PROME MINISTER PRESENTE NA GRADUACION DI FORMACION SOCIAL DAMAS GRUPO#2
“Boso ta e testimonio di determinacion, fortalesa y curashi”
Diaranson mainta 21 di augustus, a tuma luga e entrega di certificado na e di dos grupo di dama cu a completa e trayecto di Formacion Social, Social Vormings Traject (SVT). Prome Minister Evelyn Wever-Croes hunto cu Minister di Husticia y Asuntonan Social, señor Rocco Tjon tawatin e honor di haci e entrega di certificado na e damanan.
E trayecto di Formacion Social ta un oportunidad unico pa damanan hoben cu ta pasando den momentonan dificil y ta enfrentando retonan, descubri y forma habilidadnan pa ta exitoso den bida. E ta yuda nan crea un fundeshi di disciplina y responsalibidad den nan bida diario. A traves di e trayecto di Formacion Social e damanan ta haya guia, sosten y tambe nan ta core stage pa asina prepara nan pa diferente carera, ampliando asina nan chens di haya un trabou den futuro.
Prome Minister ta indica cu ta un orguyo grandi pa Gobierno di Aruba di a logra amplia e trayecto tambe pa hende muher. Tempo cu Gabinete Wever-Croes a sinta, Formacion Social tawata existi caba pero solamente pa cabayero, cual actualmente ya ta na grupo#18. Pero e Formacion Social pa damas ta algo nobo cu e Gobierno actual a traha duro p’e y a logra, kibrando asina e barera y crea mas oportunidad pa e hende muhe na Aruba. Tawata un proyecto cu a tuma su tempo pero awe ya por wak e frutonan cu e graduacion di grupo#2.
“Mi ta sumamente orguyoso di e grupo di seis dama hoben cu awe a finalisa e curso. A entrega cinco certificado awe ya cu un di e damanan ya a biaha pa Corsou unda e lo sigui e opleiding di militar. Durante nan biahe na Corsou, e damanan aki di Formacion Social a haci asina bon impacto, cu ya caba un di nan lo cuminsa un carera como militar na e hermana isla.
Un danki na Marinierskazerne, na mi coleganan minister di Gabinete Wever-Croes, y sigur na juffrouw Jessica pa sa di guia e grupo aki. Pabien na tur e graduadonan, boso ta e testimonio di determinacion, fortalesa y curashi. Hopi exito den futuro”, Prome Minister a expresa.
Prome Minister Evelyn Wever-Croes: Registra e proyecto pa bo scol y haci e soño di innovacion pa bo scol bira realidad
CICLO 8 DI E PROYECTO DI INNOVACION
EDUTECH TA HABRI
Despues di un ciclo 7 exitoso, a habri ciclo 8 di e proyecto di innovacion tan gusta, Edutech. Pa por participa, scolnan por aplica y registra desde awor caba te cu dia 21 di October 2024. Prome Minister Evelyn Wever-Croes a indica cu Gobierno di Aruba a pone 100 mil florin disponibel pa e proyecto aki, pa asina por cumpli cu soño di mas o menos 3 á 4 scol.
Mirando cu esaki ta un oportunidad grandi pa asina scolnan por haya financiamento pa materialnan di digitalisacion, Prome Minister ta encurasha tur e alumnonan di scol pa uni hunto cu nan mayornan, docentenan, y otro alumnonan pa asina traha riba e proyecto di innovacion pa nan scol desea. E ta bon pa analisa hunto kico en realidad e scol lo tin mestery/of ta desea pa facilita educacion, y traha esaki pa asina tin e oportunidad di gana.
Prome Minister a indica cu e ciclo 8 aki ta cera un total di 800 mil florin cu Gobierno a bin ta pone durante e ultimo 2 añanan, pa yuda cu materialnan di digitalisacion pa scolnan. E ciclo aki, probablemente lo ta e ultimo ciclo di Edutech. E idea aki, di Gobierno di Aruba hunto cu Futura, a wordo introduci pa yuda e scolnan adkiri materialnan digital necesario pa asina haci e proceso di educacion na e scolnan mas agradabel y eficiente. Awor a yega momento pa traspasa e proyecto di innovacion
pa Minister di Enseñansa pa asina e ministerio encuestion por sigui cu esaki.
