ЙИСАТ УLА, АРТНАТ УLА, ХАНТЫ МИРЭВ НУПТАH ЯСАH! Яlаптаl тыlащ хутмет хатl 2001-мет таl вуш эваlт этты питас
Российская Федерация Ямало-Ненецкий автономный округ Газета №7 (737) Lапат хутмет (суббота), Курк тыlащ (февраль) 14-мет хатl 2015-мет таl
Утаlтыты пуляh рупата каншты па заявление ханшты мосаl. Рупата уятты ант верытlан ки, колледж етшитыйн, еllы утаlтаты Тюмень, Хон Петра воша манты рахаl, хой па тахая ки lаhхаlа, па тахая манты верытаl. Уlты хот там порайн мощатты lаварт. Хой утаlтыты юпиян ёхи, энмам вошаlа манты lаhхаlа ки, мосаl ин, утаlтытаl пуляh, хот мощатты ураhан заявление ханшты. Щаха ки ханшlа, мосаh хув lаваlты вера иl. Каматса ясаh молодежный отделение ассоциация «Ямалпотомкам!» эlты ястас. Щаlта Нина Николаевна Ядне уlапсайl, ханшам нэпекlаl, рупатайl эlты потартас. Нина Николаевна и щорс яртьяhсот няlъяh хутмет таl ункер тыlащ хус оlаhмет хатаlан, Тазовский район
ЯНАО, Антипаютинский тундрайн сэма питас. Ащеl тащ шавиты хоят ус, щит ураhан Нина Ядне вуlы хотан энмас. Тазовский школа-интернатн утаlтыяс. Ашкоlа етшаптымаl юпийн Московский государственный институтан им. М.В. Ломоносова хоща утаlтыяс. Щи юпиян Ленинградский государственный пединститут им. А.И. Герцена етшас. Хуlам таl округ ашкоlаятн рупитас. Хуlам таl Управление механизации-2 хоща рупитас, щаlта хус таl Управление механизации-7 АООТ «Арктикнефтегазстрой» отдел кадров кущая Надым вошан рупитас. Ямало-Ненецкий автономный округ государственный думая многомандатный избирательный округ хуват хоятатан депутата пирыlыса. И щорс яртьяhсот ярсот ветмет таlн «Я родом из тундры» потраl книгая lэщатса,
Валентина Рохтымова верам хор
Курк тыlащ ветмет хатаlан Пулhаватн Ямальский многопрофильный колледжан утаlтыты няврэмат Нина Николаевна Ядне пиlан уйтантысат. Оlаh, кимет курс няврэмат, няврэм утаlтыты хоятат, шоши мир ёх департаментан рупитты хоятат, ассоциация «Ямал-потомкам!» хоща рупитты хоятат щи ёхтыlысат. Оlаhн и утаlтыты нэ потартас, муй щиран няврэмат колледжан уllат, утаlтыlат. Колледж ун, щита ар няврэм утаlтыяl. Няврэмат ураhан арсыр каш верlа, хой няврэмат якlат, хойтат арыlат, хойтат хор ханшlат, хойтат спорткомплексан наварlат. Колледж пуhаlан ун хорам спорткомплекс уl, lув таlаh хатаl, нийlъяh щёс унты пелки уl. Щита няврэмат мяч ёваlты, наварты, тренажеркая яhхты, хухатlыты, lаварт карты аlамты верытlат. Колледж няврэмат lый кутlаlан газета, видеороликат верlат, колледж верат щи ханшlат. Няврэмат кутан ар хоят яма утаlтыяl, ар спортсмен, каш верты няврэм ищи ар. Хой муй тахая хоят самаl оlаl, щита ныlа. Яма уlты хоятат кутан, ищипа каматса анта шэhк ям вер верты хоят уl. Щи няврэмат ант рахты тахайн хахса таlсат, полицияйн шияlысайт. Хойтат кучуман общежитиейн мощатысайт. Ар мосты вер эlты Сергей Валентинович Худи ястас. Lув ясhаl щиран, там йисан яма утаlтыты мосаl, хоят диплом-нэпекlы нэмаlты хоlта рупатты ант уlа.
