IslaOnline 6 Januari 2023

PROME CONSEHO DI MINISTER DI AÑA A

TUMA LUGA NA SAN NICOLAS Ministernan a ricibi presentacion di varios proyecto

Diabierna 6 di januari, Gobierno di Aruba a organisa e prome Conseho di Minister pa aña 2023 na San Nicolas, pa asina atende cu e tema di diferente proyecto na San Nicolas. Hunto cu San Nicolas Business Association (SNBA), DIP, DOW y Ministernan, a haya presentacion di 5 diferente proyecto hopi interesante y cu lo genera fluho di turista y di persona na San Nicolas. Meta di e proyectonan ta pa crea cupo di empleo specialmente pa esnan pariba di brug, y crea desaroyo economico pa Aruba.

Prome Minister Evelyn Wever - Croes na e ocasion a expresa cu e proyectonan ta hopi interesante y tabata encera proyecto di vivienda, proyecto turistico, presentacion di agricultura y mas. ‘Mi ta sumamente agradecido na SNBA pa a yuda nos setup e reunion y cu a traves di nan por a haya e presentacionnan. Mi tin tur confiansa cu e proyectonan lo bira realidad y asina crea e progreso y bienestar cu ta buscando pa Aruba en general, pero specialmente pa San Nicolas.’

Durante Gabinete Wever - Croes I y II, esaki ta e di cuatro biaha cu a organisa un Conseho di Minister na San Nicolas, pa asina atende specificamente cu temanan di San Nicolas. Tin hopi trabou pa haci ainda, e pandemia a stroba den hopi cos, e situacion financiero delicado di Aruba tambe a hacie dificil. Pero tin e fe, vision y determinacion pa logra e desaroyo cu e pueblo di San Nicolas ta desea, Premier Wever - Croes a termina bisando.

HULPBESTUURSKANTOOR SAN NICOLAS LO HABRI DEN EDIFICIO DI RDA

Otro siman lo pone nomber na e edificio

Fin di october a tuma e decision pa cera Hulpbestuurskantoor San Nicolas pa motibo di falta di seguridad di empleado y di bishitante. Awor aki Gobierno di Aruba ta anuncia e bon noticia cu dentro di poco HBK San Nicolas lo ta habri un biaha mas den curason di San Nicolas den e edificio di Refineria di Aruba (RdA).

Den e edificio di RDA tin un espacio cu a wordo prepara specialmente pa ubica e HBK y empleadonan pa por cuminsa brinda servicio na San Nicolas. Ta trata di un espacio hopi amplio, renoba, cu ta trece un ambiente di trabou nobo y caminda cu por duna servicio na comunidad di San Nicolas un biaha mas. Prome Minister Evelyn Wever - Croes a expresa cu ta lamenta cu mester a cera e HBK pa algun tempo, pero mester a pone e seguridad di empleadonan y bishitantenan na prome luga.

E tema di HBK ta den un polemica desde prome cu Gabinete Wever - Croes a drenta den gobierno cu lo mester a bin un MFA nobo na San Nicolas, si of no. Aruba ta pagando caba pa un MFA na San Nicolas pero nunca e prome piedra a wordo poni, pa motibo di maneho financiero devastador di gobierno anterior, cual a conduci na falta di fondo prome cu San Nicolas a yega na turno. Prome Minister Wever - Croes a splica cu a purba di sali di e situacion entre SOGA cu e tema di MFA y remodelacion di Hulpbestuurskantoor. Actualmente tin algun proposicion riba mesa, cual mester mira con lo por carga esaki teniendo na cuenta cu e prijsnan di huur ta halto y mester tene cuenta cu finansas publico.

A pesar di esaki ta contento cu a haya un bon solucion den apenas dos luna, caminda cu HBK na San Nicolas por habri su portanan bek, den e localidad nobo pa brinda tur e servicionan na comunidad di pariba di brug cu tabata brinda anteriormente. Concluyendo Prome Minister Wever - Croes a bisa, cu aworaki ta pendiente di algun trabou cu mester finalisa, den curso di otro siman e nomber di HBK lo wordo poni na e edificio y lo cuminsa duna e servicio na e comunidad di San Nicolas.

