PROME MINISTER TA DESEA DELEGACION DI ARUBA
EXITO NA WEGANAN OLIMPICO NA PARIS
“Boso determinacion pa representa Aruba riba e scenario mundial ya ta un logro grandi y Aruba ta hopi orguyoso di cada un di boso”
Paris, Francia, ta anfitrion di e Weganan Olimpico e aña aki for di 26 di juli te cu 11 di augustus. Weganan Olimpico Paris 2024 oficialmente a inicia diabierna ultimo na unda cu e eventonan tin como meta pa mescla tradicion cu innovacion, enfoca riba sostenibilidad, union y paz, tecnologia, inclusividad y diversidad y un celebracion di cultura. Esaki ta di tres biaha cu Paris ta anfitrion di Weganan Olimpico, e prome na 1900, e di dos na 1924 y awo, despues di 100 aña, un biaha mas e miho atletanan di mundo ta competi den e prestigioso Weganan Olimpico na Paris.
Mas di 10.500 atleta for di 206 pais ta compitiendo den 32 deporte y 329 evento. Delegacionnan, durante ceremonia di inauguracion, a participa cada un poniendo enfasis na colornan di nan bandera y nan cultura. Delegacion di Aruba a luci cu
diseño di Andrew Curiel, kende a inspira tambe riba colornan di nos bandera y cultura.
E apertura tawata un celebracion hopi spectacular y a enfatisa cultura, historia y innovacion Frances na unda cu pa prome biaha den historia di Olimpiada, e ceremonia di apertura a tuma luga diferente di un setup tradicional den un stadion. River Seine tawata e stage cu a mustra e bunitesa di Paris na unda cu delegacionnan a haci nan entrada cu botonan di diferente tamaño, cada pais encabesa cu nan cargador di bandera di nan pais. E procesion di 6 kilometer y 85 boto den e rio, a proyecta luganan icono di Paris manera e Eiffel Tower, Notre-Dame Cathedral, y e Museo di Louvre. Un ceremonia diferente, enfatisando arte, musica, baile y cultura Frances.
Continuacion PROME MINISTER TA DESEA DELEGACION DI ARUBA EXITO....
E Weganan Olimpico ta mas cu solamente un competencia; nan ta un celebracion di humanidad, nan ta testimonio di kico por logra door di trabou duru, perseverancia, y disciplina propio. Prome Minister Evelyn Wever-Croes, den nomber di Gobierno di Aruba, ta desea e delegacion olimpico di Aruba y tur seis atleta cu ta participa den diferente deporte, hopi exito. Un danki tambe na señora Nicole Hoevertsz, Secretaria general di COA y Vice - presidente di IOC, cu a core cu e antorcha di e Weganan Olimpico door di cayanan di Paris.
“Boso determinacion pa dedica tempo pa train y prepara pa representa Aruba riba e scenario mundial ya ta un logro grandi y Aruba por ta hopi orguyoso di cada un di boso. Awo na Paris, boso tin e oportunidad pa demostra boso talento y dedicacion na mundo. Biba cada momento cu curashi y confiansa den boso mes. Competi cu integridad y orguyo. Boso contribucion na deporte y participacion na e Weganan Olimpico ta grandemente aprecia. Aruba completo ta orguyoso di cada un di boso. Danki pa pone Aruba su nomber un baiha mas resona mundialmente den e ramo di deporte. Exito na cada un di boso’, Prome Minister a expresa.
Prome
Minister Evelyn Wever-Croes: 30 di juli
DIA MUNDIAL CONTRA TRAFICACION DI HENDE
Aruba ta uni na e esfuersonan di mundo riba con pa combati e crimen aki cu ta kita dignidad y e libertad di personanan
Dia 30 di juli, ta Dia Mundial Contra Traficacion di Hende cu a wordo proclama door di Nacionnan Uni. Esaki ta un dia di conscientisacion pa recorda nos riba e necesidad urgente pa combati e crimen aki cu ta kita dignidad y e libertad di personanan. Esaki ta un dia pa uni nos forsa den solidaridad contra e explotacion di bida humano y pa reafirma nos compromiso na husticia y derecho humano. Aunke na Aruba tambe tin su propio fecha nacional, 18 di October, pa conscientisa nos comunidad riba traficacion di hende, Aruba ta uni na e esfuersonan di mundo riba con pa combati e fenomeno aki.
Aruba ta pasando den diferente reto social, economico, financiero y migratorio. Un aspecto hopi tristo y peligroso di e crisis migratorio, ta e fenomeno di traficacion y contrabanda di hende, mensenhandel/ mensensmokkel, manera ta ser bisa na Hulandes. Traficacion di Hende, miho conoci como sclavitud moderno, no solamente mester wordo reconoci como un delito of crimen, pero e ta un violacion profundo contra derecho humano y ta responsabilidad di nos tur pa combati’e. Den esaki ta importante pa tin cooperacion internacional, esfuerso di cuerpo policial y legislacion fuerte y un pueblo resiliente pa hunto combati e crimen global aki.