"Mirando cu e proyecto di Edutech ta asina gusta pa scolnan, mi a haci mi maximo esfuerso pa hacie 1 aña mas, pero a yega momento pa traspasa esaki pa un otro ministerio. Mi ta spera cu Minister di Enseñansa tuma esaki over y sigui cu e proyecto di innovacion pa e scolnan. Pa cu e ciclo aki, mi kier pidi tur alumno pa traha e proyecto desea pa bo scol segun e rekesitonan, presente pa asina bo por tin e oportunidad pa gana y haci e soño di bo scol un realidad", Prome Minister a expresa.
MINISTER URSELL ARENDS A REUNI CU COMISION
DI TRANSPORTE DI PARLAMENTO PA BRINDA
INFORMACION RIBA MANEHO DI TRANSPORTE
PUBLICO PA ASEGURA OPORTUNIDAD IGUAL
Diahuebs mainta Minister Arends a reuni cu comision di transporte di Parlamento pa splicanan pakico mester a bin cambio riba e sistema inhusto cu a bin ta permiti pa loke ta trata permiso di taxi.
Minister a cuminsa na duna bista ariba e prioridadnan di su maneho di transporte publico cual ta:
• Revisacion di Ley y regulacion den beneficio di Integridad y Seguridad
• Accesibel y pagabel
• Sostenibilidad di transporte
E esencia di e cambio di maneho di transporte publico ,
manera ya a bin ta splica na diferente ocacion, ta pa move den e direccion di oportunidad igual unda cada ciudadano por yega na remarke pa un permiso di taxi. Manera ya a menciona, e sistema actual ta operando den un ‘closed system’ unda tin limite di cuanto permiso tin y cu ta keda draai den e mesun grupo. Asina impidiendo por ehempel otro ciudadano y tambe hulpchauffeur nan yega na un permiso di taxi paso simplemente no tin niun disponibel. Hulpchaffeur nan ta keda un grupo vulnerabel ya cu door di e sistema existente ta permiti cu nan ta wordo exploita door di e vergunninghouder.
A comparti cu parlamento e biahanan cu a tene dialogo cu taxistanan y tambe a a duna di conoce cu desde comienso e taxistanan a wordo informa door di Minister cu e maneho di transporte lo wordo haci conforme ley. Cual tur dos decreto ministerial y esun adicional cu lo sali ta, esta conforme ley.
Den ultimo dialogo cu taxistanan, e asociacion di taxista a trece proposicionnan dilanti cu Minister Arends a duna di conoce cu tabata puntonan valido y e lo sigur considera den e di tres decreto ministerial.
Minister Arends ta keda para pa oportunidad igual, unda cu tur Arubiano mester por tin e oportunidad husto pa obtene un permiso di taxi. “Nos ta purbando di restora e integridad di e sistema di transporte publico, y esaki a mustra di a trapa riba un ader principal di politica tradicional,” Minister a menciona.
Parlamento a ricibi amplio informacion y argumento riba e cambio di maneho di transporte publico unda cu e mayoria ta di acuerdo cu mester a bin un cambio. Esaki ta mustra cu nos ta den bon direccion pa berdaderamente trece cambio den sistemanan gubernamental cu tin risico di no ta integro y asina opera for di un sistema limpi di corupcion.
NO TIN NINGUN PROPOSICION DI HULANDA
PA
REFINANCIA
DEBE LOCAL OF EXTERNO DI ARUBA CU TA MADURA DEN AÑA 2024
Te awo ta solamente e debe di COVID-19 Hulanda ta dispuesto pa baha e interes di 6,9%
E siman aki Minister Maduro di Finansa a informa comunidad riba e fiansa cu a logra cera riba mercado internacional di capital pa por logra cubri e necesidad financiero y paga e debenan cu ta madura den aña 2024. E mandatario a splica cu a logra haya e fiansa aki na un interes di 6,3% cu ta uno bon considerando e hecho cu Aruba ta bay bek e mercado internacional despues di 6 aña y despues di e daño financiero y economico cu COVID-19 a ocasiona.
