E circulo vicioso di e gobierno anterior di keda fia y gasta placa
A CONDUCI CU ARUBA A HAYA UN KB PA E MAL
MANEHO FINANCIERO DI AVP
“Awo ta momento pa sigui cu e strategia y structura di nos maneho financiero cu ya ta cosechando su prome frutanan”
Den e ultimo temporada aki, hopi promesa ta wordo haci pa politiconan especialmente riba e tema di paga debe y fia placa. Esaki ta un efecto di politoconan cu kier ‘bula cu hala di manteca’ sin pensa con esaki lo afecta Aruba y sin tene cuenta cu kico tur Gabinete a logra den un temporada hopi difícil pa nos tur.
E gobernacion prome cu nos di añanan 2009-2017 a hiba un mal maneho financiero, corupcion na gran escala cu tereno y permisonan, pa personanan cu a financia nan campaña. Nan no tabata presta atencion con nan ta manehando Aruba. Y tur esaki a conduci na e Koninklijk Besluit, e decreto real cu Rey Willem Alexander a pone riba Aruba na aña 2014. Den e KB aki ta menciona cu e maneho financiero di e tempo ey tabata malo, cu Aruba tabata gasta mucho mas placa di loke e tabata tin, y cu esey ta trece consecuencianan hopi negativo pa Aruba. Y nos a sinti e consecuencianan ey.
Prome Minister Evelyn Wever-Croes a enfatisa cu Aruba no
por bay bek pa e pasado ey. Pasobra Aruba a pasa aden caba y cu e maneho di Gabinete WeverCroes, e miho dianan di Aruba ta nos dilanti.
Awe Aruba ta wordo reconoci como un ehempel di recuperacion, cu un turismo solido, criminalidad bao di control, inversion substancial den nos sectornan social pa mehora calidad di bida di esnan den mas necesidad. Stadionnan y otro centronan di deporte renoba, inversion den educacion y awor mas y mas tambe den infrastructura.
“Awor pues ta momento pa sigui cu e strategia y structura di nos maneho financiero cu ya ta cosechando su prome frutanan. Continuando cu e maneho aki nos lo tin mas cosecha cu mas fruta den futuro”, Prome Minister a expresa.
Segun IMF si Aruba sigui cu e maneho actual, otro aña inflacion lo baha di actual average 2.3 % pa 1.8% pa 2025, cual ta miho ainda. Y si nos keda cla cu Aruba su propio linea di barco di carga, e lo por baha mas ainda. Pero si nos cay den e wega di promesanan irealistico di e otronan, inflacion lo tin cu subi, costo di bida lo tin cu subi, pasobra debe di Aruba lo bolbe subi. Esaki sigur Aruba no por permiti.
Prome Minister: “Con-ciudadanonan, dia 6 di December boso cada un tin e oportunidad pa vota pa e partido cu segun bo opion y pensamento liber, por traha pa Aruba por sigui progresa na caminda di prosperidad y felicidad. Pa nos tin un pais caminda bo por bay drumi trankil y lanta mainta sabiendo cu e finansas di bo pais, bo entrada y bo pensioen ta den bon man, debidamente protehi y cu nos hobennan por conta cu e miho educacion y mas oportunidad pa realisa nan soñonan”.
Prome
Minister Evelyn Wever-Croes: Prome Minister a reuni cu eGovernment Academy
E PROCESO DI DIGITALISACION DI E APARATO
GUBERNAMENTAL
Recientemente Prome Minister Evelyn Wever-Croes a reuni cu representantenan di eGovernment Academy di Estonia cu ta encarga cu e proyecto di digitalisacion di e aparato gubernamental. Nan tabata na Aruba pa asina tene diferente “workshops”cu diferente stakeholder cu ta bay traha riba e proyecto aki.
Durante e workshopnan varios departamento di Gobierno tabata presente, specialmente esunnan cu nan servicionan ta e promenan pa wordo digitalisa. Tambe e representantenan a tene reunionnan cu otro stakeholdernan importante cu nan lo mester tin contacto cu nan, pa asina tur cos ta cla pa cuminsa.