Ямальский многопрофильный колледж студентат
Валентина Рохтымова верам хор
«Овс муван сэма питсам»
Н.Н. Ядне
и щорс яртьяhсот ярсот хутмет таlн кимет изданийн верса. Ар таха эlты хоятат щи умащ нэпек lуhатты верытlат. Щи нэпек ур мув эlты ёхтам эви эlты, щи эви шэhк ошаh, ар нэпек lув хоятlаl эlты ханшас, общественный деятеля йис, ар таха эlты хоятат lувеl уятты питсэl. Нина Николаевна хуван Надым вошан уl па рупитаl. Lув опращlаl уlапса, шоши мир ёхlаl щират, пищат уятаl. Щишан lув ар вераl, монщат, потрат, арат катра мув – Ямал эlты па хоятат уятты ураhан. Нина Николаевна ур, рущ ясаhан ханшам потарlаl ураhан журнал «Северные просторы» премияйн мийlыса. Нина Николаевна Ядне хоlна ар ям номас тайl. Lув яlпа ханшам нэпекlаl сэма питам муваlн улты хоятатан иса lаваllаят.
○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○ ○
Тащ шавиты ёх емаh хатл ванамс Овс муван ешовl тащ шавиты ёх емаh хатlат питlат. Курк тыlащ эlты ункер тыlащ унты тащ шавиты ёх округ хуват рупата емаh хатlэl верlэl. Оlаhн, курк тыlащан хус оlаh па хус кимет хатаlан фактория Щучье (Приуральский район) хоща емаh хатl питаl. Айкер тыlащ няlхощьяhмет па ветхощьяhмет хатаlhанн округ Куща Кубок ураhан хус-
мет пуш Надым вошан касапса питаl. Щи воша Россия ар таха эlты, па хон муват эlты хоятат ёхатты верэl уl. Айкер тыlащ хус оlаhмет па хус кимет хатаlан Новый Уренгой вошан «Праздник народов Севера» фестиваль верlа. Пулhаватн тащ шавиты ёх айкер тыlащ хус нийlмет хатаlан касты питlат. Шэhк яма округ хоятат па Россия па тахайт эlты
ёхтам хоятат районный касапсаята яhхlат – Яр-Сале, Тазовский, Тарко-Сале, Аксарка вошатата, Шурышкарский района. Аксаркайн емаhхатl ункер тыlащ хуlмет па няlмет хатаlан верlа. Мужи вошан айкер тыlащ хус оlаhмет па хус кимет хатlатан касапса питаl. Мет юхат, ункер тыlащ хус яртъяhмет хатаlан Тамбей факторияйн (Ямальский район) питаl.
