den

mondi di Bándabou

Jeroen

‘Papi!! Kon yama e mata akí?’

‘Esei ta bruska. Mamanan tabata pon’é den kama di nan yu chikí ora ku e tin kentura.’

Mami, Papi, Jerry ku Terry a sali kas tempran pa bai buska blachi di mata pa un proyekto ku e muchanan mester traha pa skol. Nan ta den grupo 8 i nan mester buska blachi di sinku mata ku kasi bo no ta mira mas.

Den e mondi será tin hopi palu grandi ku matanan haltu i bunita. Loke nan ta haña straño ta, ku e hanchi yen di bògt kaminda nan ta kana kada banda tur e matanan ta trapá manera kos ku ta un outo a pasa riba nan. Dia e muchanan a haña e tarea serka yùfrou, Terry a hisa su dede i bisa: ‘M’a kere no tin mag di kue mata den mondi bai kas kuné.’

‘Naturalmente bo no ta ranka henter un mata bai kuné,’ yùfrou ta kontestá, ‘ta un òf dos blachi bo ta kita pa bo proyekto.’

E rumannan di diesdos aña ta gusta ora nan tin e sorto di tareanan akí pasobra Mami ku Papi ta hasi tur loke nan por pa yuda nan haña un bon punto.

‘Kua mata nos a haña kaba?’ Jerry ta puntra. Terry ta kontestá: ‘Welensali, tròmelstok, bruska.’

Papi ta bisa: ‘Tremendo! Welensali tabata usa pa laba tayó kuné, traha basora pa bari stupi i pa huma sangura.’

‘Laba tayó???’ Jerry ta puntra.

‘Si, kòrda ku ántes e hendenan pober no tabatin habon pa laba tayó.’

‘Tròmelstok awor?’ Mami ta puntra.

‘Hende muhé tabata frega e blachinan den nan mannan kaba hunta e djus di e blachinan na nan kara. Ora ku e seka, nan ta laba nan kara. E ta kita tur mancha ku pèshi.’

Terry ta remarká: ‘Pasobra nan no tabatin krema pa hunta na kara.’ ‘Korekto,’ Papi ta kontestá.

‘Kuidou, ata un mata di bringamosa ei,’ Papi ta bisa purá. ‘No mishi kuné pasobra e ta pone bo keda grawatá meskos ku Kompa Nanzi den e kuenta di baka pintá. Mami bo tin un pida papel den bo tas manera semper?’

Mami ta saka un lensu di papel fo’i den su tas i ku hopi kuidou Papi ta kita dos blachi lora nan den dje. Nan tambe ta bai den e saku maron ku Terry tin tené.

‘Un mata di oleifi!’ Mami ta sklama.

Jerry ta puntra mesora: ‘E oleifi ku mami ta pone den salada?’

‘Nò, e mata aki ta saka un fruta chikitu si, pero bo no por kom’é.’

‘Dikon nò,’ Jerry ke sa.

‘Pasobra mi wela a siña mi ku si bo mira ku un kabritu no ta kome un mata, abo komo hende tampoko no mester kom’é, pasobra e por hasi bo malu.’

‘Pakiko nan tabata us’é anto,’ Jerry ta puntra.

‘Nan tabata pone paña pretu den awa ku blachi di oleifi pa nan keda bon pretu. Ku e blachinan nan tabata traha basora tambe pa bari stupi.’

Jerry ta kita dos blachi hinka den e saku. Den esei, nèt promé ku e hanchi ta bira na man robes, Terry ku ta kana djis tras di papi ta puntra: ‘Kiko ta zona asina?’

Papi ta keda para di biaha, Jerry ku Terry ta dal den su tras i nan tur dos ta kuminsá hari.

‘Sssst,’ Papi ta bisa; ku kuidou e ta dal un par di stap mas, rèk un tiki pa e mira dor di e palunan kiko tin mas leu den e mondi.

Mami tambe ta rèk p’e mira kiko ta pasando, pasobra e tambe a tende e zonido straño, manera un mashin ku ta koba. Na bos abou e ta puntra: ‘Kenneth, kiko ta zona asina?’

