ЙИСАТ УLА, АРТНАТ УLА, ХАНТЫ МИРЭВ НУПТАH ЯСАH! Яlаптаl тыlащ хутмет хатl 2001-мет таl вуш эваlт этты питас
Российская Федерация Ямало-Ненецкий автономный округ Газета №14 (744) Lапат хутмет (суббота), Ункер тыlащ (апрель) 4-мет хатl 2015-мет таl
Вуlы шавиты ёх кассат Тампуш Lорвош районан Тащ шавиты ёх емаh хатl Мужи вошан ус. Айкер тыlащ хус оlаhмет па хус кимет хатlатан район ар вош эlты «Мужевский» совхоз па «Горковский» совхоз тащ шавиты ёх тохи актащисат. Айкер тыlащ хус оlаhмет хатаlан аlаhсахат мохет Мужи воша хой lый ухаllаlан ёхатсат, хой вездехотан, вахтовкайн тусайт. Ёхатмеl юпийн мохты леккар хота медосмотра яhхсат. Леккар хот юпиян Мужи вош няврэмат утаlтыты хотан ёшпос понтсат, ёхтам верэl каштысэl. Утаlтыты хотан вуlы шавиты ёх ураhан каш верса. Няврэмат па ун хоятат арысат па яксат. Щита ханты па рущ якат, арат эталтысаят. Вуlы шавиты хоятат умащlыман ханты ар арыйм хоятат пеlа вантсат. Арат, якат кутан куща ёх яма рупитты хоятата ишак нэпекат па мойlапсаят юкатсат. Хоккейный корт «Хоккей» хоща Мужи вош па Lапатнаhк командайт кассат. Хой lаhхаса, щи яhхты верытас. Щи пуляh утаlтыты хотан тащ шавиты ёх кущайlаl пиlан совещание версат. Щита потарса тащ ёх уlапса эlты: хой еllы тащ ёх кутан кущая питаl, хой рупитты хащаl, хой вошан хащаl, муй верты хащам таl lаварт ус, хой кентат ус, хой ар вуlы энмаlтас, муй план щиран еllы уlты питlат.
Етн ёнтты, якты программа «Ритмы Севера» верса. Щита Илья Никитич Максаров, Олег Вениаминович Максаров па Денис Игоревич Талигин lый кутlаlан кассат – хантэт ёнтты щират этаlтысат, монщат мощсат, потар шупиет потарсат, амамщlысат… Касапсайт манам хуват ныlа, щи ёх ар уятlат, туса вератlат, каркама рупитlат. Кимет хатl аlаhсахат тащ шавиты ёх хорама lэщатам вуlэh ухаllаl пиlан ЦДиНТ хоща актащсат. Щиlта Ас ёхан сыl, хота емаh хатl верса, унты и юпиян мантсат. Ихощъяh щёсан емаh хатl пуншса. Кущайт хошам ясаh вуlы шавиты ёх ураhан ястасат. Каш верты хоятат арэмисат. Щи ураhан нэман Пулhавт эlты Окружной центр нацональных культур артистhан Валентин Вальгамов па Владислав Озелов па ханты фольклорный группа «Lорвош нэhат» Lорвош эlты ёхтыlысат. Тынасты хоятат рупитсат, декоративно-прикладной искусство выставка ус, шай инщты тахайт (временные кафе) lэщытсаят. Хуlам вуlы хот lонщиlыса. Катн хошмаlтыты па шай инщты ураhан, ит пормас этаlтыты (выставка) ураhан верыlыса. Хой ищкиян потса, рахас хота lоhты, хошмаlтыты. Щита шайн ищаlтысаят, потам, кавартам хуlан, нёхиян lапатсаят.