Емаh хатаlан хоятат умащlыман касапсайт вантlат, вуlыйн хатэмиlат, иса вуlы хота lоhтыlат, шай инщlат, хуl, нёхи lэlат, хошак инщlат. Касты юпиян нох питты вулы шавиты ёх арсыр мойlапсаятан юкатlайт: lонщхопатн, электрогенераторатн, охатн, ишак нэпекатн. Валентина РОХТЫМОВА lэщатам лопас
2
№7 (737) Lапат хутмет (суббота), Курк тыlащ 14-мет хатl 2015-мет таl
Роман Ругин нэмаh хатl Ямал мувевн кашаh ханты хоят щи эlты уятаl – Яlаптаl тыlащ ёlта хатаlн Роман Прокопьевич нэмаh хатlаl постаllы. Там таllуhан lув нийlъяh пеlа хут таlа йис. Округ санаторно-лесной ашкуlайн рупитты хоятат кашаh таllуh Роман Прокопьевич нэмаh хатlаl пос-томан, хоятат моя вохиlыlайт. Роман Прокопьевич катра щи ашкуlайн кущая уlтмаl. Роман Прокопьевич няврэмат пиlн яма потрэмас, щи эlты потар тус, муйщир па хон муватн lув уллийс, мата муватн lув lуhтарlаl па мир ясhа кератсайт. Lуhтарlаl lуhтас па утаlтаты няврэмата каматса номпсаh ясаh понас: яма lый ат утаlтыlат, ашкуlайн моlты верты иса ат утаlтыlат, ашкуlа юпийн утаlтаты верэl ант ат вощкиlэl, еllы па ат утаlтыlат. Зинаида Васильевна Кульмаметьева па Юлия Геннадьевна Браташ потар тустын, хоятат сценая вохиlыстан. Якты эвет сценая вохиlысайт, ханты нэhат як яксат, Лениза Камилова няврэмат щата якты утаlтаllы. Нина Геннадьевна Кель-
чина па каматса ясаh ястас. Lув ашкуlая рупитты ёхатмаl порайн Роман Прокопьевич щата кущая уlтмаl. Мосты порайн Роман Прокопьевич lувеl иса нётыlымаl. Нина Геннадьевна утаlтаты няврэмат Роман Прокопьевич lуhтарат lуhатсат. Мин па Наталья Федоровна Ребась пиlн емаh хатlа вохиlысайман. Щи эlты потар тусман, хоты муh рупатаевн Роман Прокопьевич ханшом lуhтарат эlты иса нумlув, иса lуhатlув, арат lув lуhтарlаl хуват арыlув, Роман Прокопьевич lэщатом
йис потрат хуват постановкайт верыlыlув. Нэмаh хатl тайты хоятэва хонна мин сама вана тайты арэман мойлисман – «Антом кев вот кев вур эlты…». Наталья Федоровна Ребась пиlн арыты эвет па арсов тувемисат, сумат эlты арысат, ищи Роман Прокопьевич lуhтар хуват ханшом ар. Щаlта потрэман щиты кертыlысман, Роман Прокопьевич ханшты веран па хоятат, тохеlт вантман, ищи lуhтарат ин там хатlатн ханшlат. Геннадий Павлович Кельчин lуhтар хуват ар па
тувемисман. Нэпека еша вантсоман, lуhтар ясhат хонна номпса воlаhа ант понтсаllоман. Моя ёхтыlыйм хоятhан Роман Прокопьевич па Раиса Семеновна мойlопсайн масайтан – ёшн вером ай осом хирые па пасана лаhкты хорамаh салфетка. Моя ёхтыlыйм хоятат, ашкуlа няврэмат номасlаl иса туhа усат: щи умащ хоят эlты потар хуlантсат, арат хуlантсат, якат вантсат, моlты яlоп верат эlты потрат па хуlантсат. Роман Прокопьевич номпсаl ищи ям ус, па щи ашкуlая ёхтыlыйс, хота катра кущая ус, няврэмат пиlн потрэмас, lуhтарlаl lуhтас, хоятатн нэпекlаl, lуhтарlаl lуhатlайт, ара понтlайт, lув эlтэlа нумlа, моя вохиlыlа. Муй па хоята мосаl? Роман Прокопьевич! И пуш па мойlопса ясаh ястыlув: тумтака уlа, кашимуш еllы киты, ёшlанкурlан таlаhа ат уllат, номасlан вещката ат мантlат! Туром Ащийн ат шавиlайн! Надежда КОНЕВА потар ханшас, Людмила ЛЫМАРЬ верам хор
ИНФОРМАЦИЯ об объявлении конкурса на присуждение грантов в сфере сохранения исконной среды обитания и традиционного образа жизни коренных малочисленных народов Севера Ямало-Ненецкого автономного округа Во исполнение постановления Правительства ЯмалоНенецкого автономного округа от 14 сентября 2012 года № 765-П «О присуждении грантов в сфере сохранения исконной среды обитания и традиционного образа жизни коренных малочисленных народов Севера Ямало-Ненецкого автономного округа», департамент по делам коренных малочисленных народов Се-вера Ямало-Ненецкого автономного округа уведомляет о начале и сроках приема заявок для участия в конкурсе на присуждение грантов в сфере сохранения исконной среды обитания и традицион-
