“Aruba a haci un "nulmeting" caba, y tur ayudo riba e tereno aki ta bon bini”
Recientemente Secretario di Estado Zsolt Szabo a informa prensa local, cu el a aserca e organisacion internacional Transparency International, pa yude haci un estudio pa loke ta corupcion na e 6 islanan Hulandes den Caribe, un asina yama "nulmeting". E Secretario di Estado, riba preguntanan di prensa local, a contesta cu e no sa exactamente kico cada isla a haci riba e tereno aki, y cu e no a papia cu e minister presidentnan di e paisnan Aruba, Corsou y Sint Maarten. Riba esaki Prome Minister di Aruba, Evelyn Wever-Croes a duna e siguiente reaccion.
E lucha contra corupcion tin prioridad halto pa Gabinete WeverCroes. Gabinete Wever-Croes I ta e prome Gabinete cu a pone integridad riba e agenda politico, y a trece tur departamento di gobierno hunto pa papia riba e tema aki.
E Gobierno actual a traha duro y a logra algun meta hopi importante pa loke ta integridad, por ehempel: Bureau Integriteit Aruba (BIA)
BIA ta encarga cu conscientisacion y prevencion di corupcion den aparato gubernamental, y ta fungi como 'meldpunt' pa tur hende cu kier haci un melding di corupcion.
Ley di financiamento di partidonan politico
E ley aki ta trece mas transparencia den financiamento político. E meta ta pa prohibi donacionnan politico halto, y cu e meta di corumpi.
Ley di screening, y di integridad di minister. Dirigi riba un screening mas riguroso di candidatonan pa minister, y pa atene reglanan di integridad halto durante cu e ta minister
Ombudsman
Ombudsman, Defensor di Pueblo, caminda cu ciudadanonan por recuri pa entrega un keho contra e trato inhusto.
Corporate Governance
Maneho di Corporate Governance, pa trece uniformidad den reglanan den sector semi publico.
Danki na e esfuerso y determinacion di e Gabinete WeverCroes I y II, awe Aruba tin ley y reglanan cu no ta tur pais den Reino tin, y algun di nan ta hopi mas rigido cu esunnan na Hulanda mes.
NATIONAL INTEGRITY SYSTEM-assessment
Na aña 2022 Aruba a publica un estudio haci pa e National Integrity System (NIS), cu a haci un “base line study”, un "nulmeting", riba e tereno aki. E estudio aki tabata un iniciativa di Fundacion Deugdelijkheid van Bestuur, financia pa Gobierno di Aruba, Gobierno di Hulanda y partners local. E NIS aki a wordo crea y ta wordo promovi door di NGO internacional, Transparency International como parti di un solucion holistico y integral pa bringa corupcion. A base di e recomendacionnan di e NIS, Minister Ursell Arends cu ta encarga cu e cartera di integridad a traha un plan di implementacion, cu a wordo aproba pa Ministerraad, y cu ta den pleno ehecucion.
“Cu corupcion ta existi ainda, maske ta na escala mas chikito, sigur ta di lamenta. E ta un realidad aki na Aruba, mescos cu na Hulanda y tur parti di mundo. Pero importante ta cu aki na Aruba nos ta gara e toro na su cacho, investiga y denuncia, irespecto ken e persona ta, y nos no ta sconde corupcion mas bou di tapijt manera tabata pasa te cu 7 aña pasa prome cu Gabinete Wever-Croes a drenta den gobierno. Ademas, nos a demostra den 7 aña, cu kiebro di integridad tin consecuencia severo.
Nos ta corda un caso na Hulanda, den cual un parlamentario a usa fondonan di su fraccion pa paga compania di su yiu, no tabata tin consecuencia p'e. Es mas, e parlamentario awe a wordo promovi pa minister den e gobierno hulandes actual! Aki na Aruba nos ta corda cu ora un parlamentario a hasi algo similar, mesora Ministerio Publico a cuminsa un investigacion penal contra dje, el a haya 2 aña di castigo pa esaki, y hasta gobierno a cai. Esaki ta prueba cu aki na Aruba nos TA tuma e lucha contra corupcion hopi na serio.
