Mosterdsaad by J A Buchan

’n Mosterdsaad

Erkennings Dankie aan: Yvonne Ashwell, my getroue en toegewyde tikster; Ann Roux, my redakteur; Clive Thompson vir jou oorspronklike omslagontwerp; Rod en Lyn Samouilhan van Pinetown Printers vir julle vrygewige hulp en professionele uitmuntendheid met die drukwerk. Met ons beste wense en spesiale liefde van Angus en Jill Buchan Ek is baie dankbaar vir die baie ander wie se lewens en skryfwerk my gehelp het om hierdie boek te vorm. Hulle sluit onder andere in: Streams in the desert deur L.B. Cowman, The Complete Gathered Gold deur John Blanchard, Glimpses of God through the Ages deur Esther Carls Dodgen, The Pursuit of God deur A.W. Tozer en Prayer deur Philip Yancey. Tensy anders vermeld, kom alle Skrifverwysings uit die 1983vertaling van die Bybel.

Uitgegee deur Shalom Ministries

Posbus 373, Greytown KwaZulu-Natal, Suid-Afrika 3250

Opgedra aan Ek wil graag hierdie boek aan my kleinkinders opdra: KYLA RAE BUCHAN JAIMEE KATE BUCHAN KAI REECE PRASCHMA CALLUM GREGOR HULL EMMA JAYNE PORﾃ右 en CALEB JAMES PORﾃ右 My gebed vir my kleinkinders is dat hulle sal lewe deur geloof en nie deur sien (2 Korintiﾃｫrs 5:7), en dat hulle hul lewe lank op die Here Jesus Christus sal vertrou.

Inleiding

erwyl ek op die Here gewag het voor ek nog ’n dagstukkieboek geskryf het, het die Here dit op my hart gelê dat hierdie die laaste dae is en dat ons, meer as ooit tevore, in geloof moet leef. Die Here het my geneem na daardie pragtige Skrifgedeelte wat sê as ons geloof so groot soos ’n mosterdsaadjie het, ons die berg kan beveel om hom in die see te werp (Matt. 17:20). Toe het ek gaan kyk na die Evangelie van Markus waar die Here baie duidelik vir ons sê: “[Die koninkryk van God] is soos ’n mosterdsaadjie” (Mark. 4:31). Dit is die kleinste saadjie, maar wanneer dit in goeie grond geplant word, ontkiem dit en groei dit en word ’n groot boom. Die takke is so groot dat die voëls in sy skaduwee kom nes maak. God wys ons dat indien ons in geloof wandel, die Koninkryk van God baie naby aan ons sal wees. Ons sal wandel en leef in sy krag. Maar indien ons vasberade is om self ’n plan te maak (’n boer maak ’n plan), kan ons verseker wees dat ons lewens soos hel op aarde gaan wees. Hierdie boek met dagstukkies word gewy aan die voetsoldate van die Here – nie noodwendig die generaals, offisiere en die supergeestelikes nie – maar aan dié wat sê, “Here, indien ek nie elke dag saam met U tyd deurbring nie, gaan ek dit nie maak nie”. Dit word opgedra aan daardie Christene wat elke oggend moet opstaan en leef wat hy preek, wat deur die daaglikse geswoeg gaan en van dag tot dag uitdagings in die gesig staar. Die Here het dit op my hart gelê dat elkeen van ons ’n mosterdsaadjie van geloof nodig het om deur elke dag te kom sodat ons kan wandel in die volheid van wat God vir ons in sy koninkryk voorberei het. Mag God jou ryklik seën wanneer jy elke dag hierdie woorde lees, en mag dit aan jou die krag en die stamina, die uithouvermoë en die vreugde gee om te sien hoe jou mosterdsaadjie van geloof daagliks berge versit.

Angus Buchan Shalom Ministries Posbus 373 Greytown Suid-Afrika 3250 E-pos: shalom@futuregtn.co.za www.shalomtrust.co.za

