Pa motibo di un “politieke vertrouwensbreuk”
GABINETE WEVER-CROES II TA ENTREGA RETIRO
Dialuna 9 di september Prome Minister Evelyn Wever-Croes a entrega retiro di Gabinete Wever-Croes II. Di awor en adelante Aruba lo tin un Gobierno demisionario y esaki por atende solamente cu asuntonan coriente te ora un Gobierno nobo wordo forma.
Prome Minister ta indica cu e decision aki a wordo tuma a base di e echo cu e partner den coalicion a busca alianza cu oposicion y asina a kibra e acuerdo entre MEP y RAIZ, y sin acuerdo no por tin un Gobierno.
Stabilidad politico ta algo hopi importante pa pais Aruba y
no por wordo determina pa pensamento personal di un solo persona. E acuerdo di gobernacion ta hopi fundamental y akinan ta papia di un “politieke vertrouwensbreuk”.
A base di esaki Conseho di Minister a apodera Prome Minister pa entrega e retiro di Gabinete Wever-Croes II, y e decision pa disolve Parlamento na Gobernador di Aruba, S.E. Alfonso Boekhoudt.
E fecha pa eleccion lo lo ta dia 6 di december 2024 y entrega di lista lo ta dia 18 di october.
PA PROME BIAHA DEN HISTORIA LO OFRECE UN ESTUDIO DI ARTE Y DISEÑO RIBA NIVEL DI MBO
4 NA ARUBA
Ta traha den colaboracion cu VISTA college, cual ta un scol di MBO na Hulanda
Diahuebs ultimo, den Conferencia di Prensa di Gobierno di Aruba, Minister di Enseñansa y Deporte Endy Croes, Sr. Carlos Martinus y Sra. Luocette Rapenhage a lansa un bunita proyecto di Office Openbare Avondleergangen Aruba (OAA) y Design Academy Aruba. Pa prome biaha den historia di Aruba, lo ofrece un estudio di Arte y Diseño (Art & Design), riba nivel di MBO 4. Na final di e estudio, e graduadonan lo ricibi un diploma acredita.
E estudio ta dividi den dos (2) parti, esta e parti teoretico cu lo tuma luga na OAA y e parti practico cu lo tuma luga
na Design Academy Aruba. Pa loke ta trata e parti teoretico, dos (2) bes pa siman e alumnonan lo haya e materianan generico entre otro, Hulandes, Ingles, Spaño y Papiamento y tres (3) bes pa siman lo haya e parti practico entre otro, ‘Grafische vormgeving’, ‘Duurzaam ontwerpen’ y ‘Cultuur & design’. E estudio aki lo inicia october binidero y tin espacio pa 15 alumno. Pa inscribi pa estudio aki mester tin un diploma di mavo, mbo 2 of mas halto y/of un prueba cu a bay havo 4. Ademas di esaki, pa selecta e alumnonan, lo evalua e talento di e alumnonan a traves di un presentacion y portfolio dia 7 y/ of 14 di september 2024.
Sr. Carlos di OAA ta pidi pa tur esnan interesa di drenta e estudio aki pa bin prepara durante e evaluacion. Por aplica riba e website www.oaa.aw. Minister Endy Croes ta invita tur hoben interesa pa inscribi na tempo. Finalmente, e mandatario di Enseñansa ta gradici Carlos y Luocette pa e bunita proyecto aki. Alabes, ta gradici Gabinete Wever Croes II pa sostene e gran proyecto aki.
MINISTER ENDY CROES TA FELICITA NOS
ADULTONAN MAYOR CU TA PARTICIPANDO DEN COPA JANI BROKKE MEMORIAL 2024
Diaranson ultimo, Minister di Enseñansa y Deporte Endy Croes a acudi na Eagle Bowling Alley, en conexion cu Copa Jani Brokke Memorial 2024. Copa Jani Brokke Memorial 2024, organisa pa Fundacion Movemiento ta Bida ta un actividad cu ta haci anualmente pa nos adultonan mayor (60 plussers).
Den e occasion aki, e mandatario di Enseñansa y Deporte a duna un discurso y tira e prome bala di bowling pa duna inicio na e competencia. Copa Jani Brokke Memorial 2024 a inicia 14 di augustus ultimo y ta culmina dia 14 di september binidero. Mas di 350 adulto mayor ta participa den nuebe (9) diferente deporte entre otro, volleyball, softball, domino, bowling, billiard, landamento, canamento, ‘wandel’ futbol y tennis.
Minister Endy Croes ta felicita presidente Sr. Rudy Leysner y ful e team di Fundacion Movemiento ta Bida cu ta organisa e actividadnan aki pa nos adultonan mayor. Alabes, ta felicita nos adultonan mayor cu ta participa den e tremendo competencianan deportivo di Copa Jani Brokke Memorial 2024.
