Insana

Johara D. Alangca-Azis

Inao wata aken, a pakathataya angko! Inao wata aken, a onga o poso aken! Inao wata aken, a tihaya o mata ko! Inao wata aken, a mala sa pikir aken!

Pezana angko reka so posaka a montiya, Da arega iyan, da pen a rimbang iyan. Di oto khapamasa, di oto khasambian. Mapened so bolawan, na liyawanan iyan pen. Ka khasanaan ka den a ayangka inempeda Sa kapephagintaw ka, sa doniya o kadenan.

So kanggiginawai, so kapamagogopa. So kapamagawida, so kathatabanga. So kapephoporoay, so kazezelai. So kambilangataw, so kaphiyapiya. So kapaginontola, so kapamagadata. So kaperirilai, so kapenanapiya. So kapangalimbabaan, so kasosoat. Giyaya wata aken i INSANA aken reka!