu Secretario di Estado Van Huffelen riba RAFT:
KEDA TENE RIBA NORMA FINANCIERO PREPANDEMIA TA HACI DAÑO NA GOBERNACION Y NA ECONOMIA DI ARUBA Ta bon pa haya un opinion di un tercer riba e factibilidad di e normanan cu tin awo riba mesa
Hunto cu Minister President, Minister Maduro a reuni diasabra cu Secretario di Estado Van Huffelen riba locual mester bira e Ley di Reino pa supervision financiero RAFT. Pa e mandatario di Finansa ta importante pa Aruba por tin normanan adapta na e situacion post-pandemia, ya cu e situacion financiero despues di e pandemia ta uno hopi diferente cu esun di aña 2018 ora a cera Protocol cu Hulanda. Keda tene na normanan pre-pandemia lo duna resultado irealistico y ta haci daño na gobernacion y economia di Aruba. Pesey ta bon pa haya e opinion di un tercer riba e factibilidad di e normanan cu awo tin riba mesa. Di LAFT pa RAFT Desde aña 2015 Aruba conoce supervision financiero basa riba e Ley di LAFT. Den e relacion nobo cu Aruba tin cu Hulanda na unda cu Aruba ta haya fianza di Hulanda pa surpasa e pandemia, Hulanda a pone como condicion pa e supervision financiero existente wordo etala na nivel di Reino den forma di un Ley di Reino, Rijkswet Aruba Financieel Toezicht (RAFT). Di e manera aki Aruba lo conoce e mesun sistematica di supervision financiero manera esun di Corsou y Sint Maarten. Motibo pa e cambio di LAFT pa RAFT, ta e deseo pa Hulanda tin mas di bisa den e situacion di supervision, awor cu a haci fianza grandi na Aruba. NORMA FINANCIERO E supervision financiero ta basa riba algun norma pa locual ta e nivel di deficit, debe y gasto di personal. Den e Ley di LAFT tabata tin norma financiero pa aña 2015 pa 2018. Ora esakinan a caduca, a acorda normanan nobo den e Protocol di aña 2018 cu mester conta di aña 2018 pa 2021. Na december 2021 a alarga e Protocol di 2018 cu dos aña mas te cu aña 2023. Debi na e hecho cu Hulanda ta presta Aruba placa, nan kier a mira e supervision den forma di un Ley di Reino y pa cu esaki ta
negosha awor riba e normanan nobo pa e tempo nos dilanti. Te cu awor a logra pa negosha e norma pa gasto di personal y esun pa e debe, pero esun pa e deficit ainda Hulanda ta boga pa e norma ta un surplus pa aña 2023 bay dilanti. Teniendo na cuenta e efecto financiero di e pandemia y e hecho cu Aruba ta den pleno recuperacion, e norma pa un surplus di 1% equivalente na 60 miyon florin pa aña 2023 en adelante, ta uno hopi dificil pa por bay cumpli cun'e. Esaki lo significa den practica, por ehempel, un recorte den presupuesto di Pais Aruba di 287 miyon florin. Un suma cu lo paralisa gobernacion y hunto cun'e lo tin efecto negativo pa economia di Aruba. Pa e motibo aki keda wanta na e norma pa deficit lo produci resultado irealistico. UN TERCER PA DUNA UN OPINION RIBA E NORMA Pa por yega na un norma mas adecuado pa Aruba, ta pidi e opinion di un tercer persona. Hulanda kier pa CAFT duna su opinion riba e normanan. Di banda di Aruba ta pidi IMF pa indica si e norma cu tin te awor riba mesa lo ta uno factibel pa Aruba.