Lamentablemente un medio di noticia na Aruba a publica e noticia na un manera incorecto, y a publica cu ‘Aruba mester a fia na un interes hopi mas halto cu si ela haya ayudo di Hulanda’ sugeriendo cu Aruba lo tabata por a fia e placa necesario na Hulanda na un interes mas abou.
Minister Maduro di Finansa ta enfatisa cu pa financia e debenan externo cu ta madura den aña 2024, no tabata tin ningun proposicion di Hulanda riba mesa pa fia Aruba placa na interes mas abou. Hulanda te ainda ta dispuesto pa duna un interes mas abou cu e 6,9% solamente pa e debe di COVID-19 cu Aruba tin cu Hulanda. Tur otro debe local of internacional cu Aruba tin, ta Aruba mes mester busca financiamento p’e.
Sostenibilidad den revitalisacion di Oranjestad
LO INSTALA PARKEERPLAATS CU CHARGING STATIONS PA AUTONAN ELECTRICO DEN AREA DI LAGOEN
Minister Geoffrey Wever recientemente a tene un reunion importante cu representantenan di N.V. ELMAR, DOW y Aruparking, relaciona cu e proximo fase di revitalisacion den e area di Lagoen y Wilhelminastraat. Durante e reunion aki, a discuti e preparacionnan cu ta na caminda, como tambe e puntonan di atencion cu mester tene den cuenta pa e trabounan pendiente.
Ta anticipa cu e trabounan lo inicia na luna di oktober, cu e meta di minimalisa cualkier tipo di strobansa na e comercio den e area. Den e fase aki di e proyecto, lo amplia e area di parkeo pa acapara mas vehiculonan, y promove mas accesibilidad. Den e contexto di sostenibilidad, lo instala 4 charging stations (stacion di carga) pa autonan electrico den e parkeo banda di Lagoen.
Esaki ta demostra nos compromiso pa sigui stimula e transicion energetico di Aruba. Door di amplia e infrastructura pa carga autonan electrico y hybrid, nos ta facilita e transicion pa automobilistanan cu ta considera cambia pa e tipo di autonan aki.
Minister Wever a menciona cu ta spera cu mas y mas departamento gubernamental lo tuma e ehempel y transiciona pa autonan electrico. Esaki ta sirbi tambe como un incentivo pa otro personanan considera un cambio na un auto mas eficiente, sea hybrid of electrico. "Cada un di e decisionnan aki, sea chikito awo, lo tin impacto positivo pa e proximo generacion", segun minister Geoffrey Wever.
Minister Geoffrey Wever:
ARUBA TA HUESPED DI UPAEP REUNION
REGIONAL DI ESTRATEGIA POSTAL-ADUANA, REFORSANDO COMPROMISO PA COOPERACION
Y INNOVACION REGIONAL
Gobierno di Aruba ta honra di ta anfitrion di Reunion Regional di Estrategia Postal-Duana di UPAEP. E encuentro di alto nivel aki ta uni experto y lidernan di e region pa duna atencion na e reto- y oportunidadnan den sector postal y di aduana.
Minister Geoffrey Wever a duna bon bini na e participantenan cu un discurso cual a enfatisa e compromiso di Aruba pa stimula cooperacion y innovacion den e industria vital aki. "E surgimento di e-commerce, digitalisacion di servicio y aumento di demanda pa comercio inter-frontera a transforma con nos ta mira operacionnan postal y di aduana," e Minister a bisa. Ta enfoca riba haña solucionnan tangibel pa e retonan cu ta bini den e suministro postal global cu ta evolucionando y e modelonan tradicional mester wordo redefini. Den e contexto aki, e colaboracion entre aduana y servicio postal ta mas crucial cu nunca.
E hubicacion strategico di Aruba historicamente a haci'e un hub pa comercio y comunicacion. Door di tene e evento aki, Aruba ta reaffirma su rol como lider den cooperacion regional. "Aruba ta orguyoso di por ta huesped di e reunionnan di alto nivel aki y di contribui na e trabou importante cu lo tuma luga aki", e mandatario a enfatisa.
