བརྗོད་བྱ་་་་་་་་་་་་་ཡི་གེ་གཏན་འབེབས་སྐོར
༄༅། །མཁྱེན་པའི་ཆུ་གཏེར་ཡངས་པའི་འཁྱོན་ལ་བརྩེ་བའི་འདབ་བརྒྱ་རྣམ་པར་རྒྱས།། ནུས་པའི་རྩི་བཅུད་རོ་བརྒྱ་ལྡན་པས་སྐལ་བཟང་བུར་བའི་ཚོགས་སྐྱོང་བ།། ཁ་བ་ཅན་ལ་བཀའ་དྲིན་ཟླ་མེད་ཐུ་མི་ཀུན་བཟང་ཁྱོད་ཉིད་དང་།། དབྱེར་མེད་གདོད་ནས་མངོན་སངས་རྒྱས་མཛད་གཞོན་ནུ་འཇམ་དཔལ་དབྱངས་ལ་འདུད།། ཅེས་གུས་པས་བཏུད་ནས་བོད་ཀྱི་ཡི་གེ་གཞན་ལ་འབེབས་བྱེད་ཚུལ་སྐོར་མདོར་ཙམ་གླེང་བ་ལ། ཐུ་མི་རང་གི་ཞལ་ནས། བརྒྱ་ཡིག་ལྔ་བཅུ་ ཐམས་པ་དེ། །བོད་ཡིག་སུམ་ཅུར་གཏན་ལ་ཕབ།། ཅེས་གསུངས་པ་ལྟར་གྱི་གཏན་འབེབས་བྱས་ཟིན་པའི་གསལ་བྱེད་ཀྱི་ཡི་གེ་སུམ་ཅུའི་གྲངས་ ལ་ནོར་འཁྲུལ་མེད་ཀྱང་། དེ་དག་གང་ནས་དཔེ་བླངས་པའི་གཞི་མ་རྒྱ་གར་གྱི་ཡི་གེ་དང་། ཡི་གེ་དེར་མེད་ཀྱང་བོད་ལ་ཉེ་བ་མཁོ་བའི་གསར་ བསྣན་གྱི་ཡི་གེ་ལ་བོད་ཀྱི་ལོ་རྒྱུས་སྨྲ་བ་རྣམས་ཞལ་མི་མཐུན། དེའང་ཞ་ལུ་ལོ་ཆེན་གྱིས། བོད་ཡིག་གང་ནས་དཔེ་བླངས་པའི་ཡི་གེ་ནི་ལཉྩ་ཡིན་པ་དང་། སི་ཏུས་ན་ག་རའི་ཡི་གེ། བུ་སྟོན་གྱིས་ཁ་ཆེའི་ཡི་གེ་ལ་ དཔེ་བླངས་པ་ཡིན་པར་འདོད
དེ་དག་ལ་འཐད་དང་མི་འཐད་ཀྱི་དགག་བཞག་བྱེད་པ་ལ་ཐོག་མར་རྒྱ་གར་རང་གི་བྱུང་རིམ་གྱི་གནས་སྟངས་ཤེས་པ་གལ་ཆེ་བས་དེའི་སྐོར་ ཅུང་ཟད་ཞུ་བ་ལ། རྒྱ་གར་གྱི་ལེགས་སྦྱར་གྱི་སྐད་དེ་བྲམ་ཟེ་རྣམས་ཀྱིས་ལོ་མང་པོའི་རིང་ལ་འབད་ནས་བཟོས་པའི་སྐད་རིགས་ཤིག་ཡིན་ཙང་། རྐང་བཙུགས་ནས་ལོ་ཁ་ཤས་རིང་སྦྱངས་ན་མ་གཏོགས། གཞན་རྒྱ་གར་བ་རང་ལའང་གོ་བརྡ་མི་འཕྲོད་པའི་སྐད་རིགས་ཤིག་ཡིན། སྐད་ཡིག་དེ་ ནི་རང་བཞིན་ལྷན་སྐྱེས་ཀྱི་སྐད་རིགས་མིན་པར་གསར་བཟོ་ཡིན་པའི་རྒྱུ་མཚན་གང་ཡོད་ཅེ་ན། ཡོད་དེ། རྒྱ་གར་གྱི་སྐད་རིགས་གཙོ་ཆེ་བ་ བགྲང་པའི་སྐབས་སུ། རང་བཞིན་གྱི་སྐད། ཟུར་ཆགས་ཀྱི་སྐད། ཤ་ཟའི་སྐད། ལེགས་སྦྱར་གྱི་སྐད་ཅེས། ལེགས་སྦྱར་དེ་རང་བཞིན་གྱི་སྐད་ལས་ ལོགས་སུ་བགྲང་ཞིང་། གཞན་ཡང་ལེགས་སྦྱར་ཞེས་པའི་མིང་དེ། ལྟོ་ལྡིར་བ་ལ་བུམ་པ་ཞེས་པ་ལྟ་བུའི་འདོད་རྒྱལ་གྱི་མིང་མིན་པར། པཎ་ཌིཏ་ དང་། དྲང་སྲོང་རྣམས་ཀྱིས་ལེགས་པར་སྦྱར་ནས་བཟོས་པའི་དབང་གིས་ལེགས་སྦྱར་ཞེས། བྱ་ཚིག་ལས་གྲུབ་པའི་རྗེས་སྒྲུབ་ཀྱི་མིང་ཡིན་པའི་ ཕྱིར་རོ།། དེས་ན་སྐད་རིགས་ལེགས་སྦྱར་དེ། སྟོན་པ་སངས་རྒྱས་ཞིང་འདིར་མ་བྱོན་པའི་སྔོན་ནས་གཏན་འབེབས་བྱས་ཟིན་པས་སྟོན་པས་ཀྱང་ཆོས་ འཁོར་ཕལ་ཆེར་ལེགས་སྦྱར་སྐད་ཀྱི་ཐོག་ཏུ་གསུངས། འོན་ཀྱང་སྐབས་དེ་དུས་སྤྱི་ཚོགས་ནང་། ཕྱིས་སུ་ཨ་ཤོ་ཀའི་ཡི་གེར་འབོད་པའི་མོརྱའི་ཡི་ གེ་བེད་སྤྱོད་བྱེད་པ་མ་གཏོགས་ལཉྩ་དང་ཝརྟུ་ཞེས་པའི་ཡིག་གཟུགས་ལེགས་སྦྱར་དེ་བྱུང་མེད། མ་ཟད་ཆོས་རྒྱལ་མྱ་ངན་མེད་ཀྱི་སྐབས་ཀྱི་ཡི་ གེའང་དེ་ཡིན་ཏེ། ཆོས་རྒྱལ་ཁོང་གི་རྡོ་རིང་ད་ལྟ་སཱར་ནཱཐ་ལ་ཡོད་པ་དེར་མོརྱའི་ཡི་གེ་དེ་ཉིད་སྣང་བའི་ཕྱིར་རོ།།
1
དམངས་ཕལ་པས་བེད་སྤྱོད་གཏོང་མི་ཐུབ་པའི་ཡིག་གཟུགས་ལེགས་སྦྱར་དེ། ཐུ་མི་རྒྱ་གར་དུ་ཕེབས་སྐབས་རྒྱ་གར་རང་རྒྱལ་དུའང་མེད་ན། ཐུ་ མིས་དེ་ལས་དཔེ་ཇི་ལྟར་བླངས། དེ་འདྲའི་ཡིག་གཟུགས་དེ་ཐུ་མིའི་དུས་ལས་ཆེས་ཤིན་ཏུ་རིང་བའི་དུས་ཕྱིས་སུ་བྱུང་བའི་ཡིག་གཟུགས་ཤིག་ ཡིན། སྔོན་གྱི་མོརྱའི་ཡི་གེ་དེ་ལས་གཟུགས་ཅུང་ཟད་འགྱུར་བ་གུཔྟའི་ཡི་གེ་ནི། བོད་ཡིག་དང་ཡིག་གཟུགས་ཕལ་ཆེར་མཚུངས་པར་ཡོད་པ་དང་། ཐུ་ མི་རྒྱ་གར་དུ་ཕེབས་སྐབས་སུའང་གུཔ་ཏའི་ཡི་གེ་དར་ཞིག་མ་ཉམས་པའི་སྐབས་ཡིན་པས། བོད་ཡིག་གང་ལས་དཔེ་བླངས་པའི་ཡི་གེ་ནི་གུཔྟའི་ ཡི་གེ་ཡིན་ཞེས། མཁས་དབང་དགེ་འདུན་ཆོས་འཕེལ་ལགས་ཀྱིས་གསུངས། འོན་ཀྱང་བོད་ཡིག་དེ་ གུཔྟའི་ཡི་གེ་ལས་ཀྱང་། དུས་རབས་དྲུག་ པའི་ཡ་ཤོ་དྷརྨའི་ཡི་གེ་དང་འདྲ་ཆེ་བ་འདུག གུཔྟའི་ཡི་གེ་དུས་རབས་བཞི་པ་དང་ལྔ་པར་བྱུང་བ་ཡིན་ཅིང་། དེ་ནས་ལོ་བརྒྱ་ཕྲག་རེ་རེ་བཞིན་ ཡིག་གཟུགས་འགྱུར་ནས། བརྒྱ་ཕྲག་དྲུག་པར་ཡ་ཤོ་དྷརྨའི་ཡི་གེ་དང་། བདུན་པར་བཱར་དྷའི་ཡི་གེ་བྱུང་བ་ཡིན། ཐུ་མི་རྒྱ་གར་དུ་ཕེབས་སྐབས་ གུཔྟའི་ཡི་གེ་རྡོ་རིང་སོགས་ལ་ཡོད་ན་མ་གཏོགས། རྒྱལ་འབངས་ཡོངས་ལ་ལོངས་སུ་སྤྱོད་ཡུལ་དུ་མེད། ཐུ་མིས་དཔེ་བླངས་ས་ནི་དུས་རབས་ བདུན་པའི་བརྡྷའི་ཡི་གེ་ཡིན་དགོས་ཀྱང་། ཡིག་གཟུགས་ལ་བལྟས་ན་དྲུག་པའི་དེ་དང་འདྲ་ཆེ་བ་གོང་ཞུས་ལྟར་ཡིན
ཨ་ཤོ་ཀའི་དུས་ནས་བཟུང་སྟེ་དུས་རབས་བཅོ་ལྔ་པའི་བར་ཡིག་གཟུགས་ལ་འགྱུར་བ་ཇི་ལྟར་ཕྱིན་ཚུལ་གྱི་དཔེ་རིས་ཤིག སཱར་ནཱཐ་གྱི་འགྲེམ་
