puisi-puisi ni kadék ayu kembariyani

Wayan Jengki Sunarta

Pangurip Bali

Bali..... pulau alit nanging ngulangunin Bali trepti, Bali santi kakardinin Dresta luih kasungkemin Mangulati, subakti ring hyang widhi Ngaturang bakti ngalungsur pamargi Malarapan tirta sanjiwani Bali..... Bali ajeg mabasa bali Basa Bali pinaka taksuning jagat Bali Pamekas jadma Bali, patut nyungsung sastra muah aksara Bali Seni lan Budaya sané nguripin jagat Bali Dreda suci heneng heninging budhi Raga Bali eda masebeng mabet pangus Awak enu truna cara pitiké belus Eda nagih cara anginé satata ngalilus Ngiring ajeg Bali mabasa alus Wiapi wiapakané kasengguh Mogi sida sakadi aketélan damuh Awaluya aketélan nanging ngawé dayuh

I Covid Siangolas

Tusing kena baan nyambatang Tusing karuan baan ngundukang Tekané ngansan ngebekang Tusing kena baan ngenehang Ia né teka nyakitin Sangkaning gering ngawinang sakit Geringé ngaé bingung.

I Covid Siangolas Buduh muduhin buduhang Mapuara makejang katakonang Takut pesu uling pekarangan Takut ngalih liang Takut nyujur lempuyang Makejang ento kawatesang.

Apang gelis nemu galang Apang nyidang ngalih liang Apang lega melali milehan Lemahé jaga kajagayang Mogi gelis kaicalang I Covid Siangolas.

Surya Sasangka Semara, 2020