Codewort: Olls va friahra
Polmbuschn- und Weichfeiertrogn Zua Ostern hot’s friahra ollerhaund verschiedene Bräuch gebn und ols Kina worn ma vull eingsponnt mit die Osterfeierlichkeitn. Es hot natürlich vül Verschiedenes gebn, wia die Fleischweich, Auferstehung und des Osterfeier. Jetzt mechat ih oba übers Polmbuschn- und Weichfeiertrogn dazöhln. Erzeiti Polmhulzschneidn wor gonz wichti, weil monchas Frühjoahr außi das Wetter so schean wor, dass die Polmkatzl schoa Ende Februar austriebn hobm, Mitti Mirz schoa bliaht hom und Aunfong April die Katzl schoa weda ogfolln san. Wann hianz die Oastern spot worn, host die nockatn Polmkatzlruatn ghob. Unser Hons hot do immer drauf gocht, passand und erzeiti dei Polmkatzlzweig ozschneidn. Mir hobm vül Polmkatzlbam- und böschn ghob, so dass er mehr Zweigala und Äst obagschnittn hot, weil a ob und zua fir wen onders oni Buschn gmocht hot. Die Ausredn, die die ondern ghob hom, worn ah immer die gleichan, mir worn z‘spot drau mitn Schneidn, mir hättn sist jo sölba gmua Polmkatzlgschtauda. Da Hons ah nix bled, hot gleih so beileifi gsog, jo a Ochtl Wein ban Rauch und a Suppn, jo, jo, is schoa recht und so hot a ah gern oani kloan Polmbuschn fir onari Leit gmocht. Des Polmhulz hot a in da Fuatterhittn drin am Bodn higleg, do wor‘s schea kiahl drinnan und do san die Zweig schea gleich bliebn bis zan Schmerzhoftnfreita vorn Polmsunnta. In der Hittn wor jo a Erdnbodn, mir hobm im Summa des Greanfutter einigebn, und in da Ibagongszeit wor die Labstreih drin und gegn Oastern außi wor‘s schoa fost laa. Freita vormittog hot a die Wiedn und oani Hoslruatn gschnittn und zan Schluss an Bux und Segnbam und oani Kranewittn ozwickt. Die Hoslsteckan hot a braucht, damit die Buschn länka werdn. Ban Bankerl vorn Haus hot a olls higebn und ah des Werkzeig dazua gleg, des a braucht hot. Oani Kina va uns hobn ghulfn, weil die lonkan Buschn hät a alloa net daholtn megn. Zerscht die zwoa Meter lonkan Hoslsteckan, dann schoa oani Polmzweig, so dass a oarmdicker Buschn zsammgkem is. Mit die Wiedn va untn auffi olli 30 cm fest ummandum bundn, dass a net mehr außanond geih hot kinnan. Da erschte Meter auffi is nockat bliebm zan Augreifn und Trogn, dann hot a an Bux einigsteckt und dann an Segn oder oani Kranewittn und dann schoa die Polmkatzl. Jetzt hot a weda oani Holsrutn mitbundn, dass a ebn länka gwordn is. Dann oani Wiedn, dei a weda zruck obabogn und ba oan Bund einigsteckt hot. Hianz san va die Wiedn so scheani Herzala entstandn, oba dos wichtigste worn die Bandl, die da Hons einigmocht hot iban gonzn Buschn lonk. Fir oan Bund host nochan Polmbuschntrogn a Osteroa kriag. Mir hobm immer zwoa Bischn ghob, weil ma jo zwoa Buam worn, da Toni hot ols größara Bua ah den größaran Buschn ghob, der wor ah vül schwarer olls da meinige. Da Hons hot fir die Mitzi ah oan kloan gmocht und ebn fir dei Leit, wos ba ihm oan augschoffn hobm. Ban Einigeih noch Semara hom mir Buam van Hierning heraßt schoa unsere Buschn amol zsamgmessn, dass ma wissen, wer in Heacharan hot. Is a van Bloswostl, van Blachl, van Bartlbauern oder gor va an oanaran Haus, wissen kaunst nix. Nochan Hoachomp wor in Kirchhof heraßt die Polmweich, da Kirchhof wor bis za Schul ummi gsteckt vull Leit und Kina und Polmbuschn und durch dei vüln großn Buschn, hom die Hintaran sa gor net viri gsehgn. Da Pfoarrer hot va da Kapöllnstiegn aus die Polmweich gmocht, mir hobm unsere Bischn schea hoach gholtn, dass noh heacha ausgschaut hobm, als wos totsächli worn. Noch da Weich is da Pfoarrer gleih weda außa kemman va da Sakristei und hot mit die Leit va seina Pfoarr iba olls Mögliche gredt. Mir Buam san immer