KICO TA “GREEN WASTE” Y PAKICO E MESTER WORDO PROCESA?

Desde 1 di januari 2023, Dump di Parkietenbos a cera su porta pa publico. A bin algun siman ta informa caba tocante diferente localidad posibel unda por hiba diferente tipo di desperdicio.

Den e articulo aki nos lo enfoca riba “Green Waste”, esta, sushi organico. Kico ta green waste? Unda por entrega esaki? Kico ta e impacto riba e prijs pa procesa Green Waste? Y cua ta e metodo con esaki ta wordo procesa pa recupera recursonan.

KICO TA GREEN WASTE?

Ehempelnan di Green Waste ta entre otro: yerbe, blachi di mata, palo y troncon, y pallet blanco (no blauw).

UNDA POR ENTREGA ESAKI?

Green waste por wordo entrega na Johnsons of Ecotech Freezone.

KICO TA E IMPACTO RIBA E PRIJS PA PROCESA GREEN WASTE?

Ora ta trata prijs ta importante pa aclarea cu na Aruba nos no ta conoci cu costonan di procesamento di desperdicio. Locual a paga tur e añanan na Dump tabata simplemente pa deshaci y acumula desperdicio. E impacto riba bo cartera por varia entre spaar (compara cu dump) of costo adicional pa

procesa. Actualmente dos compania tin e capacidad pa por procesa green waste y ta premira cu mas compania lo drenta e mercado di procesa desperdicio durante 2023.

CUA TA E METODO CON ESAKI TA WORDO PROCESA PA RECUPERA RECURSONAN?

Tin varios opcion pa converti Green Waste den un recurso pa sector primario. Por ehempel, palo of pallet blanco por wordo converti den mulch pa uzo den agricultura. E mulch ta percura pa menos awa vapora. E otro forma ta pa kima e green waste den incinerator of den e air-curtain burner, unda e as tambe lo por wordo uza pa enrikese e tera. Den futuro, tambe lo tin opcion pa converti tur Aruba su green waste hunto cu food waste den compost cu lo ta e miho forma pa converti desperdicio biologico den un recurso cu lo hisa e calidad di nos tera. Pa e motibo aki, ta importante pa ricibi esaki “limpi” (separa for di tur otro tipo di sushi), pa asina no solamente yuda tene Aruba limpi, pero contribui tambe na nos agricultura local.

Den transcurso di dianan nos lo sigui comunica y informa ciudadanonnan di nan opcionnan, y con nos tur por ta consciente y reconoce bo impacto. Cada un di nos tin e responsabilidad pa yuda mehora Aruba su maneho di desperdicio.

Minister Ursell Arends:

SPLICACION DI MANEHO DI DESPERDICIO NA TRAHADONAN DI SERLIMAR

Diahuebs mainta 5 di januari, Ministerio di Naturalesa a duna un splicacion amplio na trahadonan di Serlimar encuanto e maneho di desperdicio, como tambe e rol di Serlimar den esaki. A duna espacio pa haci pregunta critico, vocifera nan preocupacion y aclara confusion cu a surgi.

Di principio Minister Ursell Arends a asumi su puesto pa cuminsa traha un plan di accion con ta bay rescata Serlimar alabes trece un solucion pa e problematica di desperdicio cu e isla completo ta biba cu ne. Redirigi desperdicio for di Dump ta solamente e comienso cu ta forma parti di e restructuracion di nos sector di desperdicio. Aunke desperdicio no lo ser acepta mas na Dump, e area ta rekeri atencion pa sanea y converti den un parke solar cu ta parti di e vision di Minister Arends.

E trahadonan di Serlimar a ricibi splicacion ariba e blueprint pa asina atende cu cliente cu acerca Dump pa informacion di e maneho di desperdicio nobo. Ademas, a instala un borchi pa trece aclaracion riba e diferente tipo di desperdicio y unda por deshaci di esakinan.

E proceso ta sigui pa stimula procesador di desperdicio nobo, introduci regulacion y ley ademas di trece un cambio cultural den nos manera di anda cu desperdicio. Un danki na e directora y trahadonan di Serlimar pa nan cooperacion den e proceso aki pa fortifica e compania y trece un cambio nacional pa un miho futuro.