Dialuna 20 Juni 2022
Pagina 7
Minister Maduro di Cultura: Den cuadro di preparacion Kibra Coco Edicion San Juan - Dera Gay
SCOLNAN A RICIBI VIDEO LINK DI PRODUCCION “DIA DI SAN JUAN - DERA GAY” Un produccion pa educa nos muchanan di nos tradicion di fiesta di cosecha
Pa prepara pa participa den e programa Kibra Coco – Edicion San Juan – Dera Gay y pa docentenan por tin material educativo, tur scol a ricibi un email cu informacion. Por bishita e link: https://www.youtube.com/watch?v=t_JB8HEFt9U of tambe e youtube channel di Minister di Cultura Xiomara Maduro. E produccion digital cu tin como titulo “Dia di San Juan - Dera Gay, Nos Tradicion”. Tradicion ta yuda uni nos, pa e motibo aki a crea e produccion di Dia di San Juan, miho conoci como Dia di Dera Gay. Ta trata di un video informativo cu e meta pa conscientisa specialmente nos muchanan y generacion nobo, di e origen y historia di nos tradicion di fiesta di cosecha cu ta wordo celebra dia 24 di juni. E video aki no ta solamente pa duna lus na e bunita historia di celebracion di San Juan, pero tambe con ela evoluciona y bira manera e ta awe. Ta importante pa mantene e bunita tradicion aki bibo pa asina duna honor na nos antepasadonan. Minister Xiomara Maduro ta haci un apelacion na comunidad pa ta cauteloso ora di cende candela durante Dia di San Juan. Candela ta un elemento hopi peligroso cu facilmente por destrui naturalesa, infrastructura y hasta por causa morto. Si kier cende candela haci esaki na un manera responsabel sin perde control. Ministerio di Cultura hunto cu Comision Celebracion Dianan Nacional lo sigui hiba un maneho caminda ta percura pa tur
scol basico sigui ricibi material informativo di nos Dianan Nacional y Fiestanan Cultural pa por wordo usa den lesnan na scol. Por ultimo e mandatario encarga cu cultura ta invita tur muchanan di scol basico pa participa den e Competencia di Kibra Coco cual lo tuma luga, diasabra 25 di juni cuminsando pa 5 or di atardi na Teleraruba. Un danki na Ministerio di Cultura, Comision Celebracion Dianan Nacional, Povi-Tree, Departamento di Cultura, Archivo Nacional Aruba, Telearuba, HP, SETAR y e comision forma pa docentenan di scol basico y dos graduadonan di Bachelor Papiamento pa nan contribucion pa logra otro edicion di Kibra Coco.
Pagina 4
Dialuna 20 Juni 2022
Minister Maduro di Finansa:
E PANDEMIA A CAMBIA E SCENARIO FINANCIERO DI ARUBA, PERO E FOCUS DI GOBIERNO PA YEGA NA UN FINANSA PUBLICO MANEHABEL Y SOSTENIBEL A KEDA MESUN COS Locual falta ta norma financiero adapta na e realidad financiero post-pandemia Asina por constata cu na fin di aña 2019 a logra yega na un surplus, despues cu pa 12 aña largo Aruba a conoce deficitnan grandi. A KIBRA TENDENCIA DI CRECE DEBE Aruba su debe externo a wordo redobla cu 2 mil miyon florin den un tempo record di 4 aña den e periodo 2010 pa 2014. E debe aki ta pone un presion grandi riba finansa publico y ta afecta economia di Aruba. Na aña 2018, Gobierno a tuma paso pa frena e crecemento di debe y asina por constata cu na aña 2019 ta logra kibra cu e tendencia di crece debe. Despues cu di aña 2014 pa 2018, Aruba su quota di debe tabata fluctua rond di 75%, na aña 2019 e quota a baha bay na 71% y di e manera aki a logra kibra e tendencia di crece e debe di nos Pais.
Riba e tereno di finansa publico, Aruba a bin ta dal stapnan grandi den e bon direccion. Despues cu na aña 2015 Aruba a conoce supervision financiero debi cu e Gobierno e tempo eynan a laga bay di tur normanan di un finansa publico manehabel, na aña 2017 a cambia e rumbo di finansa publico di Aruba pa bay den un direccion mas manehabel y sostenibel. E pandemia mes a trece un cambio grandi den e scenario financiero di Aruba, pero e focus di Gobierno pa yega na un finansa publico manehabel y sostenibel, a keda mesun cos. Locual falta ta normanan financiero adapta na e realidad financiero post-pandemia. DI DEFICIT PA SURPLUS Aruba a core cu deficitnan grandi den e periodo di 2010 pa 2015. Esey tabata motibo tambe pakico Aruba a wordo someti na supervision financiero. Na aña 2017 Gobierno a cambia di signatura y di rumbo y na aña 2018 Gabinete Wever-Croes a prepara un plan financiero y economico pa stipula e pasonan cu Gobierno lo tuma pa cambia e rumbo financiero di Aruba.
