GOBIERNO TA REUNI CU REPRESENTANTENAN
DI TAXISTANAN
“Turismo ta e pilar economico mas importante, e ta pan no solamente di taxista sino di miles di Arubiano y nos niun kier perhudica esaki”
Diamars 6 di augustus atardi, Gobierno di Aruba, den representacion di Prome Minister Evelyn Wever-Croes, Minister di Finansas Xiomara Maduro y Minister di Turismo Dangui Oduber, a reuni cu representantenan di taxistanan mirando e situacion actual di e empase entre nan y e Minister di Transporte Ursell Arends, riba e maneho pa loke ta trata taxista.
Mirando cu taxistanan a bay riba puntonan cu ta afecta nos turismo, Ministernan a haya necesario pa interveni. Prome Minister a indica cu e reunion a bay den bon ambiente na unda nan a trece nan puntonan dilanti hunto cu posibel solucionnan rasonabel padilanti. “Di nos parti nos a trece dilanti cu Aruba no mester di intrankilidad awor aki y a pidi pa yega na solucion den dialogo”, Prome Minister a expresa.
Prome Minister a indica cu e puntonan di preocupacion cu a wordo treci dilanti lo wordo trata, y lo scucha e banda di Minister Ursell Arends pa asina mira e miho manera pa sali di e impase aki. “Importante pa señala ta cu Aruba ta den recuperacion. Nos a traha hopi duro, pa Aruba recupera despues di e pandemia, turismo ta e pilar economico mas importante, e ta pan no solamente di taxista sino di miles di Arubiano y nos niun kier perhudica esaki. Den interes di nos turismo y di Aruba en general, nos mester busca un salida pa cu e impase akinan”, Prome Minister Evelyn Wever-Croes a enfatisa.
Prome
Minister Evelyn Wever-Croes: Despues di negosacionnan di delegacionnan di Hulanda y di Aruba
PROME MINISTER Y MINISTER
DI FINANSA A HAYA
UN UPDATE RIBA E NEGOSACIONNAN PA YEGA NA
UN RIJKSWET
Diaranson mainta dia 6 di augustus, Prome Minister Evelyn Wever-Croes y Minister di Finansa, Xiomara Maduro a reuni cu e grupo di experto cu ta manehando e negosacionnan di e rijkswet pa asina haya un update riba esaki.
Recientemente Gobierno di Aruba a cera un acuerdo cu Hulanda riba e tema di refinanciamento di e debe. Un di e condicionnan di e acuerdo ta pa Aruba bin cu un tipo di rijkswet den cual ta regla algun aspecto di supervision financiero. E acuerdo ta indica cu den un rijkswet ta bin e definicion di e normanan y den un ley local, e landsverordering, ta bin e normanan mes. Y ta den man di Parlamento di Aruba pa defini normanan, cambia normanan y pa bin cu normanan nobo. Esey ta e palabracion cu a haci y despues di esey ta bin un periodo pa negocia pa yega na un rijkswet.
Dos siman pasa tawatin un delegacion di Hulanda na Aruba y durante un siman largo a negocia cu e ekipo di Aruba. E negosacionnan a bay bon y tin algun asunto cu ya caba tin consensus riba nan y tin otronan cu mester warda cu nan ainda.
Prome Minister ta accentua cu un di e temanan mas importante ta cu hunto a acerca IMF (Fondo Monetario Internacional), pa asina IMF yuda cu e definicion di e normanan nobo. Actualmente Aruba ta den un situacion di surplus financiero y tambe Aruba ta cumpli cu e normanan exigi, y pais Aruba ta mustrando un madurez financiero di tal grado cu ya ta tempo pa bay re-defini e normanan actual. E normanan aki ta basa riba e ley di LAft cu a bin na aña 2015 pa percura pa Aruba sali for di deficit. E deficit e tempo ey a wordo causa pa e gobierno di señor Mike Eman ken a redobla e debe di Aruba. Gobierno di señor Eman no tawatin maneho financiero y tawata biba di un deficit pa otro di 300 y 400 miyon florin. Pues e tempo ey e normanan tawata dirigi pa sali for di e situacion di cifranan cora y caba cu e deficit.