MINISTER MADURO DI CULTURA TA DESEA

SMAC, TUR GRUPO Y PARTICIPANTE HOPI EXITO

DEN CARNAVAL 69

Gobierno ta inverti un promedio di 1,5 miyon florin na servicio pa haci Carnaval di Aruba exitoso

Hopi exito y danki na tur cu ta yuda engrandece Carnaval Minister Maduro di Cultura ta desea SMAC, tur grupo y participante hopi exito den e temporada di Carnaval 69 y ta desea pa tur hende por goza sanamente. E mandatario ta gradici tur esnan cu ta haci e celebracion grandi aki di nos Cultura posibel y ta manda un palabra di gratitud y forza specialmente na Cuerpo Policial, IMSAN, Ambulance, Serlimar, DOW, DTI, Brandweer, cosedonan, estilistanan, voluntarionan y tur otro instancia y persona cu nan trabou y esfuerso ta yuda engrandece Carnaval di Aruba.

Gobierno ta inverti un promedio di 1,5 miyon florin pa haci Carnaval exitoso Carnaval 69 ta wordo organisa y guia pa SMAC bou liderasgo di su Presidente Darren van Ommeren y su ekipo di voluntario. Gobierno di su banda ta inverti un promedio di 1,5 miyon florin na servicio di varios departamento publico, pa asina haci Carnaval 69 uno exitoso. Banda di esaki, Gobierno a brinda tur grupo cu a participa na e 'Parada Nacional Cend'e E Mecha 2023,' e oportunidad pa por a haci un fundraising pa asina por a prepara pa por subi caminda den Carnaval 69.

Carnaval 69 ta cuminsa e fin di siman aki cu Parada di Flambeu despues cu pa 2 aña largo Aruba no por a celebra Carnaval debi na e pandemia di COVID-19. E ultimo biaha cu gruponan di Carnaval a subi caminda tabata durante e 'Parada Nacional Cend'e E Mecha 2023' dia 26 di februari 2022 cu a wordo organisa pa Comision Celebracion Dianan Nacional den cuadro di nos Dia di Himno y Bandera y tambe den cuadro di e Exit Strategy pa Aruba yama Bon Bini na turismo despues di tur e restriccionnan cu e pandemia a trece cune. E fin di siman aki porfin e carnavalistanan lo por subi caya atrobe cu e fantasia y creatividad pa cual e Carnaval di Aruba ta conoci p'e.

Ban celebra sin exceso Aruba su Carnaval ta e exposicion Cultural mas grandi di nos Pais, un temporada di gozo pa Pueblo y tambe un temporada pa mustra nos bishitantenan con nos Pueblo ta celebra y biba nos cultura. Minister Maduro ta haci un apelacion pa nos comportacion civico sin exceso innecesario y cu atencion special na nos muchanan y hobennan durante e celebracion cultural aki cu ta wordo biba tambe pa nos bishitantenan. Ban hunto biba nos cultura y laga un bunita recuerdo di e celebracion di Aruba su Carnaval 69.

DEN 2023 E LISTA DI ESPERA DI SPECIALISTA LO BAHA SUBSTANCIALMENTE

Minister di Turismo y Salud Publico sr. Dangui Oduber ta anuncia cu durante aña 2023 lo cumpli cu un reto mas den salud publico. Durante aña 2022 e mandatario a supervisa hopi di e trabounan haci pa asina por logra cu den aña 2023 por logra baha e lista di espera pa haya un cita na un specialista.

E mandatario a duna di conoce cu durante 2022 a percura pa amplia nos cuido di prome liña cu ta nos dokternan di cas. E idea cu ta considerando pa bin cune ta pa amplia e cantidad di dokter di cas cu tin na nos Huisartsen Post (HAP) na hospital. E concepto pa tin mas dokter di cas disponibel bou un solo dak ta un concepto cu ya caba a demostra di ta uno cu ta funciona. Tambe esaki lo zorg pa tin e continuidad di e cuido medico.