Станислав Лонгортов
Семен Озелов Катхощъяh щёсан касты щи питсат. Оlаhан вуlэh ухаlан ёх кассат, lый юпиlаlан нэhат. Хоl яха няlъяh няl хоят кассат. Ёх кутан «Мужевский» совхоз тащ хотан рупитты ху Андрей Васильевич Пугурчин оlаh места мощатас. Нэhат кутан «Мужевский» совхоз тащ хотан яhхты нэ Любовь Васильевна Талигина мет сора вуlыян яhхтаl. Lув ясhаl щиран, рутlаl иса тащ шавиты ёх емаh хатlатан касlат па нох питыlыlат. Оlаh места вуям хоятhан кинмтак lонщхопан юкатсайтан. Вуlэh ухаl юпиян lохан кассат. Ёх кутан «Мужевский» совхоз тащ шавиты ху Юрий Филиппович Артанзеев нох питас, нэhат кутан Любовь Васильевна Талигина оlhа ёхтас. «Тампуш еша lаваршак касты. Шэhк кераh па lохат ульhая хаттlыlат», – Юрий Артанзеев ястас. Щаlта ёх тынщаh сува ёваlмисат. Мет ар пуш питас «Горковский» совхозан рупитты ху Леонид Дмитриевич Тайшин. Ищи тынщаh ёвlам «Горковский» совхоз вуlы шавиты ху Никита Ильич Максаров ясаh щиран, ёхи хащам ёвlам хоятата lавартшак сува питты ус, венш пелак эlты вот поlты питас. Хуlам пуш хой хувашак наврам тахайн (тройной национальный прыжок) Гавриил Петрович Лаптандер нох питас. Юраh курпи ёх ухаl шоппи наварсат. Мет ар –
сотхутъяh ухаl Эдуард Эдуардович Лонгортов навармас. Ёх кастэl пуляh, хой хоятат хорама ёнтам lумтам сохlаl, вуlэh ухаllаl, нэhат ухаllаl этаlтысат. Сценая хорам сахаh, молщаhан, ханшэh ваян, ханшаh милаh, сыяh лыптаh антапкеlаh нэhат па икет, умащ порхаяh няврэмиет этlысат. Сохlаl этаlтымеl юпиян, нэhат хорама lэщатам нэhат ухаllаl па ёш ухаllаl этаlтысlаl. Щи арат тус пормасат туп тащ ёх емаh хатаlан шияlыты рахаl. Мет юраh ёх юращсат. Юх кат пелка таlсат па пертысысат. Юх кат пелка таlман Леонид Дмитриевич Тайшин нох питас. Пертысыман юращман «Мужевский» совхоз тащ хотан рупитты ху Виталий Николаевич Озелов хоl ёх иl паятсаllы. Щи юраh хуйhан анта оlаh пуш Тащ ёх емаh хатlатан юращман нох питыlыlтан. Хой тащ ёх няврэмат антиlаl, ащиlаl касты эlты, детский сад «Олененок» хоща няврэм шавиты нэhатан шависаят, ётаlтысаят… Мет юхат Любовь Васильевна Талигина вуlэh ухаlан нох питам нэ РФ гимн хуlатман РФ флаг юха нох таlас. Патлама йиты питаман емаh хатl воlытты питса. Оlаh места мощатам хоятат касты верат хоща рупитты кущаятан хошам ясаншан ястасаят, ишак нэпекан па мойlапсаян юкатсаят. Валентина РОХТЫМОВА ханшам потар па верам хорhан
2
№14 (744) Lапат хутмет (суббота), Ункер тыlащ 4-мет хатl 2015-мет таl
Надым мув уйтантапсайт
«Кочевой семья» конкурсан уlам катhан Тампуш Надым воша Lорвош район эlты Талигинат семья ёхтыlыйс. Игорь Анатольевич па Любовь Васильевна хувтэlан тащ хотан рупитlатан, няврэмlын щита энмаlсыllын. Семья верат касапсайн lын устан, «Приз зрительских симпатий» lын семьяяна мойlаса. Любовь Васильевна ёхтам вераl эlты щиты ястас: – Мин веlщи там ун воша ёхтыlысман, машинайн няврэмhиlаман пиlан ёхатсув. Тата «Кочевая семья» конкурс хоща арысув, яксув, куща нэlув ястаlат, щира lэщатымев. Нэман ар ант lэщатсам, нэман як ант lэщатсам, муй антем-ащем эlты нумlам, щитlам потарсаlам. Антем манэм арыйм ишканщапем тата еl арэмасэм. Тата уlты ур имиlам lув нэш руководитель тайlат, щи хоят пиlан ёша-кура ты ёхатмеl, тыlащ сайн lэщатымеl, якlаl-арlаl, сцен-
кайlаl вермеl. Ма ханты мирэм щир, уlапса иса ястысам, моlтас ант потарсам. Муh няl хоят ёхатсув, эвем Анюта, похем Степан. Эвем, похем, ащеl па сохан lэщатысlам, конкурсан этаlтыты ураhан. Щаlта район эlты ювам кущайlуван хайсаюв па сохlув ёlан ищи хащсат. Муйн усув, щиты ты ёхатсув.
