DI REINO NA PANAMA DI BISHITA NA ARUBA PA VARIOS REUNION
Actualmente ta di bishita na Aruba Emabahador di Reino na Panama señor Sander Cohen. Prome Minister Evelyn WeverCroes a indica di a topa señor Cohen durante su bishita na Panama pa instalacion di e presidente nobo di Panama comienso di Juli 2024, na unda a hiba combersacionnan interesante pa loke ta e oportunidadnan comercial entre e dos paisnan. Basa riba e combersacionnan aki, señor Cohen a bin di bishita na Aruba pa asina crea un "handelsmissie" PanamaAruba, cu lo cubri e oportunidadnan comercial.
Durante su bishita, Señor Cohen a reuni tambe cu Minsiter di Asuntonan Economico, Minister di Tursimo, y tambe cu ATIA, Camara di Comercio, AHATA y diferente otro stakeholder pa asina por cuminsa prepara e "handelsmissie".
Manera ta conoci, Aruba ta den recuperacion y un di e puntonan cu Gobierno kier enfoca riba dje ta diversificacion di e economia. Pa cu esaki, Panama lo hunga un rol importante mirando cu tin hopi oportunidad pa explora. Unabes cu nan ta asina leu, representantenan di Panama mes lo organisa e reunionnan necesario cu sector priva na Aruba, pa asina atende algun reunion di preparacion, pa despues por atende e "handelsmissie", cu si logra ta un exito, lo ta di gran beneficio pa pais Aruba.
Prome Minister Evelyn Wever-Croes: Apesar cu oposicion ta yama e aumentonan “cachi
cachi”
GOBIERNO
TA COMPROMETI PA MEHORA E PODER
DI COMPRA DI CADA CIUDADANO DI PAIS ARUBA
Awor ta keda na comerciantenan di Aruba pa tene prijsnan rasonabel
Durante e Conferencia di Prensa di Gobierno di Aruba siman pasa, Prome Minister Evelyn Wever-Croes a mustra e cifranan total di e inversion cu Gobierno di Aruba a haci pa por a aumenta entrada di varios grupo di ciudadano.
Manera ta conoci, luna pasa Gobierno a aumenta e entrada di empleadonan publico cu e indexering, a aumenta e entrada di pensionado, di trahadonan di fundacion, di esnan den sector priva, y e gehandicapten uitkering a aumenta y tur esaki ta yudando cada ciudadano cu e poder di compra.
Oposicion ta yama e aumentonan “cachi cachi” Apesar cu Gobierno a haci e aumentonan aki, alocando mas di 33 miyon florin pa aña 2024 y mas di 105 miyon pa aña 2025, toch ainda parlamentarionan den oposicion ta burla di e aumento cu a duna e ciudadanonan yamando esaki un “cachicachi”.
Prome Minister ta indica cu lo ta bon pa oposicion wak e “big picture”, e totalidad di informacion. E mandatario ta sigui bisa cu su gobierno ta traha responsabel a base di echonan y estudionan y no ta yega duna un hende un suma sin a studia e
total completo pa por duna tur e hendenan di e grupo. Tambe ta tene cuenta cu e costonan pa e aña actual y siguiente aña. E “cachi cachi”, manera cu parlamentarionan di oposicion ta catalog’e, pa e pensionadonan y pa esnan cu ta haya gehandicapten uitkering ta hopi placa, mescos pa e empleado publico, e trahado di fundacion y esun di e sector priva, esaki ta hopi placa. Cada cantidad di placa ta diferente pa cada persona, y sigur cada cen ta yuda. No tin necesidad di haci burla y cataloga un aumento di entrada cu por yuda un hende den su bida diario, como algo negativo.
Gabinete Wever-Croes ta traha na un forma transparente Aruba ta mirando un crecemento economico impresionante. A crea e espacio financiero y awor ta duna alivio na e ciudadano. Gabinete Wever-Croes ta traha na un forma responsabel, transparente, mustrando y ilustrando tur e cifranan. E mandatario a remarca cu ohala Gobierno por a duna mas, pero si haci esaki awor, lo no tin e 200 miyon extra pa otro aña den e presupuesto. Tampoco lo core haci esaki prome cu eleccion y lubida despues di eleccion, pasobra esaki no ta e forma di goberna di e gobierno aki. Gabinete Wever-Croes ta para pa bon gobernacion y esakinan ta compromisonan riba termino largo cu Gobierno ta haciendo.