པཎ་ཌིཏ་དང་གཞན་ཡང་ ཆོས་པ་རྣམས་ཀྱིས་ལོངས་སུ་སྤྱོད་བྱར་གྱུར་པའི། ལཉྩ་དང་ཝརྟུའི་ཡིག་གཟུགས་དེ་ དཔེ་རིས་དེར་མེད། དེང་སང་གི་པཎ་ཌིཏ་རྣམས་ཀྱིས་ལཉྩ་དང་ཝརྟུ་ཞེས་པའི་མིང་ ཡང་ཐོས་མྱོང་མི་འདུག་ལ། དེ་གའི་འགྲེམ་སྟོན་ཁང་དུ་ནི་རྡོ་ལེབ་ཁྲུ་གང་ལྷག་ཙམ་ ཞིག་གི་སྟེང་དུ། དུས་རབས་བཅུ་གཉིས་པའི་ལཉྩའི་ཡིག་གཟུགས་ཤིན་ཏུ་བཟང་བ་ཕྲ་ ལ་མང་བ་ཞིག་འདུག། དེ་ནི་བོད་ནང་བྲིས་སྲོལ་ཡོད་པའི་ལཉྩའི་ཡིག་གཟུགས་དེ་མ་ གཏོགས་ གཞན་རྒྱ་གར་བའི་ཡི་གེ་དཔེ་རིས་ནང་ཡོད་པ་དེ་དག་དང་འདྲ་བ་སྤུ་ཙམ་ ཡང་མིན་འདུག། སྟོན་ཁང་དུ་ཡོད། འོན་ཀྱང་དེ་ནི་རྒྱལ་འབངས་སྤྱི་ལ་བེད་སྤྱོད་བྱེད་པའི་ཡིག་རིགས་མ་གཏོགས།
2
དེས་ན་ཐུ་མིས་གང་ནས་དཔེ་བླངས་པའི་གཞི་མིའི་ཡི་གེ་ནི་དུས་རབས་དྲུག་པའི་ཡ་ ཤོ་དྷ་ར་དང་། བདུན་པའི་བ་ར་དྷ་རའི་ཡི་གེ་གང་རུང་ཞིག་ལས་དཔེ་བླངས་ནས་མི་ མཛེས་པའི་ཆ་རྣམས་དོར། ལེགས་ཆ་་རྣམས་འདམས་བསྒྲིགས་ཀྱི་སྟེང་དུ་གསར་ བསྣན་འགའ་ཞིག་ཀྱང་མཛད་དེ། བོད་ཀྱི་རྗེས་འབངས་ཡོངས་ལ་ལོངས་སུ་སྤྱོད་པའི་ སྐལ་བཟང་གི་སྒོ་འཕར་ཐོག་མར་འབྱེད། སྤྱིར་ནས་སྤྱི་ཚོགས་ནང་དངོས་པོ་གང་ལའང་འགྱུར་བ་འགྲོ་བ་དེ་འཇིག་རྟེན་གྱི་ཆོས་ ཉིད་ཡིན་པས་བོད་ཡིག་ལའང་འགྱུར་གང་འཚམས་ཤིག་ཕྱིན་ཡོད་ཚོད་རེད། འོན་ ཀྱང་ཕྱིས་སུ་ཤར་རྒྱལ་བ་བླ་བཟང་གྲགས་པས་དཔེ་ཆ་རྣམས་ཤིང་དཔར་ལ་བརྐོས་ པའི་སྲོལ་གཏོད་པའི་ཐུགས་རྗེས་ཕྲིན་ལས་ལ་བརྟེན། བོད་ཡོངས་དང་གཞན་ཡང་ འབྲུག་ལ་དྭགས། བལ་ཡུལ་ལ་སོགས་པའི་ཡུལ་ལྗོངས་རྣམས་སུ་ཡི་གེ་ནི་ཨཀྴར་ ༼འགྱུར་མེད༽ ཡིན་པ་མ་ཟད། ཡིག་གཟུགས་ཀྱང་ཨཀྴར་གྱི་ངོ་བོར་གནས་ཡོད། བོད་ཀྱི་བརྡ་སྤྲོད་པའི་གཞུང་གཏན་འབེབས་མཛད་སྐབས་རྒྱ་གར་གི་གསལ་བྱེད་སོ་ བཞི་ལས་བོད་ཀྱི་རྒྱུན་གྱི་སྐད་ལ་མི་མཁོ་བའི་སྡེ་པ་གསུམ་པ༼ཊ་ཋ་ཌ་ཌྷ་ཎ༽ཆ་ཚང་། སྡེ་པ་རྣམས་ཀྱི་བཞི་པ་གྷ་ལ་སོགས་པ་༼གྷ་ཇྷ་ཌྷ་དྷ་བྷ༽དང་མཐར་གནས་ཀྱི་བ། དྲོ་ བའི་ཡི་གེ་ཥ། མཐའི་ཀྵ་ཡིག་བཅས་དོར་བས་ལྷག་མ་འདི་ལྟར། ཀ་ཁ་ག་ང་། ཅ་ཆ་ཇ་ ཉ། ཏ་ཐ་ད་ན། པ་ཕ་བ་མ། ཡ་ར་ལ། ཤ་ས། ཧ་བཅས་ཉི་ཤུ་རྩ་གཉིས་དང་། དེའི་སྟེང་ 3
དུ་བོད་རང་གི་ཁ་སྐད་དུ་ཡོད་པ། ཙམ་པ། ཚ་བ། ཞྭ་མོ། ཟ་མ་སོགས་རང་ཆས་སུ་ཡོད་ པ་དེ་དག་དང་སྒྲ་མདངས་མཐུན་པར་ཀློག་པའི་ཡིག་གཟུགས་རྒྱ་གར་ན་མེད་པས། དེ་དག་དང་སྒྲ་མདངས་མཐུན་པར་ཀློག་པའི་ཡིག་གཟུགས་གསར་པ། ཙ་ཚ་ཛ་ཝ་ཞ་ ཟ་འ་བཅས་བདུན་བཟོས་སོ།། དེས་ན་གྷ་སོགས་དོར་བའི་ལྷག་ཀ་ནས་མའི་བར་ཡི་གེ་ བཅུ་དྲུག་པོ་གོ་རིམ་རང་འཇག་དང་། དེའི་རྗེས་ལ་གསར་བཟོས་ཙ་སོགས་བདུན། དེ་ ནས་བ་ཥ་ཀྵ་དོར་བའི་ལྷག་མ། ཡ་ར་ལ་ཤ་ས་ཧ་བཅས་དྲུག་བསྣན་པས་གསལ་བྱེད་ ཉི་ཤུ་རྩ་དགུ། རྒྱ་གར་གྱི་དབྱངས་ཨི་ལྟ་བུ་གཅིག་ལའང་བཅོ་བརྒྱད་དུ་ཕྱེར་ཡོད་ཀྱང་ བོད་ལ་དེ་འདྲའི་བྱ་བ་མེད་པས་དབྱངས་ཨི་ཨུ་ཨེ་ཨོ་བཞི། བོད་ཀྱི་དབྱངས་ཀྱི་བྱེད་ ལས་ནི་ཡི་གེའི་སྒྲ་མདངས་ལ་འགྱུར་བ་སྐྱེད་བྱེད་ཡིན་ན། ཨ་ལ་དེ་འདྲའི་ནུས་པ་ མེད་པས་ཨ་དེ་དབྱངས་སུ་མི་བགྲང་བར་གསལ་བྱེད་དུ་འགྲང་བ་ཡིན། ཨ་ཡིག་ གསལ་བྱེད་དུ་འཇོག་ཚེ། དེ་ལེགས་སྦྱར་གྱི་དབྱངས་ལས་བཏུས་པ་ཡིན་པས་གསལ་ བྱེད་གཞན་དང་མ་འདྲེས་པར། ཡང་ན་སྔར་དང་། ཡང་ན་རྗེས་སུ་འཇོག་པ་ལས་ གཞན་འོས་མེད། ཀ་ལ་སྡེ་པ་ཆ་ཚང་བས་སྔོན་དུ་མ་བཞག་ཅིང་། ཧ་གྲོགས་མེད་ཁྱེར་ ཀྱང་ཡིན་པས་མཐར་བཞག་པ་ཡིན དེས་ན་ཨ་དེས་ཨ་ལི་དབྱངས་ཀྱི་བྱ་བ་གསལ་མི་ཐུབ་པས ཨ་ལི་གསལ་བྱེད་ཨི་སོགས་བཞི། །ཀ་ལི་སུམ་ཅུ་ཐམ་པ་འོ།། ཞེས་དངོས་སུ་གསུངས་བཞིན་དུའང་དཔལ་ཁང་ལོ་ཙ་བས། དབྱངས་ལྔ་ཡ་ར་ལ་ ཝའི་འདོགས།། ཞེས་དབྱངས་ལྔར་གསུངས་པ་དེ་ཐུ་མིའི་དགོངས་པ་དང་དངོས་འགལ་ཡིན
4
ཅ་ཆ་ཇ་གསུམ་ལ་བརྟེན་ནས་ཙ་ཚ་ཛ་གསུམ་བཟོས་པ་ཡིན་པར་དགེ་ཆོས་ལགས་ཀྱིས་གསུངས་ལ། ཤ་ས་ཧ་ལ་བརྟེན་ནས་ཞ་ཟ་འ་གསུམ་ བཟོས་པ་ཡིན་ཞེས། ཞིང་གཤེགས་དམ་པ་མཁས་དབང་པདྨ་རྒྱལ་མཚན་ལགས་ཀྱིས་གསུངས། དེས་ན་མཐར་གནས་ཀྱི་བ་ལ་བརྟེན་ནས་ཝ་ བཟོས་པ་དེ་ངའི་བསམ་ཚུལ་ཡིན། འོ་ན་མཐར་གནས་ཀྱི་བ་ལེགས་སྦྱར་ལ་ཡོད་བཞིན་དུ་བོད་ཡིག་གི་ཝ་ཅིའི་ཕྱིར་བཟོས་ཞེ་ན དེ་གཉིས་སྒྲ་མདངས་མི་འདྲ་སྟེ་མཐར་གནས་ཀྱི་བ་ནི་སྒྲ་མདོ་ལས། བཀཱར་སྱ་དནྟོཤྠམ། ཞེས་སོ་དང་མཆུ་ལས་སྐྱེས་པར་གསུངས་ཤིང་ ཝ་དེ་ལྕེ་རྐན་ལ་འདར་ཞིང་འ་སྒྲ་ཅུང་ཟད་དང་བཅས་འདོན་དགོས་པའི་ཕྱིར་རོ།