ного образа жизни коренных малочисленных народов Севера ЯмалоНенецкого автономного округа. Конкурс проводится по следующим номинациям: – присуждение грантов индивидуально работающим мастерам из числа коренных малочисленных народов Севера, занимающимся художественными промыслами и народными ремеслами коренных малочисленных народов Севера. Размер гранта на одного получателя гранта составляет 200 (двести) тысяч рублей, (включая сумму налога на доходы физических лиц, предусмотренных дей-
ствующим законодательством). В текущем году в данной номинации предусмотрено 4 (четыре) гранта; – присуждение грантов малым формам хозяйствования коренных малочисленных народов Севера, занимающимся видами традиционной хозяйственной деятельности. Размер гранта на одного получателя составляет 700 (семьсот) тысяч рублей. В текущем году в данной номинации предусмотрено 5 (пять) грантов; Прием заявок для участия в конкурсе на присуждение грантов осуществляется департаментом по делам коренных малочисленных народов
Севера Ямало-Ненецкого автономного округа в течение 30 календарных дней с момента размещения информации на сайте департамента с 30 января по 02 марта 2015 года включительно. Подробнее с условиями участия в конкурсе можно ознакомиться на сайте департамента по делам коренных малочисленных народов Севера Ямало-Ненецкого автономного округа. Заявки принимаются по адресу: 629008, ЯмалоНенецкий автономный округ, г. Салехард, ул. Гаврюшина 17. Справки по телефону: (34922) 330-42; 2-27-98.
Яlап таl тыlащ хоlаты хатlатан Щаня муван уlты и ун ими нэмаh хатlаl постас. Варвара Васильевна Куртямова уlам нуптаl нийlъяh таlа ювмаl. Lув эви опращнэмаl Лонгортова, 1935-мет таlан Овоlаhкуртан сэма питмаl. Уlмаl хуват ар lаварт рупата верыlыйс, хуlам пох па вет эви энмаlтас. Ин там порайн хиlыlаl рупитты питсат, lыв няврэмаhа йисат, ун антимеl мосман тайlэl, иса lув хощайl lоhемиlат. Ешак ун имиев, Варвара Васильевна, тумтака уlа! Наh пиlэнан уйтантытэван, хатlэв хошам, нопсэв вещкат.
3
№7 (737) Lапат хутмет (суббота), Курк тыlащ 14-мет хатl 2015-мет таl
Литература лопас
Кантэлэтар (№ 6 газетайн там еlпи арат усат)
Эвет арат Мин кутэман потрэмаlман Сорни пиlэм хоlта манас, Мата мув пеlа юшl понас, Мосаh, хатl этты пелка, Мосаh, хатl омасты пелка Омеh похем юшl понас? Хумпат хоп йираlа сэhкlат, Амуй немащ йиhкат хумпат, Мосаh, ляля пиlэм манас, Муша, мосаh, пиlэм питас, Мосаh, ляляh лота lоhас, Мосаh, ояh лота питас? Эви номсlам щит щи мантlат? Самем хойн пойкиlыlа? Воlаh ясаh хой па ястаl, Самем ойн хойн поныlыlа? Тохlаh войе, ай щищкие, Номас ма пиlэман вера: Пиlнэ щирн потрэмиlман, Lуйт щирн номас туlман. Полащ туты имет хоты Щи эlтыя полащ аl туlат. Пошахlан ма вантыlыllам, Самlаl вохтыйн, lапатlаllам. Тохlыйиlан lэщатlаllам, Курпатlаl па паркатlаllам. Юрэн яха актомтыйи, Номсэн ищи такмалтыйи, Хоlта пеlа номсэн понlэн, Щи мув пеlа юшен туви. Хоlта пеlа похем манас, Хоlта юшl тувиlысlы, Хоlта пеlа похем шушас, Хоlта номпсаl поныlысlы. Щи эlты па номпсэм туlэм: Ай щищкие хоты манаl Щарсат хуват, муват хуват, Хоlтапелка юшl понаl? Овс вотэв пищ ки тайс, Юраh вотэв кум ки шитас, Ясhем, lуlан, lув щи вусlы, Потрэм, lуlан, lув щи тусlы. Номсэм щиты ант кератlэм, Ясhем ищи ант ястаlэм: Уhаl хойн вота понтса, Номас, хойн lувеl маса?
