KEREOPA TE RAU

TE WHAI MATAURANGA SMITH

DESCRIPTION Ko Kereopa Te Rau, 8 Tīhema 1871, Ahuriri

MAKER / ARTIST Samuel Carnell (1832–1920)

REFERENCE Māori portrait negatives (PA-Group-00468: 1/4-022022-G)

Ko te whiu o te kōrero i whina ki Tarimano, ko Te Aongahoro, ko te ruahine a Tawakaheimoa a kia rere ki mua ko Rangiwewehi e!

HE WĀHANGA NŌ TE WAIATA PĀTERE I TITOA E KATO FLAVELL

I te 21 o Pēpuere i te tau 1864 i tae atu te Karauna ki Rangiaowhia, he pā tata atu ki Te Awamutu. I reira rātou ka patu, ka kōhuru i te iwi o reira. Ko ētahi i kōhurutia i tēnei pakanga he wāhine, he tamariki. Ko te hoa rangatira me te tamāhine o Kereopa Te Rau i mate i te ringa o te Karauna. I te 22 o Pēpuere, i whawhai tahi a Kereopa Te Rau ki te taha o ngā toa o te ope o te Kīngitanga i te Hairini, he wāhi i waenganui o Te Awamutu me Rangiaowhia. E ai ki ngā kōrero o Ngāti Rangiwewehi, i reira ka mate te tuahine o Kereopa. I taua tau anō i huri a Kereopa ki te hāhi Pai Mārire, ā, i tonoa e Te Ua Haumēne a Kereopa rāua ko Pātara Raukatauri ki Te Tairāwhiti hei māngai, hei kaiwhakapāho i te whakapono nei. I Ōpōtiki a Kereopa i te tuarua o Māehe 1865, i te whakawātanga o Carl Volkner. I te marama o Māehe 1865 i āki a Kereopa kia whakawātia te mihingare nei a Carl Volkner nā runga anō i āna mahi muna. Ko ngā mahi muna a Volkner he tohatoha kōrero ki a Kāwana Kerei mō te whakatakotoranga o te pā o Rangiaowhia i mua i te kōhurutanga a te Karauna i te iwi o reira. I runga anō i ēnei kōrero i whakatau te minenga nei kia mate a Volkner, ā, ko Kereopa i whakaae nōki ki tēnei. I te rua o Māehe 1865 i herea te kakī o Volkner, ā, i whakairia ki te rākau whiro mate ai.

I aruaru te Karauna i a Kereopa mō ngā tau e ono. I noho muna ia ki te rohe o Tūhoe, ki Te Urewera mō aua tau. Nā te tokomaha o Tūhoe i mate i runga anō i tā rātou manaaki i a Kereopa, i tukuna a Kereopa ki Ahuriri, ki te whareherehere. I reira ia i whakawātia e te Karauna mō tōna hononga ki te kōhurutanga o Volkner. E ai ki te Karauna, nā Kereopa Te Rau i whakaoreore i ngā mahi whakamate i a Volkner. E ai nōki ki ētahi, i te rapurapu noa te Karauna i tētahi take kia taea e rātou te whakamate a Kereopa. I te mutunga iho i tutuki i te Karauna tā rātou i whai ai i runga anō i tā rātou mahi tinihanga. I te ata o te tuarima o Hānuere, i te tau 1872 i herea te kakī o Kereopa, i whakairi i a ia i roto i te whareherehere o Ahuriri.

I te marama o Hakihea i te tau 2012 i tukuna te whakaaetanga whakataunga o Ngāti Rangiwewehi. Ko tā te iwi o Kereopa, i hē te Karauna whakawā, whakatau i tōna kēhi, ā, kāore a Rangiwewehi i whakaae ki te whakatau a te Kōti kia whakamate i a Kereopa. Kei te pēnei tonu te whakapono o Ngāti Rangiwewehi i ēnei rā tonu.

He whakaahua tawhito tēnei o Kereopa Te Rau i whakaahuatia i te tuawaru o Tīhema i te tau 1871. Ko te kaiwhakaahua ko Samuel Carnell, ā, i whakaahuatia i te whareherehere o Ahuriri.