Aruba na luna di juni aña pasa, a haya un evaluacion positivo
di US State Department y a pone Aruba bek na e ranking Tier 2. Esaki ta resultado di esfuersonan di conscientisacion y accionnan haci entre otro e campaña di conscientisacion "Habri bo Wowo" cu CMMA, a bin cu ne pa conscientisa comunidad riba e importancia di ta alerta pa cu casonan di traficacion di hende. Tambe Aruba a haci hopi inversion, a duna sosten y atencion na nos departamento of ‘coordinatie punt’, y a haci esfuersonan internacional tambe. Esaki ta keda un prioridad pa Gabinete Wever-Croes.
“Pa medio di iniciativanan cu ta enfoca riba prevencion, proteccion y actua na e momento cu mester actua cu man duro, nos ta demostra e red di trafico di hende un mensahe cla, cu nan accion no ta permisibel, noble ni normal. Esaki ta contra ley. Tambe cu e iniciativanan aki, nos ta duna sosten na victimanan y duna nan e siguransa cu e malechornan aki lo enfrenta husticia. Gobierno ta haciendo tur esfuerso pa preveni traficacion di hende y percura cu tur hende por biba liber di miedo di explotacion y caminda cu husticia ta prevalece pa tur victima di trafico humano”, Prome Minister Evelyn WeverCroes a expresa.
Prome Minister ta haci un peticion na comunidad di Aruba, pa hunto keda alerta y pa ora cu cualkier ciudadano sinti cu tin un caso di traficacion di hende, meld na CMMA di biaha pa nan por actua debidamente. Por haci esaki riba medionan social, cmmaruba of por yama e hotline, 5923231 of na oficina na 5975223 of tambe via email info@cmmaruba.com.
ARUBA TA DUNA PRESENTACION RIBA MANEHO FINANCIERO NA SECRETARIADO DI CAFT
Dia 28 di juli, Departamento di Finansa a duna un presentacion riba e maneho financiero di Aruba na e secretariado di CAFT. E presentacion a tuma luga den presencia di Centrale Accountantsdienst (CAD) hunto cu e Tijdelijke Werkorganisaties Aruba en Nederland (TWO) cu ta coordina a e progreso di e reformanan den cuadro di e Landspakket.
E meta di e presentacion tabata pa informa CAFT di e trabounan cu ta wordo haci pa na Aruba pa por mehora e maneho financiero di nos Pais. Durante e presentacion CAFT por a haya un bista di e ultimo desaroyonan y tambe a haya un bista mas detaya di e procesonan financiero cu lo wordo fortifica of reorganisa e tempo nos dilanti. Den cuadro di esaki por menciona cu ta trahando riba e implementacion di e modelo di '3-lines of defence,' cu ta un sistema di control cu lo mehora e control interno den e columna financiero di Pais Aruba.
Minister Maduro di Finansa ta gradici e ehecutivonan di Departamento di Finansa, CAFT, TWO Aruba y Hulanda, y
tambe CAD pa e reunion frutifero aki na unda por a brinda un bista mas amplio riba e trabounan necesario pa por mehora e maneho financiero di Aruba. "Nos Pais ta recuperando y na un manera activo y cu rienda den propio man, nos ta traha pa sigui desaroya nos Pais su finansa publico," tabata palabranan di Minister Maduro di Finansa.
ENTRANTE AUGUSTUS 2024, TUR MUCHA DI KLAS 1 DI SCOL BASICO LO SIÑA LESA Y SKIRBI
NA PAPIAMENTO
Manera ta conoci, den cuadro di Maneho di Idioma nobo, ta introduci oficialmente Alfabetisacion na Papiamento e aña escolar binidero. Esaki ta nifica cu desde aña escolar 20242025, e alumnonan di klas 1 di scol basico lo siña lesa y skirbi na Papiamento. Lo duna Hulandes cu un acercamento nobo cu ta pas mas den e contexto di nos muchanan. En conexion cu esaki, a prepara tur docente di klas 1 y cabesante di scol basico, unda cu nan a atende un curso di profesionalisacion. Durante e cursonan a trata: e metanan nucleo di idioma y comunicacion, conocemento di e material, didactica di idioma materno y didactica di idioma stranhero y dominio di Papiamento.
Ademas di esaki, a inverti alrededor di 1.2 miyon florin pa desaroya e materialnan nobo. A print e materialnan na Hulanda, esaki nan a yega Aruba y a reparti nan pa tur scol basico. Minister Endy Croes a subraya cu diferente estudio internacional hopi profundo cu a ser haci riba e topico aki entre otro, rapport di World Bank di aña 2021, unda a yega na e conclusion cu den e prome añanan e alumno tin cu ricibi enseñansa den su idioma
materno. E rapport di UNESCO di aña 2016 titula: “If you don’t understand, how can you learn?” tambe a trata e tema aki. Nos profesionalnan a haci uzo di e rapportnan aki y realisa investigacion hopi profundo na Aruba y a yega na e mesun conclusion cu e rapportnan internacional. Pa e motibo aki nos a percura pa introduci Papiamento den klas 1 di scol basico aña escolar 2024-2025. “E vision ta pa den futuro Hulandes of un otro idioma e alumnonan lo ricibi nan como Idioma Stranhero “vreemde taal” y lo prepara e maestronan pa asina garantisa cu nos studiantenan por prepara y ta exitoso den nan carera profesional pa por sirbi Pais Aruba.