A CUMPLI CU NORMA NAN DI PROTOCOL DI NOVEMBER 2018 Pa sigura cu e rumbo financiero ta cambia na Aruba, a cera un protocol cu Hulanda na november 2018 den cual a stipula algun norma financiero pa deficit, debe y gasto di personal pa e añanan 2018 pa 2021. A wordo palabra pa yega na un surplus na aña 2020 di 0,5% cu ta equivalente na 25 miyon florin y na aña 2021 y despues un surplus di 1% cu ta 50 miyon florin. Aruba a logra yega na fin di aña 2019 na un surplus chikito di 3,9 miyon florin. Pa aña 2020 a logra entrega un presupuesto cu un surplus di 46 miyon florin na Parlamento, pero e pandemia a cambia e scenario financiero. Pa e debe a stipula un bahada di e quota di debe na 70% na aña 2027 y na 50% na aña 2039. Aruba a logra yega na 71,8% na aña 2019 cual ta indicacion cu lo cumpli cu e norma aki di forma adelanta, sino tabata pa e prestamonan cu mester a wordo haci na Hulanda pa por a enfrenta y surpasa e pandemia di Covid-19. Pa e gastonan di personal a palabra pa kibra e trend di subida di gasto di personal, reduci esaki tur aña y pa tene esaki bou di 479 miyon florin. Aruba a cumpli door di contene gasto pa por a keda bou e nivel di 479 miyon. Pues Gobierno a logra kibra e trendnan di crecemento di deficit, debe y gasto di personal y ta logra cumpli asina grandemente cu e normanan di e Protocol di november 2018.
Dialuna 20 Juni 2022
Continuacion E PANDEMIA A CAMBIA E SCENARIO FINANCIERO DI ARUBA.... LOCUAL FALTA TA NORMANAN FINANCIERO ADAPTA NA E REALIDAD FINANCIERO POST-PANDEMIA E pandemia a cambia e realidad financiero di Aruba. Na aña 2020 y 2021, Aruba a core cu deficitnan enorme debi cu entrada a cay drasticamente. Aruba mester a fia 916 miyon florin di Hulanda y esaki a pone e quota di debe bay te 127,1% na 2020 y 108% na 2021. Gobierno a purba pa contene su gastonan y wanta mas cu por na tur palabracion di e Protocol y tambe na tur condicion cu Hulanda a impone pa por a yega na fiansa nan di Covid. Sinembargo e realidad financiero cu Covid a trece cune pa mundo y Aruba, ta exigi un adaptacion di e normanan. Keda wanta na e normanan pre-covid pa deficit, debe y gasto di personal den e tempo nos dilanti, ta hiba na resultado irealistico y ta haci daño na gobernacion y economia di Aruba. Sigur en bista di e reformanan necesario den cuadro di e palabracionnan di 'Landspakket,' keda wanta na norma pre-covid no lo duna resultado positivo pa Aruba. Pa Aruba por keda focus den direccion di un finansa publico manehabel y sostenibel, locual cu falta ta norma financiero adapta na e realidad financiero post-pandemia. Eynan e energia di tur negosacion cu Hulanda, supervision di CAFT y e debate publico mester ta dirigi. E pandemia por a cambia e scenario financiero di Aruba, pero e focus di Gobierno y di Minister di Finansa di Aruba pa yega na un finansa publico manehabel y sostenibel, a keda mesun cos. Cu norma financiero realistico, e trabou di mehoracion financiero por sigui na bienestar di Pais Aruba.