Voorwoord

eel van die Onse Vader is die versoek om ons “daaglikse brood”. Hier herinner Jesus ons indirek aan die wonderwerk van die voorsiening tydens die uittog uit Egipte toe God die daaglikse hoeveelheid manna uit die lug uit laat reën en die Israeliete opdrag gegee is om dit op daardie dag op te eet. Hulle is verbied om enigiets oor te hou vir die volgende dag. Hulle kon leef van God se oorvloedige, vars en daaglikse bonatuurlike verskaffing. Hulle oorlewing het afgehang van hulle gehoorsaamheid. Baie soos Moses, het Angus ’n diep passie en sorg vir God se mense om sowel die erns as die heerlikheid van hierdie beginsel te omhels – ons innige behoefte vir God se daaglikse brood; tyd in sy teenwoordigheid om sy stem te hoor en sy hart aan te voel. Daar is tye wanneer ’n mens, nadat jy iemand ontmoet het en ’n oomblik beleef het wat potensieel inspirerend kon gewees het, daar wegstap en effens teleurgesteld voel. Die hele ervaring word vererger deur die feit dat ’n mens die oomblik tegemoet gaan met hoë verwagtinge. Een van die min mense by wie dit nooit die geval is nie, is die skrywer van hierdie skatkis. Angus beliggaam die metafoor van die Bybelse stukkende kruik van genade wie se intimiteit met en weerbaarheid voor God hom ten beste ’n inspirasie maak. Hy is, in die figuurlike sin, ’n put van redding waar soveel dors siele verniet van die lewende water kan kom drink. Om tyd te spandeer met die strome lewende water wat God goedgunstiglik deur hom laat vloei, is gewaarborg om jou nie net uit te daag nie, maar ook te verander deur die liefde van die Vader, wat jou nader aan Hom bring, terwyl jy, deur hierdie dagstukkies, tot Hom nader.

Fred May Senior Pastoor by Shofar Christelike Kerk, Stellenbosch, Suid-Afrika

1 Januarie

Die regverdige sal uit geloof lewe “Want die geregtigheid van God word daarin geopenbaar uit geloof tot geloof, soos geskrywe is: Maar die regverdige sal uit die geloof lewe.” Romeine 1:17 (1933-vertaling)

anneer ’n mens ’n nuwe jaar binnegaan, is dit maklik om bang en angstig te raak. Ons het hopelik die geleentheid gehad om oor die Kersseisoen stil te raak en te rus. Vrees en angs wel in ons op wanneer ons dink aan die reuse uitdagings wat vanjaar vir ons voorlê. Die enigste manier om vrees en angs te oorkom, is deur geloof. Wanneer geloof jou lewe binnekom, verdryf dit vrees en angs. Hoe kry ’n mens geloof? Geloof kom deur die prediking wat ’n mens hoor, en die prediking wat ons hoor, is die verkondiging van Christus (Rom. 10:17). John Wesley, ’n professionele teoloog, het alles probeer om heilig te leef. Hy het sy liggaam probeer dissiplineer, gevas, sonder goed klaargekom – en elke keer hopeloos misluk. Hy was so moedeloos, so ontnugter deur die lewe. Dit was eers toe hy, deur Martin Luther, ontdek het dat die regverdige uit geloof sal lewe, dat hy ware vryheid gevind het. Die toekoms van vanjaar hang nie van jou af nie. Dit hang van God af. God het aan jou ’n lewe van oorvloed belowe ( Joh. 10:10). As jy jou vertroue in sy getrouheid plaas, sal Hy jou deurhelp. Dit is nie eens jou eie geloof nie, maar sy getrouheid wat jou deur vanjaar sal kry. Nie net sal jy daar deurkom nie, maar jy sal uitblink. Jy sal vind dat indien jy deur geloof lewe, jy min verkeerde besluite sal neem. Jy sal meer tyd tot jou beskikking hê en selfs in staat wees om meer te bereik. Aan die einde van sy lewe, toe hy geweldig moeg geword het, het Spurgeon gesê hy gaan minder probeer, minder aanpak en meer bereik. Vanjaar sê die Here vir jou om minder te streef en Hom meer te vertrou. Indien jy dit doen, sal jy die verskil in jou lewe sien. “Verwag groot dinge van God en pak groot dinge vir God aan”, het William Carey, ’n man wat besluit het om te lewe deur die geloof en nie deur sien nie, gesê. Hy het saam met sy jong gesin Indië toe gegaan waar hy verwag het om ’n evangelis te wees, maar het hopeloos misluk. Ek dink nie hy het ’n enkele persoon na die Here gelei nie. Die man was raadop nadat hy die meeste van sy kinders langs mekaar begrawe het (hulle is