gleiati zuwi, so dass a uns dasiacht und uns aunredt, wegn die großn Buschn. Er hot uns jo van Schulgeih her kennt und Bloswostl sowieso und noh dazua, wo mir heier die Bloswostlbuam in größaran Polmbuschn van Hierning draßtn hom. Hot a dann gfrog wer s‘ bundn hot, hom ma gsog, insa Hansl. „Ah der, a braver Mau, kloa oba fleißi und tichti, ban Lichtmesskirzn Austrogn, ba da Földaweich in Hierning draßt, ban Ulrichsbrunnbetn, ba da Fronleichnomsprozession und sistn ah ibaroll. Wo isan? Ih hätt eh wos zan Redn mit eahm, wengan Stroßengl-Kiafoahrtn-Geih Anfong Mai, ob a wuhl mitgeht mitn Kaplau, dass a scheins Schöckerl Leit ah z‘Fuß obi gengan.“ Mehrari fohrn jo schoa mitn Postautobus bis za Ibafuhr obi und gengan erscht va durt weck mit. Intressant, da Hons, hot zwoar mehr kurzi Haxn, is oba a sicherer Geha, er is jo vor a poar Joahr auf Mariatrost obi ah mitglagglt. Dann is da Hons schoa dahergkemman und da Pforrer hotn gleih aungredt, wegan Stroßenglgeih. Er sog: „Hot mih eh schoa da Kaplau dawischt, er wüll hobn, dass ih zerscht auf Semara einakimm und va do
weck mitgeih, dass ma jo Mehrari san ban Furtgeih. Sist war ih jo za Aunsetz obigongan und va durt weck mit, wia mir olli Hierninger entweda zan Pabstwirt obi san, za Aunsetz, zan Kramer oder Eßlsog oder zan Woffn obigongan san.“ Mir san a Stickl weiter Richtung Gottator und dann Gosthaus zua, da Tatti hot uns heit ban Rauch a Nudlsuppn kaft und fir olli drei Kina zwoa Kracherla, sist wor‘s immer nur oans. Wiar a zohlt hot, san ma vull Freid weda hoamgongan und ban Bufitschkreiz draßt san ma draufgkemman, mir hom unsere Polmbuschn ban Rauch drin vagessn, do san ma wuhl gschwindt zruckeini grennt die Bischn huln. Dahoam hot da Hons oani kloan Stickala daunazwickt und dei hom ma auf die Acker draßt higleg, inzwischn hot a noh oni Kreizerla gmocht und ba die Stolltürn, ban Troadkostn und ban Tenntor auffignoglt, damit des gweichti Hulz dos Unheil oholt. Nächts Joahr, sog da Hansl, schau ma, dass ma va die gonzn Semriacher den Heacharan hobn. Zua Ostern hot ah des Weichfeiertrogn dazua ghert. Am Korsamstag in da Friah is vor da Kirchn heraßtn des Feier gweicht worn. Weit vorn Koroastasamsta hom ma dafür schoa a passends trucknas Holz gricht‘t und an Kea zsammghockt und ‘s gonzi Joahr üba hom ma ba die oldn Bam gschaut wegn oani Holzschwämm. Die Blechbixnan mitn Droht zan Drahn hom ma eh im Werkzeigkammerl entn aufgholtn ghobt. Die Schwämm und des feini Hulzerl hom ma in a Bern einigebn, dass uns ban Hoamgeih net des Feier ausgeht, mir hom doh a guati Stund braucht des Feier zan Hoamtrogn. Wegan Gwoand hot die Mammi gsog, das Sonntagwoand derfts ma net aunlegn wegan Aunsengan und durchs Feier und durchan Rach kriag‘s ah so an Gruchan. So hom ma des Schulergwaund aungleg. Korsamsta sechsi in d‘ Friah sam ma furt, jeda a Bixn und da Toni ah noh die Bern mitn Hulz, Kreiz zua auffi, do san schoa die Blachlbuam daher kemman, die Jostnbuam, Hieningreicher und da Kirchnseppn Erwin. Ban Weitergeih hom ma schoa amol probiert a bissl a Feier zan Auzindn und ah zan Auntreibn, dass ma‘s nochand kinnan. Da Toni und da Erwin worn schoa großi Buam und hom jeder oa Zigrettn mitghob, da Erwin hot s‘ va sein Vota gflaucht und da Toni hot s‘ van Voitl außagstuhln, da oane a C und da ondere a Flirt. Wia uns koana gsehgn hot, hom s‘ aungracht, gegenseitig a poar Zug austauscht, worn eh olli gleich hanti, oba sei hom gscheit dahergredt wia‘s zan Rachan geht, wia ma an Brustzug mocht oder wia ma durch die Nosn in Rach weda zruck außa lost. Mir kleanaran Buam hom ondächti zuaglost und zuagschaut und dann hätt’s as fost einigschissn. Mir san ban