Pagina 5
Pagina 10
Dialuna 20 Juni 2022
YES A ILUSTRA RESILIENCIA Y DETERMINACION DI SAN NICOLAS
Minister Geoffrey Wever ta enfoca riba futuro potencial economico Durante fin di siman a termina e seminario di YES San Nicolas. E Young Entrepreneur Summit aki, organisa pa Ministerio di Asuntonan Economico, Comunicacion y Desaroyo Sostenibel, a conta cu participacion di varios personanan renombra den comunidad pa nan experiencia y conocemento empresarial, especialmente den e area di San Nicolas. Den e parti di mainta a organisa un Youthpreneur event, den colaboracion cu Kiwanis San Nicolas, unda tabata tin un workshop di con pa traha un business plan, y tambe un iChoose workshop cual a enfoca riba e deseo y gusto di e participantenan, y con nan por "put your dream to work". Ta notabel cu tabata tin hopi bon idea y presentacion di e grupo aki consistiendo di participantenan entre 12 y 17 aña di edad. Despues di un dia largo di workshops, a clausura e evento anochi cu un "panel discussion", unda e tema central tabata "The economic future of San Nicolas & Aruba". Durante e presentacion, varios di e panelistanan a trece puntonan valioso padilanti. Minister di Asuntonan Economico, Comunicacion y Desaroyo Sostenibel, Sr. Geoffrey Wever, tambe a forma parti di e panel. Minister Wever a keda sumamente contento di e calidad di e combersacion riba puntonan cu ta actual y relevante. "Feedback ta necesario", segun minister Wever, pa asina por crea of modifica legislacion cu lo por sostene desaroyo economico moderno. Entre otro topiconan cu a toca durante e anochi tabata 1) Economic Development 2) Sustainable Development, Energy Policy and Innovation 3) Port of San Nicolas 4) Adult Entertainment and Tourism Industry. Topiconan relevante y al caso cu mester ser discuti pa por yega mas cerca di solucionnan duradero, no solamente pa San Nicolas pero pa Aruba henter tambe. Minister Wever a enfoca cu lo sigui hiba e combersacionnan aki dentro nos comunidad, y lo sigui crea colaboracion entre sector publico y sector priva, pa asina facilita nan y brinda nan e oportunidad pa por lidera e esfuersonan di recuperacion economico pa nos pais.
Pagina 12
Dialuna 20 Juni 2022
A FIRMA CU SETAR N.V. COMO E COMPANIA ANFITRION PA PROYECTO DI CAMARA DEN AREA HOTELERO Dialuna mainta, durante un conferencia di prensa na oficina di Setar Seroe Blanco, Minister di Husticia y Asuntonan Social Sr. Rocco Tjon, a firma e Ministeriële Beschikking (MB) pa otorga na Setar NV e proyecto di camara di siguridad den area hotelero. Esaki den presencia di Director di Setar N.V. Sr. Roland Croes. Combati criminalidad na diferente manera door di haci uso di tecnologia ta un topico sumamente importante, y ta ancra tambe den e vision y e maneho di parti di Ministerio di Husticia y Asuntonan Social. Segun e mandatario, Setar tawata un escogencia logico pa e proyecto aki, mirando cu den pasado intentonan a wordo haci pa por cristalisa e tipo di proyectonan aki, pero nunca a wordo concretisa por completo. Semper tawata tin cierto retonan pa concretisa un proyecto asina, y ora a wak e “track record” di Setar caminda ya caba a ehecuta tipo di proyectonan asina, exitosamente, pa companianan di magnitud manera Aeropuerto, e decision tawata logico pa bay di acuerdo cu e oferta cu a ricibi di Setar. E proyecto aki ta uno cu por keda amplia riba dje, y te cu awo lo conta cu un total di tres fase, e prome fase ta e instalacion di e sistema di camara y for di Ministerio di Husticia y Asuntonan Social ta planiando pa fase dos y tres pa asina practicamente na tur localidad strategico na Aruba por tin e camaranan