Dia di Betico

Pagina 1

Diaranson 24 januari, 2022

Movimiento Electoral di Pueblo MEP

Facebook MEPofficial

Pagina 2

Betico, e Lider stima pa su pueblo SU AMOR PA SU PUEBLO TA HACI CU AWE SU PUEBLO TA STIM’E Y RECORD’E COMO UN GRAN ARUBANO “Mi no ta un tata di un famia, cu ta consisti di homber y muhe y yiunan. Mi ta un tata particular, tata di un famia grandi, tata di un pueblo, nos pueblo di Aruba.”

25 di januari ta un fecha special pa Aruba.

Un dia nacional na unda nos comunidad por goza di un dia liber. Un dia na unda nos ta recorda e fecha natalicio di nos Libertador Gilberto Françios Betico Croes kende, si ta na bida, lo a haci 86 aña.

E amor incondicional di Betico Croes pa un pueblo, su boluntad pa haci un sacrificio personal pa benificia su pueblo, su accionnan incansable pa salba su pueblo, su bondad legitimamente compasivo pa su pueblo, su corage pa enfrenta forsanan grandi pa su pueblo, su noblesa pa sirbi su pueblo, ta haci cu awe su pueblo ta recorde como un heroe, como un tata, como un libertador.

Gilberto François Croes, miho conoci como Betico, a nace dia 25 di januari di e aña 1938 den un famia humilde na Santa Cruz. Su tata tawata Fransisco miho conoci como Panchico, y su mama tawata Mimita Croes-Lopez. Hunto nan tawata tin 11 yiu.

For di mucha, Betico tawata hopi stima pa esnan rond di dje. E tawata gusta yuda otro. Betico tawata yuda Pastoor tambe como misdinaar. Algo sigur cu ta di remarca ta cu for di hoben caba, tawata bisto cu Betico un dia lo bira un lider.

Betico a asisti scol basico St.Jozef

School na Santa Cruz. Awendia e scol aki yama Colegio San Hose. Despues Betico a bay St. Dominicus College, na unda el a termina su H.B.S. Na aña 1954 pa 1958 Betico a bay Kweekschool na Hulanda na unda el a studia pa maestro di scol. Na Hulanda Betico no a perde oportunidadnan pa demostra su calidad di bira un lider y tawata activo den diferente organisacionnan social Antiyano y tambe tawata organisa reunionnan pa studiantenan Arubiano y Antiyano na Hulanda.

Despues di su estudio, Betico a regresa Aruba y a traha na St.Jozef School como maestro, e mesun scol unda cu el a bishita como alumno. Y despues, Betico a bay traha na MAVO St.Antonius College na Santa Cruz, cu awo ta Colegio San Antonio.

Na Aña 1962, Betico, cu 24 aña, a drenta enlace matrimonial cu señora Glenda Croes di cua matrimonio a sali 4 yiu, Guisette, Glenbert, Junior y Glendeline.

Yiunan, cu na un tempran edad, a biba sacrificio di nan tata pa su pueblo. Betico a sacrifica su famia, su yiunan pa e por traha pa e pueblo di Aruba.

Palabranan inolvidabel cu Betico Croes a uza, di Omar Torijos di Panama, ta duna honor na e sacrificio aki: “E felicidad cu mi ta desea pa mi propio yiunan, ta e felicidad cu mi ta desea pa henter e pueblo di Aruba”.

Na 1967, Betico a drenta e arena politico riba lista di AVP. Como politico hoben, Betico a bin cu cambionan den politica.

E tawata posee un deseo grandi pa uni

e pueblo y pa Aruba haya su autonomia.

Betico a fungi como diputado pa algun aña y a bandona e partido AVP despues di a wordo inspira pa funda su propio partido.

Dia 9 di februari1971, Betico a funda Movimiento Electoral di Pueblo MEP y su popularidad den pueblo a crece mas y su lucha a bira mas ferviente pa lucha pa realisa e causa di su pueblo. Betico a bira e lider mas stima di Aruba.

PAKICO SU PUEBLO TA STIM’E? Betico tawata amigo di pueblo, hende di tur hende. Su lucha pa logra libertad di nos pueblo tawata incansabel. Betico Croes tawata un luchador pa su pueblo.

Y ta su noblesa pa realisa libertad di nos pueblo, awe ta haci cu Aruba ta stima Betico Croes.

