SIDRE, BÉBORES ENFRESCANTES, CERVEZA... ¿DE QUÉ FALAMOS?

Aspeutu de delles sidres enfrescantes que se puen alcontrar nel mercáu.

Falar de sidre o de cider nun paez que seya oxetu de discutiniu importante; paez que solo ye l’usu de pallabres en dos llingües estremaes. Por embargo, tres d’ello hai una perimportante estremancia de productos, como la qu’hai ente una sidre natural y un productu de fabricación industrial nel que lo que menos s’alcuentra ye’l mostiu de la mazana ente augua, zucres, collorantes o arumes

Guindilles, ocle, castañes, xenxibre, ruibarbu, peruyos, mores, lúpulu, refrescu de cola… y milenta coses más puen atopase neses bébores modernes que tan surdiendo al mercáu col nome de ‘cider’, sidre n’inglés. Y ¿por qué n’inglés? Porque nel mercáu británicu les lleis dexen denomar sidre a una bébora fecha de magar una piqueña parte de zusmiu de mazana con añidíos d’augua, zucre, cítricos, gas carbónicu, arumes y amestaos d’otres bébores. Daqué qu’hai cuantayá que vien denunciando la organización CAMRA, que desixe qu’una bébora seya del 100% de mazana o pera pa que puea denomase llegalmente sidre o perea y que tamién ta en contra l’usu de los zusmios concentraos na ellaboración de la sidre. ¿Daquién pue imaxinar un vinu con taste a cerveza? ¿Non? ¿Ya otru vinu fechu d’augua mineral con zusmiu d’uva, collorantes y arumes? Tampoco, porque les lleis sobro’l vinu dexen nidio que solo pue dáse-y el nome de vinu a la bébora fecha de mostiu d’uva, y solo d’uva, formientao. ¿Por qué entós sí que pue haber sidre, denomada nel idioma que seya, fecha lo mesmo con componentes químicos que col amestao d’una montonera de toa triba de productos d’estremaos tastes y arumes? Lo que siempres se mos retruca ye la llei o, entá meyor, l’orixe de la llei, que nun ta nel país, sinón na Xunión Europea, que ye la que fai esa llei. Una rempuesta que mos paez enforma interesada porque les lleis supranacionales tamién vienen d’esi mesmu Parllamentu Européu. Asina que si’l vinu, vin, vinho, wine, etc, ye una bébora fecha de magar el mostiu formientáu de la uva, y la sidre, sidro, cidre, seidr, apfelwein o cider ye una bébora de mostiu que tamién pue llevar augua, zucre, gas, zusmios y arumes, la rempuesta a esta estremancia llegal ente elles nun ta nel tratamientu parllamentariu, sinón fuera del Parllamentu, nes organizaciones d’ellaboradores o, entá más claro, nes grandes indus-

Sidres industriales con taste a estremaes frutes. Exemplos de ciders fabricaes n’España por empreses cerveceres

tries del seutor de les bébores alcóliques. Y dicimos de bébores alcóliques, y non sidreres, por falar de les tresnacionales que controlen esti seutor. Hai dellos años pasáren-nos unes anéudotes que vamos cuntar. Una d’elles fuere n’Irlanda, nuna ciudá na que nun pub llocal nel que viéramos que teníen sidre de grifu, al pidir una pinta, el chigreru, que ya mos conocía d’otres vegaes y que tamién conocía Asturies, dixéranos que: “Esto nun ye braera sidre, como la d’Asturies, sinón una bébora fecha por una fábrica de cerveces; lo más asemeyao ye esa otra que ye lo que vustedes denoman sidre axampanao”. La otra anéudota pasárenos nuna cafetería de La Rioxa na que teníen aquella mesma cider de cañeru qu’habíamos visto en Eire y que, al entrugar un veceru cómo yera esa sidre, la camarera retrucó-y: “Una cerveza con taste a mazana”. Nes dos anéudotes mentamos la cerveza. Y tamién viníemos falando de les empreses cerveceres hai cuantayá, en numberosos artículos d’esta mesma revista LA SIDRA, porque, como yá dixéremos, les mayores inversiones nel mundiu la sidre viníen de la industria cervecera, y dalguna marca de vinu, que tan fozando por metese nes organizaciones profesionales del seutor. La European Cider and Fruit Wine Association (Asociación Europea de Sidre y Vinos de Frutas), allugada en Bruseles, axunta a delles organizaciones nacionales europees, asina como grandes empreses. Ente elles a l’Asociación Española de Sidres, con sede n’Asturies, o’l Syndicat National des Transformateurs Cidricoles de Francia. Pero tamién la tresnacional cervecera Heineken, d’Holanda, y la danesa Carlsberg; y xunto con elles otres tres perimportantes empreses: la belga Konings, empobinada al envasáu de toa triba de bébores, dende los llicores y la cerveza a les bébores enfrescantes y cafetos; la sueca Kopparberg, especializada nes yá perconocíes ciders industriales, bébores enfrescantes de magar frutes, augües arumaes y coctelería industrial de llicores con frutes, con alcol y ensin alcol; o la irlandesa C&C Group plc, ellaboradora de cerveces y sidres industriales nes islles britániques y de vinu y llicores per Europa, América y Asia. Echando una güeyada a los productos que comercialicen, per tol continente atopamos non solo les sidres gasifi caes britániques, sinón tamién les ciders que nos caberos años se merquen peles cafeteríes y supermercaos, como la cider Ladrón de Manzanas, producía por Heineken, o les ciders con estremaes frutes de Kopparberg.

La sidre gasificao ye la que más se merca nes islles britániques. Aspeutu d’una sidre alemana con refrescu de cola.

N’España tamién s’atopen estes bébores; Ladrón de Manzanas ellabórase na fábrica que Heineken tien en Madrid y envásase nes plantes de la empresa en Sevilla y Valencia; otra marca conocía asgaya ye La Prohibida, producía pola cervecera madrilana Mahou; ya otra más ye la marca Maeloc, de la compañía Custom Drinks o, lo que ye lo mesmo, la cervecera galega Estrella Galicia, que fai sidres ecolóxiques, masque tamién esplumoses y arumaes con una bayura de frutes d’estremaos tastes. Como pue vese, toes estes sidres, o ciders, como a les autoridaes d’industria y consumu yos pete llamales, tienen una carauterística común, la so presentación dientro la estaya de les denomaes ‘soft drinks’, les bébores enfrescantes, y non como braeres sidres de calidá. Asina les coses ¿a daquién y sospriende que demientres el caberu SISGA hubiera llagareros franceses qu’entrugaren por qué na sidre se permite ésto? Lo que de verdá sospriende ye que seyan tan pocos los llagareros que falen d’ello y qu’entá haiga requexos, como la islla de Madeira, na que nel so concursu ofi cial de sidre solo s’almiten les sidres naturales, les que nun lleven añidíos nin alteraciones na bébora.