Mester añadi cu e logro di AruBIG caminda porfin por registra nos propio yuinan di teranan cu a studia den region pa dokter sigur a yuda na amplia e cantidad di dokter di cas na Aruba.

E mandatario a splica cu pa busca specialistanan di afor semper tabata un reto grandi mirando e scarcedad cu tin den e profesionalnan medico den e mercado laboral. Pero den aña 2023 tin presupuesto pa busca mas specialista den servicio pa cierto specialismonan. Ta bay amplia den specialistanan di entre otro specialista di wowo, specialista den urologia, specialista di dolor y specialistanan di stoma y tripa.

E mandatario ta convenci cu e ampliacion aki den dos liña di cuido ta bay yuda na reduci e cantidad di personanan cu lo mester bay un specialista. Cu e ampliacion den e specialistanan den aña 2023 lo por trata mastanto pashent y asina reduci e lista di espera considerabelmente. Minister Dangui Oduber ta premira un aña 2023 hopi positivo pa cuido medico y lo sigui traha duro pa mehora esaki aun mas.

MINISTER DI ENSEÑANSA TA REUNI CU

PRESIDENTE NOBO DI COLEGIO DI CURATOR DI UNIVERSIDAD DI ARUBA

Minister di Enseñansa y Deporte Sr. Endy Croes ta reuni cu e presidente nobo di Colegio di Curator pa prome biaha. Despues di a sirbi Colegio di Curatornan di Universidad di Aruba dos aña consecutivo como presidente, Sr. Herry Koolman a introduci Sr. Juri Nicolaas na Minister Endy Croes, como e siguiente miembro cu ta tuma e encargo di presidente.

E Colegio di Curatornan di e instituto ta consisti di 5 miembro (Sr. Juri Nicolaas como presidente, Sr. Angelo Brete como vice-presidente, Sr. Herry Koolman como presidente saliente, Sr. Haime Croes, Sra. Tisa LaSorte y Sr. Eugene Martis como miembro).

Presidente Nicolaas a pidi atencion y apoyo di Minister Endy Croes pa algun asunto cu ta den desaroyo na e instituto, entre otro e structura di “governance” y e cambionan necesario den e legislacion di universidad pa por efectua esaki. Minister Endy Croes a elabora ampliamente riba e proyecto cu el a inicia cu professor Luutsen de Vries, cu a keda encarga cu revision di varios ley riba tereno di enseñansa pa su ministerio. E proyecto aki tin un duracion di 18 luna y lo duna debido atencion na e punto akiriba menciona.

Durante di e reunion aki, Minister Endy Croes a aplaudi e programa di Universidad di Aruba, Shoco Wellness y a pidi e universidad su colaboracion pa comparti su experticio riba tereno di salud mental cu henter e sector di enseñansa na Aruba. Su intencion ta pa pronto presenta un plan pa adresa e problemanan social cu nos tin riba tereno di enseñansa na Aruba y a pidi colaboracion di Universidad di Aruba pa pone su experticio disponibel.

Minister Endy Croes a elogia Universidad di Aruba pa e hecho cu su relato financiero certifica pa un accountant tur aña ta

wordo entrega na tempo y cu e estado financiero di e instituto ta “solvente”. Sr. Nicolas a subraya cu e ta importante pa Universidad di Aruba tin bon comunicacion cu Departamento di Finansas, mirando cu no tur biaha ta ricibi informacion na tempo di locual a wordo aproba of desaproba di e presupuesto cu a entrega.

Colegio di Curatornan di Universidad ta contento di tin un bon comunicacion cu Minister Endy Croes y cu plan y vision di e instituto ta alinea cu Plan Educacion Nacional (PEN 2030). Minister Endy Croes a indica cu su intencion ta pa sigui comunica su mensahe cu tur stakeholders den enseñansa; mester por complementa otro mas, na luga di competi cu otro. Alabes, Minister Endy Croes a expresa cu su deseo ta pa e maneho di Universidad di Aruba y di Instituto Pedagogico Arubano (IPA) ta mas alinea cu otro, specialmente riba tereno di investigacion cientifico, planeamento di capacidad y desaroyo y implementacion di e competencianan rekeri den siglo 21.

