IslaOnline 3 Januari 2023

DEN 2023 BAN UNI PA ENFRENTA E RETONAN HUNTO Y PA CARGA E EXITO HUNTO

Mas uni nos ta, mas fuerte Aruba ta

Gabinete Wever - Croes II ta yama bon bini na aña 2023 yena cu hopi optimismo y oportunidadnan nobo, pa crea progreso y bienestar pa tur ciudadano. Un aña cu lo enfoca na atrae inversionnan nobo, pa diversifica di nos economia, specialmente riba tereno di energia, pa asina hunto cu e pilar di turismo, brinda Aruba e stabilidad necesario pa no solamente ‘bounce back’ di e crisisnan, pero pa ‘bounce forward’, pa recupera mas fuerte y resiliente.

Prome Minister Evelyn Wever - Croes ta invita cada ciudadano di Aruba pa den aña 2023 uni pa enfrenta retonan hunto y pa carga e exito hunto. Historia di nos pais a demostra con mas fuerte nos por ta si nos uni. Diferencia di opinion por tey, contal cu semper tin respet. Y irespecto e diferencia di opinion, ora ta trata di Aruba, mas uni nos ta, mas fuerte Aruba ta. Aña 2023 lo trece hopi cambio pa cada un di nos, y nan impacto riba cada un di nos lo ta fuerte. Sinembargo e cambionan aki tambe lo trece cosnan bon pa nos entre otro progreso y bienestar cu nos ciudadanonan merece. Aruba ta un pais bendiciona, y cu fe den Dios, mester ta positivismo cu tin cosnan grandi nos dilanti. Den union y positivismo nos lo supera e retonan cu crusa nos caminda den 2023, pa diversifica nos economia, pa transiciona pa energia mas limpi. Esaki lo crea cupo di empleo, y lo crea un base financiero solido cu lo permiti Aruba haci inversionnan atrobe den nos infrastructura, dirigi riba desaroyo sostenibel, cu respet pa nos medio ambiente.

Den union nos lo mehora e calidad di cuido, y eleva e nivel di nos enseñansa.

Den union nos lo haci Aruba mas sigur, y brinda apoyo na tur cu mester di dje.

Y tur esaki cu un actitud positivo, cu ta permiti nos mira e

solucion pa cada reto y oportunidad nobo den cada situacion. Pesey Gobierno di Aruba ta decreta aña 2023 como aña di union y positivismo. Uni nos lo atende cu e retonan nobo creando solucion, oportunidad y un base solido pa progreso y felicidad pa un y tur den nos comunidad.

Pa conclui, Prome Minister Wever - Croes ta expresa e siguiente mensahe cual ta un frase di e actual presidente di Ukrania Volodimir Zelensky; el a bisa recientemente: ‘Carga responsabilidad ta mas importante cu trata di ta un heroe.’ Premier Wever - Croes ta di pensamento cu cargando responsabilidad, bo por bira un heroe, pero si bo no carga bo responsabilidad, bo no po bira un heroe. Nos cada un tin un responsabilidad di carga pa hiba nos famia y nos pais padilanti, algun tin un responsabilidad mas grandi cu otro. Pero hecho ta cu nos tur mester carga nos responsabilidad. ‘Ban sigui carga nos responsabilidad pa un Aruba integro. Mi ta invitabo pa den union y cu Positivismo, nos carga nos responsabilidad,’ Prome Minister a termina bisando.

E YABI PA EXITO DEN 2023 TA UNION Y POSITIVISMO.

DISCURSO NACIONAL DECEMBER 2022

MINISTER PRESIDENT EVELYN WEVER CROES

FINANSA Y CULTURA

Trabou serio y maneho financiero solido a evita un “aanwijzing”, un instruccion, di Hulanda den 2022; a sigui baha gastonan di gobierno, y a cumpli cu empleadonan publico cu a contribui sacrificando 12,6% di nan salario. Ta e maneho serio y solido aki a crea surplus pa 2023 y a mantene credibilidad financiero di Aruba cerca inversionista. Aruba su maneho financiero firme y prudente a wordo reconoci den Reino y pa instancianan financiero internacional, y perspectivanan ta mustra bon, Y pa fortalece nos recuperacion pa crea un base solido y sostenibel pa paga debenan y sigui recupera, colega Xiomara Maduro a anuncia e Plan di Impuesto 2023 cu un rebaho importante di tarifanan di impuesto riba salario y pensioen. Riba tereno di cultura, a sigui reconoce baluartenan pa nan contribucion grandi na nos cultura, pasobra cultura bo tin cu bib’e!

