Illit peqatigalutit

Jeppe Jensen Pisortaaneq

ILLIT PEQATIGALUTIT Pisisartunik peqataatitsineq

KNI-p nerisassat, inuunermi pisariaqartitat ikummatissallu nunatsinni sumiiffinni tamani pisiortugarisarlugillu tuniniartarpai, maannakkullu ukiuni 250-inngulersuni taamatut ingerlatsereersimalerpugut. Nunatsinni inuiaqatigiinnit pigineqarpugut, taamaattumik pilersuinitsinni inuiaqatigiinni akisussaassusilimmik pilersuinissarput piumasaqaatitaqarpoq. Tamannalu niuernitsinni tunngavigilluinnarparput, tamannarpiaavorlu uagut qanoq ittuunitsinnik taama ittuutitsisorisarput.

Niuernermik ingerlatavut Polaroil, Pilersuisoq, KNI Engros aamma Neqi nunatsinni sumiiffinni tamani ingerlataraavut, Pilersuisorlu sumiiffinni amerlasuutigut pisiniarfituaasarpoq. Taamaattumik pisisartut ulluinnarni inuunerannut, peqqissuunissaannut atugarissaarnissaannullu annertuumik toqqaannartumillu sunniuteqarfigisarpavut. Taamatut inissisimanerput assiitsuuvoq akisussaassuserpullu annertulluni, kiisalu inuiaqatigiinni akisussaaqataanerput taamatut aamma nassuiarneqarluni.

Pisisartut ulluinnarni inuunerat uagut aamma ulluinnarivarput, ukiullu ingerlanerani periarfissat aporfissallu uagut aamma atugarisarpavut. Taamaattumik pisisartut pisariaqartitaannik sukumiisumik paasisimannippugut pilersuinitsinnilu assartuinermut tunngatillugu annertuumik misilittagaqarluta. Taamaattumik inuiaqatigiinnguani pitsanngorsaataasinnaasut pisisartut sapinngisamik peqatigilluarlutigit kivinniartarpavut. Taamatut inuiaqatigiinni akuulluta suliaqartarnerput nukinnik atuiffigisussaavarput atuiffigisarlutigulu.

Inuiaqatigiinni akisussaaqataanermi suliaqarneq tigussaasuussaaq, qanilaarfiulluni kiisalu pisisartut sulisullu akornanni ingerlanneqassalluni. Suliniutitsinnik nioqqutissanillu ineriartortitsinitsinnik pisisartutta naleqquttuusorinninnissaat iluaqutaasutullu isiginninnissaat anguniagaraarput - taamaattumillu suliniutitsinnut peqataarusussasut nioqqutaavillu atussagaat piumavarput. Inuiaqatigiinni akisussaaqataanermi pingaarnersiuineq aamma pineqarpoq: Suna tamaat ataatsikkut immikkut samminiarsaralugu suliniarsarigaanni ataasiinnarlunniit immikkut malinnaavigineqassanngilaq, taamaattumillu angusaqartoqassanani.

Nalunaarusiami matumani nunarsuarmi anguniakkani sisamat immikkut sammineqarput.

• Peqqinnissaq atugarissaarnerlu • Ilinniagaqarneq pitsaasoq • Akisussaassumik atuineq tunisassiornerlu • Suleqatigiinnikkut anguniagaqarneq Nunarsuarmi tamarmi anguniakkat ilaannut annerpaamik suliniuteqarfigisarput tassaavoq Peqqissuseq Atugarissaarnerlu, tassami maani inuiaqatigiit peqqissuunerat nalinginnaasumik ajorsiartorpoq. Naalagaaffeqatigiinnerup iluani nunatsinni ukiut inuuffiit naalagaaffeqatigisatsinnut sanilliullugu agguaqatigiisillugu ukiunik qulinik sivikinneruvoq, inooriaatsimillu tunngaveqartumik nappaataasartut ukiut 30-t siuliinut sanilliullugu ullumikkut akulikinnerupput. Tamanna inuiaqatigiit peqqissuunissaannut ajornartorsiutaavoq annertooq, taamaattumik peqqissuunissamut suliniuteqartarnerput assut pingaartipparput.