Prome Minister ta haci un apelacion na comercio di Aruba Gobierno ta compromenti pa mehora e poder di compra di cada ciudadano di Aruba y cualkier oportunidad cu lo bin, lo bolbe haci’e. Ta importante si pa remarca cu ora Gobierno duna e aumento na e ciudadano, no kiermeen cu prijsnan den tiendanan lo baha. Gobierno tin control solamente riba e canasta basico. E prijsnan den tiendanan ta wordo fiha pa e comerciante. Pa e motibo aki Prome Minister ta haci un apelacion na comercio di Aruba, pa “pone man na nan curason”, y baha e prijsnan un poco, haci e producto mas accesibel pa e ciudadano y asina stimula e hendenan gasta mas den e establecimento. E 100 miyon cu Gobierno tin presupuesta anualmente pa e aumentonan ta bay bek den e economia di Aruba y ta beneficia e comerciante mes y henter e pueblo di Aruba.
“E pensionadonan ta un grupo cu a haya varios aumento di pensioen of di e reparatietoeslag durante e añanan. Cada bes cu tin e espacio financiero, Gobierno lo kier duna bek y sigur na e pensionado kende a construi e pais aki pa nos por biba aden. Un pabien na tur esnan cu a bin na remarke pa e aumento di entrada y sa tambe cu esaki lo no keda akinan, nos lo sigui traha pa e prosperidad yega den cada hogar di pais Aruba”, Prome Minister a menciona.
Prome Minister Evelyn Wever-Croes: Prome Minister a ricibi Delegacion Paralimpico Aruba
Y A ENTREGA BANDERA DI ARUBA NA
ELLIOTT LOONSTRA
Nos atleta paralimpico cu lo representa Aruba na Weganan Paralimpico na Paris
Dialuna ultimo, Prome Minister Evelyn Wever-Croes a ricibi e Delegacion Paralimpico Aruba y e atleta reconoci y stima pa henter e pueblo di Aruba, Elliot Loonstra, cu ta bay representa Aruba pa di dos biaha na e Weganan Paralimpico. E aña aki e Weganan Paralimpico ta na Paris y lo inicia na final di augustus.
Den nomber di Gobierno di Aruba, Prome Minister a entrega Elliott e bandera di Aruba cu el lo bay desfila cu ne na Paris, y ta desea Elliott tur clase di exito pa cu e competencianan.
Prome Minister a ricibi di e Delegacion Paralimpico e uniform oficial cu Elliott y e delegacion lo uza na Paris durante e Weganan Paralimpico. Tambe Prome a ricibi e uniform pa Minister di Deporte Endy Croes.
Prome Minister a expresa di a mira Elliott desaroya den e ultimo añanan den un atleta cu hopi dedicacion y pasion pa loke e ta haci. Elliott ya caba tin un total di 15 medaya den e areanan di deporte cu e ta practica, den diferente competencia regional y internacional cu el a participa.
"Nos ta sumamente orguyoso di Elliott, pa tur su dedicacion y entusiasmo pa representa Aruba orguyosamente. El a expresa cu e ta bon prepara y cu e tin un bon plan, y nos tin tur confiansa cu e ta bay ta exitoso.
Tambe mi kier a gradici e comision cu ta busca varios atleta y prepara nan di e miho manera pa representa nos pais dignamente. Nos ta spera cu e entusiasmo y logronan di Elliott por inspira hopi mas atleta pa asina Aruba por conta cu un delegacion mas grandi den futuro. Elliott hopi exito y danki pa tur locual bo ta haci pa e dushi baranca aki. Nos ta sumamente orguyoso di bo", Prome Minister a expresa.
Prome Minister Evelyn Wever-Croes: SECRETARIO DI ESTADO NOBO LO CONTINUA CU E ACUERDO CU HULANDA RIBA E INTERES DI E
DEBE DI COVID
E negosacionnan cu Hulanda awor ta riba “ambtelijk niveau”
Siman pasa dia 12 di augustus, Prome Minister Evelyn WeverCroes a reuni cu e Secretario di Estado nobo di Relacionnan di Reino y Digitalisacion, señor Zsolt Szabó. Durante e Conferencia di Prensa di Gobierno di Aruba diahuebs ultimo, Prome Minister a resumi e bishita di señor Szabó.