Талигинат семья
– Няврэмlын еllы вуlы хотан яhхты lаhхаlайт? – Няврэмlув Кеван яhхты lаhхаlайт, lувиlаl каш, айеl-унэl. Туп каникулы пора ёхатаl, мохты вуlы хота уратlат. Авккайlаl ёхатlат, lувиlаlа умащ. Ма ащиlам, антиlам, опращlам хоl Кеван яhхам хоятат. Муh ищи lаhхаlаюв вуlыйн яhхты. Щишан, ма няврэмlам утаl-
тыllам вуlы хотаh ясhа, вуlы хотан муй щиран уlты мосаl. Муh ханты уlапсаева шеhк эваllув. Вуты охев эlатlа ки, няврэмlув мосаh яhхты питlат. Щишан уlапсаев еllы туlа, ханты щирэв. Щи уlапсаев етшаl ки, ханты хоятат хоты еllы уlты питаl? Манэма шаль, вуlы хот вер еllы ат уl, там ванты катра йис пора вер. Манэма шеhк ям там умащ уlапса. Конкурсан эвием ай потаршупие потартас. Lув нопсаlан ишкащаl, муй уlапсайн lув уl: Вуlы хотан яhхlам ма, Антем-ащем Кеван яhхаl. Ханшаh сахпи эвие, Саlтам вайh эвие, Картэh сэвпи эвие, Ун охшамаh эвие. Ун ащиlам Кеван яhхсат, Уна йиlам, Ищи Кеван яhхты питlам.
кутапан
Верантты имие
Лидия Ледовна Вэлло
Надым вошан емаhхатаlан тынасты харан каман хорпи ёнтам-верам пормасат тынысайт. И ур ими пиlан потарсаман. Нэмаl Лидия Ледовна Вэлло. Яh таlа ювмаl, хоты lув воша эвиlаl хоща касаlмаl. Пенсийн уl, рупитты яhхаl, пора шиттаlан, ёнтасаl. Верантты шеhк самаh, буркайт, тупрат, сувенират вераl. Потрэман ханты ясhа толмащтасэм. – Лидия Ледовна, ёнтасты кепаl, вуlы сох хоlща уйlыlан? – Вуlэh хоятат эlты, рутlам эlты кепlат lутlам, сот-катсот кепаlан кашh таl lутыlыlам. Тата вошан балконан татlасlам. Тухаl ишан машинайн
щутщаты унта яhхlув, щита ищи ётлащlам, нампарlаl ат хащlат. – Наh ур хотан энапсан? – Ащем вой веlты хуя ус. Там Надымский муван хоятатан яма уйтса, планlаl иса тэкаптысlы, медалят тайс, газетайн lув эlтэl ханшиlыса. Манэм хуlамхощьяh таl ус, хун lув парас. Яh няврэм антев хоща хащас, ма уншак. Антев ёнтасты тус нэ ус, атаhхатl верантас. Щишан щи муh ин ищи аl омасты ант хошlув, куш вошан уllув. Ашкуlа етшаптамем юпийн садикан рупитсам. Щаlта вуlы хотаh хоят хоща мантсам, няlхощьяh таl касlысам. Тампуш хус кат таlа йис, хоты ийкем парас. Lув пармаl юпийн ма «Ныдинский» совхосан мехмастерскойн рупитты питсам. Ин па няврэмlам пиlан тата уllам. – Наh тупрат па тыныlан, lутlайт? – Тупрат яма lутlайт, уна ёнтlыlам, рущ икет курlаl унат. Lув хуl веlман, вой веlман яhхтэlан тупрат тайlат. Моlщаhат ёнтты па партlат. Муh ёнтlув щи. Lувиlаl хошам, манэма нётап ох. Муh мувеван lапкайн тыныты сохан хув яhхты ищипа ант верытlан, потlайн. Щимащ ям нопсаh имие пиlан потарсам. Рущ рупатайн рупитаl, ёlан ёнтасаl, тынасаl, няврэмlаlа онтас вераl, вещката уl.
