Arianna Tricomi Campionëssa Mundiela per l terzo iede

Freeride Ski

2020 ie na sajon superlativa per Arianna Tricomi, l talënt dl furné cui schi ora de pista de Corvara. Pra l Freeride World Tour 2020 vëncela per l terzo ann ndolauter, se consacran tl Olimp di freerider. L Freeride World Tour ie n cërtl nternazional de garejedes professionistics ulache i atlec furnea jù liediamënter da crëpsc scialdi erc, crian ora l percurs a nëif ntiera, fajan sauc y acrobazies de uni sort. L ie na disciplina che devënta da ann a ann plu populera. N sport spetaculer che se damanda snait ma nce preparazion y cura dl detail, davia che i atlec possa me furné jù un n iede dal crëp, y chël ntan la garejeda. Arianna ie fisicamënter al top ënghe sce puecia enes dan la tapa finela dl tour se ovela fat mel ala ciavidla. Cun n total de 24.000 ponc stlujla jù la sajon al prim post metan su nce si record persunel.

Arianna nasc te na famiglia de talënc sportivs: si oma fova tla scuadra nazionela dl schi alpin y si pere pilot dle “Frecce Tricolori”. Si oma ti à nsenià duta la disciplines dl schi bel da pitla insù: dal telemark al jì a nëif ntiera, mparan a se adaté a uni situazion. Do ngrum de ani de gares de schi alpin, passëla al slopestyle y rua nfin al freeride plu salvere y estrem. Bel da plu ani ie si pascion deventeda n lëur y si talënt y curaje ti à riesc purtà n gran suzes, ruan nchinamei a vester sponsoriseda dala Red Bull adum cun i mieur atlec dl mond.

Per la proscima sajon ulëssa la jëunna badiota miuré mo deplù l backflip, n “trick” che la sënt mo nia tan sie sciche l “360”, l’acrobazia che ëila fova stata bona de fé per prima ëila ntan na garejeda dl Freeride World Tour. Te chësc sport ne iel net nia

Foto: Zlu Haller VIDEO

de imporvisà y Arianna sà avisa sun ciun saut che la fej cie acrobazia, calculan autëza y lunghëza, studian avisa la linia che la uel furné danter l crëp ju. Davia che l ie n sport zënza federazion muessa uni atlet se alené da sëul. Propi chësta liedeza ti plej a Arianna, ëila se njënia ca fajan uni sort de atività, dal jì a crëp, al surf y sambën furnan scialdi cui schi ora de pista. L mpurtant per ëila ie vester n cuntat cun la natura. Coche d’instà canche la à plu tëmp y manco prescion cumpetitiva y ti sa bel a se de jù cun si verzon. Arianna resta na persona cun i piesc sun fonz ënghe do dut si suzes. Coche canche n ti damanda ciun che ie l plu bel post per ji cui schi ye ëila respuend la Dolomites, ulache la ie crësciuda su. O canche la conta de si studi de fisioterapia a Dispruch. Per ëila fovel mpurtant avei na segonda streda scencajo che la ëssa messù stlu jù cul sport da n mumënt al auter. Ma ntant iel mo ëura de pensé al presënt y ala proscima sajon dl Freeride World Tour.