E intercambio eficiente di dato, modernisacion di regulacionnan, y e adopcion di tecnologianan nobo ta fundamental pa e futuro exito di e industria aki. Den dialogo, e reunion aki ta trata di consolida confiansa y fortalece relacionnan pa "streamline" procesonan, reduci tardansa, y aumenta seguridad den e region. Esaki sigur ta desaroyonan cu ya a cuminsa inicia na Post Aruba tambe, mirando e necesidad urgente pa modernisa su modelo comercial.
E Minister a finalisa su discurso agradeciendo na Union Postal Universal y Union Postal di Las Americas, España y Portugal pa organisa e reunion vital aki, y a expresa optimismo pa e espirito di cooperacion cu lo guia e discucionnan.
CU INICIO DI E OPLEIDING POH GGZ GOBIERNO
DI ARUBA TA AMPLIA E SERVICIO PA CU SALUD MENTAL Y ALABES TA HACI’E MAS ACCESIBEL
Diahuebs merdia, Minister di Husticia y Asuntonan Social sr. Rocco Tjon, a firma e acuerdo den cuadro di inicio di e opleiding “Praktijkondersteuner Huisartsen Geestelijke Gezondheidszorg” (POH GGZ). Gobierno di Aruba ta amplia e servicio pa cu Salud Mental y alabes ta haci’e mas accesibel.
E prome POH GGZ a wordo introduci a traves di e sociaal crisisplan, y actualmente ta forma parti integral di e maneho pa atende cu salud mental. E roadmap ta consisti di tres parti, e prome parti ta enfoca riba prevencion, e di dos ta pa haci e cuido mas accesibel, y e di tres ta pa percura pa tin un bon "nazorg". Banda di esaki, e POH GGZ'ers nan lo yuda alivia e "wachtlijsten" y baha e presion riba e prome y e di dos liña. Tambe, e cuido lo por wordo brinda mas lihe, pa motibo cu por diagnostica y wordo "doorverwezen" mas lihe.
Manera ta conoci na 2022 a introduci un "stuurgroep GGZ" pa ehecuta e vision y maneho pa loke ta salud mental a largo plaso. E stuurgroep ta consisti di tur stakeholders cu ta activo riba e tereno aki y trahando riba e diferente aspectonan. Tambe, por wak hopi inversion pa loke ta prevencion y alabes a amplia e cuido cu introduccion di fact teams y crisidienst.
Pa loke ta cuido y “nazorg”, ta inverti mas den cuido na Aruba mes y laga tratamento den exterior como excepcion. Pues, den cuadro di e roadmap tambe ta optimalisa y ta sigui hisa e nivel di capacitacion di e personal.
Pa e motibo aki, a tuma decision pa amplia e cantidad di POH GGZ'ers. Minister Tjon a gradici tur stakeholders cu a haci esaki posibel y alabes a gradici nan pa nan compromiso pa a logra pone salud mental riba mapa y haci’e un prioridad pa henter nos comunidad.
COLEGIO NIGEL MATTHEW TA HAYA SU PROME KLAS DI VWO
Durante Conferencia di Prensa di Gobierno di Aruba diaranson ultimo, Minister di Enseñansa y Deporte Endy Croes a ilustra e ultimo desaroyonan den enseñansa. E mandatario di Enseñansa a indica cu despues di varios aña cu a haci e peticion, a logra habri un (1) klas di VWO na Colegio Nigel Matthew na San Nicolas. Minister Endy Croes a scucha e peticionnan y a inicia di biaha cu e proyecto pa evalua con ta carga e proyecto aki.
A haci un peticion na Colegio Nigel Matthew pa evalua e cantidad di interes di e alumnonan pa por habri un (1) klas di V3 y presenta esaki. Pues a base di e resultado, a indica cu si tabatin un interes grandi y a logra habri e prome klas di VWO na Colegio Nigel Matthew, San Nicolas. Minister Endy Croes ta felicita e districto di San Nicolas, Dienst Publieke Scholen (DPS) y Colegio Nigel Matthew cu e logro aki.