Por ultimo, e mandatario di Enseñansa ta pidi cooperacion di tur docente, maestro y esnan den e veld di enseñansa. Alabes ta gradici Departamento di Enseñansa (DEA) y tur esnan cu a traha riba e proyecto aki. “Danki na e tereno di enseñansa, tur experto y “schoolbestuur” cu a pone hopi esfuerso y e compromiso pa hunto nos crusa e brug aki augustus proximo”, Minister Endy Croes a finalisa.
MINISTER ENDY CROES CU UN BUNITA MENSAHE
PA E MENTOR - Y MIEMBRONAN DI POC CU TA
TRAHANDO DURO PA RICIBI NOS STUDIANTENAN
NA NAN YEGADA NA HULANDA
Recientemente, Minister Endy Croes a dirigi palabra na e mentor- y miembronan di Plaatselijke Opvangcommissie (POC) di Kabinet di Aruba. Na e mentornan: John, Garlon, Nathaly, Reina, Rasnaly, Solange, Shahaira y Yuraima desde cu boso a ricibi den luna di mei ultimo e prome lista cu nomber di e studiantenan cu lo continua cu nan estudio avansa na Hulanda e aña aki, boso ta trahando incansablemente pa nan yegada. Hopi pregunta a wordo contesta y hopi conseho a ser duna. Boso a tuma contacto cu Gemeente pa facilita e inscripcion y a haci e citanan necesario cu DUO. Ademas di esaki, a regla hotel pa asina e studiantenan cu ta yegando dia 5 y 6 di augustus proximo por hospeda. Boso a inverti hopi ora di trabou boluntario pa prepara lo miho posibel prome cu e studiantenan yega Hulanda. “Tur boso esfueso, sacrificio y trabou boluntrio eherece ta wordo inmensamente balora y hopi aprecia”, Minister Endy Croes a subraya.
Na e “ouderejaars studenten” cu ta forma parti di e POC di nan respectivo ciudad di estudio en bes di bay gosa di vakantie, boso a scoge pa hinca boso tempo y energia hunto cu boso mentor pa traha un bunita programa pa e studiantenan cu ta yegando Hulanda. Cu yen di energia y entusiasmo boso a yuda cu e programa, unda cu a presenta ideanan moderno. Boso ta preparando pa yuda e studiantenan conoce e ciudad, unda
cu nan ta bay biba y studia na e miho forma posibel. Boso ta yuda masha hopi pa acomoda nos studiantenan nobo den tur aspecto. Masha danki pa tur boso esfuerso y boso bunita trabou cu boso ta haciendo. Como Minister di Enseñansa y Deporte mi ta gradici boso pa boso excelente trabou, disciplina, dedicacion y determinacion pa laga nos studiantenan sinti nan mes na cas na nan yegada na Hulanda. Na crioyo bisa: na nan cas leu for di nan cas Aruba. “Palabra di gratitud y danki for di profundidad di mi curason na cada un di boso. Masha danki! “Keep up the great job”, Minister Endy Croes a finalisa.
Maneho di Idioma:
SINTONISA PROGRAMA INFORMATIVO EN CONEXION
CU INTRODUCCION DI PAPIAMENTO DEN KLAS 1 DI
SCOL BASICO DIALUNA, 29 DI JULI
TeleAruba y Canal 22 lo ta en bibo desde 9 or di anochi
Manera ta conoci, entrante aña escolar 2024-2025, e alumnonan di klas 1 di scol basico lo siña lesa y skirbi na Papiamento. Lo duna Hulandes cu un acercamento nobo cu ta pas mas den e contexto di nos muchanan. E ta cientificamente proba cu si e muchanan forma un base fuerte den nan propio idioma, nan por siña e otro idiomanan hopi mas facil y miho. Ademas, siña lesa y skirbi den idioma materno Papiamento lo haci cu e muchanan lo compronde loke nan ta skirbi y lesa y lo stimula nan habilidadnan di siña en general.
Esaki lo ta beneficioso pa e muchanan, mirando cu nan lo bira critico di pensamento y lo ta mas prepara pa duna nan opinion durante les. Ademas di esaki, nan por conecta miho cu nan rais cultural. E muchanan lo sinti mas sigur den nan proceso di siñamento, pasobra esaki ta alinia cu nan idioma materno y nan cultura. Pueblo di Aruba ta cordialmente invita pa sintonisa
programa en conexion cu introduccion di Papiamento den klas 1 di scol basico a traves di TeleAruba, Canal 22, pagina di Facebook di Minister Endy Croes y Gabinete Wever-Croes, cuminsando 9 or di anochi.