“Danki na e Gobierno actual, Aruba a logra sali di e deficit ocasiona pa gobierno di Mike Eman. Aruba ta bayendo padilanti cu un economia cu ta creciendo. Ainda tin cierto necesidadnan den nos comunidad unda cu mester adapta e normanan y cu
esaki tambe IMF ta yudando nos. Nos ta spera cu pa otro luna IMF lo por duna nos un bon conseho riba esaki pa nos por sigui negocia riba e tema aki tambe.
Nos palabracion cu Hulanda ta cu prome cu 1 di mei 2025 nos tin cu presenta e rijkswet nobo aki na Parlamento di Aruba y na Parlamento di Hulanda y nos ta haciendo tur nos esfuerso pa cumpli cu e deadline aki. Si nos logra y bin cu e rijkswet, e interes ta baha mas ainda. Esaki tawata 6.9%, y el a baha na 5.1%, pero cu e rijkswet e lo por baha te na 3.2%. Dus awor nos ta buscando e diferencia di e 5.1% y e 3.2% cu e negosacionnan aki y nan ta bayendo bon”, Prome Minister a declara.
Prome
Minister Evelyn Wever-Croes: Gobierno a reuni cu SNBA riba e desaroyo di San Nicolas
E META COMUN DI GOBIERNO Y SAN NICOLAS
BUSINESS ASSOCIATION TA PA PERCURA PA
MAS DESAROYO NA
SAN NICOLAS
Diaranson mainta Prome Minister hunto cu Minister Glenbert Croes a reuni cu señor Errol de Freitas di San Nicolas Business Association, SNBA.
Gobierno ta considera SNBA un stakeholder hopi importante pa desaroyo di San Nicolas y p’esey tin reunionnan frecuente cu nan. Riba e mainta aki a papia riba varios proyecto cu SNBA y Gobierno tin den mente y con por alinea e esfuersonan comun. Na fin di dia e meta ta pa percura cu tin un fluho mas grandi di hende ta bishita y pasa tempo na San Nicolas y por logra cu comercio por lanta cabes bek na San Nicolas. Na e momento aki e proyecto grandi pa San Nicolas ta e proyecto di e Monumento di Segundo Guera Mundial.
Prome Minister ta indica cu lamentablemente tin retraso den e proyecto pa motibo cu un contratista so a inscribi den e destaho publico y cu su prijs ta mas halto di locual ta presupuesta. Na e momento aki tin un tension riba e mercado di construccion
na Aruba ya cu tin varios proyecto andando. Pa fin di aña lo tin mas espacio pa motibo cu lo tin proyectonan finalisando y na e momento ey lo bolbe cuminsa cu e destaho publico pa e proyecto aki.
Unabes e proyecto aki ta cla, cual lo ta un monumento masha bunita unda ta recorda e rol cu Aruba a hunga y esnan cu a fayece durante e Segundo Guera Mundial, esaki lo ta un atraccion turistico hopi interesante. Ya tin palabracionnan cu tour operators cu lo hiba e turistanan pariba pa bishita e monumento y asina tambe bishita e cayanan y e comercio di San Nicolas.
“Esaki ta un di e proyectonan cu nos ta trahando riba dje hunto cu SNBA, pero tambe awe nos a papia riba otro proyectonan interesante. Nos semper ta purba di cumpli cu e deseonan di SNBA ya cu nos meta comun ta percura pa mas desaroyo pa San Nicolas”, Prome Minister a expresa.