Minister Endy Croes: DESPUES DI 13 AÑA A AUMENTA E “NORMBEDRAG” NA 6.4 MIYON FLORIN PA
CUBRI E GASTONAN DI “SCHOOLBESTUREN”
Schoolgeld di e scolnan resorta bou di DPS no a aumenta
Diaranson mainta durante Conferencia di Prensa di Gobierno di Aruba, Minister di Enseñansa y Deporte Endy Croes a indica cu no a subi schoolgeld di e scolnan resorta bou di Dienst Publieke Scholen (DPS), ni prome, ni despues di pandemia. E mandatario di Enseñansa a enfatisa cu a aumenta e “normbedrag” pa tur stichting cu 6.4 miyon florin, cual desde aña 2009 no a aumenta. E “normbedrag” ta ancra den ley y ta e compensacion cu “schoolbesturen” ta ricibi a traves di “exploitatiesubsidie”.
E “normbedrag” ta cubri costo di entre otro, mantencion di scol, mantencion di e mueblenan di scol, seguro di e edificio di scol y lokaal, limpiesa di edificio y lokaal, coriente, awa, gas, airco, inversion den “hulpmiddel” y necesidadnan di scol, lesmateriaal y administracion. E “schoolbesturen” ta ricibi miyones di florin, dependiendo di e grandura di e scol pa cubri tur gasto cu a ser menciona. E ley ta bisa cu cada tres (3) aña mester calcula si mester aumenta e suma aki. E ultimo rapport oficial ta di aña 2009 y e ultimo aumento a tuma luga na aña 2010. Den aña 2023 un team di experto cu ta compronde e materia a haci un investigacion y calculacion. Na final di e investigacion un rapport a keda presenta, unda cu a indica cu mester “haal in” e suma di 6.4 miyon florin.
Dia 4 di september den e tratamento di “voorjaarsnota”, Parlamento di Aruba a aproba 50%, esta 3.2 miyon florin. Den luna di december aña 2023, ora cu Parlamento di Aruba a trata Presupuesto di Pais Aruba a aproba e otro 50%, esta 3.2 miyon florin. Pues, a “haal in” un total di 6.4 miyon durante aña 2023. Esaki ta significa cu a inverti mas placa den enseñansa pa asina e schoolbesturen por cubri nan gastonan. E mandatario di Enseñansa a menciona durante e conferencia di prensa cu si asina mes un stichting kier aumenta su schoolgeld, Gobierno di Aruba no tin “zeggenschap” di esaki. Pero esaki no ta e caso di e scolnan resorta bou di DPS, mirando cu e schoolgeld a keda mescos.
SWIFT DISTRIBUTION ARUBA Y ENSEÑANSA
PA EMPLEO TA UNI PA FACILITA CURSO
“INTRODUCCION NA PELUKERIA”
Swift Distribution Aruba, den colaboracion cu Enseñansa pa Empleo (EPE) y e tan reconoci estilista profesional Roberto Avalo, tin e placer di anuncia e lansamento di un curso innovativo diseña pa empodera e participantenan cu e habilidadnan esencial y necesario pa drenta den e mercado laboral actual den e area di pelukeria.
UN PILAR DEN E MUNDO DI BEYESA
“Den e mundo di beyesa, Swift Distribution Aruba ta conoci pa tin un forsa grandi tras di e estilistanan di Aruba”, asina Mitch Almary, Marketing Manager na Swift Distribution Aruba, a indica. Swift Distribution y también el Centro Educativo quieren
seguir siendo un apoyo para los estilistas profesionales aquí en Aruba. Para Swift Distribution Aruba, es importante seguir invirtiendo en educación de belleza aquí en Aruba.
Mirando e rol di Swift Distribution Aruba den e mundo di beyesa, hopi hende cu no tin e basico den e mundo di beyesa a demostra nan interes pa un educacion basico y asina cuminsa desde cero. Debi na e interes demostra, Swift Distribution Aruba tabatin un encuentro cu Enseñansa pa Empleo pa haci e curso aki un realidad. Di nan banda, Enseñansa pa Empleo tambe a mustra interes pa inicia cu un facultad nobo. Di e manera aki nan a cera cabes pa inicia cu e bunita proyecto aki.
