Prome Minister durante e di XXV FTA Congreso Statutario
GOBIERNO LO SIGUI INVERTI DEN SALUD MENTAL
Recientemente Prome Minister Evelyn Wever-Croes tabata presente na e Congreso Statutario di FTA, na unda el a wordo invita pa duna un discurso. E tema e aña aki tabata riba "E riesgonan psychosocial cu lo por tin un efecto riba e mercado laboral". Prome Minister a indica cu salud mental berdad ta un problema grandi y cu cambionan den e area di trabou di un persona por trece stress y ansiedad cu lo por tin efecto psychosocial cu lo mester di atencion. Ta importante si pa reconoce cu problema mental no ta un asunto personal so, sino ta toca nos cada un riba e isla aki.
E mandatario a sigui splica cu e mundo ta den un era unda e dinamismo di trabou ta cambia continuamente. Awendia e mundo ta technologia digital, globalisacion, y e manera nobo di traha den e economia di “gig” ta drenta nos bida profesional. Pero e mesun technologia cu ta duna progreso, ta bin cu retonan nobo: stress, insiguridad di empleo, y un desbalance entre bida priva y trabou.
Importante ta pa acepta cu e reto di salud mental ta bira cada bes mas y mas prominente, y pa cu esaki, Gobierno di Aruba tin un rol fundamental, y ta tuma e retonan aki na serio. P’esey a inverti hopi den conscientisacion, creando programa pa yuda e hende cu ta sufri di stress y ansiedad.
Prome Minister a expresa di ta satisfecho pa mira cu e
esfuersonan aki ta trahando, pero sa cu tin hopi mas pa haci den e area aki. E impacto cu stress por tin riba un trahador, no solamente den trabou, pero tambe den su bida personal ta uno grandi. Aki na Aruba, tur hende sa cu bida no ta solamente traha, pero tambe mester tempo pa disfruta di nos dushi isla den cercania di famia y amigonan. Desafortunadamente sin salud mental, esaki lo por bira dificil.
"Aruba ta un isla chikito, pero grandi den curazon, nos compromiso pa nos pueblo ta haci nos fuerte pa enfrenta cualkier reto nos dilanti. Pero sin salud mental sano, nos no por desaroya como comunidad. Mi ta sigur, cu amor pa nos pais y dedicacion pa nos hendenan, Aruba lo sigui ta mas fuerte, mas uni, y miho prepara pa enfrenta cualkier reto nos dilanti. E futuro ta den nos man y ta nos responsabilidad di crea e pais cu cada un di nos merece.
Mi ta felecita FTA pa un congreso exitoso y pa scoge e tema importante aki. Gobierno ta reconoce cu salud mental ta un reto grandi, y lo sigui inverti y pone atencion na salud mental, pa asina crea un ambiente laboral mas saludabel y sostenibel, y pa brinda ayudo na un forma senciyo na tur esnan cu mester. Masha pabien FTA cu e di 60 aniversario, y cu boso cumpli hopi mas trahando na bienestar di pais Aruba", Prome Minister a expresa.
Prome Minister Evelyn Wever-Croes: PROME MINISTER DI ARUBA TA LIDERA DELEGACION DI REINO NA SUMMIT
OF THE
FUTURE RIBA 21 Y 22 DI SEPTEMBER NA
NACIONNAN UNI
Premier Evelyn Wever-Croes lo representa Aruba, dia 21 y 22 di september 2024 na e Summit of the Future na Nacionnan Uni na New York. E Summit of the Future ta precedi e siman ministerial di e 79 edicion di Asamblea General di Nacionnan Uni cu ta e momento den aña unda lidernan di mundo ta bin hunto pa enfoca riba retonan mundial y traha hunto pa trece solucionnan.
Minister-President lo lidera como hefe di delegacion di Reino, y participa activamente na e Summit of the Future, un encuentro riba tarima internacional importante cu tin e meta pa fortalece cooperacion mundial y garantisa un futuro sostenibel pa generacionnan venidero. E meta principal tras di Summit of the
Future ta pa trece lidernan y representantenan gubernamental, sociedad civil, NGO, sector priva, mundo academico y hobennan hunto pa asina colectivamente traha riba un mundo inclusivo, husto y sostenibel cu ta responde debidamente na e realidad y varios reto geopolitico di siglo 21. Na e forma aki tur pais, incluyendo islanan chikito manera Aruba, por ta inclui den combersacionnan y decisionnan importante riba tarima internacional.
E cumbre lo enfoca riba temanan clave manera cambio di clima, innovacion tecnologico, derechonan humano, igualdad di genero, hoben y e futuro generacionnan.
Prome Minister lo duna un aporte importante como un di e oradornan principal na e culminacion di e Declaration on Future Generations di cual Reino Hulandes y Jamaica a sirbi como co-facilitado. E Declaration on Future Generations ta enfoca riba e importancia di premira y inclui e necesidad di nos futuro generacionnan den maneho y decisionnan mundialmente.
Prome Minister lo enfatisa tambe durante otro reunionnan na New York e retonan unico di SIDS, cu islanan chikito manera Aruba, tambe ta encontra. E enfoke principal lo ta riba desaroyo sostenibel y e efectonan di cambio di clima. E topiconan aki ta di gran importancia pa Aruba, mirando e consecuencianan di cambio di clima manera e subida di nivel di lama y e necesidad pa un crecemento economico sostenibel. Ademas di su participacion na e Summit of the Future, Prome Minister Wever-Croes lo reuni cu varios hefe di estado y representantenan di organisacionnan internacional pa sigui estrecha lasonan entre Aruba y su partnernan. E discusionnan aki ta enfoca riba entre otro desaroyo economico, cooperacion tecnologico y asistencia tecnico.