HUSTICIA Y ASUNTONAN SOCIAL

Otro aña ta cabando. Un aña cu a trece hopi cos bon, pero tambe hopi reto pa mundo henter.

Aña 2022 lo pasa pa historia como un aña caminda cu sucesonan internacional a crusa fronteranan, causando impacto fuerte den tur pais na mundo, y na Aruba tambe. Sea ta riba tereno di salud, di cambio climatico, tereno Financiero-Economico of Social.

Na comienso di e aña aki, e variante di Covid-19, Omicron, a extende e pandemia y, cu esaki, a tranca recuperacion economico mundialmente. Mientras nos tabata lucha pa sali di e gara di e pandemia, dia 24 di februari, Rusia a invadi Ucrania y a inicia un guera den Europa cu miyones di hende mester a huy, bay biba den otro paisnan di Europa. Cambio climatico un biaha mas a mustra su efectonan di secura y temperaturanan halto, nunca antes visto, cu a causa impacto desastroso riba naturalesa y bida humano.

Un Crisis di Energia a sigui e invasion y hunto cu ne e crisis di inflacion y su efectonan economico devastador rond mundo. Aña 2022 ta tipifica di un crisis pa otro.

Tur e sucesonan aki tabatin, y tin ainda, un efecto grandi aki na Aruba tambe. Sin embargo, no obstante e efectonan y e sucesonan mundial, a pesar di e olanan grandi cu a surgi, Gobierno di Aruba a sigui atende cu maximo responsabilidad e asuntonan importante pa tene Aruba riba e rumbo di recuperacion. Y awe, mirando bek riba 2022, mi por bisa cu gratitud y un gran orguyo cu Aruba a logra surpasa e retonan, y tin un recuperacion impresionante.

RECAPITULACION DI 2022

Gabinete Wever-Croes 2, a continua cu implementacion di nos programa gobernacion, creando solucion pa problemanan, trahando riba plannan y realisando proyectonan nobo pa crea desaroyo, cu lo trece alivio pa comunidad.

ASUNTONAN GENERAL Y INFRASTRUCTURA

Den 2022 e ministerio cu ami ta lidera a dedica hopi energia na optimalisa funcionamento di aparato gubernamental, y e prome cambionan lo wordo implementa prome di januari. Tambe nos a traha riba elimina atraso den procesonan pa por stimula nos economía, buscando semper e balansa entre desaroyo y conservacion di nos naturalesa. Den cooperacion cu sector priva, ta desaroyando un proyecto di vivienda pa 330 famia. Pa brinda mas siguridad den trafico, a construi varios rotonde, entre nan esun di Palm Beach, creando un situacion mas sigur pa nos turistanan y pa nos localnan Y pa 2023 lo sigui traha pa yega na mas eficiencia den e departamentonan di infrastructura y asuntonan general.

Tur departamento den Ministerio di Husticia y Asuntonan Social, a haya mas material pa por eherce nan trabou mihor. Tambe a inverti den camera di siguridad na Cuerpo Policial, ekiponan pa brinda prome auxilio na ciudadanonan, renobacion di e infrastructura tecnologico na Directie Sociale Zaken; un truck nobo pa brandweer y renobacion di e post di Brandweer na San Nicolas. Pa aumenta siguridad den nos pais a ehecuta fase 1 di e proyecto ‘camera surveillance’ den area di hotel, y otro aña ta ehecuta fase 2 y 3. A adkiri e di tres radar y e radarkamer tin awor technologia completamente nobo. A sigui cu esfuersonan pa combati abuso sexual, pa prome biaha tin un medico forensico, a sera un MoU entre tur profesional, a organisa opleiding pa tur zedenrechercheurs y psycologonan den cadena hudicial, y a enfoca riba prevencion cu e proyecto “mi mesun heroe”. Mes momento colega Rocco Tjon a enfoca riba salud mental, a uni forsa di diferente organisacion den Stichting HUNTO, ta trahando pa baha e listanan di espera y recientemente a aproba e proyecto pa ‘beschermd wonen’, pa brinda vivienda digno pa esnan cu problema di salud mental cu no por biba na cas mas.