Minister Endy Croes ta felicita Sr. Juri Nicolaas cu su encargo nobo como presidente di Colegio di Curatornan di Universidad di Aruba y ta gradici Sr. Koolman pa su trabao cu el a realisa durante e dos añanan cu a transcuri.

MINISTER ENDY CROES A ENTREGA PREMIO NA GANADONAN DI CAMPEONATO 2022 DI ARUBA SOFTBALL BOND

Den luna di december Aruba Softball Bond a organisa un anochi special na Club Primavera, unda a entrega tanto premionan di campeon y sub-campeon di liga: AA Masculino Liga Kibrahacha, AA Femenino Liga Flamboyant y A Klas Masculino Liga Kwihi.

Directiva di ASB representa pa su presidente Sra. Zuleyka Willems, secretario Sr. Andresito Krozendijk, tesorero Sra. Juraima Maduro y miembro di bestuur Sr. Rensley a habri e anochi di e evento special aki, unda e presidente a gradici cada ekipo, cada ganador individualmente y ekipo di Umpires y Scorers pa nan tremendo trabou. Alabes a reconoce presencia di Minister di Enseñansa y Deporte Sr. Endy Croes y tambe representante di ASU Sr. Kenneth Vrolijk, kendenan a percura pa entregamento di medaya.

Minister di Deporte Sr. Endy Croes a duna un discurso y a gradici e directiva di ASB y ekipo di Umpires y Scorers. Durante e discurso, Minister Endy Croes a splica cu realmente ASB tabatin un aña complica cu hopi reto. Pa motibo di awacero constantemente mester a cancela diferente wega, pero a logra yega final unda tur finalnan a wordo hunga. Alabes a felicita e ekiponan campeon y sub-campeon di tur 3 liga y a duna palabra di pabien na cada hungado cu a destaca durante e campeonato y cu a hiba titulonan, manera “Champion Batter”, “Champion Home Run”, “Champion Pitcher” y “MVP”. Despues di esaki, Sr. Andresito Krozendijk a tuma encargo pa asina yama e ekiponan campeon, sub-campeon y cada hungado cu a sobresali pa ricibi nan premio.

Liga Kibrahacha AA masculino: Ekipo di Royal Power (ultimo campeon na 2019) ta retene nan titulo di campeon den e prome campeonato oficial despues di pandemia y e ekipo di Macuarima Indians ta titula subcampeon. Minister di Deporte Endy Croes a entrega varios premio. Jomark Flanegin di e ekipo di Royal Power ta titula “Champion Pitcher” cu 3 wega gana y 0 perdi y alabes ta bay cu e “MVP”. Giandrick Lacle di ekipo di Royal Power a bay cu e premio di “Champion Home Run”. Xavier Croes di e ekipo

di Macuarima ta bay cu e titulo di “Champion Batter” cu un averahe di 700.

Liga Kwihi A Klas Masculino: Den categoria di A-Klas tanto Minister Endy Croes y tesorero di ASU Sr. Kenneth Vrolijk a entrega varios premio. Redskins ta titula campeon, mientras Prodigies ta bay cu e titulo di subcampeon. Ozzi Webb di Redskins a bay cu e titulo di “Champion Batter” cu un averahe di 636. Juan Chirino di ekipo di Redskins a bay cu e titulo di “Champion Pitcher” cu 4 wega gana y 0 perdi, mientras Saul Illidge ta reclama e titulo di “Champion Home Run” cu 2 “cuadrangular”.

Liga Flamboyant AA Femenino: Den categoria femenino Minister Endy Croes a entrega diferente premio.E ekipo di Aruba Bank Lady Tigers ta titula campeon y nan tambe ta retene nan titulo di 2019 den e prome campeonato despues di pandemia y ta bay cu e titulo maximo y e ekipo di Eagles ta bay cu e titulo di sub-campeon. Rudlyn Ras ta bay cu 3 titulo esta di “Champion Pitcher” cu 5 wega gana y 0 perdi, tambe e titulo di “Champion Home Run” y e premio di “MVP”. Ilajay Tromp ta reclama e titulo di “Champion Batter” cu un averahe di 750.