“Ban celebra e dia aki na grandi. Disfruta di nos programa dedica na e pueblo pa hunto nos recorda e lucha di Betico.”

FELIZ DIA DI BETICO

Lider di MEP Evelyn Wever-CroeS

Betico, e Lider stima pa su pueblo PASOBRA SU DETERMINACION PA LUCHA PA LIBERTAD DI SU PUEBLO, A CONBERTI’E DEN UN LIDER, STIMA PA TUR Gilberto François Croes, miho conoci como Betico Croes, di mucha caba a demostra cualidadnan di bira un lider. Semper yudando esnan rond di dje y duna guia na esnan cu tawata tin mester di dje. Cualidad cu a sigui manifesta den e dianan di su hubentud y a brota como adulto. Betico tawata carismatico y tawata influencia y inspira tur esnan su rond. Hopi hende a expresa cu Betico Croes a nace un lider. Pero e realidad ta, cu ta e determinacion cu Betico tawata tin pa lucha pa libertad di su pueblo, a conberti’e den e gran lider cu el a bira, stima pa tur.

INICIO DI E LUCHA PA STATUS APARTE Despues cu Lider di AVP a fayece, lidernan di bario a manifesta e deseo pa Betico bira e proximo lider. Lidernan di bario a proclama Betico lider di AVP, sinembargo despues cu famia Eman a nenga pasobra Betico no tawata un Eman, esaki no a keda realisa. Echo cu a pone Betico bandona e fila di AVP hibando un gran cantidad di lider di bario y siguidornan cu n’e. Y na februari 9, 1971, Betico a funda su propio Partido.

Na augustus 1972 Betico Croes a viaha pa Suriname formando parti di e Comision di Reino. Na e ocasion aki Betico a trata di convence Hulanda cu Aruba no ta desea di forma parti di un federacion Antiyano, esta un federacion basa riba ‘one man, one vote’. Sinembargo durante e conferencia aki Betico Croes no a haya apoyo di e otro partidonan politico di Aruba. Nan a declara cu Betico Croes no por papia na nomber di e pueblo Arubano ya cu e ta representa unicamente 7 asiento, esta un minoria den Parlamento di Aruba. No a keda Betico Croes nada otro cu bandona e reunion declarando cu “mi ta bay bek cerca mi pueblo, pero lo mi bolbe”. Despues di yegada di Betico na Aruba, el a cuminsa cu accionnan extra parlamentario cu e unico meta pa haya mas oido pa e causa di Aruba cerca Hulanda.

Dia 18 di maart 1973 un manifestacion masal a ser organisa den Wilhelminastadion pa demostra dilanti di e parlamentarionan di Hulanda y Antiyas cu Aruba ta rechasa e federacion Antiyano y ta decidido den su lucha pa logra su libertad, esta su Status Aparte.

Dia 18 di maart 1975 MEP a organisa un grandioso Marcha di Libertad cu flambeu den cayanan di Oranjestad. Alavez den e mesun aña ey un mocion di Eilandsraad a wordo acepta cu a haci posibel pa entama misionnan pa exterior en busca di apoyo pa e lucha di e pueblo Arubano. E misionnan aki tabata pa entre otro Colombia, Venezuela, Costa Rica, Panama, Hulanda, Inglatera, Merca, Nacionnan Uni y Organisacion di Estadonan Americano (O.A.S.). Betico su deseo y meta tawata pa Aruba bira autonomo y a lucha cu determinacion pa Aruba haya mas reconocimento.

PAKICO SU PUEBLO TA STIM’E? Betico a sa di uni e pueblo Arubiano cu no a exclui niun hende pa cua motibo tambe, el a bira e lider mas stima den su tempo. Un lider cu a haci di Aruba un gran famia. Un lider cu determinacion incansabel pa realisa su meta pa duna Aruba su libertad, su Status Aparte.

Ban Celebra Dia di Betico!

Lider di MEP Evelyn Wever-CroeS

Pagina 3

Pagina 4

Betico, e Lider stima pa su pueblo PASOBRA E TAWATA UN LUCHADOR PA SU PUEBLO Y TAWATA DISPUESTO PA SUFRI PA SU PUEBLO Un homber di curashi cu a haci tur lo posibel pa Aruba haya su Status Aparte.

“E echo cu mi a wordo golpia, e echo cu mi a wordo benta den prison, e echo cu mi a wordo tira, ta pa motibo cu mi a hiba e liderazgo di e partido cu a hiba e lucha di nos pueblo den fase di realisacion”.