Prome Minister a indica cu Aruba a haya un total di 14.5 miyon Euro di Union Europeo pa e proyecto aki, di cual 13.5 miyon Euro ta bay pa e proyecto y 1 miyon Euro lo bay entre Union Europeo y Estonia pa maneho di e proyecto. Cu e 13.5 miyon Euro, Aruba lo por yega hopi leu cu e digitalisacion di e departamentonan di Gobierno, pa asina comunidad di Aruba desde e comodidad di nan cas por haci mayoría di servicio y “follow up” riba nan peticion. Esaki lo scapa hopi tempo di e ciudadano, mirando cu e nan no mester bay para den rijnan largo pa un servicio of documento.
“Mi kier gradici Estonia eGovernance Academy pa a tuma e lidersago di e proyecto importante aki. Nos tin tur confiansa cu tur cos lo bay bon, mirando cu nan tin hopi experiencia den e ramo aki. Tambe un danki na tur departamento di Gobierno cu a mustra nan disponibilidad, y tur e stakeholdersnan cu ta cla pa yuda cu esaki. Cu e proyecto aki, Aruba lo drenta den un era di digitalisacion, innovacion cu no lo yuda solamente pa e servicionan bay mas lihe, sino tambe pa haci nan mas transparente, evitando asina casonan di corupcion. Tambe e lo haci e servicionan mas eficiente na unda nos lo por bay traha
A CUMINSA
cu un aparato gubernamental den termino mas largo, y menos grandi, y esaki ta loke nos kier pa Aruba”, Prome Minister a expresa.
Prome Minister Evelyn Wever-Croes: SCOL DUNA UN MAN CU UN
PROYECTO
SUMAMENTE VALIOSO PA DESAROYO DI NOS
MUCHANAN SPECIAL
Diaranson mainta Prome Minister Evelyn Wever-Croes tabata invitado na scol Duna Un Man pa un momento hopi bunita cu nos muchanan special. Riba e mainta aki, invitadonan presente a bin presencia un proyecto sumamente valioso, na unda nos muchanan special a organisa nan mesun dia di votacion. E hobennan aki mes a traha nan carchi di voto cu a bin compaña cu un invitacion.
Pa e mainta aki, e hobennan a wordo parti den tres grupo, di cual cada un tabata tin e oportunidad di presenta nan vision, kico nan ta para p’e, y kico nan lo desea pa Aruba. Mester menciona cu tur e 3 gruponan aki a papia di e importancia di conserva naturalesa y tene Aruba limpi. Loke tambe a resaltata e idea cu hopi di nan tambe lo desea di wak mas deporte y arte na scol.
Prome Minister a expresa cu e proyecto aki ta uno hopi creativo, bunita y valioso, y ta felicita e scol pa bin cu e iniciativa aki, y e muchanan pa a contribui na haci e proyecto aki uno exitoso. Tipo di proyectonan aki ta contribui grandemente na desaroyo di nos muchanan, y ta pone nan realisa cu e unico manera pa hiba pais Aruba padilanti, ta cu nan contribucion y accion.
“Mi tabata tin e honor di a ricibi e muchanan aki den sala di Conseho di Minister poco tempo pasa, y tabata un bishita hopi agradebel y cu sigur tabata nan a keda sumamente contento cu ne. Hopi pabien na scol Duna Un Man cu e bunita proyecto di awe mainta, y danki pa envolvi nos muchanan special den e desaroyonan actual di nos comunidad”, Prome Minister a expresa.
Prome Minister Evelyn Wever-Croes: Prome Minister a atende ceremonia di graduacion di EPE
PABIEN NA TUR E GRADUADONAN DI ENSEÑANSA PA EMPLEO CU NAN CERTIFICADO
DI SUPERVISOR Y MANAGER
Diaranson anochi Prome Minister Evelyn Wever-Croes tabata presente na e ceremonia di graduacion di Enseñansa pa Empleo (EPE). Riba e anochi aki, cu hopi orguyo e graduadonan a ricibi nan certificado di Supervisor y Manager I y II. Prome Minister como invitado tabata tin e honor di dirigi algun palabra na e studiantenan cu a caba di gradua, y a duna regalo na e 5 studiantenan cu a resulta e miho graduadonan cu e mesun score halto.
