Score lento del mar di Stefano Dovier
21 MARSO Xe primavera, L'odor de erba fresca consa la marina, bonora un rusignolo al canta la mattina. Repari bianchi e sicchi de colpo i sè pitura, e in aqua un bogoleo de pesse che hà primura. Anche al cuor dei zuvini scuminsia a batte forte, al sol li basa in cavo e puo i fa la corte. Le bele pute riotole al bossolo le verse, e comò fresche riose al nio le coverse.
AL BORETO Ciacolando de ani indrio la miseria gera tanta e in tei stumighi cresseva una fame mundi granda. Per dai pase a quela fame le vecette le faseva al boreto coi moreli e la polenta.... co la gera. Stà pietansa che de senpre la faseva la regina perchè oltro no i podeva a catà in te la cusina. Elo al vigniva fatto co moreli de bisato un bel goto de aseo nero pevere, in tel piatto. Garghedun la anche contao che do freli analfabeti i là fato co sinise de cristian de sò parinti. Le sinise i le à sgambiae per al pevere dei siuri perchè ciaro al gera elo e nol deva dei savori. I lo veva mandao zò da le Americhe,lontan un sò frà chel gera 'ndao a sercà de ciapà al pan. Nà desgrassia i xe vignuo e brusao ià al fantulin e cusì le sò sinise le ha mandae in tun gamelin. I do poveri ignoranti, che a lese no i saveva, in do volte coi buriti magnao duto i se lo veva. Ecco questa xe la storia del boretto che per Gravo, resta al principe dei piatti, e anche me lo magnaravo.
AL FARO Co^ se riva intel stradon, che Aquilea porta a Gravo, tu lo vighi duto fiero là sul fondo,al vecio faro. Quante aneme ze 'ndae là de elo,co^ ze note, e la luna la spariva, de matina, drio le mote. Al pareva 'nà lunserna che de note la svoleva, perchè co^ tu geri in barca, tanti zoghi la faseva. Duti quanti i pescauri i se fida de quel faro, perchè i sà che drio de elo, de siguro ze al reparo. Quando invesse ze caligo, al se mete a fistià, per visà i pescauri che 'l canal al ze de quà. Quante storie se conteva su quel faro benedeto, garghedun pe' 'ndà a sintile, al bruseva anche al boreto. Anche queste quatro righe, le ze messe zò per elo, per no fà desmentegà, che per noltri...zè un zogelo.
AMIA Ze un fogher che'l stà scoldando un'ombria che par scufagia, ma 'nà vose stà pregando co' un'aria sicusagia. Ze la amia che la dise le so' lente litanie, e coi vogi che par rie, i se specia drento i mie. Siora fiera d'nà volta, tu splindivi de belessa, e anche se l'andeva storta, tu, tu divi gentilessa. Al to' cuor gera un zogelo che'l vampeva più del sol, 'ncora 'desso al ze belo coi travagi intun nanbuol. -Figio mio stame visin, che del mal me hè pauracomò quasi un fantulin la strenzevo...la gnò creatura. Amia mia perchè al tenpo no'l và indrio un pochetin, cusì quel to' patimento al và via col neverin. Me te vego là cuciagia, e pensando al tenpo 'ndao, tu son 'ncora una ruosa che nissun hà mai fruao.
AMOR Amor, 'na parola comò tante se no tà provao dolor, un lisiero amaro in boca e 'nà fitta infondo al cuor. Cu pol dì,...no è patìo, se al sò amor nol xe svanio. Cu pol dì,... pecao passiensa, se del cuor no pol fà sensa. Duti i omini sinsieri co ià perso al sovo amor i xe sempre soli e tristi e pregando i và al Signor: -Pare mio cussì potente me sà se che oltra zente la patisse più de me; ma te prego se tu pol fà tornà quel grando amor, no stà fai desmentegà al sò omo che'l xe quà, che'l se sente lassao indrio de quel sogno armai svanio. Tanti oltri comò elo, per le ciese i và pregando, oltri invesse sensa fede, per i bar i và bevando. Ma a la fine vinserà solo cu pasiensa avrà; perchè un novo grando amor al te scolderà al tò cuor.
ARTURO E GIOVANNI Xe 'nà festa che fasemo per dò splindidi graisani, forse i megio dò poeti che xe stao in questi ani. Co la misica che i feva i riveva a fà sognà dute stè generasion che stà sera le xe quà. Gera dò veri maestri 'n tè la musica i viveva, anche se Trombai ogni tanto de la satira al faseva. La faxeva cò giudissio sensa 'ndà a tocà i valuri, là faxeva pè impinì stò isolotto de culuri. 'Vesse Arturo i vigniva le canson comò preghiere le pareva fatte a posta per cantale in tè le ciese. I xe 'ndai via comò silise cò in palù giassa la brosa, i xe 'ndai via ma drento i vive, in stì zuvini ancora. Maravege in stà tera che la xe orfana ormai, le dò ultime lampae de un bransin che no xe più. I sarà andai lassù col violin e 'nà ghitara, per sonai anche a Gesù 'nà canson a ili cara.
