Pfimi Interlaken

Begägne, aber richtig

Gmeinschaft, wo Ateil nimmt

«Hoi, wie geits?» «Guet, danke. U dir?» «Es louft, merci.» «U wie geits dir würklech?»

Ja, wie geits üs? Interessiert das üsers Umfäld überhoupt? We mi öper fragt, wies mir geit, de fragi mängisch: «Hesch Zyt?». U de erläbi ab u zue, dass mis Vis-à-vis gar ke Zyt oder ächts Inträsse het, wies würklech um mi steit.

Mönsche jeden Alters liide drunder, dass sie sich nid wahrgno füehle. E ganze Tag verusse, u niemer «gseht» eim. Es isch es Grundbedürfnis vom Mönsch, derzue zghöre, agno zsi, Wärtschetzig zübercho, gliebt zwärde. Mit Jesus Christus isch Gott sälber Mönsch worde, het Begägnig gsuecht mit Individue, wo mir vielech nid hätte gwählt: Gfallni, Betrüger, Gschitereti, Usgschtossni, Chranki, schlächt Bildeti. Jesus het 12 ängi Fründe gsuecht u ihne Vorgläbt, wie Begägnig, Gmeinschaft u Liebi, wie se Gott meint, geit. U mit dene 12 u Vielne, wo nach dene si cho, het er dWält veränderet bis hüt.

Es isch so wichtig, dass mir Orte u Mönsche hei, wo mir ächti u wärtvolli Begägnige chöi ha. Wo es ächts Inträsse da isch, wies dir u mir geit. Was, we alli, wo das hie läse, ab sofort afö anders luege u lose? Eifach de andere säge, was sie ztue hei, das het no sälte funktioniert. Aber i sälber cha der Unterschied mache. Der erscht Schritt. U weni das mache, de erläbi oft, wie bim Gägenüber dOuge afö lüchte. Ändlech wieder mal es Lächle ufme truurige Gsicht.

Mönsche, wo ächti Begägnige afö erläbe – mit Gott u Mönsche – wärde verwandlet. Sie fasse nöie Muet, die drückti Seel atmet wieder uf, dMuulegge zeige wieder ine anderi Richtig, e Hoffnigsschimmer am Horizont.

Wärs nid schön, we mir grad ir dunkle Jahreszyt, wo abroche isch, e Liechtblick si für anderi? Settegi wo frage: «U wie geits dir würklech?». Vielech müesse mir das Jahr nid überlegge, was mir wäm schänke a Wiehnacht. Vielech schänke mir eifach Gmeinschaft, wo Ateil nimmt.

Ächti Begägnige, wo Läbe verändere u rette.

Daniela Francioli-von Allmen

www.pfimi-interlaken.ch