TURISMO Y SALUBRIDAD PUBLICO

Nos turismo ta e driver di nos economía, y e aña aki a yega nivelnan di prome cu pandemia, cu recuperacion di 100%. E bon noticia ta cu turistanan ta gasta mas cu prome cu pandemia. E aña aki a sigui inverti den upgrade y embeyese producto Aruba. Tambe colega Dangui Oduber a anuncia e proyecto di Portcity, Baby Beach y Rodgers Beach na San Nicolas, trapinan di Hooiberg y Rodgers Beach, y e proyecto Gateway 2030 na airport ta den pleno ehecucion.

Riba tereno di salud a uni esfuersonan di Hospital y Imsan den un acuerdo di cooperacion, Arubig a bira un realidad pa reconoce nos yuinan di tera den cuido, y a cuminsa ehecuta nos plan nacional di prevencion. A traha un roadmap pa garantisa sostenibilidad di e fondo di AZV, y mes momento a haci inversionnan den cuido, den 2 ambulans nobo, y den Imsan y Hospital pa mehoracion di calidad di cuido y pa reduci lista di espera.

TRANSPORTE, INTEGRIDAD, NATURALESA Y ASUNTONAN DI ADULTO MAYOR.

Den 2022 colega Ursell Arends a pone tur esfuerzo pa cera e dump di Parkietenbos entrante 1 di januari. Esaki lo trece alivio considerable pa e bario y su habitantenan. E responsabilidad pa cu limpieza di nos pais ta entrante awor den man di nos tur hunto. Riba tereno di integridad a concentra riba transparencia y concientisacion. A organisa trainingnan pa tur hefe di departamento, y pa miembronan di hunta di directiva y di comisario di entidadnan semi-publico.

A institui Directie Ouderenzaken, cu lo ta encarga cu maneho riba tereno di bienestar di adultonan mayor.

Y a cuminsa cu preparacionnan pa celebra 100 aña di aviacion otro aña. Aviacion ta e porta pa nos unico pilar economico, y ta hayando e atencion cu prioridad di e minister.

Apreciabel conciudadanonan,

ASUNTONAN ECONOMICO, COMUNICACIÓN Y DESAROYO DURADERO

Despues di dialogo cu sector priva colega Geoffrey Wever a anuncia e prome fase di revitalisacion di Oranjestad, cu ta un proyecto di embeyecimento di Wilhelminastraat, cu mas mata, mas luz y mas parkeo, haciendo e area aki un area agradabel pa nos localnan y turistanan por bishita.

Tambe ta modernisando y digitalizando full e vestigingsbeleid pa negoshi, haciendo e mas facil pa haya un vestigingsvergunning, kitando hopi rekisito y haciendo esaki completamente digital, y especialmente dirigi na desaroyo di e centro di Oranjestad y San Nicolas.

ENSEÑANSA Y DEPORTE

Colega minister Endy Croes ta trahando riba e leynan di enseñansa tanto modernisa esnan existente y traha e leynan cu falta manera LV Beroeps Onderwijs y LV pa Inspectie Onderwijs. Tambe ta trahando riba un data base pa conecta tur scolnan riba un sistema pa asina den futuro por tuma desicionnan a traves di data. Den 2022 a inicia remodelacion di St Aloiysius School, y a logra swap scolnan Reina Beatrix y Paso pa Futuro, y alumnonan di scol Reina Beatrix ta bou un solo dak. Tambe a firma un contract di 5 aña cu Zweminstructeurs pa prome biaha den mas di 20 aña

Tambe a lansa Weganan Escolar Aruba cu tabata un exito rotundo, y e strea Denzel Dumfries tabata presente pa e apertura. A premia deportistanan di aña 2019 y 2021 den Premio Excelencia den Deporte. A inicia renegociacion di e contrato di Lotto pa Deporte. A anuncia y firma oficialmente pa e renobacion di Stadion Guillermo Prospero Trinidad na Dakota.

LABOR, ENERGIA Y INTEGRACION

E aña aki a logra aumenta salario minimo, pa yuda cuidadanonan combati e costo di bida halto.

Colega Glenbert Croes a haci hopi esfuerzo den 2022 pa pone nos hendenan y especialmente nos hobennan, bek na trabao, causando asina un reduccion den e cifra di desempleo.

1500 mama y tata cu famia cu no tabata tin trabou aña pasa, awor tin trabou.

A cuminsa implementa un politica di integracion mas humano den trato y servicio.

Riba tereno di energia, ta continua cu esfuersonan pa depende menos di crudo.