Papi ta drei wak i hasi seña: keda ketu. Despues e ta bisa purá: ‘Tin un par di hende ta koba mata pone den un pikòp, laga nos bira bèk promé nan mira nos!’

Nan tur ta bira mesora pa nan bai bèk di kaminda nan a bin.

Jerry, ku ta gusta tur loke ku tin motor, ta bisa na bos abou: ‘Un trùk ta bin!’

‘Drenta ei den, lihé!’ Papi ta bisa. Mami ta kore drenta un hanchi pegá ku kaminda nan tabata kana.

El a spanta pero tòg e ta puntra: ‘Ta kiko, Kenneth. B’a bisa pa nos keda riba e kaminda i awor ata bo mes ta drenta otro hanchi; kiko …’ Mami ta keda ketu i skucha pasobra awor e ta tende un otro zonido. Gritamentu i zonido di pianan ku ta kore bin den nan direkshon.

‘Ban drenta tras di e palu akí, lihé,’ Papi ta bisa. ‘Sak abou anto keda ketu ketu.’

Ta un palu masha grandi mes ku raisnan manera muraya haltu riba tera. Meimei di e raisnan nan ta drenta i kremp pegá ku otro. Ku kurason ku ta bati duru e muchanan ta tende zonido di pia ku ta kore pasa bai den e hanchi kaminda un ratu pasá nan tabata kana. Danki Dios, e matanan pegá ku e palu ta tapa nan, di moda ku un hende ku pasa den e hanchi no ta mira nan.

‘Di kon nos ta skonde?’ Jerry ta puntra ku stèm tur temblá.

Papi ta kontestá: ‘Pasobra mi no sa ken e hendenan ku ta koba aya den mondi ta. Un kos mi ke sa: di kon nan ta koba mata saka fo’i den mondi pone den pikòp. Segun mi, esei ta prohibí!’

Nan ta tende zonido di un outo ku ta yega serka. Pero ta kiko esei?? E outo no ta sigui kore, e ta keda para nèt banda di e palu kaminda nan ta skondí. Ta ken lo ta den e outo, nan tur ta pensa. Ta reina un silensio den mondi.

Den esei nan ta tende: ‘Boso por sali numa!’

Papi konosé e stem ei i e ta lur fo’i bou di e matanan, mira un hòmber pará, bistí ku karson ku flanèl bèrdè skur. Ta Ivan, un bon konosí di dje. Poko poko nan ta sali i papi ta bisa: ‘Kon ta mano, kiko a pasa anto?’

Ivan ta kontestá: ‘Algun hende tabata koba mata pa bai kuné. M’a yama polis i nan ta biniendo, pero ya e ladronnan a kore bai.’

Terry ta mustra e saku maron ku e tin den su man i tur spantá e ta bisa: ‘Nos tambe a kue mata pero algun blachi so pa skol.’ Ivan ta hari i bis’é: ‘Esei no ta nada. Awor bo por konta di tur e matanan bunita ku nos tin den mondi i kòrda bisa ku tur hende por wak e matanan pero no koba nan bai kuné si.’

Terry , niuskir manera semper ta puntra: ‘Ta mener ta doño di e mondi akí?’

Ivan ta smail i kontestá: ‘Nò, ami ta un polis di medio ambiente, nos ta kuida nos mondinan i nos animalnan.’

Ivan ta yama nan ayó i bisa nan: ‘Mi ta bai wak ki desaster e ladronnan di mata a kousa.’

‘Bon, ayó,’ Papi ta kontestá. ‘Muchanan, laga nos ban kas numa, boso tin basta blachi tòg anto m’a haña hamber ku set.’

E muchanan ta grita kontentu: ‘Si, ban kas pa nos kome repa di pampuna ku chukulati, dushi yu!’

Unda Nòki ta?