Esakinan tawata palabranan cu Betico Croes a expresa na momento crucial di su carera como politico. Y awe, su pueblo pa cua el a lucha, ta celebra su fecha natal, kende, si ta na bida, lo a haci 86 aña.

ATENTADO RIBA BETICO CROES Tradicionalmente partido MEP ta tene su parada di auto riba e diadomingo prome cu eleccion y esaki tambe tabata e caso dia 24 di april 1983. E parada cu manera custumber a ser acompaña pa e famoso ‘Barco di Libertad’ a pasa bishita tur bario di Aruba y caminda e hendenan tabata para canto di caminda cu bandera saludando e fila. Sinembargo na final di e parada, Betico Croes a ser tira y herida casi fatalmente pa un bala di un agente policial na veld di Winston. Esnan cu a acompaña Betico Croes den e jeep a lant’e for di suela ya cu e tabata sin conocemento y a hib’e hospital. E pueblo tabata conmovi pa loke a sosode cu su lider. Un tension grandi tabata reina y e situacion tabata explosivo.

Tur actividad politico a ser para. Un alivio grandi a pasa den pueblo ora cu Betico a papia for di hospital na television, pidiendo su pueblo trankilidad y pa bay vota su diabierna siguiente.

Lo por tabata coincidencia of no, pero e diasabra prome cu e parada di MEP, un grupo grandi di lidernan di bario y simpatisadornan a reuni na Rooi Lamoenchi y Betico Croes a hiba un discurso na e ocasion ey. Durante su discurso el a expresa e palabranan historico: ‘Si mi cay na caminda, gara e bandera y sigui cu e lucha’.

Dia 29 di april 1983, esta riba dia di eleccion, Betico Croes a wordo traslada urgentemente pa Jackson Memorial Hospital na Miami pa busca su salud. Un pueblo yorando su lider a vota den eleccion pa duna MEP un mandato absoluto di 13 asiento y cu Betico como votegetter cu 10.506 voto, cual te cu awe ta un record den historia di Aruba.

Na Miami poco poco Betico Croes a recupera di e herida di bala y dia 28 di augustus 1983 el a bolbe su isla natal, sano y salvo pa continua cu su lucha pa Aruba su libertad.

Un multitud grandi a ricibi Betico na aeropuerto y a duna Betico un bonbini festivo demostrando asina e stimacion cu pueblo tawata tin pa e gran luchador aki. Den su discurso e dia ey, Betico a bisa: “E bala di odio di e agente policial cu a pasa door di mi curpa, cerca di mi curason, a cambia den un bala di oro; e tawata un ‘deadshot’ segun e docternan na Miami. Aunke mi curpa ta cubri di cicatris y mi intestino ta pafo di mi curpa, mi kier expresa publicamente cu Dios Tata Todopoderoso a cuida mi y a manda mi bek mundo cu e bala di oro pa salba nos pueblo; pa nos por haci uzo di e derecho sagrado di autodeterminacion y pa asina nos por bira un pais liber. Libertad di un pueblo no ta un privilegio ni un regalo sino un derecho sagrado. Mientras mi tin campana, mientras mi tin rosea, e lo no tin sosiego te ora e mira Aruba bira liber. Un Aruba caminda ta reina harmonia, husticia pa cada uno y caminda ta reina paz”.

PAKICO SU PUEBLO TA STIM’E? Gilberto Françios Betico Croes tawata un luchador pa su pueblo kende tawata dispuesto pa sufri pa su pueblo. Un homber di curashi cu a haci tur lo posibel pa Aruba haya su Status Aparte.

LIDER DI MEP Evelyn Wever-Croes ta invita comunidad di Aruba pa asisti na Manifestacion Cultural diaranson 24 di januari, 8or pa 10.30 anochi na Plaza Libertador GF Betico Croes y pa Ceremonia Protocolar diahuebs 25 di januari, 9or pa 10.30 di mainta na Plaza Libertador GF Betico Croes.

Tambe lo tin diferente actividadnan den barionan di Aruba. Pabien Aruba cu Dia di Betico. “Ban celebra e dia aki na grandi.

Disfruta di nos programa dedica na e pueblo pa hunto nos recorda e lucha di Betico.”