Minister Endy Croes: KUDAWECHA BALLPARK A KEDA OFICIALMENTE
INAUGURA, UN HOYA DI PROYECTO
Nos a priminti y nos a cumpli! Pabien Noord!
Diabierna anochi, a tuma luga apertura oficial di Kudawecha Ballpark na Noord. Manera ta conoci, e veld a wordo completamente renoba. Minister Dangui Oduber, Presidente di Parlamento mr. Edgard Vrolijk, director di Lotto pa Deporte Sr. Junny Figaroa, Sra. Evelinda de Cuba, directiva nobo di Kudawecha, invitado special y prensa tabata presente na e ceremonia inaugural. E anochi a inicia cu himno di Aruba interpreta pa Sr. Juan David sigui pa discurso di Minister Dangui Oduber y Minister Endy Croes.
Durante e ceremonia, Kudawecha a presenta nan directiva nobo. Sr. Mitchell Castellanos, kende ta miembro di e directiva nobo a hiba palabra na e ocasion aki. Minister Endy Croes a gradici Gabinete Wever - Croes II y Lotto pa Deporte pa pone e fondonan disponibel pa realisa e proyecto aki. Alabes, e mandatario di Deporte a gradici Minister Dangui Oduber pa inicia cu e proyecto. Tambe a gradici Ministerio di Deporte, e contratistanan, e directiva cu a traha incansabel y tur cu a aporta cu awe e veld tin un turf, luz, “backstop” y “dugouts” nobo, pues un veld totalmente renoba. “Palabra di gratitud na tur cu a aporta y palabra di pabien na e bario di Kudawecha y Noord. Mi ta hopi contento di a forma parti di e proyecto di renobacion aki. Palabra di exito y forsa na e directiva nobo di Kudawecha. Nos deportistanan di baseball y softball tin un hoya di parke, boso haci bon uzo di dje”, Minister Endy Croes a subraya.
Despues di e ceremonia di apertura, a tuma luga lansamento di e prome bala pa Kudawecha Ballpark keda oficialmente inaugura. Minister Dangui Oduber a fungi como pitcher, catcher tabata Sr. Demian Kelly, Minister Endy Croes tabata na bate y e umpire tabata Sr. Kenneth Wever. Por ultimo, Minister Endy Croes a gradici Sr. Kenneth Wever, Sr. Damian Kelly y tur e palancanan cu a maneha e veld pa hopi aña. Esaki ta un soño di Sr. Coby de Cuba (den feliz memoria) cu a wordo cumpli. Pabien na Sra. Evelinda de Cuba y famia, pabien Kudawecha y bisindario y na e pueblo di Noord, pabien deporte y nos deportistanan. “Nos a priminti y nos a cumpli”, Minister Endy Croes a finalisa. Aruba a Gana. Deporte a Gana!
Minister Endy Croes: E TRAINING DI ALFABETISACION NA
PAPIAMENTO PA E MAESTRONAN DI KLAS 2
DI SCOL BASICO A INICIA
Recientemente, Minister Endy Croes a acudi na e training cu a inicia pa e maestronan di klas 2 di scol basico. Manera ta conoci, aña escolar 2024 – 2025 e alumnonan di klas 1 di scol basico a cuminsa siña lesa y skirbi na Papiamento y ta haya Hulandes cu un acercamento nobo cu ta pas mas den e contexto di nos muchanan. En conexion cu Alfabetisacion di Papiamento tin diferente sesion pa desaroya material, unda cu ta trece e maestronan di klas 2 hunto.
IPA ta dirigi e sesionnan aki, Departamento di Enseñansa (DEA) cu su profesionalnan ta sostene esaki. E facilitadonan di diferente directiva di scol entre otro, DPS y SKOA, lo guia e maestronan durante e tayernan, unda cu nan lo desaroya e materialnan, prepara e sistema y profesionalisa e maestronan riba e tema aki pa augustus 2025. Recientemente, e mandatario di Enseñansa y Deporte a bishita diferente scol, en conexion cu Introduccion di Papiamento y a indica cu el a keda impresiona cu e interaccion entre e maestro y e alumnonan. Siña den idioma materno Papiamento lo beneficia e mucha den su proceso di siñamento, desaroyo di inteligencia emocional y habilidadnan critico di pensamento.
Ademas di esaki, nan por conecta miho cu nan raisnan cultural. Fuera di esaki, e muchanan ta sinti mas confia y sigur den nan proceso di siñamento. “Nos ta desea e maestronan hopi exito, nos ta kere den boso y nos sa cu for di e grupo aki lo sali un producto magistral”, Minister Endy Croes a finalisa.