PERHUDICA ECONOMIA PA INTERES PERSONAL TA DESPROPORCIONAL
Awemainta, Minister
Ursell Arends a reuni cu representantenan di taxista. Durante e reunion amplio cu a dura alrededor di 3 ora, Minister Arends a scucha varios punto di preocupacion, tanto relaciona cu e decisionnan recien di cambio di maneho, y otro puntonan mas general di transporte publico. Tambe a duna splicacion adicional riba e decisionnan tuma, y puntonan cu ta den preparacion pa atende cu ne. Na final a palabra cu Minister Arends lo evalua e preocupacionnan, y lo continua e dialogo dia 16 di augustus 2024.
E cambio di maneho ta para e traspaso di permisonan entrante 1 di september 2024 y combati e benta ilegal di esakinan. Asina por stimula un sistema mas husto y transparente. E motibo di e decision aki ta pa crea oportunidad igual pa ciudadanonan por yega na remarke pa un permiso di taxi, na luga di mantene e situacion cu hopi permisonan ta keda circula den e mesun gruponan, limitando e oportunidad igual di otro ciudadanonan pa yega na remarke.
Un grupo di taxista no ta di acuerdo cu esaki y ta opta pa perhudica economia di pais Aruba. Esaki a pesar cu e cambio no a drenta na vigor ainda, a pesar cu a scucha e taxistanan y a
duna di conoce cu lo evalua nan preocupacionnan, y continua e dialogo dia 16 di augustus.
Perhudica economia di un pais pa bringa pa un interes personal cu no ta na vigor mientras tin dialogo y fecha pa siguiente dialogo, ta desproporcional.
Minister Ursell Arends: COMBATIENDO CORUPCION Y ASEGURANDO
OPORTUNIDAD IGUAL DEN TRANSPORTE PUBLICO
Minister Arends a sostene un conferencia di prensa pa adresa e malcontento di un grupo di taxista riba dos decreto ministerial cu a wordo anuncia siman pasa. Decision cu segun e mandatario tabata necesario pa mehora e sistema coruptivo cu tin actualmente den e proceso di permiso di taxi.
E prome decision den e cambio di maneho tabata cu ta stop traspaso di permiso di taxi, asina habri e sistema y crea oportunidad igual pa tur cu ta desea di bin na remarke. E di dos cambio den maneho ta cu lo aumenta e capacidad permisibel di asiento den vehiculo di taxi, di 5 pa 7 asiento.
E decisionnan a wordo tuma a base di diferente conseho di expertonan y basa riba preocupacionan treci door di taxistanan mes. Un di e puntonan tabata cu mester tin mas control den reparticion di permiso, y tambe e cantidad di asiento, mirando e tipo di turista cu nos ta ricibi. Un otro punto tabata e riesgo di integridad cu un sistema cera, caminda permisonan ta keda den famia of ta wordo bendi ilegalmente.
Minister Arends a papia di documentonan di traspaso cu tin riba su mesa. Aplicacionnan cu a wordo intercepta cu no ta integro. Documentonan cu a subraya e sistema coruptivo. Motibo pakico decision mester a cai pa stop traspaso di permiso. “No tin motibo pa keda cu un sistema coruptivo mientras ta traha pa drecha e otro problemanan. Nos no tey permiti e “tiki corupcion” sigui tuma luga,” Minister Arends a declara,
Ora un grupo di taxista a demostra nan malcontento, Minister Arends a invita nan pa reuni cual a tuma luga dia 6 di augustus. Den dialogo cu representantenan di taxista, nan a presente e siguiente puntonan: - nan kier mantene e "derecho" pa traspasa permiso pa nan yuinan / of hende di confiansa, Minister a bisa cu e permiso no ta nan propiedad y
tampoco mester wordo trata mane un herencia paso e no ta.
- Tambe nan a propone pa keda cu e permiso te ora nan fayece y uza hulpchauffeur pa sigui paganan cual lo sirbi pa nan paga nan belasting y pensioen. Minister a bisanan cu esaki tampoco no ta husto.
- Nan a menciona e calidad malo di diesel. E preocupacion aki lo wordo treci na atencion di e minister relevante.