Despues di a entrega varios permio, Minister Endy Croes a bolbe felicita Aruba Softball Bond y a continua pa su proximo compromiso riba un dia bastante ocupa. Deporte den pleno desaroyo!

Departamento Recurso Humano: PRESTATIEMANAGEMENT

Segun acuerdonan stipula den “Landspakket”, Gobierno di Aruba ta inicia trayecto di un sistema yama “Prestatiemanagement” guía door di Departamento Recurso Humano (DRH). De es manera aki tambe ta cumpli cu artikel 10 di LMA, esta pa uza un sistema di evaluacion pa tur personal den servicio gubernamental.

DRH a inicia e projecto aki cu un grupo piloto comienzo di aña 2022. Pa e aña piloto aki a organisa diferente workshops conhunto cu 38 departamento piloto di Gobierno. E segundo parti di aña 2022 a completa workshops pa tur empleado publico y demás 50 departamento di Gobierno. Den e proceso aki tur sindicatonan a hanja e mesun workshop y tambe a wordo consulta diferente biaha y nan feedback a wordo lo mas posible incorpora den e sistema.

Kico ta Prestatiemanagement?

E Prestatiemanagement primordialmente ta dirihi su mes riba e desaroyo (ontwikkeling) di e empleado publico. Asina, cu un sistema pa tur departamento y tur trahador publico y na un manera structura ta focus pa mehora e funcionamento di e empleado publico, e calidad, efectividad y e puntonan di desaroyo di empleado publico. Alaves ta guia e mehoracion den e funcionamento di Aparato Gubernamental.

Con e ta bai?

Prestatiemanagement ta un sistema cu ta consisti di minimo 3 combersacion entre e empleado publico y su hefe durante di e aña y ta un proceso continuo.

Combersacion 1: Planningsgesprek “Combersacion pa plania”

Esaki ta e promer combersacion, na comienzo di e aña y ta dirihi pa hasi afspraaknan riba e manera di eherse e tareanan door di e empleado. Tambe ta yega na palabracionnan concreto pa eherse tareanan pero tambe pa mehoracion, teniendo na cuenta punto nan di desaroyo.

Combersacion 2: Voortgangsgesprek “Combersacion continuo”

Esaki, ta e di dos combersacion, den mei/juni y ta repasa con e funcionamento a bai e promer mitar di aña y ta repasa e punto nan di desaroyo. Den un forma di dialogo ta yega na palabracion di mehoracion y/of si e trabou ta bayendo bon of si tin punto nan di mehoracion. * Si e empleado publico ta desea di tin mas cu un combersacion continuo, e por haci peticion pa esaki na su hefe directo.

Combersacion 3: Beoordelingsgesprek “Combersacion di evaluacion”

Esaki ta e di ultimo combersacion na fin di e anja y ta a base di resultadonan di e primer dos combersacionnan. Aki ta evalua puntonan concreto riba con e anja di trabao a bai.

Entre ken e combersacionan ta tuma luga?

E combersacionan ta tuma luga entre un empleado publico y su hefe directo. Den caso cu ta traha den ploeg, e por ta necesario pa combersacionan y e evaluacion tuma luga conhunto cu e hefe directo y tambe e esun cu ta coordina e trabow diariamente. E coordinador tin mas miho bista ariba e trabow diario y dus e funcionamento di e trahado publico.

Puntonan importante pa e trahado publico sa pa cu su derechonan:

- Mi mes ta propone mi puntonan di desaroyo.

- Mi por pidi pa un tercer persona ta presente durante e diferente combersacionan.

- Si mi no ta di acuerdo cu e beoordeling, tin tres nivel pa escala si mi no ta di acuerdo.

Landsbesluit prestatiebeoordeling AB2022 no. 165

E parti legislativo di e sistema, a wordo desaroya y finaliza conhunto cu DWJZ y a drenta na vigor 1 januari 2023.

Den e siguiente edition lo duna mas informacion riba e parti juridico y alaves tambe e procedura ora ta contra di e evaluacion final.

Pa mas informacion por acudi na e HR Portaal Overheid HR: https://hrportaal.drh.gov.aw