PROME MINISTER A ENFOCA RIBA E VISION AMBICIOSO DI ARUBA BASA RIBA RESILIENCIA,
INNOVACION Y E COMPROMISO CU
SOSTENIBILIDAD Y PROGRESO
Prome Minister Evelyn Wever-Croes durante e Summit of the Future na New York recientemente, a atende 20 reunion y encuentro durante 2 dia enfocando riba futuro, poniendo enfasis riba hobennan, tecnologia, y riba crea oportunidadnan pa mucha muhe y hende muhe.
E mandatario a forma parti di un panel interesante cu a trata Inteligencia Artificial (AI) y con esaki por yuda den un desaroyo sostenibel. Esaki a wordo organisa pa United Arab Emirates (UAE) y United Nations Development Program (UNDP). Aki nan Prome Minister a duna e perspectiva di Aruba cu a pesar di ta un isla chikito den Caribe, tin un vision ambicioso basa riba e isla su resiliencia, innovacion y e compromiso cu sostenibilidad y progreso.
Aruba su vision ta cuminsa cu sostenibilidad. Aruba su futuro ta un balansa, entre naturalesa y ambicion humano, entre avance tecnologico y preservacion cultural, entre crecemento economico y equidad social. Aruba siendo un isla chikito, no ta mira esaki como un limitacion, sino un oportunidad pa actua y su vision ta cuminsa cu sostenibilidad. Lo sigui efoca pa pasa for di turismo sostenibel pa un turismo responsabel y regenerativo, adoptando practicanan ambientalmente responsabel cu ta proteha e ecosistema fragil pa generacionnan binidero.
Innovacion ta e base di Aruba su Futuro.
Pa medio di cooperacion cu lidernan mundial den tecnologia y fomentando talento local, Aruba lo bira un hub digital unda e ciudadanonan lo wordo empodera pa por medio di acceso na educacion digital, tecnologia inteligente, y e-Government cu ta garatisa transparencia y eficiencia. E meta ta pa construi un sociedad unda tecnologia no solamente ta accesibel, pero tambe ta wordo uza como un herment pa inclusion, igualdad y mehora calidad di bida di e ciudadanonan.
Prome Minister a indica cu e vision di e isla ta uno solido, pero tambe e futuro di e isla ta mara na colaboracion global. Aruba su so, no por enfrenta retonan manera cambio climatico, incertidumbre economico y retonan di e transformacion digital. Y pa esaki Aruba ta comprometi pa fortalece e relacion cu partnernan global, pa sigura cu Aruba lo haya e beneficio di e solucionan di e partnernan global pa cu e retonan global.
“Den e Summit of the Future aki, nos ta wordo recorda di nos deber colectivo pa construi un mundo cu no ta solamente sostenibel, pero tambe inclusivo y husto. Laga nos ta balente den nos accionnan, laga nos ta uni den nos resolucionnan y laga nos ta motiva den nos vision pa futuro”, Prome Minister a expresa.
Prome Minister Evelyn Wever-Croes: Den conexion cu e caso di SSA
PA GABINETE WEVER-CROES KIEBRO DI INTEGRIDAD NO TA ACEPTABEL, NI CON CERCA
E PERSONA POR TA
Diabierna merdia, Prome Minister a duna un declaracion tocante e investigacion cu ta tumando luga na Stichting Sports
Subisidie Aruba (SSA). Prome Minister a indica cu siman pasa su persona a wordo informa pa Minister di Deporte Endy Croes cu tin un investigacion di posibel malversacion den SSA. Minister Croes a informa cu e persona en cuestion a wordo suspendi pa investigacion, y cu asina e investigacion a keda cla, a entrega un keho.
Prome Minister a splica cu e persona aki en realidad ta tok’e na famia, pero cu e posicion aki a wordo duna na e persona, debi na su preparacion financiero na universidad y su experiencia den deporte. Mirando su conocemento y experiencia, a pensa cu e lo por wordo confia cu e posicion importante aki, pero lamentablemente awor tin sospecho di malversacion.
Integridad ta primordial
Pa e Gobierno di Gabinete Wever-Croes, integridad ta di suma importancia, y na momento cu un persona kibra e regla di integridad lo tin consecuencia. Prome Minister a splica cu esaki ta algo cu semper el a para p’e y si sali afo di e investigacion cu tin malversacion di placa, e persona lo mester carga su responsabilidad, ni con cerca e ta di su persona.