Djárason atardi, den bario di Suffisant, sintá dushi den fresku bou dje palu grandi di mango, Debbie di diesdos aña ta grita: ‘Ya, m’a gana, anto changáááá!’ Ku tur su forsa e ta bati e dominó riba mesa.

‘Ai nò, atrobe?’ Caylah, su ruman di diesun aña ta protestá. ‘Di kon semper bo ta gana, mi no ta hunga mas!’

Rabiá e ta lanta kana bai paden. Debbie ta hari i grita: ‘Caylah, ami ta rabia ora mi pèrdè?’ Pero Caylah no ta kontestá. Debbie ta hari chikí chikí; kasi sigur Caylah lo a bai kuida su matanan di bèrdura, pasobra ora ku e ta rabiá ta esei e ta hasi. Debbie ta lanta bai den kurá kaminda Caylah a planta promentòn, tomati ku kousebant. Pero Caylah no ta den kurá. Purá Debbie ta buska rònt kas sin por hañ’é. E ta bolbe sali pafó i ta mira Caylah sali fo’i patras di kas kaminda den un kouchi basta grandi tin e morkoi di Tanchi Setti ku nan ta kuida p’e pasobra Tanchi a bai ku fakansi. Nan no por laga e morkoi kana lòs den kurá pasobra e kachónan ta hap e.

Tur dia Caylah òf Debbie ta drenta den e kouchi pa pone kuminda pa e morkoi i nan ta keda sinta den e kouchi un ratu pa manera Caylah ta bisa: Kòmbersá ku Nòki, pa e no sinti falta di Tanchi Setti.

Ora Debbie mira Caylah su kara e ta puntr’é: ‘Yora bo ta yora pasobra b’a pèrdè?’ Caylah ta kontestá ku awa na wowo: ‘Nòki no ta den su kouchi.’

‘No por ta, e porta tabata será tòg?’ Ora Debbie mira Caylah su kara e ta puntra spantá: ‘Caylah, bo no a sera e porta awe mainta ora ba pone kuminda p’e?’

‘Mi mi… no ta kòrda …’ Caylah ta snek.

Debbie ta haña duele di dje i ta bis’é: ‘Ban busk’é, e mester t’ei.’

Huntu nan ta bai na e kouchi; e porta ta hanchu habrí ku e baki di awa band’i dje.

‘Kon nos ta hasi!’ Caylah ta yora, ‘ta mañan tanchi ta bini bèk.’

‘Ataaaa,’ Debbie ta sklama, ‘wak aki!’

Caylah ta kore bai kaminda Debbie ta pará i su boka ta sak habri ora e mira e buraku ku e kachónan a koba den tera pegá ku e waya di kurá.

‘Ta p’esei Toetie su nanishi tabata tur na tera awe mainta!’ Debbie ta bisa.

‘Bo ta kere Nòki a sali bai dor di e buraku ei?’ Caylah ta puntra ku un stèm fini.

‘Mi no sa, pero ta bon ku e kurá di Johnny tin hopi mata den dje, asina un hende ku pasa riba kaya lo no mira Nòki lihé i koh’é bai kuné.’

Caylah ta wak Debbie ku un kara hopi preokupá: ‘Pero nos no por bula e waya pa nos buska Nòki?’

‘Nòòò, bo sa ku mama ku papa no ke pa nos sali foi’ kurá i bo sa tambe ku bisiña

Johnny ta masha fèrfelu. Kada bes e ta reklamá ku nos palu di karawara spañó ta basha flor den su kurá.’

Caylah ta bolbe kuminsá yora: ‘Kiko mi ta bisa Tanchi awor?’

‘Stòp di yora, ban bèl mama.’

Huntu e dos rumannan ta kore bai paden i Debbie ta yama mama na su trabou pero e shèf ta bis’é ku mama a bai kas fo’i tempran.

Até, ata nan ta tende zonido di mama su outo; purá nan ta kore bai pafó.

Asina mama mira nan kara e ta spanta i puntra: ‘Kiko a pasa?’

Caylah ta yora:’ Nòki no ta den e kouchi.’