Continuacion SWIFT
EXPERIENCIA AMPLIO
Roberto Avalo ta un estilista profesional pa mas cu 12 aña caba y cu actualmente ta eherce su profesion como artista profesional pa L'Oréal Professionnel. Ta importante pa menciona cu L'Oréal Professionnel ta un marca internacional cu tin mas di 115 aña den e mercado cu un influencia grandi den Caribe y Aruba no ta un excepcion. E oportunidad aki ta ideal pa tur esnan cu kier desaroya nan mes den e mundo di beyesa. E curso tin un duracion di 24 les, den 12 siman pues 2 les pa siman. Durante les, e cursistanan lo siña desaroya nan mes riba tur e aspectonan di mas importante den e mundo di beyesa. E curiculo di e curso lo trata lo siguiente:
- Principio basico di pelukeria
- Introduccion den cuido di cabey
- Bleaching (descoloracion)
- Colorimetry (Ciencia di coloracion)
- Styling
Finalisando e prome nivel di educacion di Enseñansa pa Empleo, e cursista lo por forma parti den e mundo di beyesa como un ayudante pa esnan cu tin mas experiencia den e mundo aki. E curso lo tin e sosten di Milady Book, cu ta e buki di cosmetica di Merca caminda tur estilista profesional ta siña for di dje.
AUMENTA BO OPPORTUNIDAD
“Enseñansa pa Empleo ta brinda curso pa recapacita y duna un oportunidad na esnan cu kier siña mas, crece den nan profesion of tin interes pa desaroya nan mes”, asina Sabine de Groot, Director Interino di EPE, a expresa. E curso aki ta un colaboracion cu Swift Distribution Aruba y L'Oréal Professionnel. Semper EPE ta busca manera pa ofrece diferente curso cu lo yuda e mercado laboral y e personanan cu kier amplia nan conocemento.
E curso “Introducion na Pelukeria” lo start dia 10 di september, lo tuma luga riba diamars y diahuebs, lo termina pa fin di november y lo ta na Papiamento y Spaño pero lo uza algun palabra na Ingles. E costo di e curso aki ta Afl. 500,- (Afl. 50 pa inscripcion y Afl. 450 pa e curso). E curso aki lo stimula e mercado laboral y lo certifica e profesionalnan existente di
manera oficial, ademas e lo genera futuro prospecto den e industria di beyesa na Aruba. Enseñansa pa Empleo ta gradici Mitch Almary y Cristine Hintz di Swift Distribution Aruba y Roberto Avalo di L'Oréal Professionnel pa haci e colaboracion aki posibel. Inscripcion ta a traves di https://www.epearuba. com/introduccion-pelukeria/. Pa mas informacion riba e curso por tuma contacto cu oficina di EPE na 5825662 of pasa na Engelandstraat 33.
TOCANTE SWIFT DISTRIBUTION ARUBA
Swift Distribution, ta un compania cu ta existi pa cuater aña caba. E team di Swift Distribution Aruba ta consisti di diferente talento cu ta conta cu hopi aña di experiencia y conocemento den e mercadonan di Aruba, Boneiro, Corsou y Sint Maarten den e sector di importacion, distribucion, benta y mercadeo. Danki na su conexion bon estableci, Swift Distribution Aruba tin e capacidad pa alcansa y expone su productonan na un mercado mas amplio. E pasion di Swift Distribution Aruba ta pa ofrece nan productonan na e mercado adecua y na e momento indica. Swift Distribution ta constantemente innova y trece productonan necesario y “trending” pa e mercado y ta disponibel rond di Aruba. Sigui Swift Distribution riba Instagram: @swiftdistributionaruba Facebook: Swift Distribution Aruba of subi e website https://www.swiftaruba.com/
STUDIANTENAN CARIBENSE A HAYA UN CALUROSO BON BIN NA AMSTERDAM
Den stadhuis di Amsterdam a tuma lugar pa di 13 biaha un encuentro pa e studiantenan di Curaçao, Aruba, Boneiro y St. Maarten cu e aña aki ta bai cuminsa cu un estudio na un Hogeschool of Universidad na Amsterdam. Municipio di Amsterdam ta organisa e encuentro aki pa yama e studiantenan di e parti Caribense di Reino Hulandes bon bini na Amsterdam. Invitadonan special tabata e Ministernan Plenipotenciario di Curaçao y Aruba, cu ta respectivamente Carlson Manuel y mr. Ady Thijsen. Tambe presente tabata directora di Gabinete di Aruba Joselin Croes LL.M/M.Sc y mentor pa Amsterdam Nathaly Deville-Russell.