Pagina 6

BETICO CROES A MIRA UN ARUBA LIBER Y PARA RIBA SU PIANAN Un hoben simpatico, di un spirito bibo y cu un amor grandi pa su isla, cu semper tabata meymey di su hendenan. E por ta famia, den deporte, na misa, tocando musica y naturalmente den politica. Betico, manera e hoben aki tabata ser yama, semper a stima su hendenan y tabata kier cu tur persona tin e oportunidad igual di progresa den bida.

Progreso bo por logra solamente ora cu bo ta liber. Ora cu bo por tuma bo mesun decisionnan y tambe crea oportunidadnan di desaroyo pa bo mes y pa otro. Sinembargo, den e pais cu e tempo ey Betico tabata biba no tabata di e facil ey pa su pueblo y su isla progresa. Aruba tabata bou di e yugo di Antias Hulandes, un constelacion di seis isla caribense cu ta forma parti di e Reino Hulandes. Pero ta e isla mas grandi tabata esun cu semper tabata haya mas previlegio y hasta casi por a dicidi pa e islanan mas chikito.

Den un situacion di desigualdad asina aki, Betico no tabata kier pa su pueblo biba. Pesey, e tabata tin e vision pa mira su isla liber y autonomo, di por ta para riba su pianan y tuma su propio decisionnan. E vision aki no tabata simplemente un soño of un deseo, e tabata un lucha cu un lider cu curashi mester a guia y cu e sosten di su pueblo cu tambe tabata comparti e deseo di ta liber y autonomo.

E lucha aki a cuminsa na november di aña 1971 na momento cu Betico a opone di e proposicion di forma un Federacion Antiano segun e sistema proporcional di voto, esta “one man, one vote”. E lucha sagrado aki pa Aruba pa bira liber a bira realidad riba 1 di januari 1986.

E BETICO DEN NOS E legado cu Betico a laga pa nos, ta cu nos tin cu stima nos hendenan, stima nos pueblo duna balor na nos simbolonan di identidad y lucha pa e libertad di bo pais. Manera e dicho di Betico ta bisa: “Ki bal un homber sin derecho, ki bal un homber sin bandera, ki bal tin curason den pecho, si bo no ta liber den bo tera!”. Ta pa medio di e libertad cu ta e Status Aparte cu Aruba a logra haya, Aruba por a desaroya su mes y progresa ta cu e dia di awe.

Nos deber ta pa salvaguardia nos libertad contra di tur energia aheno cu kier kita of atacha nos libertad.

Nos tur cu ta biba na Aruba, sea bo a nace riba e isla of un otro parti di mundo, Aruba ta nos cas y nos tin cu conserva y proteha nos dushi hogar Aruba. Nos por ta orguyoso di ta e ‘one happy island’, ta pasobra nos ta liber y nos ta comparti e felicidad aki cu mundo henter.

FELIZ DIA DI BETICO NA PUEBLO HENTER.

Parlamentario Ricky Hoek

Pagina 7

DIA DI BETICO: UN FECHA DI HOMENAHE PA E LIBERTADOR DI ARUBA Dia 25 di januari un biaha mas pueblo di Aruba lo subi caya pa celebra den grandi Dia di Betico. Gilberto François "Betico" Croes, a nace 25 di januari 1938 na Santa Cruz Aruba. E tabata e di 6 yiu di un famia di 12 yiu di Francisco Cornelio Croes y Maria Louisa Croes-Lopez. Su rumannan mas hoben Hendrik y Rudy Croes a drenta cu ne den politica. Mas despues su yiu homber Glenbert Croes, actual Minister di Labor, y su sobrina sra. mr. Evelyn Wever-Croes, Prome Minister actual di Aruba, tambe a sigui su pasonan.

E LUCHA Y LOGRONAN SAGRADO DI BETICO CROES E lucha pa nos ta independiente di Antiyas Hulandes tabata uno grandi y esaki a wordo logra pasobra Betico Croes tabata un homber determina y visionario. Betico a logra pa Aruba tin su propio Bandera como pais, su propio himno nacional, su propio moneda, su propio Parlamento, su propio constitucion, su propio Banco

Central y hopi mas. Apesar cu e lucha semper tabata intenso y tin biaha tabata mustra cu tabata imposibel pa gana e bataya, Betico a persevera y a logra cu awe nos tin nos Status Aparte den Reino Hulandes. Betico su amor pa e pueblo, su dedicacion na e causa ta sin comparacion.

Betico Croes mes no por a experencia e victoria aki, como cu e tabata envolvi den un accidente grave riba 31 di december 1985, algun ora prome cu e Status Aparte a drenta na vigor (1 januari 1986).

