NOS VISION

Nos lo ‘jumpstart’ nos economia cuminsando cu turismo cu ta nos fuente di entrada mas importante y nos lo pone Aruba back riba e caminda di sostenibilidad. Cu un mercado laboral bou presion, nos lo percura pa mantene cuponan di trabou y crea oportunidadnan nobo. Unda cu ingresonan di famianan a baha substancialmente mientras cu costo di bida a aumenta, nos lo percura pa e deterioro di poder di compra wordo frena. Unda salubridad a conoce recortenan drastico den memey di un crisis, nos lo percura pa esunnan cu mas mester di dje sigui haya e cuido necesario. Nos lo duna contenido na e principionan acorda politicamente cu Hulanda sin pone na riesgo nos relacionnan den Reino, pero si respetando nos autonomia.

Na vispera di e eleccion parlamentario di dia 25 di juni proximo, Aruba ta confrontando un crisis di salubridad, un crisis economico y un crisis di gobernacion. Decisionnan robes tuma pa gobernantenan sin dialogo y trato digno pa esnan directamente afecta, ta empeora e efecto di factornan externo riba nos sociedad. Dialogo cu gruponan di interes y gremionan den nos comunidad a wordo ignora di tur forma; decisionnan importante tabata wordo impone sin ningun forma di consulta. Den cuatro aña di gobernacion no a realisa projecto, ni reformanan pa soluciona problemanan structural, mehoracion di calidad di bida of bienestar di nos ciudadanonan.

AVP ta compromete su mes pa reinstitui dialogo den tur area di maneho y gobernacion y tur decision mester ta sostenibel y inclusivo den liña di e 17 Metanan di Desaroyo Sostenibel proclama pa Nacionan Uni.