E programa a cuminsa cu un discurso di loco-burgemeester di Amstedam Dirk de Jager na unda ela yama tur e studiantenan Caribense den nomber di Gobierno municipal bon bini na Amsterdam. Sr De Jager a papia riba e oportunidad inmenso cu Amsterdam ta brinda y como studiante bo mester ta para duro den bo sapato den esaki. Tambe e loco-burgemeester a bisa e studiantenan pa ta curioso den nan estudio y pafor di esaki. ‘Boso a tuma un paso grandi caba door di crusa oceano y bin studia na Hulanda; leu for di cas, famia y amigonan. Pesey mi ta kere cu boso tin perseverancia. Bisa Si riba oportunidadnan nobo y aventura. Sea habri pa drenta un “studentenvereniging” y busca contacto cu hendenan rond di bo. Bo no ta bo so! Spera cu Amsterdam por brinda boso hopi, pero tambo cu boso por laga un “footprint” atras na Amsterdam. Un ciudad cu pa siglo a atrae hendenan di tur parti di mundo cu awe a enrikece Amsterdam y a hacie un ciudad hopi diverso,’ tabata palabranan di loco-burgemeester di Amsterdam Dirk de Jager.
Minister Plenipotenciario di Aruba Ady Thijsen tambe a haya e oportunidad pa dirigi algun palabra na e studiantenan. Sr. Thijsen a gradici municipio di Amsterdam pa organisa e encuentro aki. E mandatario a splica e importancia pa Gabinete di Aruba cu e guia di nos studiantenan ta optimal. Minister Thijsen a desea e studiantenan hopi exito den nan estudio y a haci un apelacion riba e studiantenan pa despues di nan estudio pa regresa Aruba. ‘Door di “vergrijzing” Aruba lo mester di hopi trahador. Tanto e sector publico como e sector priva lo mester brinda nos studiantenan un bon salario y beneficionan atractivo pa asina stimula nan pa bai bek Aruba,’ asina Minister
Director di Gabinete di Aruba Joseline Croes a papia riba e “Handboek voor Arubaanse studenten” cu Gabinete di Aruba a traha cual tur studiante cu a bin Hulanda a haye via un QR-code riba nan telefoon. Segun señora Croes a buki aki tin hopi informacion pa e studiante, tanto riba estudio como otro temanan manera Statuut, Reino Hulandes y Gabinete di Aruba.
Un parti di e programa tabata e momento cu studiante Savino Every a tene un charla riba su experencia como studiante. Den esaki e tabata tin algun conseho pa e grupo di studiantenan nobo. Asina ela bisa cu durante bo estudio bo mester tene cuenta cu bo curpa y bo salud personal. Tambe cu bo mester busca contacto of relacion significante cu por duna bo e sentimiento cu bo ta existi. Otro aspecto cu Savino a papia riba dje ta salud mental y cu bo mester conoce e señalnan liher y busca ayudo.
E aspecto importante di e programa ta e momento cu presentador di e dia ey Tanja Fraai entrevista diferente studiante tocante nan estudio, e rason pa a scohe pa bin studia na Amsterdam y otro topiconan interesante.
Na final e studiantenan a participa na un quiz pa mira con bon nan conocimento di Amsterdam ta, sigi pa un introduccion di diferente instancianan, manera Hogescholen, Gemeente Amsterdam y organisacionnan di studiante cu ta di importancia pa e studiantenan.
Thijsen a bisa.
