20 CUPO DI TRABOU LO HABRI PA HOBENNAN CERCA KUSTWACHT ARUBA
Diaranson mainta 2 di october Prome Minister Evelyn WeverCroes a reuni cu Director di Kustwacht señor Hansen riba un tema hopi importante di e desaroyo di Kustwacht. Kustwacht Aruba ta parti di Kustwacht di Reino cu ta parti di defensa Hulandes, y nan ta yuda tene frontera di Aruba sigur patruyando e awanan teritorial.
Durante e reunion Kustwacht Aruba a informa Prome Minister cu nan ta bezig cu un transicion di Kustwacht pa asina nan ta disponibel 24/7, haciendo un control continuo di e awanan teritorial di Aruba. Akinan e mandatario a indica cu esaki ta algo grandi pa Aruba y Gobierno ta bin ta pidi esaki desde hopi tempo.
Cu esaki a bin otro bon noticia tambe. Pa motibo di e transicion aki, na Aruba lo habri 20 cupo di trabou cerca Kustwacht y esaki ta un bon oportunidad pa hobennan na Aruba cu semper tawata interesa den un carera asina. Durante e reunion Kustwacht a entrega tur loke tin di haber cu e documentacion di e transicion na Gobierno di Aruba y pa banda di Gobierno e siguiente paso ta busca e consehonan necesario riba esaki y asina aproba y ratifica e acuerdonan.
“Cu esaki e 20 cuponan di trabou por habri y hobennan di Aruba mes lo por yuda cu control y patruya di nos awanan teritorial 24 ora pa dia, 7 dia pa siman. E siguridad di nos frontera ta algo di preocupacion grandi y creciente pero mi tin tur confiansa cu e ampliacion aki di patruya y control lo yuda nos tene nos frontera y pais mas sigur”, Prome Minister a expresa.
A SCOHE PA DUNA ARUBUS N.V. UN OPORTUNIDAD Y SPERANSA
E malesa di patronahe politico ta un desafio cronico y dificil pa sana. Minister Arends a tuma nota di relato extenso den un medio di comunicacion, tocante e nombracion y retiro di ex-director di Arubus N.V. Aunke no por divulga asuntonan personal ta hopi importante si pa Pueblo tin informacionnan claro di kico ta pasa cu fondonan di e pagado di belasting, sodor di Pueblo trahador.
Ministerio di Transporte den caso di retiro di ex-director di Arubus N.V. ta simplemente actua conforme un acuerdo cu tabata legalmente estableci door di e Minister di Transporte anterior (di MEP). Minister Arends mester a haci un evaluacion y haci un decision entre cumpli cu e contrato valido, of laga Arubus N.V. y su trahadonan bai den bancarota, sin speransa di recuperacion. A eligi e prome opcion, dunando asina un chens pa Arubus N.V. tin speransa pa por ehecuta planes concreto
pa mehora su situacion financiero.
Ministerio di Integridad a bin ta traha riba e Ordenanza Corporate Governance desde 2021. E concepto a pasa su rondanan interino di patricipacion y awo ta den su fase final na DWJZ pa por sigui pa Raad van Advies. E ley aki ta di suma importancia pa por garantisa sistemanan mas integro y confiabel y evita tipo di casonan aki den futuro. Articulo 9 y 10 di e (concepto) di ley ta regla nombracionan di miembronan y commissarionan y e profielschets. Pa mas informacion tocante e Ley por bishita www.publico.aw
“Arubus N.V. ta hopi mas cu un victima di patronahe politico. E ta un compania cu tin tur potencial pa prospera y contribui di manera significante na mobilidad, transporte y bienestar den nos Pais, “ Minister Arends ta reacciona.
HULANDA LO ASISTI ARUBA CU E DESAROYO DI E INDUSTRIA AGRICOLA COMERCIAL
Minister Geoffrey Wever a anuncia cu pronto lo cuminsa cu un estudio riba e tipo di ‘greenhouses’ mas ideal, cultivonan prometedor y sondeo di metodonan di cultivo den agricultura comercial na Aruba. Esaki ta un otro colaboracion cu lo tuma luga hunto cu Hulanda como parti di e maneho di Ministerio di Asuntonan Economico, Comunicacion y Desaroyo Sostenibel pa e desaroyo di industria agricola como un pilar di nos economia. Resultado di e estudio lo bira parti di e maneho pa stimula e industria agricola.
Un paso clave den desaroyo empresarial y uzo di tecnologia innovativo den e sector agricola ta posibel danki na e ehecucion di e ‘Plan di Accion 2023-2025: Aruba su transicion pa un modelo economico sostenibel y inclusivo’. Un di e proyectonan di e plan di accion aki ta e asina yama, ‘Agri Fund’, cu a keda estableci na Maart ultimo. Despues di un proceso legal di 2 aña, e ‘Agri Fund’ a pone un suma disponibel di 3 miyon florin pa ofrece financiamento na un interes abao den e industria agricola, den colaboracion cu Qredits Aruba y Minister Arends. Adicionalmente, pa duna e empresarionan aki e hermentnan necesario, e ‘Agri Business Academy’ tambe a drenta den ehecucion desde 2022.