Toschnkreiz vorbei kemman, da Toni und da Erwin hom in da linkan Hand die Bern mitn Holz ghob, in da rechtn iban Unterorm die Bixn drübaghänkt und in der Hand mit die Finger die Zigrettn. Mir kloan Buam hom mitn Dam va da Rechtn das Kreiz gmocht, de Zwoa hom oba net recht gwisst, ob sih des ghert, mit a Zigrettn in da Hand das Kreiz mochan. Da Erwin hot sih sei Zigrettn gleim nebn eahm ummigschmissn, da Toni hot s‘ zwischn die Finger gholtn und schea hot’s ‘n daglanglt. Er hot of da Stirn und ban Mund as Kreiz gmocht, za da Brust is a net mehr obikemman, weil a sih mit da Zigrettn ba da Pappn brennt hot. Er hot sih aunständig schreckt, die Zigrettn is eahm obigfolln, er hot an Hupfer gmocht und schoa mit da Zung ummigleckt und ah mit da Hand ummigschwischt. Mir Kloan hom hoamlih glocht, oba holt net so richti außalochn kinnan, es worn jo unsere Gschwister und Cusein. Da Erwin hot seini weda aufgheb, da Toni hot‘s ah wulln aufhebn, oba de wor net do, er schaut auf des Platzl, wo er zerscht gstaundn is, nix do, des gib‘s jo net, dei Zigrettn wor ninascht zan sehgn, hianz hot a ins Becherl einigschaut - nix, hot ba da Bern gschaut - nix, jo kruzitirkn, wo is ‘n dei Zigrettn hikemman. Da Jostn Seppl sog za eahm: „Du, ba dein Spenza rachts aßa“. Is eahm dei Zigrettn ban Obifolln ins Jankasackl einigfolln und hot sih schoa durchobi brennt, hianz hätt as bold net außabrocht. Aus wor‘s mit der Racherei, mir san schei brav und gschleini Moarkt zu. Vor Siemi wor ma schoa in Pfoarrhof drin, a großas Feier hot schoa brennt, hom ma miaßn a Weil wortn bis des Feier obabrunnan is und da Messner gsog hot: „Wann‘s da Pfoarrer gsegnt hot, kennts as nehman.“ Des wor oba ah net so leicht, weil es hot nur oa kloans Schaufal gebn zan Einifoßn in die Bixnan. Zan Glück hom mir sölba vorher schoa unsere Keanstickala ins Feier einigleg zan Aunbrennen und dann weda außaghult und gleih aundraht bis a jede Bixn schea gracht hot. Da kloani Rothwanglbua hot ban Drahn net gschaut, hot a in Mohr Seppl die Bixn am Bugl auffighaut, dass die Gluatstickala außagspritzt san und den sein Janka aungsengt hot. Van Moarkt drin wor oa Bua, der hot nur a schea trucknas Feichtnhulz ghob, ba den sei Bixn hot‘s nochan Drahn gleih außabrennt, is a mitn Schuach obn drauf gstiegn, dass aufghert hot zan Brennen, gleih drauf hot‘s schoa weda außabrennt. Vorn Hoamgeih hom ma noh ban Kaufmau Aßnbaum an Traubnzucker kaft für uns und für dahom hom ma miaßn an Auneis mitbringan und ban Fellegger obn noh a 15er Birn firn Stoll intn kafn.
Hianz hom ma oba gschaut, dass ma weiter kemman, dass ma jo die erschtn san ba die aundern Häuser, wo niamb Weichfeiertrogn woar, weil do hom ma immer wos kriag dafür. Ba da Rauchsog zan Frießkreiz aßi hom ma schoa oani Schwamm nochgleg und ban Bromschn Hohlweg auffi schoa weda. Wos hom ma so kriag firs Weichfeiertrogn, oani Nussn, an Opfel, a Stickl Brot oder goar an Germtomerl. Va da Brettlbäirin hom da Toni und ih amol oan „Ein Schilling Bensdorp“ kriag, an gonz an Neign, nix aubraucht gwesn und ah nix ognudlt. Den hom ma zerscht a Weil mittrogn ban Hoamgeih, dass a schoa woach gwordn is und dann hom man doh gessn. Genau aufteilt auf uns Zwoa3S. 33, die Hülsn schea zsammgfoltet und ah des Staniolpapier, weil unser Hans hot dei gsammelt und wiara amol hundert ghob hot, hot as noch Wien gschickt und dafür a große Tofl Schocklad kriag. Mir hom auf jedn Ocka a Gluatstickal hingleg und dahoam as Restliche va da Bixn ba die obaran Ring in Herd einiglad. Da Toni hot gleih nochher des Loch in sein Jankasackl mit an bissl an Pech zuapickt, so dass ausgschaut hot, wia wenn’s a bissl vapickt gwesn wa.