Despues di lunanan largo den coma y di lucha pa su bida, Betico Croes a fayece dia 26 di november 1986.

DIA DI BETICO: UN CELEBRACION NACIONAL PA ARUBA SU LIBERTADOR Dia di Betico, cu ta wordo celebra tur 25 di januari, ta yena cu celebracion cultural tur caminda rond di Aruba. Riba 25 di januari Aruba ta para keto di su trabao y ta recorda riba e fecha aki e importancia di e bida y logronan di nos heroe y libertador nacional. Sigur e palabranan di Betico, “Si mi cay na caminda, gara e bandera y sigui cu e lucha," ta resona mas cu nunca entre e politiconan di e prestigioso partido Movimiento Electoral di Pueblo cu e la bay laga atras. Dia di Betico ta honra e legado exepcional di Betico Croes. Tur aña por mira con e pueblo ta subi e cayanan di nos pais pa disfruta y honra Betico pa tur loke e la

haci pa nos.

Betico Croes a demostra a traves di su bida cu nada ta imposibel pa logra. Su esfuerso, dedicacion, determinacion, intensidad pa logra su metanan y su amor pa su pueblo ainda ta resona a traves di su discursonan di pasado, pero cu lo keda graba pa semper den e curason di un pueblo agradecido. Pabien Aruba!

PABIEN ARUBA!

Feliz Dia di Betico

Parlamentario Marco Berlies

Pagina 8

planta den e comunidad aki. E ideologia di: ta sincero den bo intencion, y no haci nada pa bo propio interes.

Betico a practica liderazgo ariba un nivel cu te cu awe ta di admira. Den su mes palabranan e a indica cu e ta un tata pa henter e pueblo di Aruba. Un tarea grandi y cu un peso enorme pa soporta.

E sinceridad cu e tawata transmiti, a logra capta e mente y curason di henter un pueblo pa para banda di dje den e lucha y causa mas grandi cu Aruba a conoce den su historia te cu awe, e Status Aparte.

Aruba a conoce diferente politico, di diferente partido. Pero ta parce cu Betico su mensahe no tawata mara na politica solamente, ni solamente un partido. Su mensahe a etala ariba un nivel mas halto, cu te cu awe Reino Hulandes, Caribe y Latino America ta bon na altura di e logro grandi di Betico.

Aruba por ta orguyoso di por a produci un cuidadano cu a sa di carga su Pais ariba su afan personal. Un lider cu den tur honestidad a splica den pleno campaña na su pueblo e seriedad y retonan su dilanti, apesar di core e risico di perde un eleccion. Un persona cu a pone tur atencion y esfuerso, pa por logra e bienestar pa su Patria. Caracteristicanan cu nos ta mira masha poco awendia den e era aki.

Den e dianan nos dilanti celebrando Dia di Betico, nos tin e speransa cu su corahe y balentia lo motiva y inspira nos tur y e generacion cu ta sigui despues di nos. Pa den e trabou di tur dia nos avansa y prevalece riba tur obstaculo cu por presenta nos dilanti.

BETICO UN HOMBER CU A TRANSCENDE TEMPO!

Nos tin e dificil tarea, pa mescos cu esnan cu despues di Betico cu a percura di practica e ideologia aki, pa continua y aplica e ideologia di respeta, lucha y sacrifica pa logra progreso na Aruba su bienestar.

E refran di nos Himno Aruba dushi tera, ta tipifica cada un di nos cu a bira cuidadano o a nace riba e suelanan di Aruba. E ta laga nos realisa cu tin tempo duro, tempo trankilo, pero cu si nos tin speransa y fe, nos ta logra. Si nos tin hendenan rond di nos cu tambe ta dispuesto pa sacrifica y duna un man, nos ta logra. Y no ta asina cu fisicamente nos no por kibra, esey sa pasa y ta pasa. Pero nos ta logra pa no kibra ora cu nos realisa cu nos forsa ta den union, respet pa otro y perseverancia.

Esakinan ta algun di e aspectonan cu te cu awe tin e memoria di Betico presente. Aspectonan cu a percura pa generacionnan keda rebiba su mensahenan y wordo inspira y inspira otronan atraves di nan. Apesar cu den persona e no ta mas presente cu nos, den pensamento y curason ainda e ta presente pa hopi.