Durante su discurso, Prome Minister a felicita cada un di e graduadonan pa cu e logro bunita aki, y gradicinan pa nan sacrificio cu nan a haci pa yega asina leu. Tambe el a gradicinan pa kere den Aruba y den nan mes, paso e sacrificio aki ta un les pa bida , mustrando cu den futuro nada lo strobanan di logra nan meta.
Prome Minister tambe ta felicita Enseñansa pa Empleo, mirando cu regularmente un cantidad grandi di persona ta sigui cursonan di recapacitacion y na final ta haya un certificado cu ta habri porta di e mercado laboral pa nan. Masha pabien na tur e graduadonan y hopi exito den futuro.
MINISTER MADURO DI CULTURA TA APROBA
270 MIL EXTRA PA UNOCA POR FINANCIA PROYECTONAN CULTURAL
Recientemente Minister Maduro di Cultura a aproba un suma di 270 mil florin extra pa UNOCA por financia proyectonan cultural. E suma aki UNOCA lo uza pa co-financia 27 proyecto riba diferente areanan cultural. Entre otro, un suma di 62.500 florin ta wordo aloca pa celebra nos tradicion di Dande den diferente barionan na Aruba y casi 40.000 florin ta bay pa enrikese nos coleccion literario nacional cu obranan nobo cu pronto lo sali riba mercado.
UNOCA tambe ta co-financia varios proyectonan cu ta cay bou arte di tarima, manera e obra musica 'Grease' e premio nacional Crioyo di Oro, Song Festival di Pasco di nos grandinan, como tambe brinda ayudo na grupo di Gaita Las Unicas Fabulosas den nan representacion di Aruba na Boneiro e fin di aña aki. E presentacion di fin di aña di Stichting Leerorkest y concierto di Edjean Semeleer 'Euforia' tambe lo ricibi sosten di UNOCA for di e fondo extra aki.
Otro proyectonan cu a logra haya co-financiamento cu e fondo aki ta proyectonan di Arte Visual, participacion di Artistanan local na Aruba Fashion Week, celebracion di Pasco den barionan di Aruba y dos documentario interesante y importante cu lo wordo estrena den e prome lunanan di 2025. Un proyecto cu a capta hopi atencion cu tambe por a wordo realisa danki na e sosten adicional aki, ta e exposion 'Caha di Orgel: Tono di nos Tradicion' cu a tuma luga dia 28 di november ultimo.
UNOCA ta sumamente contento cu e sosten adicional cu a ricibi di Ministerio di Cultura pa asina sigui inverti den cultura di Aruba. Den 2024 UNOCA a ricibi un total di 142 peticion, di cual total 98 a ricibi co-financiamento, incluyendo e suma adicional aki cu a keda aproba pa Minister Maduro di Cultura.
Minister Xiomara Maduro
MINISTER MADURO A BISHITA E LOCALIDAD NOBO DI ADUANA NA BUSHIRI
Na aña 2026 e edificio nobo di Aduana ta keda cla
Recientemente Aduana a muda bay pa na un localidad nobo na Bushiri cu ta mas amplio y apto pa e trabou Aduanero.
Riba Dia di Gracia, Minister Maduro di Finansa a haci desvelo di e logo di Aduana na e localidad nobo y a pasa saluda e Aduaneronan pa gradici nan y desea nan exito cu nan trabou na bienestar di Pais Aruba.
E localidad na Bushiri ta uno temporario, ya cu tur preparacion a keda finalisa pa asina por cuminsa traha e edificio nobo di Aduana na Barcadera cu ta programa pa keda cla den aña 2026.