Мин юшlамн катна мантсат Пиlэм пиlн яма усман, Хорас веншаh, вещкат нопсаh. И lыl шувн lаlтман усман, И номасн нумассоман. Хоты питсоман мин катна, Хоты номасlамн ушсат, Воlаh номас Туром Ащи, Алпа, минэман ант китас. Хатlэм туромн уlты хуват, Тыlщем туромн lойты хуват, Ойl ат уштаl, щуньl ат уштаl Катна пайтом минэмн хоят. Пил хоятэм хорам тайс Веншаl вурты, охсох питы, Щит ураhан нэhан хущса, Щит ураhан ёвра таlтса.
Иса утща уllом, куняр Иса куняр, утща уllом Ов харэмн, курт харэмн, Курэм ма па утща аllом, Няня lант сэм утща сэhкlом, Щиты иса утща уllом, Хойн па ма шалитlайм? Етн утща иl оллиlом, Утща нох па киlыlыlом. Тащаh похат тый хун вантlат, Нуша эви хун lый туlат? Торн харн ант па вантlат, Мис пустэман, па ант вантlат. Нуша эви хойн туlа, Мисlы эви хойн вуlа?
Муй па ма lаhхаlайм? Щи пох пиlн ма туп мантlом, Хой хут хорам хоптан тайl,
Сорнеh антопкеllаl пиlн, Lапат ятпи хот хой тайl, Хот па анта lапат, нийl, Яртъяh lопас пох ки тайl, Хотат пуhаlн lый ки lойсат, Моlтыйн тэlаhат ат усат. Lопасатн норэт хоща Вуна тэlыева пущкайн. Суры йиинщематы рахаl Няlом сорты ям порайн. Самемн тайты похем пиlн, Ойа аматман, уllоман, Хорам, lащкам хот lыпийн Щунь уlопса уятlоман. Кашаh хатl кофе йинщlом, Нови саккар порэмоман, Щиты, lуlан, ма щи уllом, Маваh нянят lухlэмоман.
Туром Ащи, манэм нёты! Туром Ащи, ям вер вера, Куща эвем яма ванты, Атом хоята аl питаl, Вуна хир хоща аl манаl, Шарпуl ики пиlн аl манаl, Воlаh хоят ат мощатаl! Туром Ащи, ям вер вера, Йинщты хоят еlшик киты, Эвем lувеlа аl мийи, Шук тутыя lув аl питаl. Йинщты хоят пиlн уlты – Lаварт уlопса щит туты. Хатlат хуват йинщты питаl, Увты питал, сэhкилаллы, Эвем ернасlаl, курпатlаl Иса вуная йинщlаллы. Вошат кутн щиты яhхман, Эвем lув па потаlтаllы, Ухаl эlт иl паятlаllы, Ищкийн, мосаh, потаlтаllы. Поры эlты ёхлы ювман, Унтан хайты вератlаllы, Куртат кутн тутлиlыман, Эвем ищкийн потаlтаllы. Туром Ащи, ям вер вера! Хахса пул lухаlтты ики Lув пуhlаlа вана аl йиl, Еllы юшl lув ат понаl, Хахса шивн, пусаh шивн Эвем пеlа аl па lаlтаl. Хахса шивн иса уlтман, Сэмlаl каlы lув уштыйl, Хахса пусаhан иса lаlтман, Эвем веншаl питыя йиl. Туром Ащи, ям вер вера, Щимащ ху эвема мийи, Хой вуна пеlа каш ант тайl, Охаlн вещкат номс тайl. Хахса пусаh век ант эслаl, Мувl хуват туhа шушаl. Эвем юшн ант уштаllы, Талн лонщан ант хайlаllы, Потом йиhка ант вощкаllы, Хот ов харн ант сэhкlаllы, Сапlаl эlты перна кеlаl Хулэh ёшн ант маншlаllы, Паllаl эlты щимщакhаlаl, Lыкащман, ант нярэмаllы, Сорни lуйтlаl lуйlаl эlты, Йинщман, нох ант маншиlаllы.