“Aki na Aruba e lucha contra corupcion ta sigui ta di prioridad hopi halto. Si Hulanda kier duna su contribucion na esaki, e ta mas cu bon bini” , Prome Minister a expresa.
Prome Minister Evelyn Wever-Croes: ARUBA TA MIRA ATRAS RIBA UN BISHITA
SUMAMENTE EXITOSO DI PRESIDENT DI SURINAM
Dialuna ultimo dia 21 di october, Aruba a ricibi bishita di President di Surinam, señor Chan Santokhi acompaña pa First Lady Mellisa Santokhi-Seenacherry y Minister di Relacion Exterior, señor Albert Ramdin.
Prome Minister Evelyn Wever-Croes ta indica cu a trata di un bishita sumamente exitoso unda President Santokhi a atende varios reunion, entre otro cu Gobernador di Aruba, S.E. Alfonso Boekhoudt y tambe cu Ministerraad unda cu a firma un MoU (Memorandum of Understanding). Despues di esaki, President Santokhi tawatin un encuentro cu sector comercial di Aruba y parti anochi a bolbe reuni cu Prome Minister di Aruba. Ya pa diamars mainta e President y su delegacion a tuma buelo pa Corsow unda e mandatario lo sigui cu e bishitanan.
E MoU cu a wordo firma durante e encuentro cu Ministerraad ta representa e acuerdo entre Aruba y Surinam unda ta fortalece e relacion entre e dos paisnan. Specialmente riba tereno economico, comercial, agricultura pero tambe loke ta trata e relacion entre e pueblonan. Aruba tin un comunidad grandi di persona cu descendencia di Surinam, otro motibo importante pa sigui traha pa fortifica e lasonan entre e paisnan.
Otro motibo pa sigui amplia e relacion y colaboracion entre Aruba y Surinam ta trata e tema di Oil&Gas, e exploracion di petroleo unda Surinam tin un futuro prometedor. Prome Minister ta menciona cu eynan Aruba por hunga un papel importante y cu Presidente Santokhi mes a menciona cu e kier mira Aruba mas envolvi den e exito di Surinam cu lo ta un exito pa Aruba tambe.
Prome Minister:
“Mi ta hopi contento y satisfecho cu e bishita aki. Tawata algo cu nos a bin ta prepara pa hopi tempo caba. Mi a topa President Santokhi na varios ocasion caba durante biahenan
di trabou, y mi a invite pa bin conoce Aruba. Cordialmente el a acepta e invitacion cual ta un honor grandi pa nos di Gobierno di Aruba. Di akinan un invitacion na nos comunidad specialmente e sector comercial, y esnan cu tin laso cu e comunidad di Surinam, pa probecha di e oportunidadnan nobo aki. Y ohala di e palabracionnan aki bin hopi fruto cu por trece mas progreso y prosperidad pa nos cuidadanonan.”
Prome Minister Evelyn Wever-Croes:
ARUBA TA CEDE DI CONFERENCIA DI KONINKRIJKSPLATFORM
VOOR CARIBISCHE
BURGERZAKEN (KCB)
Un logro grandi di Gabinete Wever-Croes II hunto cu e plataforma KCB ta e burgerservicenummer (BSN) pa studiantenan
Dialuna mainta 28 di october a inicia e conferencia di Plataforma KCB, Koninkrijksplatform voor Caribische Burgerzaken. Den e mundo di asuntonan civil den Caribe, KCB ta e luga unda profesionalnan y expertonan di tur Instituto den Reino ta reuni y comparti conocemento, experiencia y e puntonan di bista pa loke ta trata temanan di Censo.