MINISTER XIOMARA MADURO A HACI APERTURA DI EXPOSICION CAHA DI ORGEL
‘TONO DI NOS TRADICION’
Un exposicion organisa pa UNOCA den colaboracion cu Ministerio di Cultura
Riba Dia di Gracia, UNOCA den colaboracion cu Ministerio di Cultura a organisa un Exposicion di Caha di orgel: "Tono di nos Tradicion,", cu a tuma luga den sala di UNOCA. Minister di Cultura Xiomara Maduro a haci apertura di e Exposicion y a subraya cu e evento aki ta pa brinda un homenahe na e herencia musical unico di folklore di Aruba, e Caha di orgel. Minister di Cultura a bisa cu e Exposicion aki ta pa celebra nos musica, nos tradicion y nos identidad cultural. Musica ta un pilar den nos cultura. Di fiesta di bario te ceremonianan familiar, musica ta e idioma universal cu ta uni nos pueblo.
Caha di orgel ta mas cu un instrumento; e ta un simbolo di nostalgia, alegria y union. E ritmo di un Caha di orgel ta un recuerdo di alegria di bida y tradicion di nos pueblo. E ta trece recuerdo di nos antepasadonan y ta refleha e importancia di nos historia musical.
E mandatario, na nomber di Gobierno di Aruba ta gradici tur esnan cu ta traha cu amor y dedicacion pa mantene e arte di Caha di orgel bibo. Di e trahado y tocado di Caha di orgel, e tocado di wiri y tambe tur esnan cu ta contribui pa e herencia cultural musical aki keda bibo den nos comunidad.
Alabes e dignatorio a extende un gradicimento na e organisadonan di e Exposicion ‘Tono di nos Tradicion’ cu ta un proyecto iniciativa di UNOCA, den colaboracion cu Ministerio di Cultura. Minister di Cultura a gradici Biblioteca Nacional Aruba pa nan aporte valioso cu nan Caha “Nos Recuerdo” di sr. Buchi Boekhoudt y Archivo Nacional Aruba. Un danki special tambe a bay na Sr. Nelson Tiel, Sr. Arthur Kelly, Sr. Hubert Ras y Sr. Reginald (Nai) Filicia pa nan contribucion. E mandatario a gradici e hoben Raydrick Hernandez di Archivo Nacional Aruba, cu a diseña un bunita logo cu por sigui wordo usa pa eventonan di Caha di orgel den futuro y cu tambe a traha e bunita slideshow di potret cu por a admira den e Exposicion.
Pa haci e Exposicion aki posibel tabata masha importante e presencia di e Cahanan di Orgel. Pa e motibo ey Minister Xiomara a gradici e doñonan di e 23 cahanan, e 28 tocadonan di caha y e 30 wichareronan, e tocado di wiri cu a pone e Cahanan resona. Como muestra di aprecio e mandatario a brinda na cada tocado di Caha y wicharero un portofolio cu e nomber di nan caha riba dje y un certificado di participacion.
Na final Minister Xiomara Maduro a invita tur presente pa disfruta di e Exposicion unico aki y pa sigui ‘Biba nos Cultura’ y celebra e herencia cultural musical di Caha di Orgel di nos Pais Aruba.
MINISTER XIOMARA MADURO A HONRA
MAS BALUARTE DI ‘CAHA DI ORGEL’ PA NAN
DEDICACION
Y CONTRIBUCION PA MANTENE E TRADICION DI CAHA DI ORGEL BIBO DEN
CULTURA DI ARUBA
Durante e Exposicion di Caha di orgel ‘Tono di Tradicion’, cu a tuma luga recientemente riba Dia di Gracia na UNOCA, Minister Xiomara a reconoce cinco baluarte mas cu pa nan trabao y dedicacion na e instrumento iconico di Caha di orgel, ta contribui na preservacion di nos cultura musical y folklorico.
Durante un bunita ceremonia, Minister di Cultura a brinda un reconocemento na sr. Mario y sr. Marcelino Maduro, cu ta toca y traha Caha di orgel, alabes ta doñonan di Caha di orgel “Gloria”.
sra. Bernadeta Maria Croes-Werleman, cu ta tocado di wiri y ta compaña e Caha “Sorpresa” tambe a ricibi un reconocemento for di e dignatario . Alabes Minister Xiomara a otorga un reconocemento na sr. Ceferino Gomez doño di Caha di Orgel; “Mi Wela”. E di cinco baluarte sr. Antonio Geerman, yiu di defunto sr. Agripino (Shon Pin) Geerman cu a hereda e Caha di Orgel: “Bunitesa di Aruba" di su tata, tambe a wordo honra cu un reconocemento for di e mandatario.
