rechnungswesen & controlling 2·13 Swatsch Gap Fèr – de nöii Schwiizer Exportschlaager! De Niggi Hayek isch kän Mènètscher, sondern en Undernämer. Das macht en scho emaal simpaatisch. Èèr isch mit Swatch üsserscht erfolgriich – es richtigs Schwiizer Vorzeigeundernäme! Und wil èèr sis Gäld lieber i d Produkzioon vo Uure und i nöii Aarbetsplätz inweschtiert, und nöd is Papier für e hundertsiitige Gschäftsbricht, wott èèr vo IFRS uf Swiss GAAP FER wächsle, vomene Ständärd mit 3000 Siite uf äine mit 300. Das hät aber zümpftig Lämpe gèè mit de Schwiizer Börse, wil im SMI jedes Undernäme IFRS aawände mues! Drum hät d Schwiizer Börse e Vernèèmlassig gmacht. Die isch öppe 50 zu 50 usechoo. Di äinzelne Biiträäg sind na spannend zum Läse. So chlöönet öppe d Economosuisse, das si für e sonigi Vernèèmlassig vil mee Ziit bruuchi! Dèbii het sonen chliine Verband wie de veb.ch die i äim Wuchenändi chöne beantworte. E paar gschiidi Chöpf sind halt gschnäller als e Wasserchopf. D Uni Lausanne hät mee oder weniger äifach d Stellignaam vo de Swatch abgschribe. Uf Französisch, wills gmeint händ, die z Züri mèrkeds dänn nöd. Und bi de Banke sind d Analischte für IFRS und iri Aarbetgèber sind für Swiss GAAP FER. D Chöle sind ebe wichtiger als Transparänz. Und d Schwiiz isch halt plötzli doch nöd dèè grooss internazionaal Finanzplatz. Aber de Druck vo de Wirtschaft uf d Börse isch soo grooss gsi, das die d Swatch schlussäntli doch nöd usegrüert hät.
De veb.ch isch eigentli mee für d IFRS für di ganz groosse internazionaale Undernäme ade Schwiizer Börse. Vor allem drum, das s öis au im Ussland verschtönd, öises Alpe-Accounting. Suscht bin i au de Meinig, das es es riisigs Monschter worde isch, wo vil choscht, es Undernäme nöd würkli wiiterbringt und d Läser mee verwirrt als informiert. Schaad isch äifach, das de Swiss GAAP FER für börsekotierti Konzern nöd emal d Segmäntbrichterschtattig richtig verlangt. Es isch chuum zum glaube, aber d Migros bruucht IFRS sogar freiwilig. Vilicht gaat das äifach unders Kulturprozänt, oder si meined, sie müesed für iri groosse Verlüscht im Ussland au internazionaal Rächeschaft ablegge. Bi dère Glägeheit hani vo mim Lieblingsprofässer wele wüsse, wie das es dänn eigentli mit dem «true and fair» segi, mit dère einzige Waret i de Rächnigslegig: «Lieber Herbert», hät er gschribe, «Du kannst das gleiche Unternehmen nach IFRS, Swiss GAAP FER und U.S. GAAP bilanzieren und erhältst drei unterschiedliche Resultate!» Läck, die Ständärds sind doch äifach e fèrtige Mischt! Sisch nöd zum glaube! Jee nachdèm wie me rächnet, gits verschidni Ergäbnis. Das isch würkli es Mèèrli, das «true and fair». Am Schluss isch d Rächnigslegig nöd emaal en exakti Wüsseschaft – wo füert ächt das na ane.
Und vor e paar Tääg hät en ussländische Inveschtor aaglüütet und nach em Schwiizer Ständärd gfrööget. Ich tüeg ems schnäll durefaxe, hani gseit, aber er müesi uufpasse, bi öis i de Schwiiz segs i jedem Kantoon anderscht. De Niggi hät jetz no äis druuf gsetzt und de Gschäftsbricht scho uf Schwiizertüütsch useggèè. Und jetz hani grad na s’ Nöischt us Biel ghöört: er wott s nèèchscht Jaar nume de Chèèrn-FER aawände! Ich mach jedi Wett, das d Schwiizer Börse namal de Schwanz iiziet! Ooni Vernèèmlassig.
Herbert Mattle, Präsident veb.ch
Das offizielle Organ des veb.ch, des grössten Schweizer Verbandes für Rechnungslegung, Controlling und Rechnungswesen