Па муватн па хатl этлийl Муя атом номас тайlом, Муя тышлом ма ивеван? Нэhа ант ки ма вуlайм Хоятыет, рут мувеман. Па мувата ма щи мантlом, Щата па хоятат уllат, Хатlэв щата ищи каlы. Хусат щата ищи лойлат. Па мув пеlа похем пиlн Ма щи манты номас вертlом: Саво воша ант вохсайм, Выборг пеlа ант тусайм. Нарва воша ки тусайм, Тащн-щунян усом, lуlан, Келтто пеlа ки тусайм, Ермак сохн, яhхсом, lуlан. Ояh-щуняh Келлто вошн Нянь туп lапкайн lутыlыlа, Калащ, пирэк, сотщир мават Lапка эlты аlтыlыlа. Моlты эпlаh маваh lэтот Па мувт эlты lутыlыlа, Вояh пуращ нёхи lутlа,
•Литература таlа юкантам лопас
Мохсаh, сарах хуl па lутlа. Рут куртэма ант ёхатlом, Тащаh ики ант ки туlом, Ухlа киром хуlом lова Сорни щермат ант ки понтlом. Хун рутlы, сырlы ёхlы йиlом, Каман полащ ясаh хуllом, Кашаh нэhан инщасlайм, Кашаh похан ма няхlайм: «Муй па каншты маныlысан, Муя ёхlы ёхтыlысан?»
Ащем хот ма ин щи хайlэм Ащем хот ма ин щи хайlэм, Юша актащты щи питсом, Рут мувием ин щи хайlом, Карел мув эlты щи мантlом, Хота оlаh кур ма вертсом, Хота нэhа ма щи йисом, Хота номасlам акатсом, хота хорасэм ма вусом. Ащем-аhкем хотн усом, Щата эпlаh нянь ма lэсом, Па мувата юшем понты – Щимащ номас ант па тайсом. Ин па юша щи актащlом, Хоlта сэмlам вантlат, манlом, Таl тахийн муй нянь lэты, Таl тахийн муй мув пуратты? Щиты муват хуват шушlом, Арщир юш ма поныlыlом, Lоваh юшн маныlыlом, Кусэh хопт хатэмиlом, Вот ат вотаl, ерт ат манаl, Йиhкат хуват, унтан хуват, Юшем щит щи еllы туlэм Ататн осмем понэмаlом, Няlмем сортман, сойм эlты Сыстам йиhк ма йинщемаlом. Хоты нянь пул манэм шитlом, Хоты уlты таха уйтlом? Щи эlты па аl нумпсаты, щи эlты па аl тышаты: Каркам ёшн ма масайм, Сора курн ма орттсайм, Моlты верты иса хошlом, Мосты ясаh иса уйтlом.
Рут мувем самн иса тайlэм Рут мувем эlты иса нумасlом, Мувем иса самн тайlэм, Куш муй вертlом, хоlта манlом, Номпсэм иса тохеl понтlэм. Ёхан питар хоща омасман, Арlам туllам куртэм эlты, Нови хумпат пеlа вантман, Номасlам иса рутэм эlты. Йиhки каlнаhан омастман, Мувэм эlты арэм туlэм, Хота аhкиlам-ащиlам хащсат – Рут куртэма арэм китlэм, Хота пиlнэhийиlам хащсат, Сама вана lойты похем, Умащ нэlам, умащ ёхlам – Суоми пеlа иса номпсэм.