aki instala. Banda di esaki, na comienso di Juli, Ministerio di Husticia y Asuntonan Social lo instala un comision cu ta bay sigui monitorea henter e desaroyo di e proyecto aki, pa motibo cu e proyecto aki lo conta cu un trayecto di seis pa shete luna. Es decir, e comision aki lo keda monitorea e proceso, pa asina percura cu e ehecucion ta uno exitoso. Na mes momento e comison aki hunto cu Setar lo traha hunto, pa asina cu fase un ta completamente ehecuta por sigui mesora pa fase dos y consecuentemente pa fase tres. Mientras e proyecto aki ta wordo ehecuta, ambos huristanan di Ministerio di Husticia y Asuntonan Social conhuntamente cu huristanan di Setar N.V. lo sigui delibera pa yega na un “service level agreement”, cual ta hopi importante, pa asina
garantisa cu e proyecto aki lo por keda haya mantencion, dado caso un camara of un part daña, esaki por wordo reemplasa of drecha mesora. Pa finalisa, Ministerio di Husticia y Asuntonan Social ta den combersacion cu Ministerio di Turismo y Salubridad Publico, pa un otro parti importante, cual ta e borchinan cu lo bay wordo instala den e area hotelero, pa anuncia cu e area lo ta bou di vigilancia di camara, y na mes momento tambe lo percura pa “infomercials” wordo saca, pa asina conscientisa pueblo di Aruba en general cu e area ta bou di vigilancia. E comision lo keda encarga tambe pa bin cu un proposicion pa asina evalua con e imagennan aki ta bay wordo vigila y con esaki ta bay wordo comparti tambe cu e unidadnan pa despues por reacciona tambe ora cu algo wordo capta riba e camaranan aki. A haci un evaluacion cu otro paisnan den exterior, pa cu e parti di vigilancia di e camaranan, y a opta pa otro organisacionnan of fundacionnan cu tin e autoridad cu ta mara na diferente regla lo bay keda encarga cu esaki, pa di e forma aki por percura cu nos agentenan policial por sigui ehecuta nan core business. Por ultimo, ta gradici tur trahado di Ministerio di Husticia y Asuntonan Social cu a haci esaki posibel den un tempo relativamente cortico pero tambe e personal di Setar kende a traha hunto cu Ministerio pa percura cu por firma e MB caminda ta aloca tur e fondonan. Esaki ta e prome di hopi proyecto mas pa bin na bienestar di pais Aruba.
Pagina 14
Dialuna 20 Juni 2022
GRANDIOSO APERTURA DI WEGANAN ESCOLAR WE ARUBA 2022 Organisadonan ta yama danki na tur esnan cu a haci esaki posibel y ta aprecia tur sugerencia di comunidad di Aruba
E gran apertura di Weganan Escolar (WE) Aruba 2022 a tuma luga diabierna ultimo na unda cu sigur nos muchanan cu a participa y publico en general como tambe pueblo cu a wak esaki via canal di televisionnan y medionan social, a goza y a demostra e entusiasmo cu a reina pa e evento escolar aki. Manera conoci, Gabinete Wever-Croes, bou maneho di Minister di Enseñansa y Deporte, Endy Croes, a duna balor na e weganan escolar y a pone den un bachi nobo. Ta e intencion pa Weganan Escolar bira popular un biaha mas na Aruba na unda cu muchanan por cera un aña escolar den un competencia deportivo sanamente cu otro.
Despues di e evento, Gobierno di Aruba, Ministerio di Enseñansa y Deporte, IBISA y DCA a haña diferente feedback di comunidad di Aruba. Cu hopi esfuerso di e entidadnan aki y despues di varios aña y cu cooperacion estricto di varios ‘stakeholder’, a logra e meta pa haci e Weganan Escolar algo grandi atrobe. Cultura y deporte ta un pilar hopi importante pa desaroyo di pais Aruba. Despues di temporada dificil di pandemia, y mirando cu Aruba ta den pleno recuperacion, ta nesesario pa duna atencion na temanan positivo den comunidad, manera ta e caso cu e Weganan Escolar.