oorlede aan tropiese siektes) en sy vrou kranksinnig geraak het. Miskien is jy aan die begin van hierdie nuwe jaar in dieselfde posisie? Ek wil jou aanmoedig om te doen wat William Carey gedoen het. Hy het getrou gebly. Hy het sy oë op Jesus, die Begin en Voleinder van sy geloof gevestig gehou, God het sy getrouheid geëer en hy het sy roeping in die lewe gevind. Hy was ontsettend taalvaardig en het begin om die Bybel uit Engels in Sanskrit, Hindoestani en Chinees te vertaal. Hy het ’n groot drukpers op die been gebring en die hooftolk geword van die Britse regering in die hooggeregshof in Nieu-Delhi. As gevolg van William Carey se getrouheid, is daar vandag miljoene Indiërs wat Jesus Christus ken as hulle Heer en Verlosser en bestaan die Bybel in al hulle tale. Wanneer jy dus hierdie nuwe jaar aanpak, doen dit met geloof in God en maak gereed vir ’n ongelooflike reis van opwinding, uitdagings en bowenal, vervulling in God.

2 Januarie

Die mosterdsaadjie “Dit verseker ek julle: As julle maar geloof het so groot soos ’n mosterdsaadjie, sal julle vir hierdie berg sê: ‘Gaan staan daar anderkant!’ en hy sal gaan. Niks sal vir julle onmoontlik wees nie.” Matteus 17:20

anneer ’n mens na die geskiedenis kyk, en veral na die Bybel kyk, is dit verstommend om te sien hoe die Here altyd die gewoonte het om die kleinste, swakste en onbelangrikste te gebruik tot sy heerlikheid. Die mosterdsaadjie is die kleinste saadjie. As boer ken ek saad. Wanneer ek gaan saad koop om te plant vir my oes, kies ek gewoonlik groot gesonde saad wat baie potensiaal het sodat dit goed sal ontkiem. Ek sal nooit die kleinste saadjies kies nie. Maar dit is wat Jesus doen. Hy kies die kleinste saadjies – mense soos ek en jy – wat deur die wêreld eenkant gewerp is en wat die wêreld gesê het daar geen hoop voor is nie. Die goeie nuus is dat die Here sê as jou geloof so groot soos ’n mosterdsaadjie is, jy ’n berg kan aansê om hom in die see te werp. Ek het dit, nie net een keer nie, maar al baie keer in my eie lewe ervaar, en aan die begin van hierdie jaar, waar jy ook saadjies van geloof saai, kan jy ook ’n groot opbrengs verwag. Hoekom? Want dit is God se beginsel! Dit is hoe Hy die lewe ontwerp het. As jy mieliesaad plant, kan jy ’n opbrengs van drie tot vier honderd persent verwag, want dit is hoe dit geneties geskape is. Indien jy ’n saad in opregte geloof plant, en ek praat nie net van geld nie, ek praat van moeite, jou leefstyl en die hoeveelheid tyd wat jy bestee aan jou gesin en jou werk en bowenal jou verhouding met die Here, kan jy vanjaar ’n opbrengs van vier honderd persent verwag. Met ander woorde, wat ek sê, is dat dit onmoontlik is om God te veel te seën. Hoe meer jy vir God van jou tyd, jou gebed, die lees van die Woord en ja, jou finansies gee, hoe meer sal Hy vir jou teruggee. Maar die volgende is baie belangrik – moenie vir Hom gee met die doel om terug te kry nie. Gee vir Hom omdat jy Hom liefhet en vertrou. Dan kan jy vir die berg opdrag gee om hom in die see te werp, en sal hy dit doen. Onthou jy die weduwee en haar jong kind vir wie die profeet gevra het om hom kos te gee terwyl sy net genoeg olie en meel gehad het vir een laaste brood? Sy en haar seun sou daarna gaan lê en saam sterf. Maar sy het daardie saadjie van geloof geneem, en vir die man van God ’n brood

gebak en hom kos gegee. En toe sy terugkeer, was daar genoeg om vir haar en haar seun kos te maak. So het dit aangehou, dag in en dag uit, totdat die nuwe seisoen begin het. God maak geen onderskeid tussen mense nie. Indien enige man of vrou kies om hulle geloof, selfs al is dit net so groot soos ’n mosterdsaadjie, in Hom te plaas, sal Hy dit neem en dit honderdvoudig laat toeneem. Ten slotte het ’n seuntjie sy mosterdsaadjie van geloof geneem, twee vissies en vyf broodjies, en hulle aan die Meester gegee. Die Meester het daarvoor gebid en dit aan sy dissipels gegee en hulle het vyf duisend mans kos gegee – en dit sluit nie eens die vroue en kinders in nie. Glo jy werklik dat hy die enigste persoon tussen die vyf duisend was wat kos by hom gehad het? Ek glo dit nie vir ’n oomblik nie. Hy was die enigste seuntjie wat die geloof gehad het om sy vertroue in die Here Jesus Christus te plaas, en die Here het hom geseën. Daar het twaalf mandjies vol kos oorgebly. Begin om vanjaar te leef in geloof en nie deur sien nie (2 Korintiërs 5:7) en kyk wat doen God met jou mosterdsaadjie van geloof. Indien jy dit in die stoorkamer hou, sal dit volgende jaar nog net so groot wees. Om die waarheid te sê, dit sal muf en waarskynlik doodgaan, maar as jy dit in goeie grond saai, sal jy ’n groot oes kry.