Тышман, арlам поныlыllам Ай эвие, хухатлиман, Пиращ ими арат хуlтсом, Ими умащ арат тайс, Самема lув арlаl понтсом. Умащ номпсаh арlаl юкана, Ин имем ма мойlаптасэм: Хорам ернас, хорам охшам Lув lаhкраlа поныlысом. Вурты, восты ошпун сохом Lувеlа па ма мийлисом, Щимащ умащ турсый таймаl – Умащ арат хуlантысом! Ин па, пиращ имилэhки, Хуlанта, муй ма ястыlом: Мияlн ёхlы мойlопсайlам, Арэм ма щи тувемиlом. Арlан хуlантты ант питlом, Потрэн хуlантты ант питlом: Щимащ номасн ёхатсайм, Мутрайн ахольща китсайм – Вертlам ёвра ки па мантlат, Номсlам иса ки па шакlат Щи порайн турсый хорам, Арат щи порайн тыйlат. (еllы па уl)
Надежда КОНЕВА толмащсаllы
4
№7 (737) Lапат хутмет (суббота), Курк тыlащ 14-мет хатl 2015-мет таl
Ими Хиlы – Ий кур эlты lойты lапат мурах сэм пох (монщ оlhаl №6 газетайн уl)
Щиhанща, муй хув усат, ван усат, хойн вантсайт. Lув, ванта, аlансахат, хущат этlат, хуван-ванан нёхас войl, унт войl веlты мантаl. Ёхи ёхаттаlан, антпаl кат пуш, хуlам пуш нёхас куран, вой куран караптаl. Ванта, унт вой хуl, муй кураh вой веlаl. Ащеhаllаl lапатты, ванта, мосаl. Щиhанща, имоlтыян: «Щирк, щирк» – ий моlты от щи шуштаl щащаl. Lонщ щиращ па щиращ. Вана ёхатаl па ий охпи меhк ики. Ястаl: «Ий кур эlты lойты lапат мурах сэм хуем ёlан уl? – инщасаl. – Хей, – ястаlтан, – Ий кур эlты lойты lапат мурах сэм похемн там хорпи наяh щуняh урт сэмаh хатаlан ёlан муй вераl? Хуван унт вой кур, нёхас вой кур эватты манас, – акеl ики ястаl. – Маты муй хоlты нёхас вой кур, унт вой кур эватты яhхаl, муй моlты сэй нампар, хиш нампар верман яhхаl. Ёхи lоhты рахаl? – инщасаl. – Па ёхи lонты, – куль ован lояl, имеhан, икеhан моми эlты паlтамастан хоты, ханты хоятhан, ухаl саман уllатан, моми эlты хоят паlаl, – па lоhlан ки lонlан, хоты верlэман. Моlха хиlылэhкеман манмаl порайн, щиты ястыяl: хоят ёхатаl па, lув манам юшаl хуват ёхи ат lоhаl. Меhк ики инщасаl: – Lув хоlща манас? – Lув, – ястаlтан, – хот шашн
пурас хирам вус хуват ким яhхиlыяl. Ин меhк ики хот шанша ёхатаl, паhаl вортыяl – паhаl хоlна ант lэпаl, вощна lуяl вортыяl – вощна lуяl па ант lэпаl щи ващ пурас вус хуват. – Таlта, – ястаl, – муй хоят lэпаl, ов эlты ёхи lоhlам? – Па, – ястаlтан, – lоhlан ки lонlан, хоты верlэман. Щиhанща, ов эlты меhк ики ёхи вуратаl. Ов хопlаl тэlн ёхи таlаh тэlн туllы. Ёхlы карэмияl па машакан тохи рэскаllы. Ин ими, щиhанща, нох lояпаl, мояh хоятан ёхатса хоты. Сорнеh тув хуl нык кавармаllы, охты вой анаlа хонlаllы. Савнэ тохи ванашак омасlа, кев путl пуhlа, хошак йинщтыя. Катра хоятат муй lэтот, нёхи па хуl lэlат. Я, щиhанща, ин