LOS SIDROCOLES TORNEN A LLEVAR LA SIDRE A LES ESCUELES D’ASTURIES

Falo Nosti desplicando’l furrulamientu de la mayaora.

Trabayar cola reciella desixe un nivel de responsabilidá mui altu, asina que’n Sidrocoles decidieren aparar la so actividá fasta que la situación permitiere retomar les visites a los colexos col mínimu riesgu de xenerar contaxos. Agora tan de vuelta

Los rapacinos del Colexu Públicu Aniceto Sela foron los afortunaos deprendices de llagareros que cellebraron el primer Sidrocole de la “normalidá”. La mayada tuvo llugar el 18 de payares nel patiu la escuela, gracies a la collaboración de l’Asociación de Mas y Pas del colexu, que fueron los que ficieron les xestiones, y gracies tamién a la collaboración de los llagares xixoneses de Piñera y J.R que, pesia lo avanzao de la temporá y a lo escaso de la collecha d’esti añu, apurrieron dellos sacos de les sos mazanes pa que les mayaren los escolinos mierenses. De magar les nueve la mañana y en sesión cuasique ininterrumpía dica la una y media, rapacinos d’ente tres y doce años deprendieron de la man de los monitores de Sidrocoles lo que ye un duernu, unos mayos, una mayaora rabil o un fusu y comprebaron de manera práutica comu s’utilicen toes eses ferramientes pa facer la sidre.

Los piquiñinos del cole manexando’l rabil.

La curiosidá de los rapacinos nun tien llendes y gracies a les sos munches y perinteresantes entrugues deprendieron tamién por qué la mazana cambia de collor al mayar, d’aú vien l’alcol na sidre formientao, por qué s’echa la sidre, pero non la sidre’l duernu, qu’estrema una mazana de sidre d’una de mesa, por qué’l zusmiu d’estrumidora nun val pa facer sidre, les desemeyances pente la sidre qu’ellos llamen “de Navidá”, la del duernu y la d’echar, les propiedaes saludables de la sidre y fasta’l furrulamientu de la llei de la palanca, pente otres munches otres cuestiones que foron saliendo a lo llargo la mañana. En finando col llabor toos ellos pudieron tastiar un vasín de la mesma sidre’l duernu qu’ellos mayaren y que-yos gustó, según pallabres de los mesmos escolinos “más que la Coca cola”. D’ente los participantes yeren abondos los que sabíen de facer sidre, munchos ficiérenlo en casa, colos güelos o nel pueblu, pero pa munchos otros too aquello yera una novedá dafechu. Especialmente sosprendíos amosáronse los escolinos que nun lleven muncho viviendo n’Asturies, valiendo esta actividá p’averalos a la tradición del llugar onde viven, facilitando asina la so integración cultural. La mayada nun foi lo único especial que se cellebró nel Aniceto Sela esa mañana, yá que’l Sidrocole enmarcábase dientro de les actividaes del Magüestu 2022 que’l cientru cellebró bramente a lo grande, implicándose na organización d’una intensa y completa xornada dedicá a la tradición y a la seronda. Asina, nel mesmu patiu nel que se fexo la sidre’l duernu, xugáronse esportes y xuegos tradicionales entantu dellos puestinos ufrien información y tallerinos sobro agricultura y productos del campu, setes de la fastera, música’l país, encaxe de bolillos o cestería y una bones tolos cursos pasaren per toles actividaes, dempués de xintar les mazanes y prebar la sidre recién mayao por ellos mesmos, los escolinos aconceyaron por edaes pa facer una amuesa de bailles del país, con pieces comu la Polka y la Danza Prima que realizaron primero como ensayu xeneral a puertes presllaes y depués cara al públicu, pa esfrute de los pas que veníen a recoyelos.