བོད་ཀྱི་ཝ་ཡིག་དེ་ལེགས་སྦྱར་གྱི་མཐར་གནས་ཀྱི་བ་ཡིག་དེ་མ་ཡིན་པའི་རྒྱུ་མཚན་དེ་ལ་བརྟེན་ནས་བོད་སྐད་ནང་། བ་ཕྱེད་ཝར་འབོད་ཀྱི་རྣམ་ བཞག་དེ་བྱུང་བ་ཡིན་ནོ།། དེའང་ཅུང་ཟད་ཞུ་ན། ལེགས་སྦྱར་ནང་། ཅཏུརྦི་ཤ་ཏི། ༼ཉི་ཤུ་རྩ་བཞི༽ བཛྲ། ༼རྡོ་རྗེ་༽ སརྦ། ༼ཐམས་ཅད༽ བཡུ། ༼རླུང་༽ བི་ནཱ་ཡཀ། ༼ལོག་ འདྲེན༽ བིཇཡ། ༼རྣམ་རྒྱལ༽ བི་བིདྷ། ༼རྣམ་མང་༽ བིཥ། ༼དུག༽ སོགས་ཐམས་ཅད་ལ་མཐར་གནས་ཀྱི་བ་ཡོད་བཞིན་དུ བོད་ཡིག་ནང་པ་སྡེའི་བ་བྲིས་པ་དེ་ བོད་ཡིག་གི་ཝ་དེས་ལེགས་སྦྱར་གྱི་མཐར་གནས་ཀྱི་བ་དེའི་སྒྲ་མདངས་མཚོན་མི་ཐུབ་པའི་རྒྱུ་མཚན་ཡིན། དེ་ལྟར་མ་ཡིན་ན་སརྦ་སོགས་ལ་པ་སྡེའི་བ་བྲིས་དགོས་དོན་ཅུང་ཟད་ཙམ་ཡང་མེད་པའི་ཕྱིར་རོ། དེ་འདྲའི་བྲིས་ཚུལ་དེ་ལ་བརྟེན་ནས་བོད་སྐད་རང་ལ་བ་ཕྱེད་ཝར་འབོད་ཀྱི་རྣམ་བཞག་བྱུང་ཞིང་། བདག་སྒྲ་ལའང་ཐུ་མིའི་དགོངས་པ་མིན་ པ་བ་དང་བོ་གཉིས་གསར་པ་བྱུང་། འོ་ན་མཐར་གནས་ཀྱི་བ་དེའི་ཚབ་ལ་ཡིག་གཟུགས་གཞན་མ་བྲིས་པར་པ་སྡའི་བ་བྲིས་དགོས་དོན་གང་ ཡིན་ཞེ་ན། མཐར་གནས་ཀྱི་བ་ཡིག་གི་སྒྲ་མདངས་པ་སྡེའི་བ་ལ་ཉེ་བ་དང་། ཡིག་གཟུགས་ཀྱང་དེ་གཉིས་ལ་ ཧིནྡི་ནང་ཁྱད་པར་ཅུང་ཟད་མ་ གཏོགས། ལཉྩ། ཝརྟུ་གཉིས་ཀའི་ནང་ལ་ཁྱད་པར་མེད་པ་དང་། དེ་མིན་པའི་རྒྱ་གར་བའི་ཡི་གེ་འགའ་ལའང་ཁྱད་པར་མེད་པའི་ཕྱིར། བོད་ཡིག་ ལའང་ཡིག་གཟུགས་གཞན་ལ་མིན་པར་པ་སྡེའི་བ་གཅིག་པུ་དེ་ལ་སྐབས་བབས་ཀྱིས་བེད་སྤྱོད་བྱེད་ཚུལ་མི་འདྲ་བ་གཉིས་བྱུང་བ་ཡིན་ནོ།
བྷ་ག་ཝཱན། ཝ་གེ་ཤྭར། བྷཝ་སོགས་ལ་བོད་ཡིག་གི་ཝ་རང་བྲིས་འདུག་པ་ཕྱིས་བྱུང་གི་ནོར་འཁྲུལ་ཡིན་སྙམ་སྟེ། བྷ་ག་ཝཱན་དང་། སརྦ་གཉིས་ཀྱི་ རྒྱ་ཡིག་ འདི་གཅིག་པུ་ལས་གཉིས་མེད་པས་སོ
ཅ་ཆ་ཇ་གསུམ་གསར་བཟོ་ཡིན་མིན་གྱི་རྒྱ་མཚན་མཐར་ཐུག་ནི། ལེགས་སྦྱརགྱི་སྡེ་པ་གཉིས་པ 5
ཅ་སྡེ་དང་ཙ་སྡེ་གང་ཡིན་ལ་ཐུག ཁ་ཆེ་བ་རྣམས་དང་། བལ་ཡུལ་པ་རྣམས་སྡེ་པ་གཉིས་པ་ཙ་སྡེར་འདོད་ཅིང་། བོད་ཀྱི་ཕྱིས་བྱུང་མཁས་པ་ རྣམས་ཀྱང་ཁོང་རྣམས་དང་འབྲེལ་ཆེ་བས། སྡེ་པ་གཉིས་པ་ཙ་སྡེར་འདོད་པར་བརྟེན གསར་བཟོ་ཅ་ཆ་ཇ་གསུམ་ཡིན་པཡ་འདོད། འོན་ཀྱང་སྡེ་པ་གཉིས་པ་ཅ་སྡེ་ཡིན་ཏེ སྒྲ་མདོར། ཨིཅུཡ་ཤ་ནཱམ་ཏཱ་ལུ། ཞེས་དབྱངས་ཨི་ཨཱི་དང་། སྡེ་པ་གཉིས་པ། མཐར་གནས་ཀྱི་ཡ་དྲོ་བའི་ཤ་བཅས་སྐྱེས་གནས་རྐན་ལས་སྐྱེ་བར་ གསུངས་ཤིང་ ཙ་ཚ་རྣམས་ལྕེ་རྩེ་དང་སོའི་བར་ལས་ཐོན་པར་མྱོང་བས་གྲུབ་པའི་ཕྱིར་རོ།
གཞན་ཡང་གོ་རིམ་གཏན་འབེབས་ཀྱི་རྒྱུ་མཚན་གོང་དུ་ཞུས་ཟིན་པ་ལྟར་དང་། རྒྱ་གར་རང་སྐད་ལ་ཙ་ཚ་ཛའི་སྒྲ་མེད་ལ་ཁ་ཆེ་ཨུར་དཱུའི་སྐད་ དང་འབྲེལ་བའི་ ཛ་རུར་ཞེས་པ་ལྟ་བུའི་སྒྲ་འདོན་དགོས་ཚེ་ནམ་རྒྱུན་གྱི་ཇ་ཡིག་དེའི་འོག་ལ་རྟགས་ཆུང་འདི་འདྲ་ ཞིག་བྲིས་ཀྱིན་ཡོད་པ་དེ་ ནི་རྒྱ་གར་རང་གི་ཡི་གེ་ལ་ཛ་མེད་པའི་རྟགས་ཡང་དག་ཡིན། དཔེར་ན་བོད་ཡིག་ལ་དབྱངས་རིང་པོ་མེད་པས་ལེགས་སྦྱར་གྱི་གཟུང་སྔགས་ འབྲི་སྐབས་དབྱངས་རིང་པོ་མཚོན་བྱེད་དུ་འོག་ལ་འ་ཆུང་བཏགས་པ་ལྟ་བུ་ཡིན། དེས་ན་སྡེ་པ་གཉིས་པ་ཅ་སྡེ་ཡིན་པར་བརྟེན ཅ་ཆ་ཇ་གསུམ་རྒྱ་གར་རང་ལ་ཡོད་ལ། ཐུ་མིས་གསར་དུ་བཟོས་པ་ནི། ཙ་ཚ་ཛ་གསུམ་ཡིན་ནོ
སྔོན་གྱི་གཟུང་སྔགས་དཔེར་ན། ན་མ་ཀྲཀུཅྖན་ྡཱ ཏཐཱགཏཡ། ན་མོ༔ བིཤྭབྷུཇེཏཐཱགཏཡ། སོགས་ཅ་ཆ་ཇ་རང་ཡིན་མོད ཕྱིས་སུ་མོན་པའི་རྡོ་རྗེ་གཅོད་པའི་ཞུས་དག་གི་དཔེ་ལྟར མ་དག་པ་མང་བ་དེས་སྔར་གྱི་དག་པ་དེའང་ཀྲཀུཙྪནཡྡཱ ། བིཤྭ་བྷུཛེ་སོགས་མ་དག་པར་བཟོས་ཏེ གཟུང་སྔགས་སོགས་སུ་ཅ་ཆ་ཇ་གསུམ་གར་ཡོད་ལ་ཙ་ཚ་ཛར་བསྒྱུར་བའི་གསར་བརྗེ་གསར་པ་ཞིག་བྱུང་། འོན་ཀྱང་སྐྱོན་ཆེན་པོ་རང་མེད་དེ སྡེ་པ་གཉིས་པ་རང་ངོས་ནས་ཅ་ཆ་ཇར་ཚུར་ཐུབ་ཏུ་གྲུབ་པ་མིན་པར་བློས་ཅ་ཆ་་ཇར་ཕར་བཏགས་པ་ཡིན་པས་ལྟོ་ལྡིར་བ་ལ་རྒྱ་གར་བས་ གྷཊ། བོད་པས་བུམ་པ་ཞེས་བཏགས་ཀྱང་སོ་སོའི་ངོ་ན་བརྗོད་དོན་འཁྲུལ་པ་མེད་པའི་ཕྱིར་རོ།
6
དེ་ལྟར་གོང་དུ་གང་ལས་དཔེ་བླངས་པའི་གཞི་མའི་ཡི་གེ་དང་། གང་ཉེ་བར་མཁོ་བའི་གསར་བསྣན་གྱི་ཡི་གེའི་སྐོར་ལ་ ཕལ་ཆེར་ མཁས་དབང་ དགེ་ཆོས་ལགས་ཀྱི་གསུངས་གཞིར་བཞག་གི་ཐོག་རང་གི་བསམ་ཚུལ་གང་ཡོད་བཀོད་པ་ཙམ་ཡིན་གྱི། འདི་ནི་བདེན་གྱི་གཞན་ནི་འཁྲུལ་པའོ་ ཞེས་ངས་ནམ་ཡང་ཞུ་གི་མེད། ད་དུང་དེ་དག་གི་ཐོག་དཔྱད་རྒྱུ་མང་པོ་ཡོད་མོད་རེ་ཞིག་རང་རེའི་ལོ་ཕྱེད་ཆོས་རྒྱུགས་ཐག་ཉེ་རུ་སོང་བའི་ དབང་གིས་སྐབས་འདིའི་ངལ་བ་ངང་དུ་བླངས་ཐུབ་མ་བྱུང་བས་རྗེས་སུ་མུ་མཐུད་ནས་འབུལ་རྒྱུ་བཅས་བསམ་གཏན་མིང་པས་ཟླ་༩པའི་ཚེས་ ༣༠ལ་བྲིས་པའོ།།
བརྗོད་བྱ། སྔོན་འཇུག་གི་ཅི་ཕྱིར་འཇུག་པའི་སྐབས་ཀྱི་དཀའ་གནད
༈ ཐུབ་པའི་གསུང་ཟབ་དག་བྱེད་གཙང་མའི་རྒྱུན།། བརྡ་དག་ཡུར་བའི་ལམ་ནས་འདྲེན་ནས་ནི།། བྱང་དུ་བསྟན་པའི་ཆུ་གཏེར་བཀྱིལ་མཛད་པ།། ཐུ་མི་ཀུན་བཟང་གང་དེ་རྒྱལ་གྱུར་ཅིག
ཅེས་བརྗོད་ནས་སྐབས་འདིར་སྔོན་འཇུག་གི་ཅིའི་ཕྱིར་འཇུག་པའི་གཞུང་གི་དཀའ་གནད་མདོར་བསྡུས་ཤིག་ཞུ་བ་ལ། ༡ བྱ་བྱེད་ལས་གསུམ། ༢ བདག་གཞན་དུས་གསུམ། ༣ བདག་གཞན་ངོས་འཛིན་རེའུ་མིག ༤ དངོས་པོ་བདག་གཞན་སྐབས་ཀྱི་དངོས་པོའི་དོན། ༥ བྱེད་པ་པོ་གཞན་དང་དངོས་སུ་འབྲེལ་མ་འབྲེལ། ༦ བྱེད་པ་པོ་དང་བྱ་བའི་ཡུལ། ༸ སྐབས་དོན་ཁོ་བོའི་ལུགས་ཀྱི་བདག་གཞན་ངོས་འཛིན་ དཔེར་བརྗོད་དང་བཅས་བདུན་ནོ།
