1 minute read
Nalunaarutiginnittariaaseq
Silamik kissatsitsiartoqataanermi naatsorsuutit - CO2-mik aniatitsineq
KNI-mi illuutinut sanaartukkanullu immikkoortortaqarfiup CO2-mik aniatitsinerput Nukissiorfiit CO2-mik aniatsitsinermik naatsorsuinermi atortagaat aamma GHG-protokollen atorlugit sumiiffigisatsinni tamani aniatitsinerput naatsorsortarpaa. Pineqartut assigiinngitsut kr.-ninngorlugit atuiffiusimaneri tunngavigalugit atuineq literinngorlugu, m³-nngorlugu imaluunniit kWh-nngorlugu naatsorneqartarput. Ukiumi matumani kisitsisit katersorneqarsimasut iluarsiissutinik imaluunniit arlaannut ilaasortaaffeqarluni atuinerit immikkut naatsorsoqqissaarneqanngillat. Inuiaqatigiinni akisussaaqataanermi nalunaarusiornissami Scope 1-imi aamma Scope 2-mi atuinerit eqqortut tamakkiisumik takussutissaatigilernissaat sulissutigaarput. Scope 3-mut tunngatillugu suliffeqarfiup silaannarmut toqqaannanngitsumik mingutsitseqataaneranut atuinerup paasiniarnissaanut, assersuutigalugu sanaartukkanut tunngasuni, assartuinermi tunngasuni nioqqutinullu pisiortorneqartunut tunngasuni, 2025/26-mi tamakkiisumik takussutissaateqalernissarput siunnerfigaarput.
Nerisassanik maangaannartitsineq
Pilersuisumi nerisassanik maangaannartitsineq pisiniarfiit nerisassat igiinnarsimasaat tamaasa katillugit t.kr.-nngorlugit naatsorneqartarput. Nerisassanik maangaannartitsisarneq siunissami kg-nngorlugu naatsorneqartalissaaq, kg-nngorlugumi naatsorsoraanni paasiuminarnerussaaq.
Utertitsisitsisarneq
Dunkinik plastikkiusunik pisiniarfinnut ikummatissaasivinnullu utertinneqartunik Pilersuisumi Polaroilimilu sulisut katersisarput, katersallu sumiiffimmi qitiusumik ikuallaaviusunut nassiunneqaqqittarput. Kingorna dunkinik plastikkiusunik utertinneqartut amerlassusaat piujuaannartitsinissamik suleqatigiinnut ilisimatitsissutigineqartarpoq.
Sulisut naammagisimaarinninnerinik misissuineq
Sulisut naammagisimaarinninnerinik misissuineq ukiut tamaasa ingerlattalernikuuarput, misissuinermillu Ennova ingerlatsisuusarpoq. Ukiut siuliini sulisut naammagisimaarinninnerinik misissuineq siunnersuinermik ingerlatalimmit allamit ingerlanneqartarnikuugaluarpoq. Taamaattumik misissuinermi paasisat ukiut siuliini angusanut sanillersuunneqarsinnaanngillat. Ennova misissuinermi ingerlatsisuutillutigu iliuusissavut periusissiorluta, Ennovap siunnersuutai uagutsinnut naleqqussakkat atorlutigit, ingerlassinnaalissavavut.
Sulisilluni ajutoortunik nalunaarutiginnittarneq
Suliffeqarfitsinni sulisilluni ajutoornerit KNI-mi sulisoqarnermik immikkoortortaqarfiup katersortarpai. Sulisilluni inuit perlasinerat, ajutoornerit toqunartunitsinneqarnerallu KNI-mi sulisitsisut sulisoqarnermik immikkoortortaqarfik suleqatigalugu nalunaarutigissallugit pisussaapput. Nalunaarutigineqartoq Nuummi Sulisilluni ajoqusersinnaanermut isumannaarineq pillugu sullissivimmut Nuummi Sullivinnik nakkutilliisoqarfiittumut nassiutissavaa. Sulisilluni ajutoorneq Sulisilluni ajoqusersinnaanermut isumannaarineq pillugu sullissiviup aamma Sulisilluni Ajoqusernerit pillugit Sullissiviup naliliivigisarpaa. Sulisilluni ajutoornerit toqunartunittoornerillu annertuut Sullivinnik Nakkutilliisoqarfimmut toqqaannartumik nalunaarutigineqartarput. Sulisilluni ajoqusertup inuttaa nammineerluni nalunaarutiginninnissaminut aamma pisinnaatitaavoq, ajutoornerullu pineraniit ukiup ataatsip iluani nalunaarutiginnittoqarsinnaavoq.
Brugsenip, Pisiffiup aamma Paarisap makkununnga tunngatillugu suleqatigiinnitsinni: Kattulluta inuunerinneq ilusilersorparput pillugu naatitanik paarnanillu qerisunik tunisavut procentinngorlugu Paarisamut nassiuttarnissaannik pisussaaffilernikuuvugut. Tunisat procentinngornerini siornamut sanilliullugu amerlisimanersut ikilisimanersulluunniit takuneqarsinnaapput. Tunisat amerlassusaat procentinngorlugit tunisanut taarsiullugit atorneqarput, taamatullu iliornermi paasissutissat allanut tunniunneqartussaanngitsut illua-tungeriit akornanni paasitinneqannginnissaat qulakkeerneqarpoq.
Plastikkiunissaanik pisariaqanngitsut KNI-miit atorneqarunnaariartornerat
Kaaviaartitat procentinngortinneqarnerat ukiumi naatsorsuiffiusumi 2021/22-mi Pilersuisup pisiniarfiini tamani kaaviaartitaasut tunngavigalugit naatsorsorneqarput. Naatsorsuinermi ataasiartakkat marluinngorlugit immikkoortillugit naatsorsorneqartarput, tassalu ataasiartakkat plastikkinik pappiararsuarnillu nioqqutissiat aammalu ataasiartakkat avatangiisimik innarliisussaanngitsutut nioqqutissiat immikkoortinneqartarlutik. Taamatut naatsorsuinermi ataasiartakkanik plastikkinik pappiararsuarnillu nioqqutissiat kiisalu ataasiartakkat avatangiisimik innarliisussaanngitsutut nioqqutissai qanoq kaaviiartitsissutaatiginersut kisitsisini takuneqarsinnaapput.
