Kuidou ku kaiman!

Riba un djadumingu tio Marvin, tio Angelo ku tanchi Glenda a bai Bándariba pa pasa dia na kas di Mai Rosa, nan mama, huntu ku nan yunan. Mai Rosa su seis ñetunan di sinku pa diesdos aña ta kontentu di mira nan wela.

Mai Rosa su kas ta di palu ku un balkon grandi patras i un kurá ku diferente palu di fruta manera papaya, sòrsaka, mango, mespel ku tamarein. Dilanti di kas tin un kantidat di mata di Kòrsou ku ta duna hopi flor bunita: kèlki hel, magdalena, tuturutu ku trinitaria. Den balkon tin pòchi grandi ku kayena blanku, oraño i ros pipa.

Den e kurá patras Mai Rosa ta kria algun kabritu den un pida será ku waya i den un kouchi grandi tin sinku galiña ku un gai.

Tin un huki será tambe kaminda tin bonchi, pinda, yambo ku batata dushi plantá. Ora tin hopi fruta ku bèrdura tio

Marvin ta bai ku nan pa e bende nan pa su mama ku su hendenan ku semper ta kumpra serka dje.

Mai Rosa su yunan i ñetunan ta yega i kuminsá saka e stulnan di plèstik fo’i den balkon patras pone bou di e palu grandi di flamboyan ku su takinan ta forma manera un parasòl grandi di blachi bèrdè ku flor oraño. Tanchi

Glenda ku e dos tionan a trese algu di kome i bebe.

Shelu ta blou masha bunita ku tiki nubia i ku un solo ku ya a kuminsá kima. Bou dje palu tin un bientu dushi ta supla.

Purá e muchanan ta kambia paña i bai hunga den kurá ku un bala grandi koló kòrá i nan ta grita hari ora un di nan no por fangu e bala lihé. E hende grandinan ta sinta kòmbersá dushi bou di palu, miéntras e grel ta kla pa mèrdia kuminsá hasa e pòrkchòpnan ku pia di galiña.

Despues di un ratu Mai Rosa ta bai kaba kushiná su famoso aros bruá. E mainta ta pasa trankil. Diripiente tio Angelo ta puntra: ‘Bon, ta di kon e kachónan ta grita tantu asina?’

Tur hende ta keda ketu i drei wak e dos kachónan ku ta para waf i gruña masha pisá kantu di waya.

Tanchi Glenda, ta bula lanta ora un di e muchanan mas grandi kore yega i fo’i rosea ta grita: ‘Mama, bin wak, un kaiman asina grandi!’

Mesora tur hende ta saka kareda pa bai wak si ta bèrdat. Mai Rosa ku a tende gritamentu ta paga e stof bou di su wea di aros bruá i ta sali den balkon pa e mira ta kiko ta pasando.

Tio Marvin ta kore bin bèk serka su mama i ta bisa: ‘Tin un kaiman masha grandi den hanchi!’

Lihé e ta kita su telefon fo’i su rant di karson i ta bèl polis. Ora e kaba duna polis e adrès di Mai Rosa e ta bisa: ‘Angelo, yuda mi sera e hanchi ku e palètnan ku tin pabou di kas pa e kaiman no sali.’

Danki Dios e bestia ta den un hanchi meimei di e kurá di Mai Rosa i Chita, su bisiña.

Parti patras e hanchi ta será ku waya di un skol.

Tanchi Glenda ta bisa e muchanan: ‘Hala leu for di e kurá, anto boso dos,’ e ta bisa e dos mucha hòmbernan mas grandi, ‘mara e kachónan pariba di kas pa nan no sigui grita pone ku e kaiman ta bira sali bèk.’

Dor di tur e bochincha yen di bisiña ta sali pafó pa mira kiko a pasa. Ora nan mira e kaiman tur ta spanta.

Diferente bisiña ta kana bini na Mai Rosa su kas pa nan mira kiko polis ta hasi ora nan yega.

‘Ta di unda e bestia ei a bini, yu?’ Chita ta puntra nèrvioso.

‘Kualke hende ku tabata kri’é lo a haña ku awor el a bira muchu grandi i e no por kri’é mas,’ Win, yu di Chita ta kontestá. ‘Nan ta bini ku e bestianan ei djafó ora nan ta chikitu i ora e bestia bira un mònster nan ta haña miedu di dje i sak’é fo’i kurá,’ e ta sigui bisa.

‘Pero tin mag di kria kaiman na Kòrsou anto?’ bisiña Iris ta puntra. Niun hende no ta kontestá pasobra nèt un outo di polis ta kore yega, siguí pa un pikòp blanku grandi.

Tres hòmber ta baha ku kabuya na man pa nan wak kon nan ta bai changa e kaiman. Algun di e bisiñanan di Mai Rosa a yuda tio Marvin ku tio Angelo mara e palètnan bon mará ku waya na e otro banda di e hanchi.

Pero shofùr dje pikòp ta bisa: ‘Lòs e palètnan pa mi bèk e pikòp hink’é den hanchi.’

Asina ku e pikòp ta den e hanchi algun hende ta yuda mara e palètnan purá atrobe na otro.

TeleCuraçao ku TV Direct su hendenan tambe a yega i ta filma tur kos pa anochi nan pas’é na notisia.

Poko poko e shofùr di e pikòp ta bèk te ora e yega serka di kaminda e kaiman ta drumí ketu ketu.

‘Na soño e ta?’ un dje muchanan mas chikitu ta puntra.

‘Bo no ta mira ku su wowonan ta habrí?’ su ruman mas grandi ta kontestá.

‘Ta ken e hendenan ei ta?’ Clara, un otro bisiña di Mai Rosa, ta puntra Mario, su kasá.

Mario ta respondé: ‘Segun mi ta hendenan ku ta traha na e parke di avestrus djis aki banda. Wak e nòmber riba e pikòp.’

‘E Parke ta kria kaiman tambe? Kiko nan ta hasi ku nan, kome nan karni?’ Clara ta puntra ku su stèm duru i ku un kara fis. Tur hende ta kuminsá hari. Semper Clara gusta puntra yen di kos.

Mario tambe ta hari i bis’é: ‘Stòp di puntra, wak kiko nan ta hasi!’

Un dje hòmbernan ta purba mara e kaiman su boka ku e kabuya, pero e kaiman ta hap su man kada bes i e hòmber ta bula patras lihé, pero despues di un ratu e ta logra pasa e kabuya den e kaiman su boka i mar’é bon. E bestia ta bira razu, bòltu dos bes riba su lomba kaba bolbe bòltu riba su patanan.

E hendenan ku ta para wak ta grita: ‘Huuuiii!!’ ‘Kuidou ku su rabu!’ ‘E ta dal bo basha abou!’

Pero dos di e hòmbernan ya a kue e kaiman su rabu tene duru i e otro ta pasa e kabuya bou dje animal su barika.

Porfin e tres hòmbernan ta logra mara e kaiman bon mará i nan ta bringa pa his’é pone den e baki di pikòp. Asina ku e kaiman ta den e baki nan ta mar’é na e rant di e pikòp pa nada no pas’é. Kaba nan ta sera e baki lihé, drenta e pikòp i kore bai. Tur hende ta hala un rosea grandi.

‘Yuda mi mara e palètnan atrobe pa niun otro bestia no drenta akí den,’ tio Marvin ta bisa tio Angelo.

Djis despues henter famia ta sintá bou dje palu di flambuyan, ta bebe algu, kome un pastechi, wardando e pòrchòpnan ku galiña kaba hasa pa nan saboriá nan huntu ku Mai su aros bruá.