Riba dialuna mainta, Prome Minister Evelyn Wever-Croes tawatin e honor di habri e conferencia. E mandatario a expresa durante su discurso cu den un mundo cu ta cambiando constantemente ta bon pa bin hunto y traha hunto ya cu den union bo ta mas fuerte. E plataforma aki ya ta trahando hunto cu Aruba pa algun aña y e aña aki Aruba tin e honor di ta anfitrion di e conferencia di KCB.
Un logro grandi di Gabinete Wever-Croes II, hunto cu e plataforma KCB ta e tema di e BSN, e burgerservicenummer. Esaki ta di importancia pa e studiante di Aruba cu ta bay studia na Hulanda. Ya cu desde aña 2024, e por ricibi e BSN prome cu e biaha, y asina entre otro por inscribi pa un camber, aplica pa DigiD, habri un cuenta di banco, y tin hopi facilidad mas prome cu su biahe.
E enfoke di KCB ta pa mehora e calidad di e proceso di trabou y maneho di data den asuntonan civil. Dos biaha pa aña KCB ta organisa dianan asina unda ta traha hunto, siña y crece. E meta ta pa fortifica e cooperacion regional, comparti conocemento, sostene e tumamento di desicion, y garantisa calidad di servicio den e sector.
“Aruba den e sentido aki ta haciendo hopi bon. Nos tin un departamento di Censo cu a innova na un tempo hopi lihe y cu informacion confiabel y asina otro departamentonan por
haci uso corectamente di dj’e. E logro aki nos ta showcase riba plataforma KCB y nos ta hopi orguyoso di nos Censo, nos ta hopi orguyoso cu e servicio cu ta wordo duna, lihe y confiabel y claro, mi ta orguyoso di wak con nos por comparti nos logronan cu otro paisnan den Reino. Banda di esey e bon cooperacion entre Aruba, Corsou, Sint Maarten y BES, semper ta hopi importante y ta bayendo bon”, Prome Minister a indica.
ARUBA PRONTO LO HAYA SU PROPIO INTERNET ARCHIVE SERVER CU TA CONTENE NOS
HERENCIA CULTURAL DEN FORMA DIGITAL
Hunto cu e organisacion Americano Internet Archive, e partnernan cu ta forma parti di Coleccion Aruba, a bin ta digitalisa y haci accesibel via internet mas di 150 mil diferente buki, revista, corant, potret, video etc cu ta contene informacion di Aruba y Papiamento. Di e manera aki na Aruba trabounan pionero den nos region ta wordo haci pa conserva nos herencia cultural y haci esaki accesibel online via www.coleccion.aw. Pa e trabou importante aki, Aruba a wordo premia recientemente cu e Internet Archive Hero Award.
E informacion cu ta wordo digitalisa na Aruba pa e partnersnan di Coleccion Aruba, ta wordo haci accesibel riba internet via e servernan di Internet Archive na Merca cu ta haci esaki gratuitamente posibel. Pa Internet Archive ta importante pa material historico cu ta forma parti di e memoria di un Pais ta accesibel, no solamente pa e habitantenan di e Pais, sino tambe pa mundo henter. Cu e intencion aki, nan ta sostene Aruba pa Coleccion Aruba por ta accesibel riba un server special cu nan a yama Internet Archive Aruba.
Pronto e server aki lo wordo treci Aruba pa asina material digital di nos herencia cultural por wordo warda na Aruba mes, y na mes momento tin un back-up na diferente datacenter di Internet Archive rond di mundo.
E intencion ta pa e server na Aruba un dia fungi tambe como server pa otro paisnan den nos region por tin un backup di nan material historico den e server di Internet Archive di Aruba. Den e tempo nos dilanti nos lo tende mas si por concretisa e idea aki.
E server di Internet Archive Aruba lo wordo instala na Biblioteca Nacional di Aruba na unda elo ta visibel pa publico por mira unda nos herencia cultural ta wordo convserva y haci accesibel pa henter mundo.
