ИНФОРМАЦИЈА ЗА СВЛЕЧИШТАТА И МОЖНИТЕ КАТАСТРОФАЛНИ ПОСЛЕДИЦИ ОД ИЗГРАДБАТА НА АВТОПАТОТ КИЧЕВО – ОХРИД НА ТЕРИТОРИЈА НА ОПШТИНА КИЧЕВО Со почетокот на работите на автопатската делница Кичево – Охрид, на просторот над Кичево, во близина на локалниот пат Кичево – Крушино – Кнежино (кој го користат жителите на село Кнежино, посетителите на Манастирот Св. Ѓорѓија, хотелот „Куќа на уметност“ и неколку стотини рекреативци) се појавија проблеми. Имено, на дел од ископот кој изнесува повеќе од 30 метри, се појави свлечиште кое го сруши дел од патот и сѐ повеќе се шири. Свлечиштето и денес го загрозува користењето на локалниот пат и е екстремно опасна ситуација која се толерира од надлежните. Свлечиштето не е санирано, поставени се само земјени насипи кои треба да спречат некој да не падне движејќи се по патот. Во случај на поголеми врнежи и невреме постои реална и голема опасност ова свлечиште да се активира уште повеќе и да настанат катастрофални последици. Свлечиштето се наоѓа на само 100-тина метри над првите куќи од Кичево.
Фотографии од првите моменти на активирање на свлечиштето
Фотографии од првите моменти на активирање на свлечиштето
Свлечиштето постојано се шири и дополнителен дел од патот за Крушино пропаѓа
После реакциите направено е времено решение со ископ во горниот дел од патот кон планината
Свлечиштето работи и понатаму. Ситуација април 2017 година
Планината го возвраќа ударот, има ново рушење. Ситуација јуни 2017 година
Работите продолжуваат да течат и понатаму без оглед на опасностите и рушењата. Ова е ситуација од 21.07.2017 година Од извори на фирмата ГРАНИТ која ги изведува градбите велат дека се чекало Решение за санирањето на состојбата со потпор на највисокиот дел. Но, всушност, не се чека ништо, работите се одвиваат ми се чини со забрзано темпо. --------------------До овој момент се информирани: Министерот Горан Сугарески (по мејл и преку СМС), Директорот на ЈП за државни патишта Зоран Китанов (преку мејл) и Градоначалникот на Општина Кичево Фатмир Дехари (лично и преку печатена информација). Нема преземено НИКОЈ НИШТО.
--------------------Во меѓувреме на патот Кичево – Крушино – Кнежино, ноќта меѓу 3 и 4 март 2018 година се појави огромно свлечиште на нова локација, кое е предзнак за голема катастрофа која може да следи:
На ова, како одговор, Гранит направи нов времен пат (бајпас) со усек во планината при што се заобиколува местото на кое е настанато свлечиштето. Ова може да е сѐ, но не е решение на проблемот кој веќе е од животно загрозувачки карактер за жителите на Општина Кичево. На 7 април 2018 година се лизна и делот од земјата што се наоѓа под пресечениот привремен пат (бајпасот) за времено движење на возилата кон Крушино:
Веќе на 5 април 2018 година до општина Кичево пристигна допис од Гранит за затворање на локалниот пат Кичево – Крушино – Кнежино ?!? Како е ова можно кога Крушино е излетничко место и место за спорт и рекреација на кичевчани, а Кнежино е активно село во кое живеат луѓе постојано. На територија околу селото Кнежино постои хотел како туристичка дестинација, а исто така и Манастирот „СВ. Ѓорѓија“ во кој служат неколку монахињи. --------------------Јас и неколку ентузијасти и загрижени граѓани за Кичево и неговата околина, кои се значително загрозени со ваквиот начин на пристап кон решавање на трасата на автопатот, сметаме дека е можно соодветно решение на проблемот со изградба на „надземен тунел“ (поимот можеби не е најсоодветен, но е доста описен – во литература може да се сретне под „open cut“). Имeно, наместо да се гради потпорен ѕид со огромни размери, најсоодветно би било да се направи тунел над веќе ископаниот дел од патот. Неговата изградба би била со приближно иста цена како и огромниот потпор, како и потпорен ѕид за дел од патот. За изградба на тунелот може да се користат соодветни претходно изработени калапи кои би де спојувале и би ја намалиле цената на чинење на градбата. Оваа изведба може да се сретне на многу места во светот, за што говорат и сликите:
Предлози за изглед на надземен тунел Да направиме мала лаичка анализа, поткрепена со неколку податоци добиени од страна на инжинери со искуство во оваа област: -
-
Предвидено решение: На локацијата треба да се изведе потпорен ѕид од долната страна на автопатот во должина од 85 метри и надвозник над автопатот во должина од 50 метри, предвидени со проект и чинат околу 1 милион евра и накнадно треба да се постави потпорен ѕид за свлечиштето со темели и на 80 шипови (колови) со должина 150 метри и цена 0,5 милиони евра. Предвидена е и звучна ограда во должина од 3 километри. Предложено (наше) решение: Ако се избере еколошкото решение – тунел (open cut) во должина од 200 метри и се пресметаат трошоците за неговата изградба, ова решение ќе биде и финансиски поисплатливо.
Доколку ова се заврши на ваков начин, потоа може просторот над него да се насипе и насипот да се раззелени, со што би се задржал претходниот прекрасен изглед на планината над Кичево. Верувам дека ова што го предлагам ќе биде сериозно разгледано и сметам дека ќе биде најповолно решение за проблемите кои се веќе наталожени над овој дел на патот. Се извинувам за малку пообемниот приод кон запознавањето на еден од најактуелните проблеми со кои моментално се соочува Кичево. Ви благодарам за отстапениот простор и време.
Тино Алексов, Дипл. ел. инж. Советник за енергетска ефикасност и јавно осветление во Општина Кичево Моб. 075 32 32 11, E-mail: tino.aleksov@yahoo.com, tino.aleksov@kicevo.gov.mk