A traha riba e expansion di proyecto Molina di Biento na Rincon. Nos prioridad den e transicion energetico ta pa cuida nos medio ambiente pa futuro generacionnan. Introduciendo mas energia renobable, nos vision ta keda energia pagabel y limpi pa nos pueblo.

Pa mas tarda februari 2023 nos lo anuncia e continuacion di e reactivacion di e Industria di Energia riba e zona di e refineria cu ya a cuminsa cu e proyecto di Eagle LNG.

Tur esaki sigur no tabata Facil, pero nos a lora manga y lucha pa surpasa cada reto, y cu determinacion, curashi, sacrificio, transparencia y cargando responsabilidad, e retonan di 2022 a wordo stabilisa.

Tin sernan keri cu lamentablemente a bay laga nos, entre nan personahenan di cultura y media hopi conoci na Aruba, y ta claro cu esaki ta yena nos curason cu tristesa, especialmente den e dianan aki. Nan no a biba pa mira e recuperacion di Aruba, abo y ami si. Y pesey nos mester ta agradecido y probecha cada dia manera ta e ultimo.

Ohala cu e bunita recuerdonan di bo ser keri por duna abo y bo famia forsa den e temporada aki. Y cu bo por gosa di union cu esnan cu t’ey ainda den bo bida.

Tin conciudadanonan cu ta atravesando temponan dificil, varios ciudadano cu problema di salud mental. Nan mester di nos, y ta solamente si nos uni, nos lo vence e retonan aki. Gabinete WeverCroes 2 tin hopi atencion pa e problematica aki, y a eleva esaki na nivel di crisis di salud mental.

Di otro banda, den 2022, nos a celebra tambe e exitonan di nos graduadonan y esnan cu a bay over, un biaha mas nos palabranan di pabien y hopi exito, Aruba tin mester di boso tur.

Na tur e deportistanan cu a gana medayanan pa Aruba den competencianan local y internacional, masha pabien, boso ta yena nos cu orguyo.

Na nos profesionalnan y hefenan di departamento di Gobierno cu a sacrifica oranan largo di trabao, nos inmenso gratitud.

Na sector priva, comerciantenan y esnan cu ta labora den sector priva, e weso di lomba di nos economia, DANKI pa kere den Aruba, danki pa traha pa Aruba, pa inverti den Aruba.

Y na cada persona di nos comunidad cu a duna un contribucion of sacrificio di un manera of otro, den nomber di Gobierno di Aruba, mi ta gradici bo di curason.

2023

Nos ta mira un aña nobo nos dilanti, cu hopi optimismo. Cu oportunidadnan nobo, pa crea progreso y bienestar pa tur ciudadano. Atraendo inversionnan nobo, pa diversifica nos economia, specialmente riba tereno di energia, pa asina hunto cu e pilar di turismo, brinda Aruba e stabilidad necesario pa no solamente ‘bounce back’ di e crisisnan, pero pa ‘bounce forward’, pa recupera mas fuerte y resiliente.

E yabi pa nos exito den 2023 ta Union y Positivismo.

Historia di nos pais a demostra con mas fuerte nos por ta, si nos Uni. Diferencia di opinion por t’ey, contal cu semper tin respet. Y irespecto e diferencia di opinion, ora ta trata di ARUBA, mas uni nos ta, mas fuerte ARUBA ta. Mi ta invita abo pa den 2023 nos uni pa enfrenta e retonan hunto, y pa carga e exito hunto.

Aña 2023 lo trece hopi cambio pa cada un di nos, y nan impacto riba cada un di nos lo ta fuerte. Sin embargo ban carga e positivismo cu tur e cambionan aki lo trece cosnan bon pa nos, lo crea e progreso y bienestar cu nos ciudadanonan merece. Aruba ta un pais bendiciona, y cu fe den nos Todopoderoso, nos mester carga e positivismo cu tin cosnan grandi nos dilanti.

Den union y positivismo nos lo supera e retonan cu crusa nos caminda den 2023, pa diversifica di nos economia, pa transiciona pa energia mas limpi. Esaki lo crea cupo di empleo, y lo crea un base financiero solido cu lo permiti Aruba haci inversionnan atrobe den nos infrastructura, dirigi riba desaroyo sostenible, cu respet pa nos medio ambiente.

Den union nos lo mehora e calidad di cuido, y eleva e nivel di nos enseñansa.

Den union nos lo haci Aruba mas sigur, y brinda apoyo na tur cu mester di dje den un forma of otro.