INFLACION
DEN 2024 TA MAS ABAO CU 2023
Minister Geoffrey Wever ta anuncia cu e indice di prijs di consumo den september 2024 ta mustra un caida di 0.4% cu e indice di augustus 2024. E inflacion pa ultimo 12 lunanan di september 2023 te cu september 2024 ta 1.5%. Durante e mesun periodo di aña pasa, inflacion tawata 1.7% cu ta un caida di 0.2%. Tur luna Oficina Central di Estadistica (CBS) ta publica e resultadonan principal di e Indice di Prijs di Consumo (CPI).
Pa loke ta e promedio annual, pa e ultimo 24 luna, periodonan di september 2021 te cu september 2022 y september 2023 te cu september 2024 e inflacion ta 2.0%. Compara cu e periodonan di september 2020 te cu september 2021 y september 2022 te cu september 2023, den cual e promedio anual tawata 4.5%, esaki ta mustra un caida di 2.5%
Durante e luna di september, shete di e diesdos sectornan a registra un caida den nivel di prijsnan. Sectornan cu tawata tin un efecto mas grandi riba e caida den inflacion tawata e sectornan di “Mobilario” (-2.7%) y “Transporte” (-1.0%). E sector di “Paña y sapato” a registra un subida den e indice di 4.6%.
Aruba como isla chikito ta importa mayoria di productonan pa consumo. Inflacion den nos partnernan mas importante, Merca y Hulanda ta mustra te cu luna di september un inflacion di 2.4% y 3.5% respectivamente.
E Canasta di consumo ta consisti di 408 producto y servicio. CBS riba un base continuo ta monitor y publica e cambio di prijsnan di e canasta di consumo. E publicacion ta uno detaya y ta duna un bista riba e desaroyo di prijsnan di diferente producto y bienes.
Minister di Asuntonan Economico, Comunicacion y Desaroyo Sostenibel, mr. Geoffrey Wever, ta gradici CBS pa e trabao mensual di publico e desaroyo di nivel di prijsnan na Aruba y ta invita tur ciudadano pa bishita e website di CBS www.cbs.aw pa mas informacion.
Minister demisionario Geoffrey Wever: IMPORTANCIA DI MIDI PROGRESO ECONOMICO CU TA TENE CUENTA CU DESAROYO SOSTENIBEL
Diahuebs 24 october 2024, riba e di 79 anniversario di United Nations, minister demisionario Geoffrey Wever, hunto cu International Organization for Migration Aruba (IOM), cu como tema ‘Rethinking how we measure economic growth’, a haci e desvelo di e standing mural ‘Joyful Growth Index’.
Minister demisionario Geoffrey Wever a enfatisa e importancia di e transicion pa un modelo economico nobo cu ta duradero y inclusivo y cu ta importante pa por midi e progreso economico usando indicadornan tradicional complementa pa indicadornan innovativo cu ta gara e esencia di inclusividad y di nos medio ambiente.
Den cuadro di desaroyo sostenibel y Sustainable Development Goal (SDG) #8 ‘crecemento economico’ y SDG #17 ‘partnership’ a enfatisa e importancia di midi progreso economico di manera innovativo incluyendo tambe aspectonan social y medio-ambiental y e importancia di traha hunto pa cu esaki. E standing mural ta sirbi como simbolo di con por midi progreso den desaroyo sostenibel di manera innovativo.
Minister Geoffrey Wever: “Mi ta contento cu nos por bisa cu Aruba ta haciendo e transicion pa un modelo economico nobo por medio di ehecucion di e plan di accion nacional pa Aruba su transicion pa un modelo economico duradero y inclusivo y cu por medio di e Nationaal Statistisch Systeem (NSS) cu ta bezig ta ser construi, lo bin un proceso pa identifica e datos y indicadornan necesario y e parti innovativo den monitorea progreso economico tambe por ta parti di esaki. Danki na IOM pa e iniciativa di e standing mural y hopi exito cu continuacion di e proyecto!”