Oponentenan poltico ta duna declaracion falso
Prome Minister tambe a indica di por a tuma nota di varios declaracion di oponentenan politico basa riba mentira. Por
ehempel señora Marisol LopezTromp cu a uza e oportunidad di referi riba e investigacion andando, pa bisa cu mescos cu caso di Arubahuis no a entrega keho.
Prome Minister a expresa cu esaki no ta e caso, mirando cu na momento cu su persona a haya indicacion cu algo no ta bon na Arubahuis, el a pidi CAD y DRH pa haci un investigacion, di cual rapport a entrega na Ministerio Publico (OM). E investigacion ta andando, pero ta e vocero di OM ta e unico cu lo por duna un declaracion riba esaki. Esaki ta mustra claramente cu señora Marisol Lopez-Tromp un biaha mas ta gaña, mirando cu keho a wordo entrega, y a base di esaki tin un investigacion andando.
Pa loke ta e caso di SSA, Minister Endy Croes a haci un declaracion informando cu asina cu SSA a detecta cu algo no tabata bon, a haci un investigacion y a entrega keho. Pues señora Marisol Lopez-Tromp a bay OM pa espectaculo pasobra ya tin un investigacion andando.
Marisol Lopez-Tromp no ta un politico honesto
Prome Minister a expresa cu Señora Marisol Lopez-Tromp no ta un politico honesto pasobra na Juni 2021 su persona tabata sospechoso di un investigacion di corupcion riba cual nunca el a reacciona. Ta na momento cu OM a para e investigacion, el a bin afo bisa cu e no ta un sospechoso mas. Esaki ta mustra cu e no ta un politico honesto, pasobra na momento cu ta trata di su persona e ta sconde, pero ora ta trata di otro hende e kier expone y busca atencion.
"Mi ta ripiti, pa Gabinete Wever-Croes I y II, integridad ta un prioridad, y unabes cu tin kiebro, tin consecuencia. Ni con cerca e persona ta di nos, e lo mester carga su responsabilidad. Esaki sigur ta e diferencia mas grandi entre nos Gobierno y e partidonan den oposicion cu no por bisa mescos. E caso ta den man di OM y lo duna nan espacio pa haci nan trabou pa asina husticia por vence", Prome Minister a expresa.
Prome Minister Evelyn Wever-Croes: Riba dia mundial di Turismo
PROME MINISTER TA FELICITA ARUBA EN GENERAL
Y GRADICI TUR ESNAN CU DI UN OF OTRO MANERA
TA APORTA NA E INDUSTRIA IMPORTANTE AKI
Riba dia Mundial di Turismo, Prome Minister Evelyn WeverCroes a asisiti un conferencia organisa pa Aruba Tourism Authority, na unda e tema central di e conferencia ta "overtourism", cu ta un reto grandi na e momentonan aki pa Aruba, ya cu esaki ta causando descontento den nos fiel bishitantenan y comunidad en general.
Aruba a kibra tur record
Riba e dia importante aki, Prome Minister a enfatisa riba e importancia cu e sector aki tin pa pais Aruba. Turismo ta e pilar mas grandi di nos economia, mirando cu e ta crea finansas publico y espacio financiero pa inversion. Tambe turismo ta crea empleo pa comunidad, treciendo bienestar y progreso. Den e ultimo aña a keda comproba cu Aruba ta un destinacion hopi gusta pa e turistannan, mirando cu apesar di e situacion mundial, e sector aki a crece, kibrando record di añanan anterior.
"Overtourism"
Apesar di tur e beneficionan, turismo tambe ta bin cu su retonan, y aki ta referi na loke ta "overtourism". E mandatario a expresa cu ta di suma importancia pa para keto y wak ki efecto "overtourism" tin riba termino largo, ya cu e tema aki ta creando descontento no solamente entre nos mesun hendenan, sino tambe entre nos fiel bishitantennan.