○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○
○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○
Пиlнэhhан
Альбина Тырлина па Ольга Няч
Ольга Няч па Альбина Тырлина пиlнэhан, Пулhавт вошан колледжан яха утаlтыман. Хуван рупитlаhан, семья тайlаhан, там емаh хатаlн Надым вошан уйтатман. Ольга Рамильевна Пуровский районан Самбург вошан ашкуlайн нийlхус таl утаlтыты нэhа рупитаl. Самбург ашкуlайн няlсот ветьяh няврэм утаlтыйl, арпелак шоши муваh хоят няврэмат. Утаlтытэl сыс интернатан уllат. Щита рупитты воспитателят хоl ур ясаh уйтlат, няврэмат пиlан потарlат. Ашкуlайн яртъяhмет класс унты ур ясаh утаlтыlат. Ун вошата олимпиадаята яhхlат, оlаh местайт уlат. Щишан ясhеl ант ёрэмиlэl. Щи муван ур ёх тумпийн саранат па касlыlат, кат стойбище уlтаl, Рочев опращ нэмпи хоятат вуlыйн хоlна яhхlат. Щимащ айкеl муh газетаева верас Ольга Рамильевна Няч.
Клавдия МАКАРОВА lэщатам лопас
3
№14 (744) Lапат хутмет (суббота), Ункер тыlащ 4-мет хатl 2015-мет таl
Ун ляля юкантам потрат
Ун Ляль верат кашаh тахайн нумlайт Lапатъяh таlа ешовl щи йиl, Ун Ляль етшом таl эlты. Щит шек lаварт ляль ус, немащ фашистат муh мувев иса ёша вуты вутщисэl, па юрлэhкеl шимаl уlтмаl. Советский Союз ёх йи lаhкарн мувев сайlаты lойсат. Lаварт шука питыlыман, юр и яха понтман, кутн-кутн нётман, ищипа муh хон
мув хоятlав щи ляльн нох питсат. Па анта туп lый нох питсат, па хон мув хоятата па нётсат, фашистат lый мувlаl эlты еl воштаты. Lорвош мув эlты па ар хоят ляля яhхас – нэпек щирн 1634 хоят, 626 хоят па ляль хар эlты ёхи ант ёхтас, 1008 хоят па ой таймеl па рут мувеlа ёх-
тыlымеl. Ун Ляль верат эlты Lуп-хары ашкуlа музейн па ханшман уl. Музей кущая щата Конева Светлана Григорьевна уl. Муh щаlта лялясом хоятат эlты lуhатсув па тый, газетаева па ханшlув, па хоятат lый эlтэlа ат уятlат. Ханты хоятат йис тэlн пошкан эlты яма эсаlаl, щит
ураhан муh рут мув хоятlав иса «стрелок» званияйн усат. Кунавт эlты, Касом нёl эlты па Lупхары эlты lа-патьяh пеlа и хоят тутлийм, туп хут хоят ёхlы ёхтыlымеl: И.Я. Конев, Н.А. Литва, Л.З. Пузланов, А.И. Русмиленко, А.А. Рылов па М.М. Уксюмов.