3 Januarie

Ek slaan my oë op “Ek slaan my oë op na die berge: waar sal my hulp vandaan kom? My hulp is van die Here wat hemel en aarde gemaak het. Hy kan jou voet nie laat wankel nie; jou Bewaarder kan nie sluimer nie. Kyk, die Bewaarder van Israel sluimer of slaap nie. Die Here is jou Bewaarder; die Here is jou skaduwee aan jou regterhand. Die son sal jou bedags nie steek nie, die maan ook nie by nag nie. Die Here sal jou bewaar vir elke onheil; jou siel sal Hy bewaar. Die Here sal jou uitgang en jou ingang bewaar, van nou af tot in ewigheid.” Psalm 121 (1933-vertaling)

it is vroegoggend en ek sit en kyk na die Drakensberge. Ek voel hoe Jesus vir my sê: “Vertrou op My, want Ek is vas en standvastig soos hierdie einste berge. Ek is onbeweeglik en tog is Ek lewendig”. Berge fassineer my omdat hulle onbeweeglik is, maar hulle voorkoms heeltyd verander. Soggens vroeg is hulle in skaduwee gehul. Nou, nadat die helder son opgekom het, is die skaduwees weg en bedek die groen somergras hulle soos ’n sagte groen tapyt. Daar is min skaduwees oor. So is dit met ons Hemelse Vader. Hy is standvastig. Hy is getrou. Hy is ongelooflik groot en tog is Hy baie opwindend omdat Hy voortdurend verander. Hy bly nooit agter nie. Hy is altyd op datum. Hy is relevant tot die omstandighede en die situasie waarbinne ek en jy op die oomblik leef. Hy het belowe dat Hy ons nooit sal verlaat nie en ons nooit in die steek sal laat nie (Heb. 13:5). Ons roep vanoggend tot God: “Here, vermeerder asseblief ons geloof sodat ons U kan geniet, U kan vertrou en al ons vertroue alleenlik in U kan plaas”. My hulp kom net van Jesus Christus. Nie van berge of van mense nie, maar van God en Hom alleen. Amen en Halleluja!

4 Januarie

“Ek is” (Geloof – erken wie God is) “Om te glo, is om seker te wees van die dinge wat ons hoop, om oortuig te wees van die dinge wat ons nie sien nie.” Hebreërs 11:1

od noem Homself “Ek is”. Dit beteken Hy is alles. Hy is die verlede, die hede, die toekoms. Hy is lewe. Hy is alles. Hy is “Ek is”. Daar is geen mens, geen skepping wat groter as Hy is nie. Hy is “Ek is”. Hy is die lewe self. Môreoggend gaan ek ’n klein dogtertjie by haar ouerhuis toewy. Hulle het gevra vir ’n privaat toewydingsdiens en ek is meer as gelukkig om dit te doen, want hulle is betrokke by en lede van die plaaslike kerk, maar om verskeie redes, en ook omdat ek nie daar kan wees nie, kan ons dit nie op ’n Sondag doen nie. Daarom doen ons dit op ’n Saterdagoggend. Ons gaan haar ma en pa aanmoedig om elke dag ’n gesinsaltaar in die huis te hê. Die Bybel sê indien jy jou kind grootmaak om die Here te dien, sal hy of sy wanneer hulle ouer word, nie van daardie weg afwyk nie. “Die geloof kom dus deur die prediking wat ’n mens hoor” (Rom. 10:17). Ons moet ook God se heilige Woord verbaliseer. Net soos God gedoen het, moet ons dit hardop sê, want wanneer ons dit sê en dit hoor, en die gesinslede dit hoor, word dit ’n werklikheid in ons huise. God het die Woord gespreek en die wêreld het tot stand gekom. Ons praat nie net van enige woord nie. Nee, ons praat van God se heilige Woord in die Bybel. Die Woord van God sê byvoorbeeld: “Alles wat julle in die gebed vra, glo dat julle dit al ontvang het, en dit sal vir julle so wees” (Mark. 11:24). Ek het die ervaring gehad toe ek in ’n verlore stryd gewikkel was teen ’n veldbrand op ons plaas. Die brand was op pad na my buurman se groot houtplantasies. Indien dit sy bos bereik het, sou ek alles wat ek besit het verloor het en van die plaas weggestap het met net my vrou, my kinders en die klere aan ons lywe – en dit sou al gewees het. Ek het daardie dag tot God geroep en Hy het my gebed verhoor. Hy het letterlik die wind laat draai. Daar het ’n sterk noordewind gewaai wat die vlamme in die rigting van my buurman se eiendom, wat suid van my geleë was, gewaai het. Die Here het die wind laat bedaar en laat draai. Hy het ’n sterk suidewind laat opkom, en soos dikwels gebeur, het daar saam met die suidewind ’n koue front uit die suide gekom. Die wind het gaan lê, die koue front het verskyn en ’n sagte reën het die brand geblus. God antwoord beslis ons gebede!