P'esey ta importante pa Gobierno sinta hunto cu e instancianan concerni pa alinea y bin cu un strategia, den cual ta determina ki direccion Aruba lo kier sigui bay cu turismo. Pa Gobierno ta importante pa laga atras un pais stabil, na unda futuro generacionnan tin mas oportunidad pa por logra nan metanan. E compromiso di Gobierno "Mi kier a enfatisa cu e Gobierno di Gabinete Wever-Croes no ta esun cu a duna permiso pa e hotelnan cu tin bou construccion actualmente, cu excepcion di Secret Hotel na San Nicolas. Tur
e construccionnan cu tin adando cu e hotelnan nobo den e area hotelero, ta compromisonan cu tin haci di hopi aña pasa pa e Gobierno anterior. Tambe mi kier sigura comunidad completo, cu e Gobierno aki lo sigui traha na bienestar di pueblo y no lo duna permiso, ni tereno mas pa niun hotel nobo.
Varios ley den preparacion
Actualmente, tin varios ley andando pa regula y frena e desaroyo, sigurando cu turismo ta sigui ta sostenibel, duradero y den bienestar di tur ciudadano di pais Aruba. Tambe tin un ley den preparacion pa regula loke ta Airbnb. Esaki ta importante pa por sigura cu Aruba ta keda un producto di calidad, y cu lo keda casnan disponibel pa nos mesun hendenan biba aden. Mi kier a felicita Aruba completo, y gradici tur esnan cu ta labora den e sector turistico pa nan trabou incansabel den yuda desaroya e pilar importante aki. Ban sigui aprecia y conserva e bunitesa di nos pais, y e amabilidad y cordialidad di nos hendenan, pa asina nos por sigui promove e baranca aki, como e isla mas gusta den Caribe", Prome Minister a expresa.
MINISTER MADURO TA FELICITA PAREHA JOSEPH
Y
LUCIA LIOE A TJAM CU NAN 70 ANIVERSARIO
DI MATRIMONIO
Dialuna pasa Minister Maduro di Finansa y Cultura tabata tin e placer pa a pasa felicita e pareha sr. Joseph y sra. Lucia Lioe A Tjam pa nan 70 aniversario di matrimonio. Pa e bunita ocasion aki di celebracion di boda di platino e mandatario a presenta e pareha cu un felicitacion special den nomber di Gobierno di Aruba.
Minister Maduro ta felicita famia y amistadnan di pareha Lioe A Tjam y ta gradici specialmente nan 4 yuinan pa e bunita fiesta na unda e mandatario a comparti un rato ameno cu e pareha hunto cu nan famia y amistadnan. Masha pabien na sr. Joseph y sra. Lucia Lioe A Tjam.
DIA MUNDIAL DI TURISMO TA ENFOKA ARIBA
UN TURISMO RESPONSIBEL Y SOSTENIBEL CU TA BENEFISIA FUTURO GENERACIONNAN
Diaberna mainta Minister di Turismo y Salud Publico sr. Dangui Oduber a celebra “Dia Mundial di Turismo” conhuntamente cu tur partnersnan y profesionalnan cuta traha den turismo. Minister Dangui a hiba algun palabra cu su reflecion di tur locual turismo ta significa pa nos isla.
Minister Dangui Oduber ta expresa cu turismo na Aruba no ta solamente stimula nos economia, pero tambe ta contribui di un manera significante na e bienestar social di Aruba. E ingreso nan genera di turismo ta yuda directamente pa sostene sector nan importante manera cuido di salud y fondo di pensioen, asegurando cu nos ciudadanonan ambos den e industria y pafor tin aceso na benificionan esencial y asina sigurando un futuro cu calidad di bida halto.
Minister Dangui su maneho ta basa ariba: 1. Trece e turista afluente y di calidad. 2.Crece Aruba cu un turismo sostenibel y responsabel. 3. Diversifica nos turismo innovando producto Aruba. 4. Haci inversionan continuo den mehoracion di producto Aruba. Minister Oduber ta reafirma su compromiso pa mantene su vision y accion nan pa hasi Aruba su turismo sostenibel y responsabel. Hunto nos por traha pa preserva Aruba su bunita paisahenan, su tradicionnan y tur expresion cultural cu ta haci Aruba un destinacion realmente special. Door di adopta un maneho di turismo sostenibel, nos no solamente ta proteha nos isla pa generacionnan cu ta bin, pero tambe ta eleva calidad di bida pa tur hende cu ta biba ariba e dushi pida
baranca aki.