Señor Szabó ta conoce Aruba den un situacion financiero trankil y saludabel
Prome Minister ta indica cu señor Szabó ta e di tres Secretario di Estado cu e ta encontra den su carera como Prome Minister. Señor Szabó ta haya Aruba den un situacion totalmente diferente cu tempo cu Secretario di Estado señor Knops a drenta na 2017, cu tawata net despues di Gobierno di AVP y Hulanda tawatin masha hopi desconfiansa den e gobierno ey. Despues na aña 2022 ora cu Secretario di Estado, señora Van Huffelen a drenta tawata net despues di e pandemia di Covid19 y Aruba tawata pasando den un situacion hopi dificil. Señor Szabó awor ta drenta durante un Aruba den un situacion financiero hopi mas trankil y hopi mas saludabel y asina por a dialoga tambe desaroyonan den futuro.
Prioridadnan di Gobierno
Durante e reunion Prome Minister a mustra riba e prioridadnan di Gobierno na e momento aki. Un ta finansas publico, tambe e diversificacion di e economia di Aruba y otro prioridad ta pa traduci e progreso di e pais den prosperidad den cada hogar na Aruba.
Secretario de Estado Szabó lo continua cu e acuerdo pa baha e interes
Otro tema cu a toca durante e reunion cu señor Szabó tawata ta riba e rijkswet.
Manera ta conoci, prome cu Secretario di Estado Van Huffelen a sali, Aruba a yega na un acuerdo cu Hulanda riba e interes
riba e prestamo di Covid. Secretario de Estado Szabó a indica cu e lo continua cu e acuerdo aki unda ta indica cu e interes di Aruba a baha di 6.9% pa 5.1%. E 5.1% ta un “tussenrente”, unda si bin un rijskswet e interes lo baha na 3.4% , pero si no bin cu un rijkswet e lo bay bek na 6.9%.
Negosiacionnan di e rijkswet ta bayendo den bon caminda Prome Minister ta indica cu Aruba tin te luna di mei 2025 pa entrega e rijkswet.
E negosacionnan a cuminsa caba y esaki ta hiba dos trayecto. Un trayecto ta trata e puntonan cu no tin discusion y ta wordo trata, skirbi y elabora riba nan. E otro trayecto ta e puntonan cu si ta den discusion of cu mester warda ainda pa IMF (International Monetary Fund) duna conseho riba e normanan nobo pa Aruba. Na luna di september lo haya e conseho di IMF y por finalisa e parti aki.
“E negosacionnan cu Hulanda ta awor riba “ambtelijk niveau”. Kiermeen e reunionnan ainda no ta entre gobernantenan, pero si nan ta bayendo den bon ambiente. Hulanda a manda un delegacion Aruba na juli cu a negocia durante un siman largo logrando hopi avance. Asina cu nos haya e consehonan di IMF nos ta yega na e puntonan mas delicado y nos lo mester papia y traha riba nan, y e momento ey nos por duna mas update. Importante ta cu e negosacionnan ta bayendo den bon caminda y den bon ambiente.
Tin hopi mas area di trabou pa atende cu Secretario di Estado Szabó, pero pa e reunionnan aki durante su prome bishita na Aruba, el a haya un bon impresion di Aruba. A haci palabracionnan di con nos lo bay traha y comunica cu otro pa mantene e bon relacion di trabou entre e dos paisnan cual ta hopi importante”, Prome Minister a expresa.
Minister Xiomara Maduro ta informa:
ARUBA TA LOGRA UN FIANSA RIBA MERCADO
INTERNACIONAL DI CAPITAL NA UN INTERES DI 6.3%
Esaki ta resultado di un maneho financiero serio pa mehora finansa publico di Pais Aruba
Recientemente durante un conferencia di prensa, Minister di Finansa, Xiomara Maduro a brinda un ‘update’ di finansa publico. Den luna di juni, Minister Maduro a biaha pa Merca hunto cu e profesionalnan di Departamento di Finansa pa busca prestamo pa Pais Aruba riba mercado internacional di capital. Na Merca e ekipo di expertonan financiero di Aruba a haya asistencia y guia di e expertonan di banco Santander y Citibank y hunto nan a bishita durante cinco dia, cinco diferente cuidad na Merca.
Roadshow pa atrae inversionista
Durante di e roadshow aki a brinda e inversionistanan informacion tocante e recuperacion financiero y economico di Pais Aruba despues di COVID-19. Alabes a duna un bista di e situacion actual di Aruba y tur locual Pais Aruba ta haci pa sali for di e situacion di pandemia. Hunto cu esaki expertonan financiero a duna un presentacion tocante e maneho financiero y economico pa reduci debe di Pais Aruba y tambe con Pais Aruba ta prepara pa e reto di e cambionan di clima cu mundo henter ta experiencia.