5 Januarie

Die vermenigvuldiger van elke behoefte “Toe het Hy die vyf brode en twee visse geneem, na die hemel opgekyk en die seën gevra. Daarna het Hy die brood gebreek en dit vir sy dissipels gegee om aan die mense voor te sit. Hy het ook die twee visse onder hulle almal verdeel. Al die mense het geëet en genoeg gekry. Hulle het nog twaalf mandjies vol bymekaargemaak van die stukke brood en vis. Van dié wat van die brood geëet het, was net die mans vyf duisend.” Markus 6:41-44

esus het vir sy dissipels gesê om nie die skare weg te stuur nie, maar om eerder vir hulle kos te gee. Toe deur rou geloof, deur in dinge te glo wat nie is nie asof dit so is, het Hy die klein seuntjie se ontbyt geneem – twee klein sardientjies en vyf klein broodjies. Jesus het dit geseën en die kos vermeerder. Vyf duisend mans (die vroue en kinders is nie eens bygetel nie) het kos gekry en daar het twaalf mandjies kos oorgebly wat hulle daardie dag bymekaargemaak het. Ons moet onsself ’n vraag vra. Was ons al ooit werklik sonder kos? Waarom is dit dan dat ons voortdurend tot so ’n mate bekommerd en angstig is dat ons maagsere, hoë bloeddruk of depressie kry? Jesus het dan nog altyd vir ons genoeg kos en klere gegee vir daardie dag. Onthou jy die verhaal van die twee voëltjies wat op die telefoonlyn gesit het? Die een vinkie het vir sy maatjie gesê: “Hoekom hardloop die mense heen en weer, stoor kos en goedere in hulle huise en lyk so angstig en bekommerd?” Die ander voëltjie het geantwoord: “Hulle ken seker nie ons Vader in die hemel wat elke dag in my en jou behoeftes voorsien nie” (Mark. 11:22). Julle moet geloof in God hê!

6 Januarie

Ordelikheid “Maar soek eers die koninkryk van God en sy geregtigheid, en al hierdie dinge sal vir julle bygevoeg word.” Matteus 6:33, 1993-vertaling

nige goeie boer sal vir jou vertel dat indien jy ’n goeie, gesonde, oorvloedige oes wil produseer, jy jou lande op ’n ordelike wyse moet voorberei. Eerstens moet jy diep ploeg. Moenie afskeep nie, selfs al is die brandstofprys hemelhoog. Ja, jy gaan baie meer brandstof gebruik, maar dit sal op die ou end tot jou voordeel strek. Volgende moet jy ’n gelyk saadbedding met ’n ploegskottel of ’n skoffelploeg voorberei sodat dit mooi en glad is. Dan moet jy die beste saad gaan koop wat jy kan kry. Moet nooit tweedegraadse saad koop as jy ’n rekordoes wil hê nie. Bemes goed. Maak seker jou plantdigtheid is presies soos jy dit wil hê. Die diepte en spasiëring moet presies wees. Maak seker jou oes beleef geen teëstand nie, geen onkruid, gras, insekte of enige tekorte in die grond nie. Laat dan die res aan die Groot Boer oor en Hy sal sorg. Hy sal die oes oppas deur droogtes, vloede, hael of brande. Dit is heeltemal in sy bekwame hande en Hy sal jou nie teleurstel nie. Ons hemelse Vader verwag dieselfde van elkeen van ons. Ons oes sal misluk indien ons kies om ’n lewe van selfsug, vraatsug en hardkoppigheid te leef en ons rûe te draai op die grootste man wat ooit geleef het. Maar as ons kies om ’n lewe van heiligheid en gehoorsaamheid te lei, sal ons ’n rekordoes in honderdvoud oes. En mense sal van heinde en verre kom om die goedheid van ons en ons families se lewens deur die liefde en genade van ons Here Jesus Christus te sien. Hy is die Groot Boer.