E ‘Agri Business Academy’ ta un programa pa empresarionan cu kier cuminsa nan propio negoshi of cu tin nan negoshi caba den e sector di Agricultura y ta desea di haya mas conocemento y experiencia den e area di ‘Business Management’. Tanto ‘Agri Fund’ como tambe e ‘Agri Business Academy’ ta posibel danki na e bon cooperacion cu Qredits Aruba.
Pa sigui pusha e desaroyo di e industra agricola como pilar economico, dia 2 di Juli ultimo riba peticion di minister Geoffrey Wever, conseho di minister a aproba e ampliacion di e Landspakket. E ampliacion aki ta encera tanto e estudio nobo aki den sector agricola cu lo cuminsa pronto y tambe e financiamiento pa ehecuta esaki. Mientrastanto, tres instituto di conocemento a wordo acerca pa haci un oferta pa e estudio aki. Despues di un evaluacion mutuo, tanto Gobierno di Aruba y Hulanda a duna aprobacion pa Priva / Greengrounds ehecuta e estudio riba e uzo optimal di “greenhouses” den agricultura comercial na Aruba.
Minister Geoffrey Wever ta gradecido pa e bon cooperacion cu Hulanda y cu hunto a logra pa haci e estudio importante aki posibel. “Mi ta contento Hulanda a kere den nos vision y pone
e financiamento disponibel pa nos haci un estudio actual riba e uzo optimal di tecnologia innovativo den e industria agricola. E estudio aki ta completa tur loke mi Ministerio ta haci pa stimula e desaroyo economico y diversifica Aruba su economia” asina e mandatario a expresa.
E aplicacion di e ‘Landspakket’ como instrumento ta trece structura pa e desaroyo di pais Aruba y ta facilita e creacion y ehecucion di varios proyecto concreto na un manera integral. Den e trayecto di 2021 padilanti, e cooperacion cu Hulanda a resulta di ta uno positivo cu a trece beneficio den forma di experticio, ayudo financiero y asistencia tecnico. 'Landspakket' ta un instrumento extra cu Aruba tin na su disposicion por avansa e maneho necesario y realisa e vision economico di Aruba den bienestar di tur ciudadano, y mester percura pa continua haci bon uzo di e cooperacion aki.
MINISTER GEOFFREY WEVER A REUNI CU
INTERNATIONAL MONETARY FUND
Riba 1 di october Minister Geoffrey Wever a reuni cu un delegacion di International Monetary Fund ("IMF") den cuadro di preparacion pa e proximo Article IV Consultation cu ta programa den 2025.
Durante un reunion ameno minister Geoffrey Wever y IMF a elabora riba e maneho y vision cu Ministerio di Asuntonan Economico, Comunicacion y Desaroyo Sostenibel ta bin ta implementando riba entre otro tereno di comptencia husto, diversifica Aruba su economia y proyectonan di energia renobabel.
Cu un enfoke riba implementa, minister Geoffrey Wever a duna IMF un resumen di su maneho y proyectonan den ehecucion. Pa combati economia informal sector publico y priva ta trahando hunto riba e implementacion di e plan “National Program for Formalizing the Shadow Economy in Aruba” pa garantisa un “fair-level playing field” den tur mercado. Den cuadro di competencia husto, tambe a elabora riba proceso pa lanta e Aruba Fair Trade Authority cu desde januari 2024 ta operacionalmente independiente di gobierno.
Pa crea mas sectornan economico ta pusha e desaroyo di industria agricola como un pilar di nos economia. Hunto cu Qredits Aruba a crea e “Agri Fund” y “Agri Business Academy”. E fondo pa agricola comercial of “Agri Fund” cu un suma total di 3 miyon florin, ta ofrece financiamento na un interes reduci di 2% pa sumanan entre Afl. 5.000 y Afl. 200.000. E “Agri Business Academy” ta un programa pa (futuro) empresarionan cu kier cuminsa nan propio negoshi of cu tin nan negoshi caba den e sector agricola y ta desea di haya mas conocimento y experiencia den e area di ‘Business Management’. Pa subi e produccion comercial di webo pa 1.4 miyon den 2026, tin un “Open Call” andando y a instala un wergroep di DEZHI, Santa Rosa y DIP pa traha y implementa maneho. Parti di e maneho aki ta tambe e asistencia di Hulanda pa e desaroyo di e industria agricola comercial. Adicionalmente e nota di maneho “Development of the Orange Economy in San Nicolas” ta den ehecucion desde 2023 unda lo ofrece entre otro un
“Creative Business Academy” pa pusha e industria creativo como otro pilar economico. Tambe minister Geoffrey Wever a elabora riba e potencial y transformacion di FreeZone y e colaboracion cu UN/ ECLAC pa ricibi asistencia pa desaroya e sector “FINTECH”.