Debbie ta bisa: ‘E kachónan a koba un buraku grandi kantu di e waya i por ta Nòki a sali bai den kurá di Johnny.’

‘Awèl,’ mama ta bisa, ‘nos ta ban busk’é.’

Mama ta pone su tas paden, sera porta na yabi i nan tres ta sali bai kas di Johnny.

Mama ta murmurá: ‘Wak e kurá, si Nòki ta eiden e ta pèrdè sigur,’ i e ta kinipí wowo pa Caylah ku ta kuminsá hari sin por yuda.

‘Bontardi Johnny,’ mama ta grita. ‘Bontardiiiii!’

Niun hende no ta kontestá. Mama ta tek ku su yabi di kas riba e brivenbùs i bolbe grita : ‘Johnny!’

Nèt mama ke bolbe grita ku nan ta mira Johnny habri su porta di kas i sali ku su ròlstul den stupi. Ku un kara será e ta keda mira nan.

‘Kon ta Johnny,’ mama ta bis’é. ‘E muchanan por pasa wak si e morkoi ku nan ta kuida pa nan tanta a drenta den e kurá akí?’

Johnny ta hala un rosea fadá i ta hasi seña ku su man: drenta numa.

E muchanan ta kore kontentu rònt e kurá pa mira si nan ta haña e morkoi. E kurá ta chikitu i bèrdè bèrdè di mata, hopi di nan ta mata di mondi.

Mama ta wak rònt i despues di un ratu e ta bisa

Johnny: ‘Bo kurá ta yen di mata atrobe, masha dia mi no a mira e shon bin limpia kurá pa bo.’

Ku stèm rabiá Johnny ta kontestá: ‘E ta kobra muchu karu, p’esei.’

‘Oh,’ Mama ta bisa. ‘Na mi kantor nos a traha un grupo ku ta yuda hende grandi ku trabounan ku nan mes no por hasi. Bo ke mi laga nan bin limpia bo kurá, nan ta hasié pòrnada.’

Ku kara abou Johnny ta sagudí su kabes ku ta bon.

‘Ok, nan ta bin den wikènt. Mi ta laga bo sa mañan sigur.’

Despues di basta ratu Debbie ta grita: ‘Nos a hañ’é!’ E ta kore bin ku Caylah su tras, ku e morkoi kargá.

‘Ahhh,’ mama ta suspirá. ‘Danki Dios. Masha danki ku e muchanan por a buska e morkoi, Johnny! Bo ta tende di mi mañan.’ Kontentu nan tur ta kana bai kas.

Su manisé mama ta duna su shèf Johnny su adrès. Tanchi Setty ta bin buska Nòki djaweps atardi; e ta hari masha ora e tende kiko a pasa ku e morkoi i ta bisa: ‘Ai, piká, Nòki a hasi ko’i mala mucha, no Caylah?

Tuma, wak kiko m’a trese pa boso. Masha danki ku boso a kuida Nòki pa mi.’

E muchanan kada un a haña un tablet serka nan tanta! Nan ta bira loko di kontentu!

Djasabra mainta ocho or dos pikòp grandi ta kore yega ku e koleganan di mama. Nan a bin ku skòp, chapi, harka, ku saku grandi pa hinka sushi aden.

Fo’i seis or mama a lanta traha asina un wea di sòpi i e koleganan a trese pan será, djùk, eis ku kùp, djus ku bòter di awa. Caylah, Debbie ku nan tata tambe a bin yuda.

Promé ku nan kuminsá mama ta bisa: ‘Wak e matanan akí, ta orégano ku lamungras. No kap nan, por traha te ku djus ku nan. Anto den huki aya ta yerb’i hole; bon pa tira den yambo.’

E hendenan ta traha duru, mèrdia nan ta bebe sòpi, kome pan será. Ora nan tin set nan ta bebe awa òf djus. Atardi e kurá ta limpi limpi atrobe. Tur hende ta yuda hinka e sakunan di sushi den e pikòpnan pa hiba Landfill.

Johnny mes? E ta kontentu di su alma!