དང་པོ་བྱ་བྱེད་ལས་གསུམ་ནི
བྱ་ཞེས་པ་བྱ་བ་དུས་གསུམ་གང་ཡང་རུང་བ། བྱེད་ཅེས་པ་བྱེད་པ་པོ། ལས་ཞེས་པ་བྱ་བའི་ཡུལ་ཡིན། དེ་གསུམ་གྱི་ཐ་སྙད་ནི་ལེགས་སྦྱར་ནས་ བྱུང་བ་ཞིག་སྟེ། དེ་དག་གི་སྐད་དོད་རིམ་པ་བཞིན 7
ཀྲིཡཱ། ཀར།ྟཱ ཀརྨ ཞེས་བྱ་བ་དེ་གསུམ་ཡིན། དཔེར་ན། འགའ་བྱེད་དེབ་ཀློག་གིན་འདུག ༼རཱ་མཿ གྲནྠཾ པཋཏི།༽ ཅེས་པར་ལྟ་བུར་མཚོན་ན་འགའ་བྱེད་ནི་བྱེད་ པ་པོ། དེབ་ནི་བྱ་བའི་ལས། ཀློག་པ་ནི་བྱ་བ་ཡིན། འགའ་བྱེད་དང་དེབ་གཉིས་མིང་རྐྱང་ཡིན་པས་དེ་གཉིས་ལ་དུས་ཀྱི་ཁྱད་པར་མི་འཇུག བཀླགས་ཟིན། བཀླག་འགྱུར། ཀློག་བཞིན་ལྟ་བུའི་དུས་ཀྱི་ཁྱད་པར་ནི་ཀློག་པའི་བྱ་བ་དེ་ལ་འཇུག་པ་ཡིན། དེས་ན་མཁས་པ་དག་གིས་བྱ་བ་ཡུལ་ལ་ཡོད་པའི་ལས་དང་། བྱེད་པ་པོ་ལ་ཡོད་པའི་ལས་ཞེས་ ལས་ལ་གཉིས་སུ་དབྱེ་བ་དེ་ནི། ལས་ཞེས་པ་བྱ་ བ་ལ་འཁྲུལ་ནས་ལས་ངོས་མ་ཟིན་པའི་དབང་གིས་བྱུང་བ་ཡིན། ནན་ཏན་དུ་ཞུ་རྒྱུ་ནི། ལས་ཀྱི་སྐད་དོད་ཀརྨ་ཞེས་ཡོད་ཅིང་ དེ་འདྲ་བའི་ཀརྨ་དེ་ལེགས་སྦྱར་གྱི་དབང་དུ་བྱས་ན། བྱེད་པ་པོའི་ཤིན་ཏུ་འདོད་པ ༼ཀརྟུརིཔཏྶི ཏམཾ ཀརྨ།༽ ཞེས་པའི་བྱ་ཡུལ་དེ་མ་གཏོགས་བྱ་བ་ལ་འཇུག་པའི་སྐབས་མི་སྲིད་དོ
གཉིས་པ་བདག་གཞན་དུས་གསུམ་ནི
བདག་ནི་བྱེད་པ་པོ་དང་། གཞན་ནི་བྱ་བའི་ཡུལ། དུས་གསུམ་ནི་བྱ་བའོ། འདིའང་གོང་གི་དཔེར་བརྗོད་དེར་མཚོན་ན་འགའ་བྱེད་ནི་བདག དེབ་ནི་གཞན། ཀློག་པ་ནི་དུས་གསུམ་ལས་ད་ལྟ་བའོ
སྐབས་འདིའི་བདག་གཞན་ཞེས་པའི་ཐ་སྙད་ནི་ལེགས་སྦྱར་གྱི་བདག་ཚིག ༼ཨཱཏྨནེཔད༽ དང་། གཞན་ ༼པརསྨཻཔད༽ ཞེས་པ་དེ་གཉིས་ལས་ བྱུང་བ་ཡིན། འོན་ཀྱང་སྐབས་འདིའི་བདག་ཚིག་ཞེས་པ་བདག་དང་། གཞན་ཚིག་ཞེས་པ་གཞན་ཞེས་གོ་རྒྱུ་མིན། བདག་ཚིག་ཞེས་པའི་ཚིག་ནི་ བྱ་ཚིག་ཡིན་ལ། དེ་སྦྱོར་ཡུལ་ཨཱཏྨ་ཞེས་པ་བདག་ཡིན་པ་དང་དེའང་བྱེད་པ་པོ་ལ་གོ་དགོས དེ་བཞིན་གཞན་ཚིག་ཞེས་པའི་ཚིག་ཀྱང་བྱ་ཚིག་ཡིན་ལ
8
དེ་སྦྱོར་ཡུལ་པ་ར་ཞེས་པ་གཞན་ཡིན་པ་དང་དེའང་བྱ་བའི་ཡུལ་ལ་གོ་དགོས། དེའང་ལེགས་སྦྱར་སྐབས་སུ། འགའ་བྱེད་དེབ་ཀློག་གིན་འདུག ༼རཱ་མཿ གྲནྠཾ པཋཏི།༽ ཅེས་བརྗོད་པའི་ཚེ། འགའ་བྱེད་ལ་རྣམ་དབྱེ་དང་པོ། དེབ་ལ་རྣམ་དབྱེ་གཉིས་པ་འཇུག་པ་ཡིན། འགའ་བྱེད་ཀྱིས་དེབ་ ཀློག་གིན་འདུག ༼རྰམེཎ གྲནྠཿ པཱཋཡཏེ།༽ ཅེས་བརྗོད་པ་དེའི་ཚེ འགའ་བྱེད་ལ་རྣམ་དབྱེ་གསུམ་པ། དེབ་ལ་རྣམ་དབྱེ་དང་པོ་འཇུག་པའི་བྱ་ཚིག་མི་འདྲ་བ་གཉིས་ཡོད་པ་དེའི་དབང་གིས། བརྗོད་པ་དང་པོའི་ ཚེ་ཀློག་པའི་བྱ་བ་དེ་དེབ་ལ་བབས་པས པ་ཋ་ཏི་ཞེས་པའི་བྱ་ཚིག་དེ་ལ་གཞན་ཚིག་ཅེས་བྱ་བ་ཡིན་ལ། དེ་བཞིན་བརྗོད་པ་གཉིས་པའི་སྐབས་ཀློག་པའི་བྱ་བ་བྱེད་པ་པོ་ལ་བབས་པས པཱ་ཋ་ཡ་ཏེ་ཞེས་པའི་བྱ་ཚིག་དེ་བདག་ཚིག་ཅེས་བྱ་བ་ཡིན། བོད་སྐད་ནང་ངག་སྦྱོར་འདི་གཉིས་ཀྱི་རྣམ་བཞག་གསལ་པོ་མེད་པས་ཅུང་ཟད་ གོ་དཀའ།
མཁས་པ་འགའ་ཞིག་གིས། ཀ་ལ་པར གར་བྱེད་མཁན་དེ་བྱེད་པ་པོ། གར་བྱ་བ་དེ་ལས་སོ། ཞེས་པའི་གར་བྱ་བའི་དོན་བྱེད་པ་པོས་གང་བྱ་བ་ནི་ལས་སམ་བྱ་བ་ཡིན་ལ། དེ་ལ་དབྱེ་ན་ བྱེད་པ་པོ་ལ་ཡོད་པའི་ལས་དང་། བྱ་བ་གཞི་ལ་ཡོད་པའི་ལས། ཞེས་གཉིས་སུ་ཕྱེ་ནས དོན་ལ་དེ་གཉིས་ཀ་བྱ་བར་འདོད་ནས་ཕྱི་མ་ལ། ལས་སམ་གཞན་ཞེས་ཐ་སྙད་མཛད་པ་ནི་དོན་མ་གོ་བ་སྟེ། སྐབས་འདིའི་ལས་ཀྱི་སྐད་དོད་ ཀརྨ་ཞེས་ཡོད་ངེས་ཡིན་ལ དེ་འདྲ་བའི་བྱ་ཚིག་གཉིས་པོ་དེ་ལས་༼ཀརྨ༽ཡིན། ཞེས་གསུངས་མི་སྲིད་པའི་ཕྱིར་རོ
གསུམ་པ་ངོས་འཛིན་རེའུ་མིག་ནི
བདག 9
གཞན ཞ་ལུ བདག་རང་ཉིད གཞན་བྱ་བ་ལ་འགོད་པ བྲ་ཏི བྱེད་པ་པོ བྱ་བའི་དངོས་པོ་༼ཤིང་གཅད་པའི་བྱ་བ་ལྟ་བུ།༽ རྣམ་གླིང་། བྱེད་ལས་ད་ལྟ་བ བྱ་བ་ཞིག་ལ་ཡོད་པའི་ལས་དང་། བྱེད་ལས་མ་འོངས་ པ་གཉིས སི་ཏུ བྱེད་པ་པོ། བྱེད་པ་སྟེ་རེ། བྱེད་ལས་ད་ལྟ་བ བྱ་ཡུལ། བྱ་ཚིག་མ་འོངས་པ
དེའི་རྗེས་ཀྱི་མཁས་པ་རྣམས་ཀྱི་བཞེད་པ་ནི་ཕལ་ཆེར་སིཏུ་དང་མཐུན
བཞི་པ་དངོས་པོ་བདག་གཞན་གྱི་སྐབས་ཀྱི་དངོས་པོའི་དོན་ནི 10
བདག་དང་གཞན་ལ་དངོས་པོ་ཞེས་སྦྱོར་ཞིང་དུས་ལ་དངོས་པོ་ཞེས་མི་སྦྱོར། དེའང་གང་ཞིག་བརྗོད་པ་ན་དུས་ཀྱི་ཁྱད་པར་མི་མངོན་པར་ དངོས་པོ་ཙམ་ཞིག་སྟོན་པ་དེ་ལ་དངོས་པོ་ཞེས་བྱ་ཞིང་། གང་ཞིག་བརྗོད་པ་ན་དུས་ཀྱི་ཁྱད་པར་སྟོན་པ་དེ་ལ་དུས་ཞེས་བྱ་བ་ཡིན། དེའང་གོང་ གི་དཔེར་བརྗོད་དེར་མཚོན་ན་འགའ་བྱེད་དང་དེབ་གཉིས་དང། དེ་བཞིན་བྱེད་པ་པོ་དང་བྱ་ཡུལ་ཞེས་པའི་ཚིག་དག་གིས་དུས་ཀྱི་ཁྱད་པར་ མི་སྟོན་པར་དངོས་པོ་ཙམ་ཞིག་བརྗོད་པས་དངོས་པོ་ཞེས་བྱ་བ་ཡིན་ལ། ཀློག་གིན་འདུག་ཞེས་པས་དུས་ཀྱི་ཁྱད་པར་སྟོན་པ་ཙམ་ལས། དངོས་ པོའི་རང་ལྡོག་མི་སྟོན་པས་དེ་ལ་དངོས་པོ་ཞེས་མ་སྦྱར་བ་ཡིན
