I. ECONOMIA Y LABOR

Turismo ta e prome industria cu lo wordo revitalisa. Lo enfoca den prome instancia pa mantene y recobra cuponan di empleo. Esfuersonan pa aumenta airlift y determina ciudadnan cu ta wordo defini como ‘sigur’ pa aerolinanan y cruceronan ta haya preferencia. No solamente e actividadnan economico mester aumenta, pero e reparticion di e crecimento tambe mester ta husto. E pandemia a siña nos cu e cadena alimenticio for di exterior ta uno hopi vulnerabel. Un economia di conocemento mester keda haya e atencion y circularidad den nos economia mester aumenta pa evita salida di divisa y crea desaroyo di experticio. Lo logra e combinacion ideal entre crecemento economico, reparticion di e crecemento aki den entrada y condicionnan digno, como tambe creacion di cupo di trabou.

Puntonan di accion:

• Mantene, recobra, crea cuponan di trabou y diversifica mercadonan cu enfoke riba un poder di compra mas halto y airlift; • E maneho di turismo mester ta dirigi riba maximalisa e entradanan y sigura cu entradanan aki ta woro distribui den forma mas husto den henter e comunidad, mientras ta minimalisa e cantidad total di turista cu ta bini Aruba.

• Riba plazo largo mester basa meneho di turismo riba e atraccion di nos naturalesa, cultura y herencia. Pesey e mantencion di esakinan ta sumamente importante. • Inclui recomendacionnan di e cumbre di turismo di e paisnan G20 na Roma den maneho di turismo mediano y chikito, dunadornan di servicio y trahadornan independiente mester wordo incentiva urgentemente pa por recupera di e recesion economico y duna e sosten necesario na sectornan cu a crece durante e pandemia; • Duna sectornan noturistico atencion extraordinario, manera agricultura, horticultura, cria y pesca y trece mas seguridad alimenticio y circularidad den nos economia;

• Uza un minimo di tereno habri pa construccion nobo y renoba of reconstrui edificionan existente y sigui promove “calidad di bida”; • Conscientisa departamentonan di gobierno pa duna un mihor servicio pa medio di digitalisacion unda cu e ciudadano ta wordo considera un cliente y por monitorea e proceso; •Crea financiamento faborabel pa sector priva por haña acceso na capital mas facil y liher den cooperacion cu institutonan financiero y Banco Central.Aumenta acceso na capital pa empresanan. Studia e balor agrega di uzo di “digital currencies” na Aruba; • Acelera proyectonan sostenibel y cu un rendimento efectivo pa nos economia; • Finalisa procesonan di rehabilitacion di e refineria of duna e terenonan un destinacion nobo; • Lanza un campaña pa stimula industrianan creativo unda cultura y creatividad ta central den tur actividad. Nacionnan Uni a declara e aña 2021 como aña di industria creativo; • Hunto cu sector priva lo explora introduccion y incentiva un sistema di “apprenticeship” unda cu por cubri e necesidad profesional di e mercado. •Stimula desaroyo economico y social den tur districto di nos isla, haciendo uzo responsabel di e caracteristicanan, tereno y deseonan di habitantenan di cada districto y bario. Haci uzo di entre otro instrumentonan fiscal pa stimula desaroyonan desea. Den e cuadro aki e districtonan di Noord y San Nicolas lo haya prioridad. • Den dialogo cu partnernan social yega na formanan real pa reparticion mas husto di e peso financiero di nos comunidad y di e frutanan di futuro crecemento economico.