- Otro preocupacion ta cu segun e taxistanan, e maximo di 7 pasahero lo resulta den practica ilegal. Minister Arends a bisa cu e no por generalisa tur taxista y cu nan lo haci e practica ilegal.
- E ultimo tabata e falta di control cual e Minister a duna di conoce cu e ta di acuerdo cu ne. Pa cual motibo e la tuma decisionnan pa asegura cu di berdad por tin mas control, cuminsando den e proceso di permiso.
Minister a conclui bisando cu e reunion a termina cu niun argumento valido pa revoka e dos decreto ministerial, pero si ta hopi necesario pa sigui dialoga pa asina mehora e sector. Awo cu a pone e sistema coruptivo pa pasado, Minister Arends a asegura ta dispuesto pa sigui dialoga. Ta urgi e taxistanan pa organisa nan mes. Asina nos por bini na mesa pa aborda otro preocupacionnan manera pensioen, seguro di accident, miho areglo cu belasting, mas control y tarifa. E siguiente reunion cu taxistanan ta plania pa dia 16 di augustus 2024.
Por ultimo Minister a declara cu e comportacion di e taxistanan cu a welga ta desproporcional y ta perhudica economia di pais Aruba y tur esnan cu ta labora den sector di turismo. “Aruba no por tolera monopolio den un grupo so; esaki nota husto. Gobierno di Aruba ta comprometi pa kibra e monopolio den permiso di taxi y asegura oportunidad igual pa tur. Mi ta contento cu pueblo tambe ta compronde esaki y ta para pa lo corecto”, Minister a termina.
E dos decreto ministerial ta disponibel riba www.publico.aw den e tab di maneho.
A ELABORA RIBA DIFERENTE PROYECTO
DEPORTIVO MANEHA PA IBISA CU DIRECTOR SR.
ISNARDO “JUNI” FARO
Preparando pa Weganan Escolar Aruba y Weganan Interinsular 2025
Recientemente, Minister di Enseñansa y Deporte Endy Croes a reuni Sr. Isnardo “Juni” Faro, kende desde 1 di juni 2024 ta director nobo di Instituto Biba Saludabel y Activo (IBiSA). Juni a pasa su proceso di solicitud y a wordo scogi como director nobo na IBiSA. Sr. Faro ta bin di e mundo di deporte y a representa Aruba den dos (2) ocasion den Weganan Olimpico den e deporte di weightlifting.
Esaki tabata e prome reunion unda e mandatario di Enseñansa y Deporte a reuni cu Sr. Faro como director di IBiSA. Durante e reunion a repasa e lista di proyecto pa e aña escolar nobo cu ta iniciando. A ahusta algun proyecto di e draaiboek di IBiSA y dialoga tocante e proyectonan cu ta maneha bou di
IBiSA y Ministerio di Deporte entre otro, Weganan Escolar Aruba (WE Aruba) y Weganan Interinsular (WI). Minister Endy Croes a haci peticion pa e cartanan cu invitacion pa scol wordo manda trempan. Pa den e luna di september di e aña aki tin un direccion concreto pa tur schoolbestuur haya nan invitacion cu e fecha di e actividadnan cu lo tuma luga otro aña.
Eliminacion di WE Aruba y Weganan Interinsular ta inicia e aña escolar aki, pero e scolnan cu clasifica lo competi den e luna di maart y april di otro aña. Den e occasion aki, Sr. Faro a comparti su plannan pa IBiSA. Finalmente, Minister Endy Croes ta desea Juni Faro tur clase di exito cu su posicion nobo como director di IBiSA.
Minister Endy Croes: A COMBERSA CU ALGUN STUDIANTE PROME CU NAN A SALI RUMBO PA HULANDA
Dialuna atardi, a combersa cu algun studiante prome cu a nan a sali cu e vuelo KL 765 di KLM pa Madre Patria Hulanda pa continua cu nan estudio avansa.