གཅོད་དོ་ལྟ་བུ་བདག་ཏུ་འདོད་པ་དང་། གཅད་པར་བྱ་ལྟ་བུ་གཞན་ཡིན་པར་འདོད་པ་ནི བདག་གཞན་གཉིས་ལ་དངོས་པོ་ཞེས་པའི་ཚིག་དབུ་ཚུགས་ཀྱིས་སྦྱར་བ་མ་གཏོགས་དངོས་པོ་ཞེས་པའི་དོན་ཇི་བཞིན་མ་གོ་བའི་རྣམ་འགྱུར་ དུ་གསལ། དེ་བཞིན་དུས་མ་འོངས་པ་དང་ད་ལྟ་བའི་དཔེར་བརྗོད་ལ་གཅད་བྱ། གཅོད་བྱེད། དགག་བྱ། འགོག་བྱེད། གཏང་བྱ། གཏོང་བྱེད། ཅེས་སོགས་བྲིས་པ་རྣམས་ཀྱང་བདག་གཞན་དུས་གསུམ་དང་དངོས་པོ་དང་དུས་ཀྱི་རྣམ་བཞག་ཇི་བཞིན་མ་ཤར་བ་ཡིན་ཏེ། དགག་བྱ། གཏང་ བྱ། གཅད་བྱ། སོགས་ཀྱིས་དངོས་པོ་གཞན་བརྗོད་པ་ཙམ་ལས་དུས་བརྗོད་པ་མིན་པ་དང་། དེ་བཞིན་འགོག་བྱེད། གཏོང་བྱེད། གཅོད་བྱེད་ སོགས་ཀྱིས་ཀྱང་དངོས་པོ་བདག་བརྗོད་པ་ཙམ་ལས་དུས་བརྗོད་པ་མིན་པས་སོ།
མ་ཟད། གཅོད་དོ་ལྟ་བུའི་བྱ་ཚིག་ད་ལྟ་བ་དེ་དངོས་པོ་བདག་ཏུ་འདོད་པའི་འཁྲུལ་པ་འདིས། མ་ནིང་གཉིས་ཀ་ད་ལྟ་ཆེད།། ཅེས་པའི་སྐབས་ཀྱི་ ད་ལྟ་བའི་འགྲེལ་བཤད་རྒྱབ་རྒྱུ་མ་བྱུང་བར་སྟོབས་མཚུངས་དང་ཤེད་མཚུངས་ལ་སོགས་པ་དང་། ཐུ་མི་གཉིས་པར་ཞལ་གྱིས་བཞེས་པ་གང་ དེས་ཀྱང་ད་ལྟ་ཆེད་ཅེས་པ་བདག་ལ་འཇུག་པའི་སྒྲུབ་བྱེད་དུ་སྦྱར་དགོས་བྱུང་བ་ཡིན། དངོས་པོ་དང་དུས་ཞེས་པའི་ཐ་སྙད་གང་ལས་བྱུང་བའི་ཁུངས་ནི་སུམ་ཅུ་པའི་དེ་སྒྲའི་སྐབས་སུ། དངོས་པོའི་དབང་དུ་བཞི་རུ་འགྱུར། །དུས་ཀྱི་ དབང་དུ་གཉིས་ཡིན་ནོ།། ཞེས་པའི་གཞུང་དེ་ལས་བྱུང་བ་ཡིན་ལ དེ་ལ་བརྟེན་ནས་པཎ་ཆེན་ཤཱཀ་མཆོག་པས་ཀྱང་། ཡང་ན་དུས་དང་དངོས་པོ་དང་། །མིང་དང་བྱ་བ་སོ་སོར་དབྱེ། །དངོས་པོ་ལ་ཡང་བདག་ དང་གཞན
ཞེས་གསུངས། དེས་ན་ཐ་སྙད་དབང་དུ་གསུམ་གྱི་དཔེར་བརྗོད་དུ་དུས་འདས་པའི་དཔེར་བརྗོད་བྱུང་བ་ནི་དཔྱད་གཞིའི་གནས་སོ།
11
ལྔ་པ་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་ནི
རྣམ་བཞག་འདི་ཐོག་མར་སི་ཏུས་སྲོལ་གཏོད་པ་ཞིག་ཡིན་ལ འདི་ལ་བརྟེན་ནས་བདག་གཞན་དུས་གསུམ་གྱི་གོ་རྟོགས་ལ་ཕན་རླབས་ཆེན་པོ་བྱུང་ཡོད། དེའི་དོན་ནི་ཆུ་ཆད་ཅེས་པ་ལྟ་བུ་བྱེད་པ་པོ་མེད་པ་ འམ། འཁོར་ལོ་དང་པོ་མིས་བསྐོར་བའི་རྗེས་ལ་འཁོར་ནས་སྡོད་པའི་སྐབས་ལྟ་བུ་བྱེད་པ་པོ་ཡོད་ཀྱང་དངོས་སུ་མི་སྣང་བ་ཞིག་ལ་བྱེད་པ་པོ་ གཞན་དང་དངོས་སུ་མ་འབྲེལ་བ་དང། བྱ་བ་གང་ཞིག་ལ་བྱེད་པ་པོ་གཞན་དངོས་སུ་སྣང་བའི་ཚེ། བྱ་བ་དེ་ལ་བྱེད་པ་པོ་གཞན་དང་དངོས་སུ་ འབྲེལ་བ་ཞེས་པའི་ཐ་སྙད་འདོགས་པར་མཛད། དེ་ལ་ཁོ་བའི་སེམས་ནང་ཐེ་ཚོམ་འདི་འདྲ་ཞིག་བྱུང་། དཔེར་ན་རྐུན་མས་ཤིང་བཅད་ནས་ཁྱེར་ཕྱིན་པའི་རྗེས་ལ་བཅད་ཤུལ་མཐོང་བ་ན། བྱེད་ པ་པོ་དངོས་སུ་མི་སྣང་བས་བཅད་པའི་བྱ་བ་འདས་པ་དེ་ལ་ བྱེད་པ་པོ་གཞན་དང་དངོས་སུ་མ་འབྲེལ་བའི་བྱ་ཚིག་ཆད་ཅེས་པ་དེ་སྦྱོར་རམ་ཅི།
དྲུག་པ་བྱེད་པ་པོ་དང་བྱ་ཡུལ
བཀྲ་ཤིས་ཀྱིས་ཤིང་གཅོད་པ་ལ་མཚོན་ན བཀྲ་ཤིས་བྱེད་པ་པོ་དང་། ཤིང་བྱ་ཡུལ་ཡིན་པར་ཕལ་ཆེར་ཞལ་མཐུན་ཀྱང་ དཀར་ལེབ་སུམ་རྟགས་དཀའ་འགྲེལ་༼༦༦༽ དུ་“བཀན་བྱའི་ལག་པ་སོགས་ཁམས་ལུགས་ལྟར་བྱ་ཡུལ་དུ་ངོ་སྤྲོད་ན། ནམ་ཞིག་མཆོད་ཡུལ་ དང་སྦྱིན་ཡུལ་སོགས་ཀྱང་མཆོད་རྫས་དང་། ཟས་ནོར་གོས་སོགས་སུ་ཁན་མི་ལེན་ཀ་མེད་བྱུང་།” ཞེས་འགོག་ཁུལ་བྱེད་ནས་དཀར་ལེབ་རང་ ལུགས་སུ
“ཤིང་མཁན་གྱི་སྟ་རེས་ལྕང་ར་རུ་ ཤིང་བཅད།” ཅེས་དཔེར་བརྗོད་ནས “ལྕང་ར་འདི་བྱ་བ་སྒྲུབ་སའི་ཡུལ་དེ་ཡིན། ཤིང་དེ་བྱ་བའི་དངོས་པོའམ་དོན་དུ་གཅོད་རྒྱུ་དེ་ཡིན།” ཞེས་དང་། ཡང ”བྱེད་པ་པོས་བྱ་བ་གང་ བསྒྲུབ་པའི་ས་དམིགས་དེ་ལ་བྱ་ཡུལ་ཞེས་བྱ།” ཞེས་གསུངས 12
ཁྱེད་ལ་འདི་བརྗོད་པར་བྱ་སྟེ། ཤེས་བྱ་ཆོས་ཅན། གཙུག་ལག་ཁང་དུ་མཆོག་གསུམ་ལ་སྐྱབས་སུ་འགྲོ་བའི་ཚེ་སྐྱབས་སུ་འགྲོ་ཡུལ་ནི་གཙུག་ལག་ ཁང་འདི་ཡིན་པར་ཐལ། སྐྱབས་སུ་འགྲོ་ཡུལ་དང་སྐབས་འདིའི་བྱ་ཡུལ་གཉིས་གཅིག་ཏུ་ཁྱོད་ཀྱིས་ཁས་བླངས་ཡིན་པའི་ཕྱིར། འདོད་མི་ནུས་ཏེ། ཁྱོད་ཀྱིས་སི་ཏུ་ལ་ནམ་ཞིག་ན་ཁས་ལེན་དགོས་པར་ཐལ་བ་དེ་ཁྱོད་རང་གིས་ད་ལྟ་རང་ཁས་བླངས་དུ་འགྲོ་བ་དེའི་ཕྱིར།