Minister Xiomara Maduro, na nomber di Gobierno di Aruba a gradici cada un baluarte pa conserva, proteha y mantene e musica di Caha di orgel como parti di nos rikesa cultural musical bibo den nos pueblo.
RESTAURACION DI E EDIFICIO DI EX ARUBA
BANK OTRO PASO IMPORTANTE PA ORANJESTAD
Diaranzon 4 di december Minister Geoffrey Wever a firma un "Memorandum of Understanding" cu Aruba Bank N.V., Stichting Monumentenfonds Aruba y Restauratiefonds Nederland pa compra y renovacion di e edificio di ex Aruba Bank den Caya Betico Croes den cual lo ubica Centraal Bureau voor de Statistiek y Sociaal- Economische Raad.
Pa un tempo largo Stichting Monumentenfonds Aruba tawata purba pa cumpra e edificio di John G Eman den caya di Oranjestad. Como parti di su vision pa trece bida bek centro a traves di amplifica e fluho di personanan cu ta frecuenta e area, minister Geoffrey Wever a dialoga cu Stichting Monumentenfonds Aruba pa sondea pa ubica Centraal Bureau voor de Statistiek y Sociaal- Economische Raad como huurdo principal den e edificio.
Y awe despues di mas o menos un aña di trabao Minister Geoffrey Wever, Stichting Monumentenfonds Aruba, Nationaal Restauratiefonds di Hulanda y Aruba Bank N.V. ta anuncia cu a yega na un “Memorandum of Understanding” pa e compra di e edificio di John G Eman, e renovacion y e financiamento pa ubica Centraal Bureau voor de Statistiek y SociaalEconomische Raad.
E ubicacion di Centraal Bureau voor de Statistiek y SociaalEconomische Raad den centro di Oranjestad ta forma parti di e maneho concreto di Minister Geoffrey Wever pa trece bida bek den centro di Oranjestad y pa restaura monumento y edificionan bashi den centro di Oranjestad. Esaki ta importante pa realisa e revitalisacion di Oranjestad.
Por mira diferente otro proyectonan caminda a restaura edificionan y ubica departamentonan den e centro di ciudad, manera Freezone na Plaza Nikki Habibe, y Aruba Fair Trade Authority (AFTA) den Oranjestraat. Edificio di Ministerio Publico cu ta bai ser converti den vivienda pa studiante, y edificio di exInterbank caminda lo haci trabounan di renobacion, y lo ubica Bureau Intellectuel Eigendom (BIE) y SEDECO den dicho edificio. Cas Veneranda ta den pleno renobacion caminda lo
ubica Departamento di Asuntonan Economico y un café y awo e renovacion di e ex edificio di Aruba Bank.
E proyectonan aki di renoba y ubica departamentonan di gobierno, traha un vivienda pa studiante y horeca den e edificionan ta forma parti di e vision di Minister Geoffrey Wever cu e modelo di edificionan combina, un parti pa horeca, un parti pa vivienda y un parti oficina di gobierno ta duna resultadonan concreto pa trece hende back cu ta fungi como clientenan pa tur negoshi den centro di Oranjestad.
Minister Geoffrey Wever ta contento cu despues di tanto tempo y trabou incansabel di preparacion, cu hunto cu Aruba Bank N.V., Stichting Monumentenfonds Aruba y Restauratiefonds Nederland ta logra drecha/ reuza e edificio di John G Eman.
“Danki na Stichting Monumentenfonds Aruba, Aruba Bank N.V. y Nationaal Restauratiefonds Nederland pa partner up cu Gobierno di Aruba y logra e paso importante aki pa revitalisa Oranjestad y conserva nos patriminio nacional!”, según Minister Geoffrey Wever.
