Diego Catalán y la dialectoloxía asturllionesa por Fernando Álvarez-Balbuena García
T
uvi l’honor de conocer personalmente a Diego Catalán el día 11 de febrero del añu 2005, nuna mañana enverniza y fría como’l llaz, na que foi la casa de so güelu y agora –enagora– la sé de la Fundación Ramón Menéndez Pidal, nel barriu madrilanu de Chamartín. Malapenes trés años depués d’aquel alcuentru con una de les persones que más me motivó a dedicame al estudiu de la variación espacial de les llingües, la muerte de Diego Catalán ofrezme la triste ocasión de valorar la so contribución a la dialectoloxía asturllionesa. * * *
Foi el mesmu Diego Catalán el que relató los sos inicios na profesión de llingüista y el so inclín tempraneru a los estudios dialectales (Catalán, 2001a: 262-267). L’añu 1944, metanes na postguerra española –y a los deciséis años d’edá–, empicipió los estudios de lletres na Universidá Central de Madril. Desengañáu bien lluego d’aquella universidá «de las depuraciones y del arribismo», recurre al maxisteriu de so güelu, Ramón Menéndez Pidal, que, en casa, empón al nietu na que va ser la so carrera investigadora, enveredándolu, de mano, pelos estudios romancísticos y dialectales. N’agosto del añu 1946, de la que pasaben unes vacaciones en Llinares (Ribesella), en casa del so primu Álvaro Galmés, Ramón