Ya pa 7 aña consecutivo, riba Dia Mundial di Prensa, Gobierno di Aruba ta duna un reconocimento special na un medio di prensa. E aña aki a duna e reconocimento na TELEARUBA, pa nan colaboracion y cooperacion pa transmiti e mensahe di Gobierno na e comunidad di Aruba. Presente pa e ocasion aki tawata señor Giovanny Kock, señor Aldrick Werleman y señor Patrick Everon.
E reconocimento a wordo entrega durante e encuentro cu prensa dia 2 di september, den cuadro di Dia di Prensa 2024. Durante e entrega Prome Minister Evelyn Wever-Croes a bay bek den tempo y a referi na e tempo di e pandemia unda cu, danki na e cooperacion di TELEARUBA, Gobierno por a comunica por medio di conferencianan di prensa y trece e mensahe na comunidad di Aruba. Tur anochi a traves di TELEARUBA e ciudadanonan a sigui e situacion y e paso a paso durante e pandemia, y esaki tambe a yuda Aruba logra recupera hopi lihe.
Prome Minister a sigui bisa cu tawata momentonan di trabou intensivo pa Gobierno pero tambe pa e empleadonan di TELEARUBA, cu a coopera na tur momento pa trece e mensahe na e pueblo di Aruba. Pa e motibo aki y tambe pa e cooperacion durante 7 aña di gobernacion di Gabinete WeverCroes, cu hopi orguyo Gobierno a entrega e reconocimento special na e planta nacional TELEARUBA.
“Mi ta corda e conferencianan di prensa tur anochi 7or durante e pandemia. Hopi cansancio pa nos pero sigur tambe pa empleadonan di TELEARUBA. Pero apesar di e situacion dificil e tempo ey semper nan a cumpli y a yuda nos trece nos mensahe padilanti na e pueblo. Gobierno di Aruba ta hopi orguyoso di nos planta nacional. Nan ta traha cu curason y semper pensando den e bienestar di pais Aruba y pa esey semper nos lo ta agradecido na nan. Danki y pabien na director di TELEARUBA señor Giovanny Kock, y henter su ekipo”, Prome Minister a expresa.
Prome Minister Evelyn Wever-Croes: Prome Minister: "Ban crea doñonan di mascota responsabel"
A LANSA MATERIAL EDUCATIVO PA SCOLNAN
"MI MASCOTA"
Dialuna anochi Prome Minister Evelyn Wever-Croes hunto cu Minister Endy Croes, Minister Ursell Arends y Parlamentarionan Setty Yarzagaray, Darlaine Guedez Erasmus, y Ricky Hoek tabata presente na John F Kennedy Educenter pa lansamento di material educativo "Mi Mascota". Prome Minister a splica cu e proyecto aki a inicia bou di ministerio di enseñansa, cu e meta pa traha material educativo pa e scolnan.
E buki "Mi Mascota" a wordo traha door di un ekipo di profesional, cu a sa di entrega un buki di calidad halto y di bon contenido. Prome Minister a expresa cu e material importante aki ta yen’e di hopi emocion, pasobra na Aruba e problematica di specialmente cacho riba caya ta uno cu Gobierno a bin ta lucha cu ne pa hopi aña.
Hopi ta esnan cu ta critica Gobierno pa e cachonan riba caya, pero ta importante pa comunidad sa cu e responsabilidad no ta solamente den man di Gobierno, sino tambe di e doño di e cacho. Y e unico manera pa bringa esaki ta pa cuminsa na siña nos muchanan di jong caba e responsabilidad di tin un mascota. E material educativo aki ta yuda na crea ciudadanonan di futuro pa ta mas responsabel na momento cu tin un mascota.
Muchanan en particular ta gusta tin un "puppy" pa hunga cu ne, pero na momento cu e cacho bira grandi, tin e tendencia di hala e cacho aki un banda y busca otro puppy. Esaki sigur no ta e manera corecto pa trata e mascotanan. P’esey e material aki ta hopi importante pa siña nan con pa trata nan mascota y e deber cu ta bin cu e mascota.
"Mi ta felicita Minister Endy Croes y ekipo cu a haci esaki posibel. Un danki na Minister Ursell Arends pa su esfuerso den bringa e problematica aki, cu ta uno compleho y cu hopi faceta. Pa esnan cu ta gusta lesa buki, sa cu no tin nada mas dushi cu habri un buki y haya e holo di e buki specialmente si e ta nobo pasobra bo lo les’e cu hopi mas smaak.
Mi ta sigur cu e buki aki lo duna cada un di boso e sentimento necesario pa asina hunto compromete pa ta doñonan mas responsabel di un mascota. Masha pabien y hopi exito na tur e scolnan cu lo bay uza e buki bunita aki", Prome Minister a expresa.
