Ech si giel a schwaarz, fënns du eraus wien ech sinn?

Et ginn enorm vill Insektenaarten op der Welt an all Insekt spillt eng wichteg Roll an der Natur. Zu den Insekten zielen och d’Beien, d’Harespelen, d’Runnen an d’Mécken. Si hunn, wéi all d’Insekten, 3 Kierperdeeler a 6 Been.

Verbann d‘Insekt mat der richteger Beschreiwung.

Oft geheien d’Mënschen all d’Insekten déi giel a schwaarz gesträift sinn an een Dëppen. Kuckt ee sech si awer mol méi genee un, mierkt een, datt si u sech ganz verschidde sinn.

Ech gesinn änlech aus wéi d’Hunnegbei, mee ech sinn awer keng. Ech hunn e grousse Kapp mat grousse Facettenaen*. Ech picken net a fléie séier wéi de Blëtz no vir an no hannen.

Déi meescht Mënsche sinn net esou frou mat mir, obwuel ech ganz gutt am Bestëbse sinn. Et gesäit bal aus wéi wa mäi Kierper an zwee gedeelt wier. Ech ka ganz dacks picken a komme gäre bei dech op den Iessdësch.

Ech sinn éischter brong a schwaarz gesträift an hu relativ vill hell Hoer um Kierper. Ech spillen eng wichteg Roll beim Bestëbse vun ville Planzen an transportéieren de Pollen an engem Pak u mengen hënneschte Been.

Ech wunnen am Buedem an hu ganz vill schwaarz Hoer u mengem Kierper. Ech hunn e kuerze Rüssel fir Nektar ze drénken, dobäi huelen ech och ëmmer e gudde Pak Polle vun enger Planz bei déi aner mat.

Mech kenns du bestëmmt, ech maachen nämlech eppes wat déi meescht Mënsche ganz gären op d’Schmier oder an den Téi maachen. Ech sinn éischter dënn an hunn och ee laangen, dënne Rüssel. Mat dësem sammelen ech Nektar. Och ech spillen eng wichteg Roll bei der Bestëbsung, fir datt s du vill Uebst a Geméis plécke kanns. Wann ech picken, da stierwen ech.

Ech si relativ grouss, meng Kinnigin ass souguer 4 cm laang. Ech picken, mee nëmme wann ee mech ganz no bei mengen Doheem stéiert. Lo wëlls du bestëmmt wësse wou dat Nascht ass. Ech verroden dir et, ech wunnen an huele Bamstämm, am Kamäin oder an Hielen, an dat all Joer op der nämmlechter Plaz.

*Facettenaen: esou nennt een d’Aen vun den Insekten. D’Insekten op dësen zwou Säiten hunn zwee Facettenaen. All Facettena besteet aus ville klengen Aen.

Harespel ass en eelert lëtzebuergescht Wuert. Am hënneschten Deel vum Wuert stécht dat däitscht Wuert Wespe oder dat englescht Wuert wasp. Den éischten Deel (Har) bezeechent d’Pick (oder och de Stachel) vum Insekt.

Zeechen eng Form op däi Stoft. Huel däi Lineal an zeechen ongeféier 4 cm ronderëm déi nämmlecht Figur.