Dialuna 20 Juni 2022
Continuacion GRANDIOSO APERTURA DI WEGANAN ESCOLAR.... E organisadonan a opta pa haci e apertura den un tema festivo den combinacion cu un parti formal y un parti oficial na unda un gran parti di e mandatarionan y representantenan di organisacionnan deportivo nacional y internacional tabata presente. Pa percura cu tin un bon balans, a opta pa celebra e apertura manera cu ta custumber den tradicion y normanan Arubano. Bunita tawata pa wak e defile di scolnan participante pasa cu alegria pa cuminsa competi cu otro scolnan cu e speransa pa fortifica lasonan di amistad y hermandad entre nos muchanan. Un banda musical a toca pa anima tur presente y tambe tabatin un brassband y DJ. Tambe a percura cu e muchanan participante haña algo di come y bebe, algo cu scolnan y mayornan a aprecia masha hopi. Minister Endy Croes y organisadrnan ta gradici tur esnan cu tin sugerencia, conseho y of critica constructivo cu por yuda mehora e organisacion di Weganan Escolar, y en general mehora nos custumbernan tambe di celebra proyectonan den un manera mas saludabel. Cada sugerencia, conseho y critica constructivo ta bon bini y ta wordo teni cuenta cu ne pa e planiamento di e Weganan Escolar 2023 pa asina por haci e evento aki mas grandi ainda cu esun di 2022 cu apenas a cuminsa. “Hunto nos ta logra un comunidad mas saludabel y activo y nos ta desea tur mucha cu ta participa den e Wegannan Escolar 2022 hopi exito”, Minister Endy Croes a expresa.
Pagina 15
Dialuna 20 Juni 2022
Pagina 13
MINISTER GLENBERT CROES A BISHITA E JOB FAIR ORGANISA PA AFBA Dialuna, Aruba’s Food & Beverage Association a organisa un Job Fair den Renaissance Convention Center. E mandatario riba su Social Media a haci un yamada na Aruba pa participa na e Job Fair. “Tin hopi oportunidad pa trabao pa tur hende. Please participa. Aruba mester di nos tur.” E mandatario a expresa su gratitud na AFBA pa a tuma e iniciativa aki y cu semper lo por conta cu su apoyo. E mandatario a gradici y expresa su orguyo na DPL cu tambe a participa.
Pagina 16
Dialuna 20 Juni 2022
Gobierno di Aruba:
DENZEL DUMFRIES: SI BO KERE DEN BO MES Y BO SA KICO BO KIER TUR COS TA POSIBEL Exito na tur muchanan participando den Weganan Escolar 2022 Diabierna 17 di juni na ocasion di apertura di Weganan Escolar 2022, WE Aruba, E hoben deportista profesional Denzel Dumfries a hiba palabra na tur muchanan presente y desea nan exito durante e weganan escolar. Sr. Dumfries a haci uzo di e oportunidad pa gradici Prome Minister Evelyn Wever - Croes y tambe Minister encarga cu deporte Endy Croes pa e oportunidad di ta presente. “Mi ta hay’e sumamente fantastico pa ta aki y pa mira cuanto mucha lo participa na e weganan aki.” El a sigui bisa cu e ta un honor pa e por ta na Aruba unda cu el a biba algun tempo y unda cu semper e ta sinti’e na cas unabes cu e tey bek. “Mi ta haye interesante pa mira tur e felisidad di muchanan y cuanto gana e muchanan tin pa participa na e weganan.” Sr. Dumfries a splica di e bunita ruta cu el a encamina pa yega na hunga pa Inter Milan y tambe pa forma parti di e team nacional di Hulanda y aworaki den preparacion pa WK na december. “Tur esaki mi a logra door di traha duro, kere den mi mes, confia den mi mes y semper busca retonan nobo pa mi mes. Algun dia bo ta logra y otro dianan no, pero un cos cu mi semper tabatin ta cu mi ta kere den mi mes. Si bo ta kere den bo mes, den bo mesun cualidadnan y bo sa loke bo kier, e orey tur cos ta posibel. Esey ta loke a semper pusha mi durante henter mi carera te dia di awe,” sr. Dumfries a bisa. Por ultimo, el a gradici un y tur cu a haci posibel pa e por tabata presente na e apertura di Weganan Escolar 2022. “Mi ta haye fantastico pa mira cuanto hende a presenta na e ocasion”. Alabes sr. Dumfries a desea tur mucha hopi exito cu e weganan y spera cu cada mucha duna e miho di nan mes, “Doe jullie best”.