MINISTERIO DI NATURALESA TA ANUNCIA
CAMBIO DI FECHA PA CONSULTA PUBLICO DI E CONCEPTO DI LEY DI BIENESTAR DI ANIMAL
Den transcurso di siman pasa Ministerio di Naturalesa a inicia consulta cu diferente stakeholders den e veld di animal na Aruba riba e concepto di ley pa bienestar di nos animalnan.
E sesionnan aki ta importante pa asina por ricibi aporte di cada stakeholder ariba diferente area di e ley nobo aki mirando cu nan ta directamente atende of lo atende cu e ley nobo.
Desde 26 di augustus Ministerio di Naturalesa a sinta entre otro cu e asociacion di veterinarionan local, departamento di Santa Rosa, Centro Control di Cacho, departamento di Salud Publico, mayoria di nos fundacionnan cu ta traha cu animalnan y otro stakeholders. E siman aki lo sinta cu entre otro Douane y Inspectie.
Pa motibo cu ainda tin algun sesion cu stakeholder pendiente, Ministerio di Naturalesa ta anuncia fechanan nobo di consulta publico ambos online y na MFA.
E fechanan nobo pa consulta publico lo bira:
• Online entrante 18 di september, caminda lo por duna sugerencia of comentario via un formulario online
• Ministerio di Naturalesa lo duna presentacion di e concepto di ley na publico:
o MFA Savaneta: 24 di September 2024, 6:00 PM – 7:00 PM
o MFA Paradera: 26 di September 2024, 6:00 PM – 7:00 PM
Pa cualkier pregunta of informacion tocante e concepto di ley aki por aserca Ministerio di Naturalesa via naturalesa@ gobierno.aw
Minister Ursell Arends:
TA ANUNCIA CREACION DI UN MERCADO LOCAL NA SAN NICOLAS COMO PARTI DI PROYECTO DI REVITALISACION
Na un conferencia di prensa dialuna, 2 di september, Gobierno di Aruba a anuncia e prome fase di e proyecto di Revitalisacion di San Nicolas.
Fase 1 di e proyecto lo inclui e creacion di un mercado local, destina pa sirbi como un atraccion nobo pa bishitantenan y un plataforma vital pa nos agricultor y productor local. E Sunrise Market lo ta situa den e parkeerplaats actual di Arubus, y lo inclui espacio dedica pa no solamente artesania, pero tambe pa productonan local cu hopi di nan a anhela pa asina nan por bende den un forma mas consistente y accesibel.
Pa hopi tempo, a yega peticion for di comunidad pa haya un espacio cu por promove e mercado local, y cu e proyecto aki, Minister Arends ta mustra e compromiso firme pa atende e necesidad aki. E creacion di e Sunrise Market ta un paso importante den e direccion di diversifica e atracionnan di San Nicolas, y brinda un sosten pa e agricultor y productor local cu
tanto mester di un plataforma manera e Sunrise Market pa por crece y prospera.
Adicionalmente, e proyecto ta inclui mantencion y “upgrade” necesario na e stacion di bus na San Nicolas, creando un espacio mas atractivo pa peaton y pa turistanan. E Sunrise Market lo no solamente fungi como un atraccion turistico, pero e localnan di e area tambe lo haya beneficio di e disponibilidad mas frecuente di productonan fresco y local, asina stimulando e industria di nos productor local y duna nan un chens mas grandi pa progresa.
Minister Arends ta reitera cu esaki ta un parti crucial di su plan pa sostene y fortalece e comunidad di productornan local. Gobierno di Aruba no solamente ta revitalisando un parti di Aruba sino tambe ta construyendo un futuro unda San Nicolas ta prospera mas aya cu un refineria.
Den conexion cu celebracion Dia di Prensa
MINISTER XIOMARA TA FELICITA Y GRADICI
CADA
MIEMBRO DI PRENSA NA ARUBA
“Keda den e balansa profesional y laga boso compas moral sigui guia boso den e trabou pa informa y comunica cu nos comunidad”
Den conexion cu celebracion Dia di Prensa diadomingo 1 di september, Gobierno di Aruba a extende un invitacion dialuna mainta pa felicita nan y especialmente duna prensa di Aruba gradicimento pa e trabou cu nan ta desplega den nos comunicad. Minister di Finansa y Cultura, Xiomara Maduro a dirigi palabra masha bunita na cada prensa presente enfatisando cu prensa ta un di e pilarnan di nos comunidad cu ta facilita informacion pa tur ciudadano. Minister Maduro a haci comparacionnan entre prensa y politiconan den gobernacion.