○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○
Lый ляль харн шук вантсат
Великие Луки вош сайlам хоят
Л.З. Пузланов
Лазарь Захарович Пузланов Шишиhкуртан сэма питас. Хун нийlхус таlа йис, Ун Ляля вуса. Калининский фронтан лув ляль вераl тусlы. Па соlтанат пиlн Торонец станция хоща (Великолукская область) ляль пормасат ун базайн (военная база) шавийс. 1942-1943-мет таllуhатн хон мув ляль кущайlав Великолукская операция верыlысат, щи операция щирн, немщат и яха мухаlты мосас па щиты паратты. Операция номас поном щирн манас, па яlоп таl кимет хатаlн Великие Луки вош эlты
немщат еl вощкисайт. Каматса пуш немщат база нох вуты вутщисат, соlтанат па такан lоймел, немщат ант эсаlтмеl. Лазарь Захарович шуhат кашlы няврэмlаlа ляль верат эlты потартыйс, таhха, самаlа lаварт ус щи эlты па нумаlматы. И пуш па щи эlты ястыlымаl, соlтанат иса lэllы уlтмеl, ищкия потом картопка карат lэвмеl. Па муйщир вера ляльн хоят ант питыlыйl. И пуш па щимащ вер уlтмаl. Соlтанат моlты сый хуlтмеl, нумастэl: щит немщат кар-
ты кеl пушас хуват вуратlат… Щит па … ун кураhвойшики уlтмаl, карты пушаса тохи тахартlомаl. Лазарь Захарович шуhат пошканl аlэмомаl па нёl эсаlтмаl, кураhвой иl щи питмаl. Муй арат амат щата уlтмаl! Лазарь Захарович шуhат мойlопса медальн мийлиса – «За отвагу». Щит шек ун мойlопса. Туп апраh, таксары па паlтапlы хоят щимащ медальн мойlыlыса. Лазарь Захарович рут муваlа 1947 таllуhан ёхтас. Аhкеlн ёхlы вохом, ёlн шука питмеl: ащеl партмаl, аhкеlа нётты мосас, апщиlаl хонна аят уlтмеl. Ляль юпийн Лазарь Захарович шуhат хуl веlтман, вой веlтман ус. Семья верыlыйс, няврэмат сэма питыlысат, энмиlысат. Тухlат ин па Lупхары вошн уllат. 1971мет таllуhан Лазарь Захарович парас. Примечание: Л.З. Пузланов шуhат эlты Зоя эвеl шуhат потартас, А.С. Дьячкова (Мужи вош эlты) па потар нэпека поныlысlы.
Медаль «За взятие Берлина» lув тайс Афанасий Иванович Русмиленко шуhат 1911-мет таllуhан Lохащ куртан сэма питас. Ун Ляль питом порайн lув па ляля вуса. Москва вошев немщат эlты сайlыlымаl, Киев вош эlты немщат воштаты па нётмаl. Щиты, лялясман, немщат мет ун воlаh вош унты – Берлин вош унты ёхтыlымаl. Каматса пуш мушмиlтыйм па ищипа, таlаhа ювиlыман, па па еllы лялясмаl. Апраhа, паlтапlы уlмаl ураhан
«За отвагу» медальн мойlыlыса. «За взятие Берлина» медаль па тайс. Щи lаварт ляль юш Афанасий Иванович таймаl. 1946мет таllуhан lув рут муваlа ёхlы ёхтас, семья верыlыйс, похат-эвет имеl пиlн саhкаlтыстын, энмаlтыстын. Иса хуl веlтман, вой веlтман ус. Семьяйl пиlн оlhа Lохащн ус, щи юпийн Lупхары воша касlыlыйс. Няврэмlаl па хиlыlаl ин па Lупхары вошн уllат.