BENZINA NO XE! Semo duti travagiai quando manca la benzina, perchè no più abituai a vogà in batelina. Se la macchina tu usi per andà a lavorà de siguro te vien i nervi a pensà de pedalà. Che travagi per stè femene dute bele e ben truccae co la jeep le deva 'ndà per no esse sputtanae. Comò fasso a portà gno figio 'n te la scuola elementar? co la bici me no rivo è la mini de indossà. Solo 'desso se pensemo che travagi veva i avi fin in cantier i pedaleva co la buora a zero gradi. Le sò femene le 'ndeva a lavà su la fontana e la sangola le svodeva che sia buora o tramontana. Oltri ani gera quii, quando al siopero "mancheva", lo faseva solo al cul....... co un santonego al passeva.
BIANCO XE GRADO Bianco all'alba al palù sà vestio lisiero caligo coverse al gno nio. Xe zà i primi fridi e la brosa pitura quei bianchi repari co massa primura. Al sol che a levante par che'l ciapa fogo vampisa de luse su duto al maroso. Comò de le scusse pusai xe i corcai su lame che par dei laghi giassai. Xe duto un mistero sto logo imbiancao comò maravegia me resto incantao. Xe fele de acqua e ninte se move per fin al campanil là ferme le ore. Xe proprio un bel quadro creao da un maestro siguro là fato in un giorno de estro.
BRAGOSSI DESMENTEGAI Dò bragossi pusai là sulla secca in pampagnola, gera barche de sabbion che le'ndeva fin a Pola. Desso le veghemo scarne le ordinade le vien fora e la chiglia ormai tabacco la se disfa con la buora. Marineri duti fieri su de ele i navigheva cò burasche e temporal al salmastro in bocca i veva. Quanti mari navigai quanti porti zà salpai quante storie che i hà drento quei fasuni carolai. Me le vardo in riva al molo e me par che le me ciama perchè forse le vol dime che son un'anema graisana.
BRUSA AL CASON Xe tinpi duri e mundi crui solo al fogher te dà la pase suffia al maistro refuli fridi e sul palù par duto tase. Drento al cason 'nà maravegia 'ntela caina xe al cugiaron, stiopussa al fogo e al stiarisse la sera e drento la nappa xe duto un splendor. Sbola peraria un mier de falische che par lunserne sora al cason, e le se pusa co' siera triste, proprio sul colmo de là costrusion. Vampa de colpo duta la mota comò mitraglia canta la cana, al sielo al stiarisse comò lampo de ton e la sinisa da color a la dosana. Pùo co' le lagreme al vampa de più, al se riflette al fogo intei vogi, ormai stissuni....restai.... i fuma mogi e la gnò casa in tel tapo, no hè più. 'Desso al maistro al porta via quela sinisa che gera un cason, i và a sigonda l'anima mia e duti i recordi passai in quel pagion.
AL DIAVOLO E L'ACQUA SANTA Questo narra 'nà lesenda che anche al diavolo al se veva trasformao in un brutto lovo per fà a Gravo 'nà sorpresa. Queste aneme spaurie le xe 'ndae dute a Barbana per pregai alla Madona -fà sparì stà bestia strana-! La Madona che se sà la xe bona comò al pan no là podeva fai del mal a una bestia comò al can. E cussì là mandao zò al bon Anzolo Michele che gargossa al fassi elo per salvà la nostra pele. Co la spada dritta in sielo al scuminsia la battaglia e la bestia i feva contro coi artigli a scimitarra. Gera culpi de vigliacco quel che l' lovo a elo i deva e col giglio e cò la spada gagiardo al sè defendeva. Co Dio à vogiuo al xe rivao a serali la dentiera e per punission là messo a tignì l'acquasantiera. La Madonalà sà dito: -che fasemo cò Michele? al xe stao co stì graisani un bon Anzolo fedele. Co là calma e gentilessa e la vose quasi a fil i domanda a la Madona: -fame stà in tel campanil!La Madona da la zogia quasi al cuor i scampa fora e in tel campanil lo mette per segnà sirocco e buora. Ecco caro Anzoletto al tovo posto al xe quà per vardate stì graisani, e l'amor i te donarà.
ANDA' A VELA Sdionfa la vela la bava de tera drio de la pupa ze sbruma lisiera, al và verso al nio un vecio corcal, siguro tra poco vien sù temporal. Casagia la scota,al stralo se tira, scarocia la barca....son sensa deriva, andà de bolina, ze dura in batela, ma per tornà a casa se fa anche quela. Un bordo de drita e un a "manca", pe' 'ndà fin in foseta,de stra' ne ze tanta. Gunbine ze in prova,i magi ligai, inte le sarce i ze mesi spacai. 'Nà man tien al bugiol e l'oltra la rigola, son carego de aqua la devo ghità fora. Se sente zà le giosse, e brontola al maroso, 'desso al tenporal diventa fastidioso. Comò dei arzentini, i se cassa drento i oci, le sguanse ze ingiasae, 'desso par che fiochi. Al vento 'se rinforsa, me rodolo la vela, me tocarà vogà, se vogio tornà in tera. Al mar lo hè de pupa, ....son travagiao... ligao hè la rigola, al remo lo hè frontao. Un colpo de siada, dalongo 'nà vogada, passao hè la foseta... e questa la ze 'ndagia. Sti quà gera i travagi che veva i pescauri, 'desso i ze più quieti... a bordo i hà i moturi.