Desaroyo sostenibel tambe tawata un tema durante e reunion cu IMF. Pa cu esaki Minister Geoffrey a elabora riba e Plan di Accion 2023-2025: Aruba su transicion pa un modelo economico sostenibel y inclusivo cu ta consisti di diferente proyectonan pa stimula e desaroyo sostenibel di Aruba. Recientemente, Minister Geoffrey Wever a entrega e prome 4 auto electrico na DEZHI como parti di e programa piloto pa e transicion completo di e fleta di Gobierno pa autonan electrico. E transicion aki tambe ta bai man den man cu instalacion di “EV-chargers” como parti tambe di revitalisa centro di Oranjestad. Pa baha e consumo di energia, resultado di e scan di edificio di Staten lo sirbi como modelo pa tur edificionan di gobierno y asina contribui pa stimula e “green sector” como sector economico. “International Monetary Fund ta un organisacion internacional cu ta evalua e desaroyo di nos pais continuamente y ta importante duna informacion concreto riba loke Aruba ta hasi riba tereno economico y desaroyo sostenibel pa fortifica economia y desaroyo di Aruba cu pasonan concreto", segun Minister Geoffrey Wever.
MINISTER GEOFFREY WEVER A INTERCAMBIA INFORMACION TOCANTE ENERGIA LIMPI CU ALUMNONAN DI SINT DOMINICUS COLLEGE
E siman aki Minister Geoffrey Wever a bishita alumnonan di 6e klas di Sint Dominicus College den cuadro di e metanan di desaroyo sostenibel (Sustainable Development Goals (SDGs)) na unda Minister Geoffrey Wever a intercambia cu e alumnonan over, entre otro, e importancia di energia limpi y economico (SDG #7) pa un desaroyo sostenibel.
Aproximadamente, 15% di e energia genera na Aruba ta energia limpi (molina di biento y "solar panels") - 85% di e electricidad cu ta wordo genera na Aruba ta haci uzo di ‘fossil fuels’. E prijsnan halto di ‘fossil fuels’ (petroleo) ta pone presion grandi riba balansa di pago y reserva di divisa. Ta wordo estima cu pa aña ta wordo paga entre 250-300 miyon Florin na importacion di ‘fossil fuels’ (petroleo) pa uzo local. Minister Geoffrey Wever a splica e importancia pa haci e transicion pa energia limpi tambe den cuadro di e efecto di ‘fossil fuels’ riba cambio climatico y impacto economico.
E importancia di energia limpi y economico a capta e interes di e alumnonan y e alumnonan tabatin conocemento tambe di formanan di energia limpi. Banda di e tema aki e alumnonan tabata interesa tambe den temanan manera innovacion, reduci desigualdad, barionan sostenibel, bida riba tera y husticia.
“Mi ta gradici Sint Dominicus College pa a ricibi nos. Mi ta contento di mira cu nos hobennan tambe tin nan conocemento y opinion riba e temanan complica di desaroyo sostenibel. Ta importante pa educa nos hobennan riba e retonan cu paisnan y mundo tin actualmente pa asina empodera nan pa nan ta studiantenan y ciudadanonan informa y critico", minister Geoffrey Wever a opina.
Minister Geoffrey Wever: INSTALACION DI 100 LUZ ADICIONAL Y BARINAN NOBO DEN CUADRO DI REVITALISACION DI ORANJESTAD A CUMINSA
Despues cu den luna di juni a cuminsa cu limpiesa di caya grandi, ta sigui cu instalacion di barinan di sushi y instalacion di 100 luz adicional y asina contribui positivamente na e seguridad y limpiesa den nos centro di ciudad, segun Minister Geoffrey Wever. Un inversion di mas cu 270 mil Florin adicional den nos centro di ciudad, e luznan ta esteticamente "clasico" y bunita pa mantene e zjeito di e area, y ta provee mas iluminacion compara cu e modelonan anterior. Tur inversionan adicional pa nos centro di ciudad ta parti di un strategia holistico pa revitalisa Oranjestad y hasi nos capital mas comercialmente atractivo.
Esfuersonan di revitalisacion no ta limita solamente na Caya Betico Croes. Wilhelminastraat y Columbusstraat y cercania a haya debido atencion mirando cu aunke Oranjestad pa añanan no tabata den su miho momento, e area aki a sa di crece organicamente den un “cluster culinario”. E area lo mester bira un centro di actividad comercial y recreativo, atrayendo tanto residente como turista. E siman aki a cuminsa cu fase 3 cu renovacion den e area di parkeo na Caya E. Harms y Irenestraat pa asina sigui aporta na e crecemento y desaroyo positivo di e area.
Na Columbusstraat, a instala mas iluminacion, amplia e espacio pa peaton y publico, mas parkeo, y a zorg pa planta mata asina crea un ambiente mas agradabel. Revitalisacion di Oranjestad ta inclui tambe e restauracion di edificionan historico, preservando e herencia cultural di nos isla mientras ta propaga un desaroyo “urbano” sostenibel, elevando e prospecto comercial di e area y contribui na un ambiente mas agradabel pa local y turista por bishita.
Minister Geoffrey Wever, ta enfatisa cu e obhetivo principal ta pa crea un ambiente sigur, atractivo y dinamico pa comunidad y bishitantenan, mientras ta sigura cu e crecemento y desaroyo ta sostenibel y na beneficio di e futuro di nos isla.