7 Januarie

Ons moet opnuut gebore word “Daarop sê Jesus vir hom: ‘Dit verseker Ek jou: As iemand nie opnuut gebore word nie, kan hy die koninkryk van God nie sien nie’.” Johannes 3:3 “Moenie verbaas wees dat Ek vir jou gesê het: Julle moet opnuut gebore word nie.” Johannes 3:7

it is absoluut noodsaaklik om opnuut gebore te word. A.W. Tozer het gesê: “Soos ’n man wat woestyn toe gaan sonder ’n gids, of ’n man wat see toe gaan sonder ’n kompas, net so is dit nie net noodsaaklik nie, maar ’n saak van lewe en dood”. Daar moet ’n betekenisvolle verandering in ons lewens plaasvind. Ons kan nie net die gebed van verbintenis bid en dieselfde bly nie. Net soos die aarde om die son wentel moet ons ook om Jesus Christus wentel. Hy moet vir ons alles wees. Nie net een van die belangrikste faktore in ons lewens nie, maar die belangrikste faktor in ons lewens! Sy vriende moet ons vriende word, sy vyande ons vyande, sy weë ons weë, sy verwerping ons verwerping, sy lewe ons lewe, sy toekoms, ons toekoms. In ’t kort vra dit vir ’n totale leefstylverandering, ’n ommekeer van 180 grade. Die ware Christen het God ontmoet. Hy weet waarvan hy gered is; het sy voormalige sondige lewe opreg bely en begin weer van voor af. Ek kan met eerlikheid sê dat die dag toe ek dit gedoen het, op 18 Februarie 1979, my lewe verander is. Ek het ’n nuwe horison gehad, ’n nuwe begin, ’n nuwe bewustheid van sonde. Ek wou nie meer die Here seermaak nie. Ek raadpleeg Hom oor elke kwessie en Hy het my sedertdien nog nooit in die steek gelaat nie. Daar wag ’n nuwe begin op jou as jy jou knie sal buig en vanoggend saam met my die sondaarsgebed sal bid: Liewe Here Jesus Ek erken U as Heer en Redder van my lewe. Ek bely al my sonde en vra dat U vanaf vandag elke aspek van my lewe sal oorneem. Amen.

8 Januarie

Is enigiets vir God onmoontlik? “Ek is die Here die God van al die mense. Is iets vir My onmoontlik? Jeremia 32:27

s daar een ding is wat ons God meer as enigiets anders ontstel, is dit ongeloof. Die kinders van God het byvoorbeeld in die woestyn heeltyd vir Yahweh teleurgestel deur in Hom te twyfel. Hulle het ’n goue kalf gebou omdat Moses nie gou genoeg van die berg afgekom het nie. Hulle het voortdurend gekla omdat hulle nie kos, water en klere gehad het nie, en tog het hulle klere nooit stukkend geraak nie en het hulle vir veertig jaar in die woestyn kos en water gehad. Die gevolg was ongelukkig dat almal van hulle, as gevolg van hulle ongeloof, in die woestyn gesterf het. Net twee mans het die Jordaan oorgesteek en Kanaän, die land van melk en heuning binnegegaan, twee mans wat geglo het – Josua en Kaleb. Waarom? Omdat hulle ’n ander gesindheid gehad het! In Numeri 14:24 sê God: “Maar omdat my dienaar Kaleb ’n ander gesindheid (geloof) het en My getrou gevolg het, sal Ek hom inbring in die land wat hy gaan verken het, en sy nageslag sal dit besit”. Dus het ongeveer 2½ miljoen Israeliete in die woestyn gesterf. Want weens hulle ongeloof het hulle nooit die Jordaan oorgesteek nie. Josua en Kaleb het omdat hulle in God geglo het, die land van melk en heuning binnegegaan. Niks is vir God onmoontlik nie. Al wat ons vanoggend moet doen voor ons die nuwe dag aanpak, is om Hom te vra om ons meer geloof te gee. “Die apostels sê toe vir die Here: ‘Gee ons meer geloof ’” (Luk. 17:5). Laat dit vandag ons gebed wees – en niks sal vir God onmoontlik wees nie.