Siringan

Abduljaleel Udtog M. Tago & Sagola Zakiyyah D. Tago

Aya kazisiringan na lenganan sa balebeg Ka didn pendowa-dowa na mipengganata aka Okor a mapiya so kapakazirangan Sa lawan sa pagaringka ko siyap ago so parangay

Didn khada sa pikir so kiyando-dolona-an Na lalayon sa ginawa so kiyapamago-gopa-an Na adimat ko kahwri a ganat ko manga lombay

Phorongan a impitan so kapaki zisiringan Ka toroan o Islam na gakot o kapaginged Na da a ikhada iyan sa dayon sa pakataman

Inao na siringan na so kiniborodami Ko bago a babalingan a kaimpunan sa gagaw A darpa a merebbgay na di rata sa ginawa Ka da a ba kha-alinan ko siyap ago so Phangeni na rakheso araparap ko kamapiya-an tano

Aya mini saliob ko kapekhanegani Ko manga garokot, manga oni a makina o Pephamanagap a phageda-an na so Oniya manga papanok go so Rapendas o ndo a lalaton somasagad

Omanden pagebangan a masjid ni’mah Na karanonan so ladan Ko pananawag ko simba Na mananayaw so qamat ko Kitindegen ko sambayang

Igira pkhapita na ped pekhabantayan So pamorawag a senang ko sebangan o alongan A kalilindawayan so langowa Kapalawan a mili-libet ko ranaw

Maoma sa mapolid so Alongan a masindaw A rampi den sa pezedep na matanos A pandangan ko maomag sa sedepan A mai-ilay so ragat

Kapipiya ginawa so kapekhatimo tano Ko omanden diyama-at a ron tano Phamakineg pantag ko agama Go so kambilangataw

Panamaran tano den a midadayon So kazisiringan ko surga a Firdaus A tatap a thogalinan a ron tano den phaginged