Pagina 18
Dialuna 20 Juni 2022
Señora Omaira Lares Directora di DRH
AMBTENAARNAN TIN TE CU 14 DI AUGUSTUS 2022 PA ENTREGA PETICION PA VUT Diahuebs mainta durante conferencia di prensa di Gobierno di Aruba, Prome Minister Evelyn Wever-Croes y Directora di Departamento di Recurso Humano (DRH) señora Omaira Lares a dun splicacion amplio riba e areglo di VUT cu diaranson ultimo 15 di juni a habri pa tur ambtenaar cu desea di aplica pa e areglo aki. Señora Lares a duna splicacion mas detaya di tur loke ta encera VUT-regeling 2022. Por aplica te cu diadomingo 14 di augustus 2022 y e ultimo fecha pa por baha cu VUT ta 1 september 2023. Conforme ley, un ambtenaar tin dos luna di tempo, segun e temporada stipula, pa entrega e peticion. Cualkier ambtenaar cu tin deseo pa yena un formulario y/of ricibi informacion y splicacion di e posibilidad pa tuma VUT, por haci esaki via di vut@drh.gov.aw of por yama na 522-9999. Haciendo esaki, DRH por haci un cita cu esnan interesa, y duna cualkier informacion of calculacion cu e ambtenaar ta desea, prome cu un decision wordo tuma. Algun informacion importante pa tene cu ne ta entre otro e maximo di 36 luna cu por haya e uitkering. E cantidad di luna cu un persona tin derecho riba dje ta bay segun e cantidad di luna cu un persona ta den servicio di Gobierno. Un otro punto importante pa tene cuenta cu ne, manera poni den ley, ta e periodo di ‘onafgebroken diensttijd’. Si un persona tuma BVVD y bay biba den exterior pa 3 aña y despues bin bek, esaki ta wordo conta cu a interumpi su periodo di servicio. Unabes cu un persona bay cu VUT, e ta haya 90% di e suma di su ultimo salario mensual pa e prome 12 lunanan, sigui pa 80 % y despues 70%. Ademas tin algun toelage cu cada ambtenaar ta bin na remarke pe, depende di e trabou di e diferente ambtenaarnan cu ta determina si ta ricibi nan of no. Tambe si durante e periodo cu e ta cobrando VUT e persona fayece, e ta haya su ‘overlijdingsuitkering’ di ambtenaar hunto cu e 3 luna uitkering manera un ambtenaar activo lo haya. E ambtenaar inactivo no ta haya e dianan di vakantie, atv-dagen, overtime etc. pa motibo cu e no ta activo y no ta acumula esakinan. Un aspecto hopi importante tambe ta e hecho cu den ley tambe tin e asina yama ‘terugkeer verbod’ den dienst, cual ta valido pa un periodo di 5 aña pa un persona cu tuma VUT. E organisacionan unda cu e persona no por bay traha ta wordo menciona den ley. E mag di traha den sector priva pero no na un entidad cu ta liga na Land Aruba. Unbes cu un aplicacion drenta, e comision mester dicidi dentro di 4 siman despues di ricibi e peticion riba e peticion di VUT. Den caso di tardansa, e departamento lo percura pa manda un
carta y informa e ambtenaar di e tardansa. Por ultimo, DRH ta recomenda esnan cu ta desea di ricibi mas informacion tocante locual e ta bin na remarke pe, pa tuma contacto cu DRH pa e calculacionnan wordo haci den cada caso specifico.
Dialuna 20 Juni 2022
Continuacion AMBTENAARNAN TIN TE CU 14 DI AUGUSTUS 2022....
Pagina 19
Pagina 20
Dialuna 20 Juni 2022