Y tur esaki cu un actitud positivo, cu ta permiti nos mira e solucion pa cada reto y oportunidad nobo den cada situacion.

P’esey nos ta decreta aña 2023 como aña di UNION y POSITIVISMO Uni nos lo atende cu e retonan nobo creando solucion , oportunidad y un base solido pa progreso y felicidad pa un y tur den nos comunidad.

Mi ta desea di termina mi mensahe cu un frase di e actual presidente di Ukrania presidente Volodimir Zelensky; el a bisa recientemente; CARGA RESPONSABILIDAD TA MAS IMPORTANTE CU TRATA DI SER UN HEROE. Ami ta kere cu cargando responsabilidad, bo por bira un heroe, pero si bo no carga bo responsabilidad, bo no po bira un heroe. Nos cada un tin un responsabilidad di carga pa hiba nos famia y nos pais padilanti, algun tin un responsabilidad mas grandi cu otro. Pero echo ta cu nos tur mester carga nos responsabilidad. Ban sigui carga nos responsabilidad pa un Aruba integro. Nos no por pas’e pa nos futuro generacion. Mi ta invita bo pa hunto, den union, y cu ositivismo, nos carga nos responsabilidad.

Mi ta gradici Dios pa tur e bendicionnan cu nos ta ricibi y mi ta gradici bo pa bo sosten y apoyo. Den nomber di Gobierno di Aruba mi ta desea bo un bon Aña Nobo, yena cu positivismo, union den famia, bon salud, felicidad y prosperidad. Y cu Dios bendiciona cada ciudadano di nos pais.

MINISTER URSELL ARENDS A HABRI AÑA BISHITANDO CASNAN DI CUIDO

Aña nobo a habri riba bon pia pa minister Ursell Arends. Riba 2 di januari a pasa tempo bishitando diferente cas di cuido, compartiendo un dande cu nos adultonan mayor.

E mandatario ta manda un gradicimento na Stichting Cas Di Machi, Stichting Thuiszorg Aruba, Stichting Cas Cristelle, Fundacion Paraiso Aruba, Stichting Zorg Met Liefde Tehuis, y Betesda Home Care pa habri nan porta pa e bunita gesto aki.

Tambe un danki na Ryan Maduro, Erik Ras, Rudy Ras, Jessica Ras, Glenbert Bislip y Daniel Werleman di Conhunto297 pa a trece ambiente cu nan dushi dande na esnan cu ta residencia na e casnan.

Minister Arends ta desea salud y bendicion na tur adulto mayor, trahado di cas di cuido y habitantenan di nos dushi Aruba. Cu e aña nobo trece felicidad na un y tur.

PARTNERSHIP ENTRE GOBIERNO Y SECTOR PRIVA TA NECESARIO PA POR REVITALISA E CENTRO DI ORANJESTAD

Pa algun tempo caba miembronan di Parlamento di Aruba, ciudadanonan, comerciante y diferente gremionan a expresa nan preocupacion pa cu e estado cu nos centro di ciudad ta permanece aden. Nan a pone accento ariba e responsabilidad cu gobierno di Aruba tin y cu gobierno di Aruba mester activa mas rapido posibel y trece bida bek den nos centro di ciudad. Un reto, cu Minister Geoffrey Wever, a hereda y a tuma e encargo aki cu dos man.

Despues di hopi sondeo y planifacion, mei mei di stakeholders dia 13 di december ultimo, Minister Geoffrey Wever a presenta e prome fase di Revitalisacion di Oranjestad: Embeyecimento di e area di Wilhelminastraat cual lo cuminsa den januari 2023. A habri caya Betico F. Croes, un biaha mas pa trafico, a rederigi e tram y asina poco poco ta implementado e strategia cu lo mester yega na revitalisa e area.

Minister Geoffrey Wever a divulga tambe cu hunto cu sector priva, den lunanan nos dilanti lo anuncia algun Proyecto, manera proyecto di apartamento, proyecto di residencia pa studiante, y move departamentonan di gobierno den centro di ciudad.

Tur esaki seguramente no por ser logra sin cooperacion estrecho entre sector priva, nos institutonan financiero, y gobierno di Aruba. Gobierno cu e poco fondonan disponibel a dal e prome stap y ta spera cu e compromiso financiero aki por crea confiansa den sector priva pa hunto crea un ciudad vibrante.