Aruba como un isla chikito den Caribe, participando na e cumbre aki encabesando e delegacion di Reino Hulandes ta subraya e fortalesa, capacidad y determinacion di nos pais pa hunga un rol activo riba escenario global y contribui na solucionnan.
HUNTA DI SUPERVISION TA INFORMA RETIRO DI DIRECTORA DI SERLIMAR
Minister di Transporte, Integridad, Naturalesa y Asuntonan di Adulto Mayor a wordo informa door di Hunta di Supervision(RvT) di Serlimar ayera atardi, cu e Directora di Serlimar, Sra. Melitza Geerman, a tuma su retiro.
“Mi ta lamenta cu e compania ta haya su mes den un situacion asina na e momentonan aki. Mi a urgi e Hunta di Supervision pa mantene continuidad den e servicionan di Serlimar durante e transicion aki. Mi tin tur confiansa cu e Hunta di Supervision lo inicia e proceso pronto pa nombra un director nobo,” Minister Arends ta reacciona.
Ministerio ta extende palabra di gratitud na Sra. Melitza Geerman pa su cooperacion y su trabounan desplega, y ta desea Sra. Melitza tur clase di exito den su futuro.
Minister Maduro di Finansa ta informa:
E MANDATO DI DIRECTOR DI ADUANA TA
VALIDO PA HACI HURAMENTACION NECESARIO
NA DEPARTAMENTO DI ADUANA
Tur ambtenaar cu falta huramenta lo wordo haci conforme e reglanan nobo di Departamento di Recurso Humano
E siman aki a sali un articulo den prensa den cual Sindicato SADA ta cuestiona e hecho cu tin ambtenaar na Aduana cu ainda no a huramenta y cu Gobernador lo a duna instruccion pa para e huramentacion debi na e pasado disciplinario di e Director di Aduana. Banda di esaki e sindicato ta cuestiona tambe cu desde aña 2019 nan a pidi Minister di Finansa pa bin cu un solucion y cu segun nan e mandato cu e Director di
Aduana tin pa haci huramentacion di Aduaneronan no lo ta bon of valido.
MANDATO VALIDO DUNA PA GOBERNADOR
Como Minister di Finansa encarga cu e Cuerpo di Aduana, nos por informa cu e mandato duna na e Director sr. Ricky Croes na aña 2017 door di su Excelencia Gobernador di Aruba pa haci huramentacion na Departamento di Aduana ta uno valido. No obstante e hecho cu e director di Aduana den su funcion anterior na Departamento di Impuesto a haya un multa disciplinario, esaki no a wordo considera di tal indole cu mester a kita e mandato cu Gobernador a duna na su persona como Director di Aduana pa por haci huramentacion.
PROCUDURA NOBO PA HURAMENTACION
Minister Maduro di Finansa ta splica cu e motibo cu e huramentacion di Aduaneronan nobo no a tuma luga ainda tin di haber cu e hecho cu Departamento di Recurso Humano ta trahando riba un procedura nobo pa huramentacion di tur empleado publico. Den e procedura nobo, Gobernador lo huramenta tur director prome y despues lo ‘mandateer’ nan (di nobo) pa asina e director por huramenta e empleado publico di e departamento bou nan encargo.
TUR ADUANERO LO WORDO DEBIDAMENTE HURAMENTA
Gobernacion ta algo serio y Minister Maduro di Finansa ta atende na un manera serio cu su responsabilidad. Asina cu e procedura nobo pa huramentacion keda cla, tur empleado publico incluso Aduanero nan nobo, lo wordo debidamente huramenta.
PAIS ARUBA TA DUNA ATIA UN RELATO DI E TRABOUNAN CU TA WORDO HACI DEN CUADRO DI LANDSPAKKET
Siman pasa diabierna 13 di september, pais Aruba a duna ATIA un relato di e trabounan cu ta wordo haci den cuadro di Landspakket. Esaki por medio di un session informativo na unda e diferente trekkers cu ta encarga cu temanan cu tin de haber cu reforma financiero, reforma di nos red di siguridad social, reforma di mercado laboral y reforma di e aparato gubernamental, a reuni pa trata tur e trabounan cu ta wordo haci na e momentonan aki y e trabounan cu tin proyecta pa futuro.
Pa Pais Aruba, a participa na e reunion, Director di Financien, Derrick Werleman – DirFin, Emeliën Kelly – DirFin, Indra Zaandam TWO-AUA, Roraima Arends TWO-AUA, Ghislaine Gomes – DRH, Marylou Tromp – DRH, Omaira Lares – DRH, Glendeline Croes – MinLEI y Yvonne Lee-Perez – DAO.
E tabata un session constructivo na unda cu cada persona cu ta encarga cu e temanan corespondiente a duna un relato di e trabounan cu ta wordo haci. Na mesun momento tambe a para keto na e sistematica di landspakket, di e forma cu ta traha y tambe a splica kico ta e papel di entre otro TWO Aruba como tambe TWO Hulanda.
A para keto na e structura y governance. Tambe a papia di e sistematica di raportahe na unda cu, den e caso aki, e asina yama uitvoeringsagenda ta duna un indicacion di e trayectonan cu ta planifica y e uitvoeringsrapportage ta duna un indicacion di kico tabata e prestacion di trayectonan cu a wordo proyecta.
Pais Aruba ta sumamente contento di por a reuni cu ATIA,
pa asina por splica kico ta e trayectonan cu pais Aruba ta encamina. Asina ta pais Aruba ta sigui informa di e trayecto di landspakket.