Inversionistanan a keda impresiona
Despues di seis aña cu Pais Aruba tabata ausente riba mercado di capital internacional, Pais Aruba a subi mercado di capital internacional na un manera exitoso. E inversionistanan a keda impresiona cu e maneho financiero serio di Pais Aruba y a deposita nan confiansa pa Aruba por a logra un prestamo na un interes di 6.3% di interes. Minister di Finansa ta remarca cu Hulanda a brinda Pais Aruba, e prestamonan durante pandemia na un interes di 6.9%.
E mandatario ta subraya cu e exito di Pais Aruba riba mercado internacional di capital ta resultado di un proceso largo, trabou duro y extenso y di un ekipo cu profesionalnan serio cu ta traha cu amor pa Pais Aruba.
ECONOMIA DI ARUBA A CRECE DEN E PROME TRES LUNANAN
Minister di Asuntonan Economico, Comunicacion y Desaroyo Sostenibel, mr. Geoffrey Wever, ta informa cu e economia di Aruba ta sigui mustra un crecemento positivo segun e ultimo publicacion “State of The Economy 2024 Q1” di Banco Central di Aruba.
Den e prome tres lunanan di 2024, indicadornan pa consumo manera importacion di mercancia y consumo di utitidad ta mustra un crecemento compara cu e mesun periodo di 2023. Indicadornan pa inversionnan ta mustra un crecemento den balor di hipopteca nobo pa cas y mientras indicadornan manera importacion di metalnan basico y trabounan deriva, materialnan di construccion y hipoteca comercial nobo ta mustra un caida.
Banco Central di Aruba ta indica cu den e prome lunanan di 2024 Aruba su economia a crece cu 11,2 porciento den termino real. E crecemento aki ta e resultado di e desaroyo positivo den e industria turistico y inversionnan relata na esaki.
Pa luna di maart 2024 e inflacion tawata 2,1 porciento. E inflacion midi riba un promedio anual a sigui baha como di e caida den e contribucion di e subida den tarifa pa utilidad den augustus 2022, prijsnan di gasolin y diesel mas abou, y normalisacion den prijsnan pa cuminda. Pa 2024 Banco Central di Aruba ta proyecta un inflacion di 1,6 porciento.
Departamento di Asuntonan Economico y Fondo Monetario Internacional pa 2024. Publicacion di Banco Central di Aruba ta importante den analisis economico di nos pais y ta contribui pa decisionan economico segun minister Geoffrey Wever”.
“E prome lunanan di 2024 ta mustra un desaroyo positivo di nos economia. . E desaroyo aki ta den liña cu e proyeccionan di economia banda di Banco Central di Aruba tambe di
Ministerio di Asuntonan Economico, Comunicacion y Desaroyo Sostenibel lo sigui monitor e desaroyo di nos economia.
MINISTER GEOFFREY WEVER A REUNI CU EMBAHADOR HULANDES NA PANAMA
RELACIONA CU MISION COMERCIAL PA PANAMA
Minister Geoffrey Wever recientemente a reuni cu embahador di Reino Hulandes na Panama, señor Sander Cohen, director di Holland House na Panama, señor Robert Bosman, directeur di Dienst Buitenlandse Betrekkingen (DBB), señora Jocelyne Croes, y senior policy advisor di DBB, señora Ghislaine Nicolas relaciona cu un Trade Mision cu embahador Hulandes na Panama y director di Holland House ta organizando pa e islanan Hulandes na december 2024.
Usualmente, misionan comercial ta wordo organisa pa un pais y su delegacion comercial bai otro pais, pero e biaha aki e mision comercial ta wordo organisa pa e islanan Hulandes den Caribe, un muestra di solidarismo dentro di e Reino Hulandes.
“Nos ta contento di por forma parti di e mision comercial aki y duna nos comerciantenan e opcion pa expande nan horizonte, conoce un pais di negoshi y oportunidadnan di inversion nobo. Tambe ta uza e oportunidad pa wordo introduci na comerciantenan na Panama, y explora posibilidadnan comercial hunto”, segun Minister Geoffrey Wever.
Como pais cu ta importa gran parti di su productonan nos mester keda sondea den region unda nos por haya producto mas economico y brinda comercio mas opcionnan comercial. Participacion di e otro islanan Hulandes manera Corsou y
Boneiro tambe ta interesante, segun Minister Wever, mirando cu e ta duna nos e opcion pa hunto identifica kico e retonan ta y busca solucionnan comun.