Temponan ta cambia, pero principionan ta permanece. Si nos pone interes di otronan prome cu nos mes, nos tambe lo ta contribuyendo grandemente cu e adelanto pa nos Pais y transcende tempo manera Betico d.f.m. a haci’e.

Mi ta referi na Betico Croes, un estadista Arubano cu te cu awe ainda ta inspira generacionnan cu a nace o no a nace aki. Na scolnan bo por mira e impacto cu su decisionnan y pasonan tuma decadanan atras, tin awe ainda riba e studiantenan.

Mensahenan cu ta laga cada un reflexiona den era y tempo di awe. ‘Materialismo a avence idealismo’, ‘si mi cay na caminda gara e bandera y sigi cu e lucha’, ‘no tin victoria sin sacrificio’.

Palabranan bon scogi cu a transcende tempo cu ta aplicabel awe ainda.

Sin cu hobennan a conoce personalmente, hopi di nan ta transmiti un aprecio sin igual pa su persona y locual cu e a nifica pa Aruba. Awe ainda nan ta convivi e ideologia, cu e a

MI TA DESEA PUEBLO DI ARUBA UN FELIZ DIA DI BETICO !

Lider di Fraccion di MEP Hendrick Tevreden

Pagina 9

OFRENDA FLORAL NA ARUBA PA CU DIA DI BETICO Den Haag – Personal di Arubahuis a tene awe 24 di januari, na antesala di Dia di Betico, un ceremonia pa recorda e fecha natalicio di Sr. Gilberto Françoise “Betico” Croes, politico y estadista Arubiano.

Minister Plenipotenciario mr. Ady Thijsen y director di Arubahuis mr.

Joselin Croes a pone un flor na e busto di Betico Croes.

Despues di e ceremonia a canta nos himno nacional ‘Aruba Dushi Tera’.

PABIEN PUEBLO DI ARUBA CU CELEBRACION DI E GRAN ESTADISTA ARUBANO, BETICO CROES

Minister Plenipotenciario Ady Thijsen

Pagina 10

BETICO CROES SEMPER A CARGA CONFIANSA Y FE DEN NOS PUEBLO, DEN NOS CARACTER Y MENTALIDAD Durante di un di Betico su discurso e la bisa lo siguiente: “Semper ami tawata carga e confiansa y fe den e pueblo aki. Semper m’a carga e confiansa den e mentalidad y caracter di e pueblo aki y pesey nos por bisa cu pueblo di Aruba a salba su honor y dignidad realisando su libertad “

FELIZ DIA DI BETICO ARUBA! BAN RECORDA Y CELEBRA SU FECHA NATALICIO EN GRANDI.

E caracter y mentalidad aki ta loke ta bay yuda nos recupera y surpasa tur reto. Pesey mes nos mester enfatisa e echo cu nos mester sigui papia di su legado, di e lucha cu e la hiba. Di e motibo pakico nos ta yam’e nos Libertador y arkitecto di nos Status Aparte.

Ta unico manera cu nos lo sigura cu nos ta sigui aprecia loke nos tin y tur loke nos a logra desde cu nos a haya nos Status Aparte.

Pesey mes diahuebs awor, dia 25 di januari, laga nos rindi honor na su memoria. Bisti bo T-shirt, hisa bo bandera y sali celebra.

Pero tuma tempo tambe pa papia di dje, conta bo yiu y nietonan di su lucha. Pa nan sa cu aki na Aruba nos tabata biba bou otro circumstancianan prome cu 1986. Y cu desde 1 di januari 1986 Aruba a crece y florece. Y esaki sigur tabata danki na Betico!

Feliz Dia di Betico Aruba! Ban recorda y celebra su fecha natalicio en grandi y contagia nos mes cu e candela di lucha pa semper nos sigui hiba Aruba padilanti.

Parlamentario Shailiny Tromp-Lee

Pagina 11

isla su identidad cu ta su bandera y su himno. Esaki a duna cada ciudadano e sentimento nacionalista y cu cada bes cu e bandera tabata bula y nos scucha nos Himno “Aruba dushi tera” cada ciudadano por ta orguyoso di nos isla y cu pueblo completo tabata anhela pa nos isla por ser reconoci rond di mundo y por ta liber.

Cu e logro di Status Aparte 1 januari 1986 e meta a ser logra.

Unda cu awe pueblo completo por wak nos bandera ta bula rond di mundo, nos himno ta resona rond mundo, cu mundo completo conoce nos isla y sigur lo mas importante nos por tin e destino di nos isla den nos propio man.