○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○
«За победу над Японией» медаль тайты хоят
Касом нёlн щимащ семья ус: Анатолий Александрович Рылов шуhат па Ираида Николаевна Рылова шуhат. Хоят пеlа щикем ям хоятhан устан, хантэт кутн уlтман, аlмунтыки, хантэт усат. Lапат няврэм тайсатан па энмаlт-
сатан. Хоlыева утаlтсат, рупатlат, няврэмаhа йисат. Тухlат Lупхары вошн уllат, тухlат па па муват пеlа мантсат. Ай порайн уlтман, хуллисом, lув па Ун Ляльн лялясмаl, туп унашик ювман, щи эlты аршик уятты питсом.
Рылов Анатолий Александрович шуhат 1918-мет таllуhан Ёмвош округан Микояновский районан Мэhкатнёл куртан сэма питмаl. Щата ашкулая ярхиlымаl, няl класс етшиlымаl. 1941- мет таllуhан ляля вуйм, Дальний Востокан оlhа сапера уlтмаl, щи юпийн па стрелока поныlыйм. 1945-мет таllуhан медальн «За победу над Японией» мойлиlыйм. Ёхи 1946мет таllуhан ёхтыlымаl. Имеl пиlн, няврэмlаl пиlн оlhа Касом нёl куртан ус, щи юпийн па Lупхары воша исая уlты мантсатан.
Надежда КОНЕВА ханшам потрат, КЕРАН Митры верам хорат
4
№14 (744) Lапат хутмет (суббота), Ункер тыlащ 4-мет хатl 2015-мет таl
Вурты суювие (ханты монщ) Катра, культ, меhкат уlам пораян, ям lоват куртан имеhhан-икеhhан устан. Lын хуlам няврэм тайсатан. Катhаllаl уншакhан устан, итан ай, эсам lэты lоват няврэм. Вой па хуl веlман усат. Яма усат, туп имоlты пораян аlаh сахат нох киlмеlэн шияlасэl, курт и оlнаl мохэт антомат. Ишниlаl, овlаl пелки оllат. Еша каншсаllаl па еllы уlты питсат. Щиты па етная йис. Кимет аlаhсахат нох киlмеlан шияlасэl курт и шупаl хоятlаl ушмеl. Хотlаl матты ов эlты lоhам па ишни эlты ким этам. Па хун етная йис, ин имеhhан–икеhhан эви паlаl, иl ат вояпlа. Оlаl, хуlатаl. Туп ата йис, ай апщеl нох опсас па потарты питас: «Онтап ярпем хоl эhханща (онтап ярты кеlаl нох эhханщаl), шанш ярпем нох эhханща (шанш ярты кеlаl нох эhханщаl), вай лэhкеhиlам нох lомтащатан (вай лэhкеhиlаl нох lомтащlатан), молщан лэhкем нох lомтаща (молщан лэhкеl нох lомташаl)». Нох lояl па ким этаl. Опеl ишни хоща хухаlаl па вантаl. Туп апщеl ким этас, уна-а йис. Щаlта курт кератты шушмас. Хущl этты еlпиян ёхlы ёхтас, ов пуhаlан ая йис, ехи lоhас. Отпаlа хуhхас. Па потарты питас: «Молщан lэhкем нох эhханща (мол-
щан lэhкеl нох эhханщас), вай лэhкеhhиlам нох эhханщатан (вай лэhкеhhиllаl нох эhхащсатан)». Отпа иl оlас. Па еllы потараl: «Шанш ярпем яха ярсаща (шанш ярты кеlаl яха ярсащаl), онтап ярпем нох ярсаща (онтап ярты кеlаl нох ярсащаl)». Туп хущl хояс, еl хоllантас. Антеl нох киlас, эсамн lапатты питса. Ин эвен нумасаl: «Хоя ястатыя? Антем, ащем ищи па ат эваllатан. Апщема ястаlам». Нох киlас па ястас апшеlа: «Мин апщеман меhк». Апщеl ястас: «Муй щиран мин апщеман меhк?» Эви: «Наh атаlан аl оlа, хуlанта».