Ciudadanonan mester por considera pa bin biba den centro, y pa hasi negoshi hunto cu entretenimento. Alabes, turistanan mester por haya e caminda bishita bek mas frecuente. Pa añanan largo no ta logrando pa atrae turista den centro. Gobierno su so no lo por crea e condicionnan necesario pa crea e realidad nobo aki.

Minister Geoffrey Wever ya ta den combersacion serio cu algun insituto financiero, presentando plan y compartiendo su strategia y ta wak cu poco poco e apetit ta creciendo pa inverti nos centro di ciudad.

Segun analisis haci pa departamento di Asunto Economico, Comercio y Industria, inversion den nos centro di ciudad no lo solamente ta nifica revitalisacion di nos centro pero lo tin consecuencia positivo pa nos economia en general. Cada 10 miyon florin di inversion den nos economia, lo conduci na un crecemento economico nominal di 0,1 prociento di nos GDP. Pesey, pa logra e impacto maximo, y un ‘spin-off effect’ nacional, hunto so lo por logre.

"Nos atencion special pa e area aki no lo tin beneficio solamente pa e area pero ta un forma pa crea mas actividad economico y inversion na nos Pais", minister Wever ta expresa. Cooperacion entre sector priva, institutonan financiero, y gobierno ta e formula corecto pa logra un desaroyo sostenibel den nos centro di ciudad.

MINISTER ENDY CROES A REUNI CU SRA.

JULIETTE VAN ROMONDT DI LEERORKEST ARUBA

Diaranson

a reuni cu

di Leerorkest Aruba, Sra. Juliette van Romondt. Durante e reunion Sra. Van Romondt a presenta e trabounan cu Leerorkest Aruba ta haci y a infoma e Mandatario di algun deseo cu nan tin. Leerorkest Aruba ta traha cu 5 scol piloto e.o. Sint Paulus School, Graf Von Zinzendorf, Adventist Academy Aruba, Colegio

Leerorkest Aruba ta duna les di diferente instrumento, entre otro violin, cello, trombone, trompet, clarinet, kwarsfluit, drum y contrabaho. E lesnan di instrumento aki ta wordo duna door di diferente musico local. Banda di esaki, a trece dilanti un otro proyecto di Leerorkest; ta trata di les online. E lesnan online aki ta wordo duna door di e musico, sr. Jayderick Croes y por wak e lesnan aki a traves di planta nacional TeleAruba, pues tur scol na Aruba cu ta interesa por sigui e lesnan aki.

E proyecto musical aki a cuminsa door di Leerorkest Hulanda, cual ta haya un suma pa aña di entre otro, Oranje Fonds y Ministerie van Onderwijs, Cultuur en Wetenschap (OCW) pa sostene proyectonan aki. Durante e dialogo Sra. Van Romondt a señala cu actualmente alumnonan di aña 3 y 4 di scol basico ta haya les di instrumento. E deseo di Leerorkest Aruba ta pa duna e lesnan aki tambe den aña 5 y 6 di scol basico, pero lamentablemente esaki no ta inclui den e presupuesto di Leerorkest Hulanda.

Fuera di esaki, sra. Van Romondt a indica cu otro aña den e luna di maart, 15 docente di musica di Aruba, Boneiro y Curaçao ta biahando na Hulanda pa dos siman largo pa desaroya cierto habilidadnan di duna les. Un proyecto sumamente interesante cu ta cubri completamente door di Leerorkest Hulanda. Minister Endy Croes a indica cu e lo keda den contacto cu nan, pa asina evalua con por contribui na e proyecto bunita aki.

ultimo, Minister Endy Croes

coordinado

Laura Wernet Paskel y Prinses Amalia Basisschool.

Minister Endy Croes: STICHTING HUNTO SU EDIFICIO A YEGA SU

PUNTO DI MAS HALTO

Pronto ta cuminsa brinda servicio na comunidad

Dia 29 di december ultimo, e edifcio nobo di Stichting HUNTO (FMAA y SPD) a yega su punto mas halto. Durante conferencia di prensa colega Minister Rocco Tjon a haci e grato anunico cu na luna di mei di e aña aki edificio ta cla. Presente pa celebra e momento memorabel aki tabata Minister President Evelyn Wever – Croes, Parlamentario Hendrik Tevreden y demas invitadonan special. Nos por corda cu na luna di augustus di 2022, a pone e prome piedra pa e construccion.