Nos lider maximo lamentablemente no por a mira realisacion di su logronan y p’esey den hopi di su discursonan tabata manda e mensahe pa nos, nos yiu y nos futuro generacionnan: “Laga nos cuida nos Status Aparte manera un clompi diamante y laga nos yiunan y yiu di nos yiunan gara nos bandera, canta nos himno y conserva nos patria Aruba”.

Na momento cu cosnan ta bay dificil den e pais aki hamas nos no tin di perde speransa, pero nos tin di sigui lucha y no laga e lucha di nos Libertador Betico Croes tabata envano. Nos Libertador a laga pa nos un pais cu nos tin cu cuida y conserva y e unico manera cu nos por logra esaki ta den UNION. P’esey laga cada ciudadano cu ta biba riba e clompi diamante yama Aruba reflexiona cu nos no por sigui biba mas oprimi y e unico manera pa nos por logra libra nos mes di e opresion actual ta UNION. Pueblo tin di uni cu e unico causa pa mantene nos libertad y p’esey pa termina mi ta pidi pueblo pa no perde speransa hamas, pero “Gara e bandera di nos dushi isla Aruba y ban sigui cu e lucha pa conserva nos patria y nos libertad”.

BAN CELEBRA DIA DI BETICO DEN UNION.

NOS LIBERTADOR A LAGA PA NOS UN PAIS CU NOS TIN CU CUIDA Y CONSERVA Diahuebs awor 25 januari pueblo ta celebra cumpleaños di nos lider inmortal Betico Croes y alabes ta recorda su maximo esfuersonan pa porfin nos pueblo por a kibra e cadena cu tabata tin nos dushi isla Aruba mara. Cu su lucha incansabel na final a logra cu nos ta “baas in eigen huis”, cu e logro di nos Status Aparte.

Nos Libertador a logra locual hopi a purba, cu ta Uni e pueblo pa por a logra nos Status Aparte. Nos lider maximo tabata sa cu e tabata un tarea hopi dificil, pasobra e pueblo tabata hopi segregra y p’esey nos lider maximo a dicidi pa duna e

Presidente di Parlamento Edgard Vrolijk

Pagina 12

BETICO CROES TA E LIDER STIMA CU A SA DI UNI NOS PUEBLO NA BIENESTAR DI ARUBA Su amor pa Aruba a transcede tempo y ta e forza invisibel pa surpasa tur reto 25 di januari nos ta conmemora e fecha natalicio di Betico Croes, e lider stima di nos Pais cu a sa di uni nos Pueblo na bienestar di Aruba.

Na bida Betico lo a cumpli 86 aña, pero Dios a dicidi diferente y na edad di 48 aña Betico a bay sosega pa semper. Sinembargo Betico su esfuersonan, logronan y su amor incondicional pa Aruba ta asina grandi, cu awe 38 aña despues di su fayecimento, ainda Betico ta bibo den e memoria y curason di nos Pueblo.

Esaki ta demostra cu Betico Croes ta e lider stima pa su Pueblo.

Betico su amor pa Aruba te dia di awe ta inspira, pa e manera cu ela unifica e Pueblo di Aruba pa logra cosnan grandi pa nos Pais. Na cabes di un Pueblo uni, Betico a logra Aruba su Status Aparte cu a duna nos e herment pa desaroya como Pueblo y Pais, segun nos propio compas pa dicidi nos propio destino.

Na caminda pa logra nos Status Aparte, Betico a mustra nos riba e importancia pa defende nos diginidad y nos identidad, y pa obra semper cu amor pa nos prohimo y nos Pais. Ta e amor cu Betico a demostra den su obranan pa Aruba, ta locual a transcede e barera di tempo y awe ta e forza invisibel cu ta yuda e Pueblo di Aruba pa surpasa tur reto.

Nos ta eternamente gradici na tur locual Betico a significa pa Aruba. Betico ta e lider stima pa su Pueblo. Ban siña nos yuinan kende tabata Betico Croes. Ban splica nan di e legado cu ela laga pa nos, y mustra nan riba e forza cu union y amor ta trece pa e Pueblo di Aruba. Feliz Dia di Betico.

PASA UN FELIZ DIA DI BETICO, ARUBA. CELEBRA NA GRANDI E DIA DI NOS LIBERTADOR.

Minister Xiomara Maduro

Pagina 5