དེས་ན་འཁྲུལ་པ་འདི་ལྟ་བུ་ནི་ལ་དོན་གྱི་བྱ་ཡུལ་དང་། བདག་གཞན་སྐབས་ཀྱི་བྱ་ཡུལ་གཉིས་དབྱེ་འབྱེད་མ་ཐུབ་པའི་ནོངས་པ་ལས་བྱུང་བ་ ཡིན་ཏེ། ཤིང་གཅོད་སའི་ཡུལ་ལྕང་ར་འམ་ཤིང་ནགས་ལྟ་བུ་དེ རྣམ་དབྱེ་བདུན་པ་སྦྱོར་ཡུལ་རྟེན་གནས་ཞེས་བྱ་བ་དེ་ཡིན་ལ སྐབས་འདིའི་བྱ་ཡུལ་ནི་བྱེད་པ་པོ་གཞན་དང་དངོས་སུ་འབྲེལ་བའི་ཡུལ་ལྡན་བྱ་ཚིག་གི་ཡུལ་དེ་ལ་གོ་དགོས་པའི་ཕྱིར་རོ།། དེའང་ལེགས་སྦྱར་དུ། ཟ། ཐུང་། ཀློག གཅོད་ལྟ་བུའི་བྱ་ཚིག་རྣམས་ལ བྱ་བའི་ཡུལ་ལམ་ལས་རིམ་པ་བཞིན་ཟས། ཇ། དེབ། ཤིང་སོགས་གཞག་རྒྱུ་ཡོད་པ་དེ་ལ་ཡུལ་ལྡན་བྱ་ཚིག ༼སཀརྨཀདྷཱ་ཏུ ༽ དང་། འགྲོ་བ། འཕུར་བ། ཁྲུས་རྒྱབ་པ། ཉལ་བ་སོགས་ལ་བྱ་ཡུལ་གཞག་རྒྱུ་མེད་པས་ཡུལ་མེད་བྱ་ཚིག་༼ཨཀརྨཀདྷཱཏུ།༽ཅེས་གསུངས་པ་དེ་ དག་བོད་ཀྱི་སྐད་ཡིག་ནང་ཐ་སྙད་ཡོངས་སུ་མ་གྲགས་པ་མ་གཏོགས་དོན་ལ་ལེགས་སྦྱར་དང་གཅིག་མཚུངས་སུ་ཡོད། དེ་ལ་ཆད་ལྟ་བུ་ལ་ཡུལ་ ཡོད་ཀྱང་བྱེད་པོ་གཞན་དང་མ་འབྲེལ། བཅད་ལྟ་བུ་ཡུལ་ལྡན་བྱ་ཚིག་དང་བྱེད་པོ་གཞན་དང་འབྲེལ་བ་གཉིས་ཀ་ཡིན་པས་བྱ་ཚིག་དེའི་ཡུལ་ ཤིང་དེ་བདག་གཞན་གྱི་སྐབས་ཀྱི་བྱ་ཡུལ་ཡིན་ནོ།
དེས་ན་བདག་གཞན་གྱི་སྐབས་ཀྱི་བྱ་ཡུལ་དང་། རྣམ་དབྱེ་བདུན་པ་སྦྱོར་ཡུལ་གཉིས་གཞི་མཐུན་མི་སྲིད་པའི་འགལ་བ་ཡིན་ལ། དེ་དང་རྣམ་ དབྱེ་གཉིས་པའི་ཡུལ་ལ་མུ་བཞི་ཡོད། ཤར་དུ་འགྲོ་ཞེས་པའི་སྐབས་ཀྱི་ཤར་ནི། རྣམ་དབྱེ་གཉིས་པའི་ཡུལ་ཡིན་ཀྱང་བདག་གཞན་གྱི་བྱ་ཡུལ་ མིན་ཏེ། བྱ་ཚིག་དེ་ཡུལ་ལྡན་བྱ་ཚིག་མིན་པའི་ཕྱིར་རོ། ཤིང་བཅད་ལྟ་བུའི་ཤིང་ནི་བདག་གཞན་གྱི་བྱ་ཡུལ་ཡིན་ཀྱང་རྣམ་དབྱེ་གཉིས་པའི་བྱ་ ཡུལ་མིན། གཟུགས་ལ་ལྟ་ཞེས་པའི་སྐབས་ཀྱི་གཟུགས་ནི་གཉིས་ཀ་ཡིན། བཀྲ་ཤིས་ཀྱིས་ཤིང་བཅད་ལྟ་བུའི་སྐབས་ཀྱི་བཀྲ་ཤིས་ནི་གཉིས་ཀ་མིན་ པའོ།
བདུན་པ་སྐབས་དོན་ཁོ་བོའི་ལུགས་ཀྱི་བདག་གཞན་ངོས་འཛིན་ནི 13
དེ་ལྟར་ཞར་ལ་འོངས་པས་ཐ་གཞན་བཀག་ཟིན་ནས སྐབས་སུ་བབས་པའི་དོན་ལ་གཞུང་དུ། ཕོ་ནི་འདས་དང་གཞན་སྒྲུབ་ཕྱིར།། ཞེས་པའི་སྐབས་ཀྱི་ཐ་སྙད་ལྔ་ལས། བདག་ནི། བཀྲ་ཤིས་ཀྱི་སྟ་རེས་ ཤིང་གཅོད་ལྟ་བུར་མཚོན་ན བཀྲ་ཤིས་དང་སྟ་རེ་ལྟ་བུ་དངོས་མིང་གིས་གསལ་བའམ། མི་གསལ་བ་བྱེད་པ་པོ་དང་གཅོད་བྱེད་ལྟ་བུ་རྣམས་ཡིན། གཅོད་བྱེད་ཅེས་བྱ་བ་ནི་ བྱེད་པ་པོ་དངོས་མིན་ཀྱང་དུས་དང་དངོས་པོ་གཉིས་ལས་དུས་མི་སྟོན་པར་དངོས་པོ་ཙམ་ཞིག་སྟོན་པས་ འདུས་ཤིང་། གཞན་མིན་པ་དང་བྱེད་པ་པོའི་གྲོགས་བྱེད་པའི་ཆ་་ནས་བདག་གི་ཁོངས་སུ་འདུས་སོ།
བདག་གཞན་གཉིས་གང་རུང་དུ་
གཞན་ནི། དངོས་མིང་དངོས་སུ་གསལ་བ་ཤིང་དང་། མི་གསལ་བ་གཅད་བྱ་ཞེས་བྱ་བ་གཉིས་པོ་དག་གོ། དུས་གསུམ་ནི། བྱ་བ་ཡུལ་ལ་ཡོད་པ་ དང་། བྱེད་པ་པ་ལ་ཡོད་པ་སོགས་ཀྱི་ཁྱད་པར་མེད་པར་སྤྱི་ལྡོག་ནས་བྱ་བ་བྱས་ཟིན་འདས་པ། བྱེད་འགྱུར་མ་འོངས། བྱེད་བཞིན་ད་ལྟ་བའོ
ཕོ་ཡིག་དུས་འདས་པ་ལ་འཇུག་པའི་དཔེར་བརྗོད་ནི ལམ་བཀག མདོ་བཀླགས། སྲོག་བསྐྱབས་ལྟ་བུ། གཞན་ལ་འཇུག་པ་ནི་བསྐྱབ་བྱ། བསྐྱབ་བྱའི་སྲོག བཀྱེ་བྱ། བཀྱེ་བྱའི་སྤྲུལ་པ་ལྟ་བུའོ
མ་ནིང་གཞན་ལ་འཇུག་པ་ནི དགག་བྱ། དགག་བྱའི་ལམ། དགུམ་བྱ། དགུམ་བྱའི་སྲོག གཟར་བྱ། གཟར་བྱའི་གོས་ལྟ་བུ། བདག་ལ་འཇུག་པ་ནི། གཅོད་པ་པོ། གཅོད་བྱེད། ལོགས་སུ་དགར་བ་པོ། དགར་བྱེད་ལྟ་བུ། ད་ལྟ་བ་ལ་འཇུག་པ་ནི། གཅོད་པར་བྱེད། གཅད་དོ། ནོར་གསོག་པར་བྱེད། དགྲ་གསོད་པར་བྱེད། ལག་ ཏུ་གཏོད་པར་བྱེད་ལྟ་བུ་རྣམས་ཏེ དེ་རྣམས་ཀྱིས་དུས་ཀྱི་ཁྱད་པར་བརྗོད་པས་བདག་གཞན་དུས་གསུམ་ལས་དུས་དང་། བྱ་བྱེད་ལས་གསུམ་ལས་བྱ་བའི་ཁོངས་སུ་བསྡུས་པ་གོང་ ཞུས་ལྟར་རོ 14
མོ་ཡིག་བདག་ལ་འཇུག་པ་ནི དགྲ་དང་འཐབ་པ་པོ། འཐབ་བྱེད། གཞན་དུ་འཁྱེར་བ་པོ། འཁྱེར་བྱེད། འགོག་པ་པོ། འགོག་བྱེད་ལྟ་བུ། ད་ལྟ་བ་ལ་འཇུག་པ་ནི། འཁྲིད་པར་ བྱེད། འགུམས་པར་བྱེད་ལྟ་བུ། མ་འོངས་པ་ལ་འཇུག་པ་ནི། ཆུ་འཁྱིལ་བར་འགྱུར། དྲི་མ་འཁྲུ་བར་འགྱུར། ཁྲི་ལ་འཁོད་པར་འགྱུར་ལྟ་བུའོ
ཤིན་མོ་བདག་གཞན་དུས་གསུམ་མཉམ་པར་འཇུག་པ་ནི མཁྱེན་བྱ། མཁྱེན་བྱེད། མཁྱེན་ཟིན། མཁྱེན་བཞིན། མཁྱེན་པར་འགྱུར་ལྟ་བུ་རྣམས་སོ།། །། ཅེས་པ་འདིའང་བསམ་གཏན་ནམ་མིང་གཞན་ཤེས་རབ་སེང་གེར་འབོད་པས དབྱུ་གུ་ཟླ་བའི་མར་ངོ་རྫོགས་པ་གཉིས་པ་སྤྱི་ལོ་༢༠༠༢སྤྱི་ཟླ་༡༠པའི་སྤྱི་ཚེས་༣༡ཉིན་རྫོགས་པར་བྲིས་པ་དགེའོ།
ཐུབ་བསྟན་དྲི་མ་མེད་པའི་བདུད་རྩིའི་ཆུས།། འགྲོ་བའི་རྨོངས་པ་ཐ་དག་བཀྲུས་བྱས་ནས།། བློ་གྲོས་རིན་ཆེན་རྒྱན་ཚོགས་སྦྱིན་མཛད་པའི།། མི་ཕམ་པདྨ་དཁར་པོ་དེར་ཕྱག་འཚལ།། སྐབས་འདིར་རྗེས་འཇུག་གི་ཇི་ལྟར་འཇུག་པའི་སྐོར་མདོར་བསྡུས་ཤིག་ཞུ་བ་ལ་། སྒྲའི་འཇུག་ཚུལ་དང་། དོན་གྱི་འཇུག་ཚུལ་གཉིས། དང་པོ་ སྒྲའི་འཇུག་ཚུལ་ནི། ཕོ་གསུམ་རང་གི་འཇུག་ཡུལ་མིང་གཞི་སོགས་ལ་སྒྲ་དྲག་པའི་ཚུལ་གྱིས་འཇུག་ཅིང་ དེ་བཞིན་མོ་གཉིས་ཞན་པ་དང་། མ་ ནིང་གསུམ་སྒྲ་རན་པའི་ཚུལ་གྱིས་འཇུག་པ་ནི་གཞུང་ནས་བཤད་པ་ལྟར་རོ
15