Den e edificio lo ubica Fundacion pa Maneho di Adiccion di Aruba (FMAA) y Sociaal Psychiatrische Dienst (SPD), pa asina alinea procesonan mucho mas miho y eleva e calidad di cuido cu ta brinda na comunidad di Aruba den cuadro di salud mental y adiccion. Ambos organisacion a mira e necesidad pa haci e cuido cu cada un ta brinda mas accesibel y alabes enfoca riba clientenan cu tin un “dubbele diagnostiek” cu atencion specifico pa mucha y hobennan. E vision ta pa percura cu clientenan por rehabilita y reintegra bek den comunidad.

Concluyendo Minister Endy Croes ta felicita colega Minister Rocco Tjon y Ministerio di Husticia y Asuntonan Social cu e proyecto. Palabranan di pabien na e profesionalnan den e veld cu pronto ta bay traha hunto bou un solo dak pa brinda e ayudo cu ta un necesidad. Un danki na e contratista cu a traha sin stop pa por a logra e punto mas halto di e edificio prome cu fin di aña. Dentro di poco e edificio ta keda finalisa pa asina Stichting Hunto por cuminsa brinda nan servicio na comunidad. Trabounan ta continua!

MINISTER DI ENSEÑANSA Y DEPORTE ENDY CROES A RICIBI RECONOCEMENTO COMO POLITICO DI AÑA 2022

Den e ultimo dianan di aña 2022, Minister Endy Croes a haya e grato sorpresa di Bo Informado TV unda a sorprende e Mandatario cu e reconocemento como Politico di Aña 2022. Minister Endy Croes a tuma esaki den nomber di henter e Coalicion y a expresa cu esaki ta un trabou den ekipo. Aña 2022 tabata un aña cu yen di reto y hopi trabou den enseñansa y deporte na Aruba.

A pesar di e retonan, Minister Endy Croes a sa di maneha dos ministerio importante pa pais Aruba y a realisa diferente proyecto pa enseñansa y deporte. Concluyendo e Mandatario ta gradici Ministerio di Enseñansa y Deporte cu ta traha cu amor y pasion pa nos pais. Minister Endy Croes ta contento cu e reconomento cu el a ricibi y ta gradici Bo Informado TV cu e elogio aki.

MINISTER ENDY CROES A PRESENCIA TALENTO DI E HOBENNAN ATLETA DI PERLA RHYTHMIC GYMNASTICS ARUBA

Recientemente, Minister Endy Croes tabata di bishita na Perla Gymnastics Aruba, unda cu por a presencia talento di e hobennan atleta den e deporte di “Rhythmic gymnastics”. Perla Gymnastics Aruba ta e prome club na Aruba cu a inicia na aña 2016 un club di “Rhythmic gymnastics”. Tambe Presidente di Federacion Internacional di Gymnastiek, sr. Morinari Watanabe y Presidente di Federacion di Gymnasia Aruba, sra. Milly Bagheri van Trigt tabata presente y tabata sumamente contento cu e talento di nos hobennan local.

Ademas di esaki, 2 atleta internacional den e mundo di “ritmica” ta di bishita na e isla, esta Evgeniya Kanaeva, atleta Rusiano, kende ta e prome ganado absoluto di 2 medaya di oro den e deporte di “Rhythmic gymnastics” den e Weganan Olimpico y tin un record di 17 titulo mundial y 13 titulo Europeo y Chisaki Oiwa, atleta olimpico di Hapon cu 3 titulo mundial “all around”. E proposito di nan bishita ta pa hunto den ekipo hiba e atletanan di Perla Gymnastics Aruba na un siguiente nivel.

Minister Endy Croes ta felicita Presidente di Perla Gymnastics Aruba, sr. Miguel Ortiz y “Head Coach” di Perla Rhythmic Gymnastics, sra. Adriana Sevilla, cu e tremendo trabou cu nan ta haciendo cu e deporte aki na Aruba. Tambe, un palabra di felicitacion ta bay pa e hobennan atleta cu ta practica e deporte bunita aki.

RESUMEN DI E TRABOUNAN REALISA PA MINISTERIO DI DEPORTE DEN AÑA 2022

Den e luna di juni di aña 2022, tabatin competencia di diferente deporte entre e scolnan di Aruba, unda cu mas di 800 alumno di scol preparatorio, scol basico y scol avansa a participa durante 1 siman largo den 8 diferente disciplina. Un proyecto hopi bunita cu e proposito pa motiva mucha y/of hobennan pa practica deporte. E strea di futbol Denzel Dumfries tabata e invitado special pa e apertura di dicho Weganan Escolar.