E mandatario di finansa y cultura a remarca cu ta importante pa ta consciente semper di e rol cu prensa tin den su man. Esaki ta un derecho cu prensa ta haya apesar cu na Aruba no tin leynan cu ta indica cua ta e caminda y con leu por bay. Comparando cu e politico den gobernacion cu ta haya un derecho den su man pa haci un trabou pero esaki ta wordo limita cu leynan. Y mescos cu e politico, prensa tin e compas moral pa indica cua ta e limitenan den expresion y den duna informacion.
Un otro comparacion cu Minister Maduro a trece dilanti ta cu mescos den politica, hopi biaha bo ta para bo so ora cu mester tuma desicionnan, abo cu Dios, y hopi biaha ni coleganan ta para banda di bo. Den casonan asina ta mescos pa prensa tambe, sabiendo cu den bo man bo tin un poder y responsabilidad hopi grandi, especialmente si no ta limita pa leynan, ta e compas moral ta bira e guia pa tuma desicionnan den tur situacion. Con bo ta pensa, actua y kico bo ta sinti cu
ta bon conforme con bo ta hiba bo bida, ta locual cu ta depende kico lo sali for di bo pen of di bo stem. Mescos pa e politico, su pen y su stem ta e instrument di mas importante cu e tin, pa prensa esaki no ta diferente.
E trabounan cu cada di miembronan di prensa y e politico ta haci pa e comunidad, ta di iguala. Tur dos ta importante. Mescos cu no ta tur hende ta gusta e trabou di tur politico, no ta tur hende ta gusta tur prensa. Pero realidad ta tambe cu nos tur tin cu convivi cu otro den un comunidad chikito. Den bida y den e trabounan aki, nos no por tin solamente bon experencianan. Ta e mal experencianan ta conscientisa nos cu tin e bon experencianan. Esaki ta e balansa den cada trabou.
E trabou pa informa un comunidad ta hopi importante. E trabou di educa ta mas importante lagando sensacionalismo un banda pa hala mas atencion di hende, pero cu informacionnan cu no ta noticioso. Den un comunidad chikito, semper mester corda kico e poder den bo man ta, kico e noticia ta y con bo ta scoge pa uza esaki den comunidad. Esaki ta hopi importante, pasobra e informacion por lanta of e por kibra un sociedad.
Minister Maduro ta felicita tur miembro di prensa riba nan dia special, Dia di Prensa y ta gradici nan pa e trabounan cu nan ta haci pa mantene nos pueblo informa. “Corda semper cu locual cu boso haci, boso ta ricibi bek multiplica. Esaki no ta un ley di politica sino un ley di bida y di universo cu ta existi prome cu nos y lo keda existi despues di nos. P’esey ta importante pa nos informa corectamente. Sa cu boso trabou ta wordo aprecia y balora pa cada minister di Gabinete Wever-Croes. Keda semper cu boso bon intencion pa informa nos comunidad. Keda den e balansa profesional y laga boso compas moral sigui guia boso den e trabou pa informa y educa nos comunidad. Nos sa cu boso trabou no ta facil y no tin orario fiho hopi biaha. Danki pa ta parti di informa nos comunidad y yuda fortalece nos pueblo cu veracidad”, Minister Maduro a expresa.
MINISTER XIOMARA MADURO TA FELICITA Y GRADICI E BARIO DI BRAZIL Y ARUBA PA UN BUNITA PARADA
CULTURAL CELEBRACION “DIA DI BRAZIL 2024”
Pabien Fundacion Chico Harms y henter su ekipo
E fin di siman cu a pasa tabata e culminacion di celebracion di Dia di Brazil. Fundacion Chico Harms hunto cu su comision un bes mas a organisa y guia e Parada cu Lanterna y e Parada Cultural. Minister Xiomara Maduro no por tabata presente pa motibo di otro compromiso, pero a wordo representa diadomingo pa Prome Minister di Aruba Evelyn Wever-Croes.
PARADA CU LANTERNA:
Diabierna anochi e cayanan di Brazil a wordo ilumina cu lanterna di 10 gruponan cultural y folklorico participante. E animacion tabata den man di bandanan musical, gruponan tipico y Djnan. Nos reinanan cultural tabata presente y hunto cu participantenan a luci den e Parada cu Lanterna. A conta cu participacion di Grupo di Corsou cu a yuda engrandece y anima e parada.
PARADA CULTURAL:
Diadomingo dia 1 di september den oranan di atardi a tuma luga e Parada Cultural, cual e aña aki a resulta mas grandi. Un parada bunita y bon organisa cu a pasa den cayanan di Brazil. Un total di 11 grupo di e.o. baile y folklorico a participa, nos reinanan cultural a briya den e parada y e ambiente a wordo crea pa bandanan musical, gruponan Tipico y Djnan. Un y tur por a disfruta di e paradanan y biba nos cultura.