འོན་ཀྱང་གནད་ཀྱི་དོན་ནི ཕོ་ཡིན་པའི་རྒྱུ་མཚན་གྱིས་སྒྲ་དྲག་པ་སོགས་མིན་པར སྒྲ་དྲག་པར་འཇུག་པའི་རྒྱུ་མཚན་གྱིས་ཕོར་འཇོག་པ་དང་། དེ་བཞིན་མོ་དང་མ་ནིང་ཡང་སྒྲ་ཞན་པ་དང་རན་པར་འཇུག་པའི་རྒྱུ་མཚན་གྱིས་ དེ་དང་དེར་བཞག་པ་ཡིན་ལ། སྒྲ་དྲག་ཞན་རན་བར་མ་དེ་དག་ལའང་ནང་གསེས་དྲག་ཞན་གྱི་དབང་གིས་ཕོ་གསུམ་དང་མོ་གཉིས་མ་ནིང་ གསུམ་བཅས་ནང་གསེས་དབྱེ་བ་བརྒྱད་དུ་ཕྱེ་བ་ཡིན་ནོ།
ནང་གསེས་དབྱེ་བ་བརྒྱད་ཀྱི་ངོས་འཛིན་ལ བཞེད་པ་མི་མཐུན་པ་མང་པོ་ཞིག་ཡོད་ཀྱང་དེ་དག་ལ་དགག་སྒྲུབ་མཐར་ཕྱིན་པ་བྱེད་དཀའ། འོན་ཀྱང་ཁོ་བོའི་རྨོངས་འཆར་ཁ་ཤས་ཞུས་ན་ འདི་ལྟར། རྣམ་གླིང་སོགས་ཀྱིས་སྐབས་འདིའི་དྲག་པ་གསུམ་ནི སྔོན་འཇུག་མིང་གཞི་རྗེས་འཇུག་ལ་འདོད་པ་གཞུང་གི་བགྲོད་དང་མཐུན་ནའང་ ནང་གསེས་དབྱེ་བ་ཕྲ་ཞིབ་མང་པོ་ཕྱེ་བ་གཞུང་དང་མི་མཐུན
སི་ཏུས་སྐབས་འདིའི་དྲག་པ་གསུམ་ནི་སྐྱེས་བུ་རབ་འབྲིང་མཐའ་གསུམ་ལ་འདོད་པ་ནི། གཞུང་གི་དགོངས་པར་སོང་སྙམ་པ་མིན་འདུག གང་ ཡིན་ཞེ་ན། ཁོང་གི་བཞེད་པ་ལྟར་ན དྲག་པ་གསུམ་ཉིད་ཞེས་པ་ཕོ་གསུམ་དང་། གལ་ཏེ་ཞེན་པ ཞེས་པ་མོ་གཉིས་ ལ་གོ་དགོས་པས ཕོ་གསུམ་དང་མོ་གཉིས་སུ་ཕྱེ་བ་གཉིས་ཀའི་རྒྱུ་མཚན་དུ ནང་ཕྲད་ཅེས་པ་དེ་ཙམ་ལས་གཞན་རྗེས་འཇུག་གང་དང་གང་ནང་ཕྲད་ན་ཕོ་གསུམ་དང་མོ་གཉིས་སུ་འགྱུར་བའི་རྒྱུ་མཚན་རྩ་བས་མ་བསྟན་ པར་ཐལ་བ་དང་། ག་བ་ཡང་འཇུག་མེད་པ་དང་། ད་སའི་མཐའ་ཅན་རྣམས་ལ་རྗེས་འཇུག་གཅིག་ལས་མེད་པས་དེ་དག་ནང་ཕྲད་ཇི་ལྟར་ བཞག་པ་དང་། གཞན་ཡང་ཕོ་དང་མོའི་སྐབས་མིང་གཞི་ལ་བྱུས་གཏོགས་མེད་པར། མ་ནིང་གི་སྐབས་མིང་གཞི་ལ་བྱུས་གཏོགས་དགོས་པར་ བཤད་པ་ནི་ཕྱོགས་སུ་ལྷུང་བའི་བཤད་པ་ཡིན་ཞིང་ 16
མ་ཟད་ཁྱེད་ལྟར་ན་རྩ་བའི། དམ ཞེས་དང་ གལ་ཏེ ཞེས་པའི་ཚིག་གཉིས་ཀྱང་འབྲེལ་མེད་དུ་འགྱུར་རོ
དེས་ན་སྐབས་འདིའི་དྲག་པ་གསུམ་ནི འཇུག་ཡང་འཇུག་གཅིག་ཏུ་བརྩིས་པའི་སྔོན་འཇུག་མིང་གཞི་རྗེས་འཇུག་གསུམ་ལ་གོ་དགོས་ཏེ་ སྔོན་འཇུག་དང་མིང་གཞི་འཇུག་ཚུལ་དྲག་ ཞན་བཤད་པའི་སྐབས་མིན་ཀྱང་རྗེས་འཇུག་རང་གར་བ་ལ་སྒྲ་མེད་ཅིང་། དེ་དག་གི་སྒྲ་ཐོན་པ་མིང་གཞི་སོགས་ལ་ལྟོས་དགོས་པའི་ཕྱིར་རོ།། འོན་ཀྱང་མིང་གཞི་བ་ལ་སྔོན་འཇུག་ད་ཞུགས་པ་དཔེར་ན། དབྱངས་ལྟ་བུའི་སྐབས་ཙམ་མ་གཏོགས སྔོན་འཇུག་གཞན་ལ་ཐུན་མིན་གྱི་སྒྲ་མདངས་གསལ་བ་མེད་པས་ན་ སྐབས་འདིའི་དྲག་པ་གསུམ་སོགས་ནང་ཕྲད་པ་ནི། མིང་གཞི་རྗེས་འཇུག་ ཡང་འཇུག་གསུམ་ལ་སྦྱར་ན་ལེགས་པར་མངོན
དེའང་ཕོ་མོ་མ་ནིང་གསུམ་ལས་དང་པོ་ནི། རྗེས་འཇུག་ཕོ་ཡིག་གཞིར་བཞག་ལ། ཡང་འཇུག་བཅས་པའམ་ཡང་འཇུག་མེད་ ཀྱང་མིང་གཞི་ཕོ །གང་ཡིན་པ་དེ་ནི་མིང་གཞིའི་སྟོབས་ཀྱིས་དྲག་པར་འགྱུར་བས་སྐྱེས་བུ་རབ་ཅེས་བྱ། །ཡང་འཇུག་མེད་པའི་མིང་གཞི་མ་ནིང་ཡིན་པ་ནི་སྐྱེས་ བུ་འབྲིང་དང་དེ་བཞིན་མིང་གཞི་མོ་ཡིན་པ་ནི་སྐྱེས་བུ་ཐ་མ་ཡིན་ནོ
གཉིས་པ་མོ་ནི། མོ་ལ་ཡང་འཇུག་བཅས་པའམ
17
ཡང་འཇུག་མེད་ཀྱང་མིང་གཞི་ཕོར་གྱུར་པ་ནི་མོ་ཙམ་དང་། །ཡང་འཇུག་མེད་པའི་མིང་གཞི་མོ་འམ་མ་ནིང་གྱུར། །མ་ནིང་སྒྲ་རན་པ་ཡིན་ཀྱང་ རྗེས་འཇུག་ཞན་པའི་སྟོབས་ཀྱིས་ཞན་པར་འགྱུར་བས་ན་དེ་ནི་ཤིན་ཏུ་མོ་ཞེས་བྱ།། གསུམ་པ་མ་ནིང་ནི། རྗེས་འཇུག་ཡི་གེ་མ་ནིང་ཡིན་པ་གཞིར་བཅས་པ་ལ། །ཡང་འཇུག་ཡོད་དམ་མེད་ཀྱང་རུང་། །མིང་གཞི་ ཕོར་གྱུར་ཚེ་མིང་ གཞིའི་སྟོབས་ཀྱིས་སྒྲ་དྲག་པར་འགྱུར་བས་དྲག་ཕྲད་དྲག་གྱུར་དང་། །ཡང་འཇུག་མེད་པའི་མིང་གཞི་མོ་ནི་ཞན་ཕྲད་ཞན་འགྱུར་ཞེས་བྱ །མིང་གཞི་མོའམ་མ་ནིང་ལ། །ཡང་འཇུག་དང་བཅས་པའི་ཚེ་མིང་གཞིའི་སྟོབས་ཞེན་པ་དང་ཡང་འཇུག་དྲག་པས་ན་མཚན་གཉིས་ཅན་དང་། །མིང་གཞི་མ་ནིང་ལ་ཡང་འཇུག་མེད་པ་ནི་དྲག་ཞན་གང་དུའང་མི་འགྱུར་བས་མཚན་མེད་མ་ནིང་ཞེས་བྱའོ།། དེ་ལྟར་གོང་དུ་ཞུས་པ་དེ་དག་ནི་བདག་གི་བསམ་ཚུལ་ཙམ་ཡིན་གྱི་་གཞུང་གི་དགོངས་པ་དེ་ལྟར་ཡིན་ག་ལ་སྲིད། རྣམ་དཔྱོད་ཀྱི་རྩལ་དང་ ལྡན་པའམ་དུས་གསུམ་མཁྱེན་པའི་གང་ཟག་རེ་བྱུང་ན་སྔོན་འཇུག་ལའང་ཐེལ་གཏོགས་ཡོད་པའི་རྣམ་བཞག་ཞིག་ཕྱེ་བར་མཛད་དུ་གསོལ་ ཞེས་གསོལ་བར་འདེབས་པ་ལགས།
གཉིས་པ་དོན་གྱི་འཇུག་ཚུལ་ལ་གཉིས་ཏེ་རྗེས་འཇུག་རང་གིས་འདྲེན་མི་དགོས་པའི་ སྔ་མ་སྔོན་འཇུག་གི་དོན་ཇི་ལྟར་སྟོན་པ་དེ་བཞིན་སྟོན་ པར་འགྱུར་བ་དང་། རྗེས་འཇུག་རང་གིས་མིང་མཐའ་དང་རྣམ་དབྱེ་སོགས་ཕྱི་མ་ཇི་ལྟར་འདྲེན་པ་ལས་བྱུང་ བའི་དོན་གཉིས་སོ
དོན་དེ་གཉིས་པོ་ཅུང་ཟད་རྒྱས་བཤད་ཀྱི་ཚུལ་དུ་ཞུས་ན འདི་ལྟར་ལེགས་སྦྱར་གྱི་སྐབས་སུ་མིང་དང་ཚིག་གྲུབ་ཚུལ་གཉིས་ཡོད། དེའང་རྩ་བའི་བྱིངས་ལ་ཉེ་འགྱུར། རྐྱེན། མཚམས་སྦྱོར། ཚིག་སྡུད་བཞི་ པོ་ཇི་ལྟར་འོས་པ་སྦྱོར་བ་ལས་མིང་གྲུབ། གང་སྒྲུབ་ པའི་མིང་དེ་ལ སུ་ཨཽ་ཇས་སོགས་རྣམ་དབྱེའི་རྐྱེན་སྦྱར་བས་རྣམ་དབྱེ་མཐའ་ཅན་གྱི་ཚིག་གྲུབ་པ་དང་། ཡང་རྩ་བའི་བྱིངས་ལ ཏ་ཏི་ཨནྟི་སོགས་ཀྱི་རྐྱེན་སྦྱར་བས་བྱ་བའི་ཚིག་ཏུ་གྲུབ་པའི་རིམ་པ་མི་འདྲ་བ་གསུམ་ཡོད་པ་ལྟར། བོད་སྐད་ལའང་དེ་གསུམ་གྱི་ གྲུབ་ཚུལ་ ལོགས་སུ་བཤད་དགོས
