I-I-Igitt!!

Wie kennt en net – dee gielzeg pechege Schmorri, deen un onsem Fanger pecht, wa mir ons an d’Ouer gefuer sinn. Et ass den Ouereschmalz. Mee wéi kënnt deen dann iwwerhaapt an onst Ouer a wat mécht en dobannen?

Den Ouereschmalz, deen an der Wëssenschaft Cerumen genannt gëtt, ass näischt anescht wéi de Wëschmopp vun onsem Ouer

Hie suergt dofir, datt de Gank vun der Ouermuschel bis bei d’Trommelfell propper bleift a mir gutt héiere kënnen. Dofir hu mir am Ufank vum baussenzege Gehéiergank Drüsen*, déi eng pecheg, fetteg, giel-brongelzeg Flëssegkeet an d'Ouer lafe loossen. An dëst Ouerefett huet gläich eng ganz Rëtsch vun Aufgaben.

Ouereschmalzdrüs fein Hoer

Ouermuschel

Stëbs an Hautpartikelen

Ouereschmalzdrüs

Un him bleiwe Stëbs an ofgestuerwen Hautzellen aus dem Ouer pechen. En ass och eng Barrière fir Bakterien, déi Krankheeten am bannenzegen Ouer kéinte verursaachen. An och kleng Krabbeldéieren, wéi Insekten oder Spannen, fannen Ouereschmalz net cool a bleiwen dofir aus dem Ouer eraus. Donieft hält d’Fett am Ouereschmalz d’Haut bannen am Ouer schéi geschmeideg, sou datt se net ausdréchent oder kleng Rëss kritt.

* Drüse si kleng Fabricken am Kierper, déi eng Flëssegkeet (Sekret) produzéieren, déi de Kierper brauch fir ze funktionéieren.

Den Ouereschmalz gëtt vun onsem Kierper dauernd erneiert. Dat „Knaschtegt“ gëtt mat Hëllef vu butzegen Hoer am Ouer a Richtung Ouermuschel gedréckt; d’Beweegunge vum Ënnerkifer hëllefen hinnen dobäi. Wien also vill schwätzt oder vill knat, deem seng Ouere gi méi séier propper!

Et kann nawell virkommen, datt den Ouereschmalz déif an de Gehéiergank erakënnt, bis virun d’Trommelfell. Dat ka geschéien, wann een Ourestëppeler benotzt oder ëmmer kleng Kopfhörer am Ouer huet. Dann dréckt een d’Ourefett, wat erauslafe wollt, nees an d’Ouer eran. D’Resultat ass eng grouss Bull vu Schmalz ganz hannen am Gehéiergank: et huet een e Stopp am Ouer an et héiert een net méi esou gutt. Dësen ongemällege Fettklomp kann awer vum Ouerendokter erausgespullt ginn an dann héiert een nees wéi virdrun.

Wéi kann ech meng Ouere botzen?

Wann s de dengen Ouere wëlls hëllefe fir den Ouereschmalz erauszekréien, da lee däi Kapp liicht op d’Säit a wësch d‘Ouerefett mat wotlechem Waasser an engem fiichte Läppchen einfach op. Wichteg ass, datt s du net mam Läppchen oder engem Stëppeler an de Gehéiergank erafiers, well do kéins du dat empfindlecht Trommelfell verletzen.