Tabata masha bunita mira con nos grandinan, nos hubentud y muchanan a uni den e gran celebracion aki. Un danki na tur grupo cu a participa den e Parada di Lanterna y e Parada Cultural, cu tabata alrededor di 1000 participante di e.o. Fundacion Bernadina Growell, Scolnan di Brazil, Brazil den cunucu, Flota Cultural, Fundacion Pro Cultura, Gucci Dancers, Alegria di Nos Cultura, Zjeito Cultural, Sembra Alegria, Grupo Antaño y Grupo Cultural Aruba di Antes. Ademas un danki tambe na esnan cu a pone ambiente musical ta Frans Disco, Myron Disco, Grupo Luis Maduro, Caha di Orgel, Amigales, Alvin Disco, Bazjan, Alma Folclorico, Rincon Boys, Patrick Disco, Un Brindis y Brisa Tropical.
Un danki special na e organisacion, boluntarionan y na un y tur cu a coopera pa haci e Celebracion Dia di Brazil 2024, un exito grandi. Ademas mester gradici e publico grandi canto di caminda cu a sostene, apoya y aprecia ambos parada.
Masha Pabien y danki un biaha mas cu e Celebracion Dia di Brazil 2024!
MINISTER ENDY CROES A HACI UN BISHITA
OFICIAL NA EDUCAMPUS
Awo den su localidad nobo den edificio di ex-edificio di Bon Bini Bazaar
den caya GF Betico Croes
Recientemente, Minister di Enseñansa y Deporte Endy Croes a haci un bishita oficial na EduCampus. EduCampus a caba di muda na e ex-edificio di Bon Bini Bazaar den Caya GF Betico Croes. Directora di Educampus Sra. Stephanie Croes a ricibi e mandatario di Enseñansa cu caluroso bonbini. E mandatario a haya un recorido y por mira e klasnan.
E estudio aki ta acredita pa medio di Cognia, pues e alumnonan cu termina nan estudio na EduCampus por continua nan estudio na Merca of Hulanda. E ta un sistema enseñansa completamente diferente cu nos sistema tradicional na Aruba. E aña aki alrededor di 300 alumno a inscribi pa e estudio mainta y mas di 100 alumno a inscribi pa e estudio parti atardi. Cada aña tin mas deportista cu ta opta pa studia na EduCampus, mirando cu nan ta brinda e atletanan e oportunidad di practica nan deporte den combincacion cu nan estudio.
E atletanan cu ta bishita e scol aki y cu mester prepara pa un campeonato ta haya oportunidad pa haci esaki. Finalmente, Minister Endy Croes ta desea e maestro- y alumnonan di EduCampus hopi exito e aña escolar aki.
Minister Endy Croes: COLEGIO BON BINI A CELEBRA 132 AÑA DI EXPERENCIA WAW DEN ENSEÑANSA DI JUFFROUW
RITHA, JUFFROUW ELBA Y JUFFROUW STELLA
Recientemente, Minister di Enseñansa y Deporte Endy Croes y Prome Minister Evelyn Wever- Croes a ricibi bishita di tres (3) maestra cu ta celebrando hunto un total di 132 aña di experencia WAW den enseñansa di Aruba, esta juffrouw Gregoritha (Ritha) Thode cu a cumpli 46 aña, juffrouw Elba Hirschfeld-Smith cu a cumpli 43 aña y juffrouw Stella Tromp Chan cu a cumpli 43 aña. Hunto cu ayudo di cabesante di Colegio Bon Bini juffrouw Sharissa, a sorpresa e maestranan na Bestuurskantoor.
Durante e bishita, e maestranan a conta nan experencia durante tanto aña. Minister Endy Croes y Prome Minister Evelyn WeverCroes a comparti un momento ameno cu e maestranan y a gradici nan pa nan amor, pasion y dedicacion durante varios aña den enseñansa di Aruba. E juffrouwnan a ricibi un bunita reconocemento di Gobierno di Aruba. E maestranan a indica cu nan ta hopi contento di por a experencia e innovacion den enseñansa, e cambio di les tradicional pa les digital. Ademas di esaki, a expresa cu nan ta contento cu despues di varios aña por a presencia e introduccion di Papiamento na scol y por a mira e cambio positivo cu esaki ta trece pa e alumnonan durante les.
Pa finalisa, Minister Endy Croes ta felicita nan pa e bunita trabou cu nan ta desplega pa nos muchanan y ta gradici nan pa contribui grandemente den e desaroyo di enseñansa di Aruba den su totalidad.