དང་པོ་མིང་གྲུབ་པ་ལ་མིང་གཞི་ལ་རྗེས་འཇུག་སྦྱར་བ་ཙམ་གྱིས་མིང་དུ་གྲུབ་པ་དེ་དཔེར་ན། ནས། གྲོ། འབྲས། སའ། རླུང་སོགས་ནི་ཤེས་སླ་བར་ བརྟེན་གཞུང་གིས་དངོས་སུ་བཤད་མེད། ཡང་དེ་ཙམ་གྱིས་མི་ཆོག་པར་དེ་ལ་མིང་མཐའ་གཞན་ནམ ཡང་ན་མིང་ལ་མིང་གཞན་སྦྱར་བས་མིང་གཉིས་པ་ཞིག་གྲུབ་པ་དཔེར་ན 18
ཟས་གཙང་སྲས། ཤ་རའི་བུ། སངས་རྒྱས་པ། ཕྱི་རོལ་པ། ཞིང་པ། བདག་ཅག་སོགས་ནི ཕོ་ཡིས་ཕོ་ཡི་མིང་མཐའ་དྲངས།། ཞེས་པ་ལ་སོགས་པའི་སྐབས་ནས་བསྟན
ཚིག་གྲུབ་ཚུལ་ལ་བྱ་ཚིག་དང་། རྣམ་དབྱེ་དང་ཚིག་ཕྲད་མཐའ་ཅན་གཉིས་ལས། དང་པོ་བཤད་པ་ནི། སྔ་མ་སྔོན་འཇུག་ལྔ་བཞིན་སྦྱར།། ཞེས་ སྔར་རྒྱས་པར་བཤད་པ་ལ་ཞལ་འཕངས་པར་མཛད
སྔར་བཞིན་ཇི་ལྟར་སྦྱོར་ཞེ་ན། སྔོན་འཇུག་གི་སྐབས་ལྟར་རྗེས་འཇུག་ལའང་། ཕོ་ནི་འདས་དང་གཞན་སྒྲུབ་ཕྱིར།། ཞེས་སོགས་སྦྱོར་རྒྱུ་མིན་ལ། འོ་ ན་ཇི་ལྟར་ཞེ་ན། རྗེས་འཇུག་གང་ཡིན་ཡང་རུང་གཙོ་བོ་རང་སྟོབས་ཀྱིས་དོན་སྟོན་པ་མེད་པས་ན། དེ་དག་ ལ་མིང་གཞི་དང་སྔོན་འཇུག་ཕ་མོ་ མ་ནིང་གང་ཞུགས་པ་དེས དོན་འདས་པ་སོགས་ཅི་ཞིག་སྟོན་པ་ལྟར། རྗེས་འཇུག་གིས་ཀྱང་སྔོན་འཇུག་གི་རོགས་བྱེད་པའི་ཚུལ་དུ་ དོན་དེ་གསལ་བར་མཛད་པ་ལ་སྦྱར་ དགོས་ཏེ། དཔེར་ན མིང་གཞི་ཅ་ལ་ད་ཞུགས་པ་ ཅད་འདི་ལྟ་བུ་དེས་དོན་ཅི་ཞིག་སྟོན་ཅེ་ན རང་དབང་དུ་དོན་མི་སྟོན་པར་སྔོན་འཇུག་མ་ནིང་ག་ཞུགས་ན་མ་འོངས་པ་དང་ ཕོ་བ་ཞུགས་ན་དོན་འདས་པ་སྟོན་པ་ལྟ་བུའོ
གཉིས་པ་རྣམ་དབྱེ་དང་ཕྲད་མཐའ་ཅན་ལའང་གཉིས་ལས་དང་པོ་རྣམ་དབྱེའི་མཐའ་ཅན་ནི། གང་གིས། གང་ལ། གང་ལས། གང་གི། གང་དུ། ལྟ་བུ་སྟེ། དེའང་། མིང་མཐའ་དེ་དག་ཉིད་ཀྱིས་ནི། །དེ་ཉིད་རང་གི་སྒྲ་མཐུན་པའི། །ཆོས་དངོས་ལས་དང་བྱེད་ པ་དང་།། ཞེས་པ་ནས། གནས་ དང་བོད་པའི་སྒྲ་ཡང་དྲངས།། ཞེས་པའི་བར་གྱིས་བསྟན
གཉིས་པ་ཚིག་ཕྲད་མཐའ་ཅན་ནི། དཔེར་ན 19
ཁྱོད་ནི། ཁྱོད་དང་། དངོས་པོ་དེ། དེའམ། ཞིང་པ། མ་སོང། གང་ཞིག ལྟ་བུ་སྟེ དེའང་ གཞན་ཡང་སླ་བསྡུ་ལྷག་བཅས་དང་། །འབྱེད་སྡུད་བསྣན་དང་བདག་པོ་དང་། །དགག་སྒྲུབ་རྒྱན་དང་དུས་ལའང་ འཇུག །དེ་དག་སྔ་ཤུགས་ འདྲེན་པས་འབྱུང་།། ཞེས་པའི་གཞུང་གིས་བསྟན
འོ་ན་རྗེས་འཇུག་དེ་དག་ལ་རྣམ་དབྱེ་དང་ཕྲད་དེ་དག་དུས་སྐབས་སམ་སྐབས་དོན་གང་གི་ཚེ་སྦྱོར་ཞེ་ན། དེ་ནི་ཚིག་དོན་འོག་མ་ལ་ལྟོས་དགོས་ ཏེ ཚིག་དོན་འོག་མ་དེ་སྤྱི་ལ་འཇུག་པའི་སྒྲ་ཡིན་ན་རྣམ་དབྱེ་དང་པོ་དང་། བྱེད་པའི་སྒྲ་སོགས་ཡིན་ན་རྣམ་དབྱེ་གསུམ་པ་སོགས་སྦྱོར་དགོས་ ཞེས་པ་ནི། དེ་དག་ནང་གསེས་གང་འཇུག་པ། །མཐར་སྦྱར་འོག་མའི་མིང་དོན་ལ། །སྤྱི་འཇུག་ཡོད་དམ་བྱེད་པ་ཡོད།། ཞེས་པ་ནས སྔོན་དུ་འོས་པ་གནས་པ་འམ།། ཞེས་པའི་བར་གྱིས་བསྟན། དེ་བཞིན་དུ་ཚིག་ཕྲད་དག་ཀྱང་ཚིག་དོན་གོང་འོག་ལས་བསྡུ་རྒྱུ་ཡོད་ན་སྡུད་པའི་སྒྲ་དང་། དོན་ལ་བསྙེགས་ལ་ཡོད་ན་ལྷག་བཅས་སོགས་སྦྱོར་ དགོས་ཞེས་པ་ནི། གཞན་ཡང་ཚིག་དོན་འོག་མ་ལས། །བསྡུ་རྒྱུ་ཡོད་དམ་མེད་པ་དང་།། ཞེས་པ་ནས དེ་དག་ནང་གསེས་རྣམ་པར་དབྱེ།། ཞེས་པའི་བར་གྱིས་བསྟན་པ་ཡིན་ནོ།། དེས་ན། ཕོ་ཡིས་ཕོ་ཡི་མིང་མཐའ་དྲངས།། སོགས་ཀྱིས་ཡི་གེ་ལས་མིང་གྲུབ་ཚུལ་དང་། མིང་མཐའ་དེ་དག་ཉིད་ཀྱིས་ནི།། སོགས་ཀྱིས་མིང་ལས་ ཕྲད་རྣམ་དབྱེ་མཐའ་ཅན་གྱི་ཚིག་གྲུབ་ཚུལ། སྔ་མ་སྔོན་འཇུག་ལྔ་བཞིན་སྦྱར།། ཞེས་པས་བྱ་བ་དང་བཅས་པའི་ཚིག་གྲུབ་ཚུལ་བཤད་ལ མིང་ཚིག་དེ་དག་ལས་དོན་སྟོན་པའི་བརྗོད་པ་དང་བསྟན་བཅོས་སོགས་གྲུབ་ཅིང་། དེ་ཉིད་རྗེས་འཇུག་གི་ཅིའི་འཇུག་པའི་དགོས་པའང་ཡིན་ པས་ན། ཅི་ཕྱིར་འཇུག་པ་བྱེད་ཅེ་ན། །ཡི་གེ་ཁོངས་ནས་མིང་དབྱུང་སྟེ། །མིང་གི་ཁོངས་ནས་ཚིག་ཕྱུང་ནས། །ཚིག་གི་དོན་རྣམས་སྟོན་པར་བྱེད།། ཅེས་གསུངས་པ་ཡིན་ནོ
མདོར་ན་སུམ་ཅུ་པ་དང་སྔོན་འཇུག་གི་རྟགས་ཀྱི་འཇུག་པའི་སྐབས་སུ་མིང་གྲུབ་ཚུལ་བཤད་མེད་པས་རྗེས་འཇུག་གི་སྐབས་འདིར་བཤད་ དགོས་ཤིང་ 20
དེ་ལས་ཀྱང་། ཕོ་ཡིས་ཕོ་ཡི་མིང་མཐའ་དྲངས།། ཞེས་སོགས་ཀྱི་སྐབས་སུ་བཤད་དགོས་པ་ནི་གནད་ ཀྱི་དོན་ཡིན་པས་ན མིང་མཐའ་འདྲེན་ཚུལ་ལ་བརྟེན་པའི་མིང་གྲུབ་ཚུལ་གྱི་རྣམ་བཞག་ཞིག་མཛད་ཐུབ་ན་ཀུན་ལ་སྨན་པའི་ གསོས་སུ་གྱུར་པ་ལགས།། །། ཞེས་པའི་གསོལ་འདེབས་དང་བཅས་རྗེས་འཇུག་གི་ཇི་ལྟར་འཇུག་པ་ལ་ཅིའི་འཇུག་པས་བརྒྱན་པའི་བཤད་པ་མདོར་བསྡུས་འདི་བསམ་གཏན་ མིང་པས་ཟླ་༢པའི་ཚེས་༨ཉིན་སྦྱར་བའོ།།
21