Durante e mesun periodo, e Mandatario di Deporte a firma un acuerdo cu Stichting Run in the Sun pa extende KLM Marathon pa un periodo di tres aña mas y di e forma aki sigui brinda e pueblo di Aruba e oportunidad di participa den e evento magistral aki. Un otro logro exitoso tabata na momento cu FLPD a inicia negociacion di un contracto nobo pa Fundacion Lotto pa Deporte cu Canadian Bank Note y di e forma aki trece e maneho di Lotto pa Deporte bek den man di Aruba.

Durante e prome aña como Minister di Deporte, Minister Endy Croes a realisa diferente proyecto deportivo pa pais Aruba. A pesar di a traspasa door di varios obstaculo, e Mandatario di Deporte a sa di maneha su puesto debidamente. Un aña fructifero, unda cu a traha hopi duro pa e bienestar di deporte en general pa henter Aruba.

Desde inicio di su carera como Mandatario di Deporte, Minister Endy Croes encontra problema, por ehempel cu e pump y filternan di e piscina di Community Pool San Nicolas, unda a tuma accion mesora y cu yudansa di profesionalnan di WEB a logra pone e piscina den funcionamento bek. Alabes, a compromete pa inverti den un sistema completamente nobo den futuro. Durante aña 2022 a inverti den LED light ultra moderno pa henter e pista di International Raceway Park Palomarga. E luznan a yega Aruba y lo instalanan na inicio di aña 2023.

Fuera di esaki, Minister Endy Croes conhuntamente cu FIFA, AVB y FFD ta den negociacion avansa, unda cu FIFA a traves di AVB lo inverti 2.4 miyon den, entre otro Stadion Frans Figaroa y mas clubnan di futbol. Aparte di esaki, durante e luna di mei di aña 2022, a inaugura e cancha di futbol Johan Cruyff Court na Jaburibari cu a wordo renoba y a haya e nomber nobo di Cruyff Court Denzel Dumfries. Minister hunto cu Johan Cruyff Foundation, IBISA, FFD, FCCA a firma un acuerdo entre stakeholders pa cu operacion y mantencion di e cancha aki. Ademas di esaki, Minister Endy Croes hunto cu IBISA, Departamento di Cultura y diferente instancia a traha den ekipo pa trece e proyecto di Weganan Escolar Aruba 2022.

Na mesun momento, a logra haya beneficionan adicional pa nos deportistanan. Den e luna di augustus di aña 2022, Minister di Deporte a lansa Premio Excelencia den Deporte (PED), unda cu a reconoce y duna balor na nos atletanan cu a destaca durante aña 2019 y 2021. Banda di esaki, a rindi homenahe na 10 baluarte deportivo cu a dedica gran parti di nan bida den deporte di Aruba. Tambe, Minister Endy Croes hunto cu Minister di Enseñansa y Deporte di Curaçao y Diputado di Infrastructura y Deporte di Boneiro a firma MOU pa inicia bek cu Weganan Interinsulair 2023 cu ta panifica pa e luna di maart y april na e islanan di Aruba, Boneiro y Curaçao.

Aparte di esaki, a haci varios inversion pa renoba algun veld di Aruba, entre otro a drecha e luznan di Veld di Flatstone, Veld di Dragon Hitters y Veld di Aruba Juniors. Tambe a renoba e dak di e tribunanan na veld di Pos Chiquito. A rosa y yena graniet na Veld di Sabana Grandi y prepar’e pa ta bek den funcion. A haci diferente mantencion na veld di San Luis y alabes container cu material a yega den e luna di september pa asina termina e trabou na Veld di Kudawecha cu ta den renobacion.

Banda di esaki a logra firma contracto pa inicia e renobacion di Guillermo Prospero Trinidad Stadium na Dakota, cual lo inicia den prome kwartaal den aña 2023. Pues, desde 20 di september 2021 te cu final di aña 2022 por wordo accentua un aña sumamente exitoso cu yen di logro pa deporte en general tanto riba e parti di infrastructura, como directectamente pa e deportista. Minister Endy Croes ta finalisa cu un palabra di felicitacion na tur atletanan di diferente disciplina cu a ricibi medaya riba plataforma internacional y nacional. Ban sigui traha duro drentando aña 2023. Un bon aña na tur e Directivanan, Federacionnan deportivo y atletanan di Aruba. Bon aña Aruba. 4D. Deseo-Disciplina-Dedicacion-Determinacion!.