"Den nos experiencia, logistica semper ta un reto, y kizas consolida carga pa e islanan por nifica cu prijs di transporte por wordo reduci y asina tambe e prijs pa nos consumidornan", segun e mandatario.
Minister Wever ta invita comercio Arubiano pa evalua pa haci uzo di e opcion aki.
LO RICIBI SOSTEN TECNICO
DI E EHECUTIVONAN
DI LITTLE LEAGUE WORLD SERIES PA RENOBA STADION DI BASEBALL NA POS CHIQUITO
Durante e biahe di trabou na Pennsylvania na Merca, Minister di Enseñansa y Deporte Endy Croes a reuni cu diferente ehecutivo di Little League World Series entre otro, ‘Chief Operating Officer’ Sr. Patrick Wilson y ‘Senior Ehecutive Operations’ Sr. Dan Velte. A dialoga di diferente tema di interes pa Pais Aruba. Lo ricibi sosten tecnico pa renoba stadion di baseball na Pos Chikito segun e standardnan di Little League. E ehecutivonan a duna un splicacion amplio di nan sistema.
E ehecutivonan a priminti cu unabes e World Series termina, nan ta disponibel pa otro reunion y brinda Aruba sosten. Den caso cu tin necesidad di manda un persona Aruba pa brinda apoyo, lo haci esaki. Pa asina Aruba tin e concepto bon coordina y tin veld cu ta cumpli cu e standardnan internacional cu por “host” competencia internacional na cas. Finalmente, Minister Endy Croes a indica cu e tabata un bon reunion, unda a haci diferente acuerdo na bienestar di deporte di Aruba. Plantando un simiya pa futuro.
Minister Endy Croes: SINTONISA E PROGRAMA INFORMATIVO EN CONEXION
CU E BIAHE DI TRABOU NA WILLIAMSPORT, MERCA
DIARANSON, 21 DI AUGUSTUS
Minister Endy Croes ta invita Pueblo di Aruba pa sintonisa e Programa Informativo, unda cu e lo elabora riba su biahe di trabou na Williamsport, Merca. Durante e biahe aki, e mandatario di Deporte tabatin reunion cu diferente ehecutivo planifica, entre otro director regional Sr. Carlos Pagan y algun
ehecutivo di World Series cu ta atende e weganan riba e nivel aki. Un idea ta pa inicia cu un proyecto na Aruba, unda por tin un Little League Ballpark cu su yerba (turf) pa nos muchanan deportista. Durante e reunion, a evalua kico ta e exigencia- y rekisitonan pa inverti den un parke asina. Tambe Minister Endy Croes a reuni cu Sr. Chrispoher Hansen, kende ta manager di e compania mundialmente renombra Musco.
E compania ta specialisa den fabrica poste di luz, tin un amplio experticio den e calidad di luz y ta calcula e cantidad di lux cu un veld tin mester. Finalmente, Minister Endy Croes a presencia e partido di baseball pa duna sosten na nos seleccion den 2024 Little League Baseball World Series. Pues, Pueblo di Aruba ta keda cordialmente invita pa sintonisa e Programa Informativo diaranson, 21 di augustus pa 7:30 pm, a traves di Canal 22, Telearuba y pagina di Facebook di Gabinete Wever-Croes y Minister Endy Croes.
MINISTER ENDY CROES A REUNI CU SR. CARLOS PAGAN
DI LITTLE LEAGUE WORLD SERIES
Sr. Pagan pronto lo ta na Aruba, unda cu lo trata mas profundo e programa di Little League den su totalidad
Recientemente, Minister Endy Croes a reuni cu Sr. Carlos Pagan, kende ta director regional di Latino America y Caribe, alabes ta sirbi Mexico y e paisnan di Sur America, Centro America y Caribe. “Un bon reunion, unda a trece varios punto di atencion, cual por desemboca den un structura elegante pa Aruba. Alabes Sr. Pagan a confirma cu e lo ta Aruba den luna di september of october proximo, unda cu lo combersa mucho mas profundo riba e programa di Little League den su totalidad. “Nos trabou ta pa crea conexion (networking) y planta e simia pa hunto nos sigui padilanti cu e proposito pa sirbi Pais Aruba na e miho manera posibel,” Minister Endy Croes a enfatisa.