Етан хун иl оlсат, няврэмhан ат оlсатан, хуlатсатан. Туп хущl хурlас, апщан потарты питас: «Онтап ярпем хоl эhханща (онтап ярты кеlаl нох эhханщаl), шанш ярпем нох эhханща (шанш ярты кеlаl нох эhханщаl), вай лэhкеhиlам нох lомтащатан (вай лэhкеhиllаl нох lомтащlатан), молщан лэhкем нох lомтаща (молщан лэhкеl нох lомташаl)». Нох lояl па ким этаl. Опеl па яйl ишни хоща хухаllатан па вантlатан. Туп апщеl ким этас, уна-а йис. Щаlта курт пеlа манас. Хущl этты еlпиян ехlы ехтас. Хонаl уна ювмаl. Ов пуhаlан ая йис, ехи lоhас.
Умащ сох тайты щущиет
Отпаlа хуhхас. Па потарты питас: «Молщаh лэhкем нох эhханща (молщан лэhкеl нох эhханщас), вай лэнкеhиlам нох эhханщатан (вай лэhкеhиlаl нох эhхащсатан)». Отпа иl оlас. Па еllы потараl: «Шанш ярпем яха ярсаща (шанш ярты кеlаl яха ярсащаl), онтап ярпем нох ярсаща (онтап ярты кеlаl нох ярсащаl)». Хущl этас, еl хоllантас. Антеl нох киlас па эсаман lапатты питса. Нох киlмеlан, курт ун шупаl антома ювмаl. Няврэмhан нумассатан, нумассатан, муй верты. Па хонтаты номас версатан. Аяlта, ёнтты кашн, сохlын акатсаllын, ай ухlа хушсаlын. Антеlан инщасlайтан: «Нын муй сохlын аlлиlтан?» Няврэмhан ястаlтан: «Мин аl ёнтlаман». Хун ата йис, апщан па вош паратты манас. Эви па пох ай ухlана амп кирсатан, lэlапсатан па матсатан. Хув-ван мантсатан, нэмаlт хоят ант уятаl, и тахаян хоlсатан па щита уlты питсатан. Пох хуl па унт вой веlты питас, эви – ентасты па апщеlа lэтот каварты. Пора хащас, lын еша энапсатан. (еllы па уl) Эрнст КУРТЯМОВ монщам монщ, Валентина РОХТЫМОВА нэпека lэщатсаllы па хоран ханшсаllы
•Хорат потарlат
Валентина РОХТЫМОВА верам хорат
Газета
«LУХ АВТ» Адрес редакции: 629008, ЯНАО, г.Салехард, ул. Подшибякина, 17 (34922) 4-68-03, 4-68-63 Е- mail: luhavt@yandex. ru
Учредитель (соучредитель) Департамент внутренней политики Ямало-Ненецкого автономного округа (ЯНАО, г.Салехард, пр-кт Молодёжи, д. 9) Газета зарегистрирована Управлением федеральной службы по надзору в сфере связи, информационных технологий и массовых коммуникаций по Тюменской области, ХМАО-Югре и ЯНАО 19 апреля 2012 года Регистрационный ПИ № ТУ72-00558
Тираж 700 Заказ 0290 Подписные индексы: на год - 29925, на полугодие - 84611
Газета вышла в свет 4 апреля 2015г. Подписано в печать 2 апреля 2015г. по графику: 16.00 фактически: 12.00 Газета выходит по субботам Цена годовой подписки 96 руб., в розницу не распространяется
Издатель Департамент внутренней политики ЯНАО (629008, Тюменская область, ЯНАО, г.Салехард, пр-кт Молодёжи, д. 9) Отпечатано в типографии ГУ «Северное издательство» (629008, г.Салехард ул. Ямальская, 14)
Главный редактор Г.П. Кельчин