Lindsey Zimmerman a caba di termina su estudio na Universidad di Aruba y e ta continua cu su estudio avansa na Haagse Hoogeschool na Den Haag, unda cu e ta bay studia International & European Law. Lindsey a cuminsa prepara for di tempran, a busca tur luga pa haci compras na Hulanda, a habri un cuenta di banco, a regla su DUO y Arubalening. Lindsey su conseho na e hobennan di Aruba ta cu “sky is the limit”, nunca “no give up” riba bo deseonan y bay p’e. Si bo kier e, bo por logr’e. Na final tur cos ta den bo man. Alabes, a manda un saludo pa su mayornan, ruman, wela, tanta, omo, amiganan y grupo di baile.
Jaroël Ignacio despues di a finalisa Colegio E.P.I. ta continua cu e estudio International Communication Management na Fontys Hogescholen Eindhoven. Jaroël a expresa cu su famia y amistad a keda basta tristo, pero e mes ta trankil y positivo. Ta prome bes cu Jaroël ta bayendo Hulanda, pero e tin famia eynan pa sosten’e, yud’e y gui’e cu loke e tin mester. Su conseho na e studiantenan ta pa semper tin bo meta den mente, no laga nada distrai bo! Bo mester tin e balansa di studia y disfruta. No lubida bo meta y corda riba bo famia.
Mary Kristine Tumalad a gradua dos aña pasa na Colegio Arubano y ta bay studia Communication & Multi Media Design na NHL Stenden Hogeschool na Leeuwarden. Esaki ta pa prome bes cu Mary Kristine ta bayendo Hulanda. E tabata hopi luna di preparacion. Mary Kristine a cuminsa desde december di aña pasa pa crea su cuenta di Arubalening pa e portal y habri su cuenta di banco. Alabes, ta manda saludo pa famia y ta bisa nan cu e ta stima nan hopi. Su mensahe pa hubentud di Aruba ta pa no preocupa, haci bo best y cu nunca ta laat. Bo semper por purba di nobo y semper ta na tempo.
Pa finalisa, e mandatario di Enseñansa ta desea nan hopi exito cu nan estudio na Hulanda.
MINISTER ENDY CROES TA FELICITA SR. RICARDO COOPER CU UN EXITOSO CLINICA
DI
BASKETBALL
Diadomingo ultimo, na Village Basketball Court na San Nicolas a tuma luga clausura di Ricardo Cooper Basketball Clinic organisa pa Sr. Ricardo (Tico) Cooper. Sr. Cooper a nace y crece den Village y ta un ex-basketbolista internacional Arubano cu a hunga basketball profesional na Merca, Hulanda y Belgica. Den luna di maart ultimo, a inaugura e cancha di basketball despues di un renobacion total y a wordo dedica na dos legendario den e disciplina di basekball, esta Sr. Malary Anthony “Pete” Coco (den feliz memoria) y Sr. Ricardo Cooper.
Como muestra di aprecio Sr. Cooper a bin Aruba for di Belgica riba su propio gasto y a organisa e clinica di basketball pa e hobennan di San Nicolas y bisindario. E clinica tabata pa mucha y hoben entre 6 y 18 aña di edad y a tuma luga riba e dianan 26, 27, 28 di juli y 2, 3 y 4 di augustus. Diadomingo mainta, Minister Endy Croes a bishita e clinica y a haci entrega di e certificadonan di participacion na e hobennan cu a atende e seis (6) dia di clinica aki.
Por ultimo, e mandatario di Deporte ta gradici Sr. Ricardo Cooper pa comparti su tempo y experticio cu nos hobennan. Palabra di danki na Ministerio di Enseñansa y Deporte. Alabes, ta gradici Sra. Terry Gumbs y team pa organisa e bunita proyecto aki den vakantie pa e hobennan di Village y bisindario. “Deporte ta den desaroyo,” Minister Endy Croes a finalisa.