меhк ики сорнеh тув хуlаl вуйlыllы па, уhlа тутlыты вутщиllы па – охты войн иl менэмаlа, па уhlа тутlыllы – па охты войн иl менэмаlа. Еlэма йиl па, нох аl щи воlыяl, тув хуlаl иl понтсаllы. Хошак йинщты вутщияс, савнэhаlан амармаllы па, савнэhаl ёвра щаплапаl, ин хошаhкаl иl манаl. Хуlаl щи напра таhарсаllы, таhарсаllы, аl еlэмаса, нох щи воlыяс. Нох щи lояс. – Я, похен хоlт пеlа манас? – инщасаl. – Похеман хот шанш пелак хуват маныlыяс, – ястаlтан. – Хиlылэhкеман манмаl порайн ястас, хоят ёхатаl ки, lув юшаl хуват ат манаl. Нымlаh юш
уl, lув щита ныlа. Меhк ики, ин щиhанща, ов эlты па вурайн ким вуратаl, ов хопlаl иса патн туllы. Ёхlы керlыяl, машакан lыпия рэскаllы. Щи, хот шанш пелак пеlа lонщ кур патыйн щулитыман шушмамаl щащаl. Ширщиман ин меhк ики щи манмаl щащаl. Меhк ики манмаl юпиян, сорнеh тув хуl йиhки пущка lыпия ёхlы вощкаса. Lув lыlhа еl ущемас. Ин имоlтыян, хоlща ий пуш ахой уваlтымаl щащас. Унт юх lэпса тохараl, ванта, щи сый, мува тохараl. Таl утан сыйт яма щащlат. Ин нэмоlты хув антом ус, хиlылэhкан каман ёхатмаl щащаl, нымhаllаl сэhктаl щащаl. – Хоты, нын уllатан? – Уllаман щи, – ястаlтан, – хоlта лэhки манlаман. – Хоятан ёхтыlысайтан? – Муй хоят, ий охпи меhк икийн ёхтыlысайман, – ястаlтан. – Lапатсаllан? – Lапатсэман. – Хоlта пеlа партсаllан? – Наh яhхты юшен хуват щи партсэман. – Еша туташак ий вур сэмие вантсам, – ястыяl. Веlсаllы, ванта, паратсаllы. (еllы па уl) Емельян КУРТЯМОВ потартам монщ ханшсаllы Зинаида ЛОНГОРТОВА
Ишни хорамат
•Хорат потарlат
Геннадий КЕЛЬЧИН верам хорат
Газета
«LУХ АВТ» Адрес редакции: 629008, ЯНАО, г.Салехард, ул. Подшибякина, 17 (34922) 4-68-03, 4-68-63 Е- mail: luhavt@yandex. ru
Учредитель (соучредитель) Департамент внутренней политики Ямало-Ненецкого автономного округа (ЯНАО, г.Салехард, пр-кт Молодёжи, д. 9) Газета зарегистрирована Управлением федеральной службы по надзору в сфере связи, информационных технологий и массовых коммуникаций по Тюменской области, ХМАО-Югре и ЯНАО 19 апреля 2012 года Регистрационный ПИ № ТУ72-00558
Тираж 700 Заказ 0085 Подписные индексы: на год - 29925, на полугодие - 84611
Газета вышла в свет 14 февраля 2015г. Подписано в печать 12 февраля 2015г. по графику: 16.00 фактически: 12.00 Газета выходит по субботам Цена годовой подписки 96 руб., в розницу не распространяется
Издатель Департамент внутренней политики ЯНАО (629008, Тюменская область, ЯНАО, г.Салехард, пр-кт Молодёжи, д. 9) Отпечатано в типографии ГУ «Северное издательство» (629008, г.Салехард ул. Ямальская, 14)
Главный редактор Г.П. Кельчин