Finalmente, Minister Dangui Oduber ta desea Aruba un dushi Dia di Turismo Mundial yena cu inspiracion y determinacion nan nobo pa hunto nos sigi hiba nos pilar di nos economia dilanti. Alaves, Minister Oduber kier gradici henter e ekipo di Aruba Tourism Authority (ATA) pa un mainta ameno y ta yama danki na tur cu ta labora den turismo, esaki no ta posibel sin boso hospitalidad y servicio cu ta brinda na nos bishitantenan.
Ban hunto sigi traha pa logra un turismo responsable y sostenibel, pa nos henter isla por sigui prospera den un manera cu ta benefisia futuro generacionan.
MINISTER ENDY CROES A ACUDI NA E CEREMONIA DI 75 AÑA DI REPUBLICA DI CHINA
Dialuna atardi, Minister Endy Croes a sali pa un biahe di trabou na Corsou, unda cu el a representa Prome Minister Evelyn Wever – Croes y Gobierno di Aruba na e ocasion special di 75 aña di Founding of People’s Republic of China. E ceremonia a tuma luga den e ballroom di Renaissance Corsou y a wordo decora den un forma unico, unda cu e color cora cu ta identifica China a resalta.
Durante e ceremonia Consul General di China Sr. Li Yigang a hiba palabra y a enfatisa riba bon cooperacion, intercambio cultural, economia di China y e importancia di tin un bon relacion cu e islanan den Caribe. China ta invertiendo hopi den tecnologia y innovacion, cual ta e direccion cu mundo ta bayendo. E impacto cu e comunidad Chines tin na Aruba ta grandi, nan ta un bon amigo, a percura pa un gran parti di nos economia entre otro, den e sector di restaurant y supermercado. Alabes ta significa un poder fuerte pa e desaroyo di economia
di e islanan. Despues di e discurso, Consul Sr. Li Yang hunto cu Vice Premier di Corsou Sr. Charles Cooper, Gezaghebber di Boneiro Sr. Silvana y Minister Endy Croes a toast y a corta bolo pa celebra e ocasion special aki.
“Sigur nos por siña hopi di un pais asina grandi manera China. Nan ta traha duro, domina diferente sector di economia sea ta supermercado of negoshi y nan ta integra na un manera hopi simpel y trankilo den cualkier comunidad. Trahando den colaboracion cu e comunidad Chines nos por logra mucho mas en bes di bringa otro”, Minister Endy Croes a subraya. Pa conclui, Minster Endy Croes ta felicita Repubica di China y e consul general di China cu e 75 aniversario. Alabes, ta gradici pa e invitacion y caluroso recepcion. Por ultimo, e mandatario di Enseñansa y Deporte ta gradici e Pueblo di Corsou pa e bon trato durante su estadia y TeleCuraçao pa e cobertura.
MINISTER ENDY CROES A ACUDI NA E IMPRESIONANTE APERTURA DI ASU
OLIMPIADA 2024
Hopi exito na tur federacion
Recientemente, Minister Endy Croes a acudi na apertura oficial di ASU Olimpiada 2024 cu a tuma luga na Centro Deportivo Fransa Figaroa na Noord. Desde aña 2018, Aruba Sport Unie no a organisa e campeonato aki mas. E directiva nobo di ASU a tuma encargo di e proyecto aki y a hinke den un bachi nobo. E ceremonia a inicia cu desfile di e 20 federacionnan cu ta participando. Sigui pa e himno di Aruba canta pa Sr. Edward van der Biezen.
Minister di Deporte y presidente di ASU Sra. Soraida Boekhoudt a hiba palabara na e ocasion aki. Gihae Gymnastics y Aruba Tang Soo Do Federation a presenta un bunita show cu nan a gana premio cu ne na North Carolina, Merca. Un momento emocionante tabata ora cu e atleta Amika Every a cende pebetero pa duna inicio na ASU Olimpiada 2024. Presidente di ASU hunto cu e mandatario di Deporte a declara e Olimpiada 2024 habri. E publico presenta a presencia un bunita show di apertura yena di color y talento. “Palabra di pabien na directiva di ASU pa organisa e competencia deportivo aki pa nos atletanan.
Danki na Lotto pa Deporte, FFD, SSA, Gabinete Wever –Croes II y tur cu a aporta pa realisa e proyecto aki,” Minister Endy Croes a enfatisa. Por ultimo, e mandatario di Deporte ta desea e atletanan hopi exito cu deseo, disciplina, dedicacion y determinacion ta logra.