Ademas di esaki, a pidi asistencia y “input” di Sr. Pagan pa loke ta trata e structura general di Aruba, kico ta e posiblidadnan pa hunto modernisa esaki. Tambe por a compronde e rekisitonan di clasificacion mas miho pa e parti Latino Americano, Caribe y Sur America, unda cu el a splica con e ta dirigi esakinan. Sr. Pagan ta raporta na e ehecutivonan Sr. Patrick Wilson y Sr. Dan Velte pa tuma cierto decision. Sr. Pagan a indica di tin aprecio pa Pais Aruba cu pa hopi aña a “perform” hopi bon y pa e logronan cu Aruba ta ricibi. Despues di 13 aña nos por mira ekipo di Aruba bek den e World Series na Williamsport. “Hunto nos ta mas fuerte. Trabou den desaroyo,” Minister Endy Croes a conclui.
DPIS A BISHITA GABINETE DI ARUBA
Recientemente un delegacion di Fundacion Desaroyo y Progreso di Idioma pa nos Studiante (DPIS) a haci un bishita di cortesia na Gabinete di Aruba. E delegacion a consisti di Isidro Berg,Yirani Berg, Raiza Ras y Luvy Cicilia. E dia ey dos miembro di e team no por tabata presente cu ta Chinua Mardenbourough y Gelvine Flanders.
Meta di e bishita tabata presenta e plannan pa Fundacion Desaroyo y Progreso di Idioma pa nos Studiante (DPIS). E idea pa yuda studiantenan a surgi algun luna pasa ora cu Yirani Berg tabata tin un combersacion cu Minister Plenipotenciario mr. Ady Thijsen pasobra un di e mihor studiantenan di e scol di aviacion, Gelvine Flanders, kende ta bin di Aruba, kier a keda den spotlight pasobra e tabata entre e top 4 heroenan di abilidat nacional cu ta pertenese na Hulanda. Yirani Berg ta docente den opleiding di Spaño y ela mira cu nos studiantenan Arubiano tin potencial y a presenta e dia ey con e studiantenan por wordo yuda durante nan estudio den enseñansa profesional secundario, enseñansa profesional superior y enseñansa universitario.
Despues, Yirani Berg y e otro miembronan di e team a cuminsa brainstorm con pa por yuda e studiantenan mihor. E dia ey DPIS a presenta nan plannan y kico ta nan obhetivonan. Durante e combersacion a sali na cla cu Minister Plenipotenciario Ady Thijsen y directora di Gabinete di Aruba Joselin Croes LL.M tabata hopi interesa den un di e metanan, esta pa yuda studiantenan cu e idioma Hulandes, pa medio di entre otro poder di idioma. Ta bisto cu e sosten actual pa studiantenan
Arubiano na Hulanda no ta adecua. Sosten existente hopi biaha no ta suficiente pa yuda studiantenan alcansa di berdad nan pleno potencial. Ta pesey a lanta un fundacion pa atende e deficiencianan aki y a introduci manera nobo, mihor di guia.
E enfoke ta riba mehora nan dominio di e idioma Hulandes, pasobra esaki ta esencial pa nan exito. Segun DPIS esaki ta necesario pasobra por mira cu hopi studiante tin dificultad cu e idioma Hulandes, cu ta stroba nan estudio y bienestar. E sistema di sosten actual no ta suficiente efectivo, loke ta nifica cu hopi studiante no ta haña e yudansa cu nan mester. ‘Nos kier cambia esaki door di crea un sistema di sosten amplio y sostenibel cu lo yuda nan durante henter nan periodo di estudio na Hulanda. Nos team ta inclui tres persona den enseñansa y e otro tresnan a duna entrenamento na personal nobo cerca nan dunadonan di trabou y tin experencia den dunamento di entrenamento,’ asina Yirani Berg a bisa.
Na final di e presentacion y combersacion, a palabra cu Minister Plenipotenciario Ady Thijsen y directora di Gabinete di Aruba Joselin Croes cu DPIS lo manda nan plan di proyecto cu e speransa cu por drenta den un partnership entre Fundacion Desaroyo y Progreso di Idioma pa nos Studiante y Gabinete di Aruba pa por yuda studiantenan di Aruba na un manera profesional. Pa medio di un partnership lo por tin un mihor alcance den yuda studiantenan Arubiano y yuda nan durante nan estudio pa sigui desaroya nan idioma Hulandes na un nivel academico pa asina nan por desaroya nan talentonan completamente durante nan estudio.
