COMUNICADO DE PRENSA JUANA RIVAS, BASTA DE (IN)XUSTIZA PATRIARCAL
A ESTRADA, 28 de xullo, 2018
O xulgado do Penal 1 de Granada condenou a Juana Rivas a cinco anos de prisión, tamén a unha pena de seis anos de inhabilitación da patria potestade, polo cal non poderá ter a custodia dos fillos durante ese tempo. Ademais, o xuíz condena a Rivas a indemnizar á súa exparella, Francesco Arcuri, con trinta mil euros e ó pago das costas do xuízo. A asociación que agrupa ós técnicos e técnicas dos CIM de Galicia (ASOCIM) reitera o seu apoio a Juana Rivas ante unha sentenza que evidencia o arraigo no noso país da xustiza patriarcal e da violencia institucional contra as vítimas da violencia de xénero. Ademais, ASOCIM quere trasladar a súa indignación e perplexidade ante unha sentenza que recolle reflexións de carácter persoal, algunhas delas negativas e despectivas cara Rivas, e cun enorme sesgo de xénero á hora de xulgar o caso. Gran parte da sentenza céntrase en negar que Juana Rivas fose unha vítima da violencia de xénero para logo expoñer que a denuncia que presentou en 2016 contra a súa exparella non era máis que unha estratexia para facerse coa custodia dos menores. Lapidaria e moi preocupante resulta a súa consideración de que os feitos denunciados en 2016 son “inexistentes, porque non se probaron en ningún proceso” para continuar cun “a acusada non acreditou sufrir malos tratos entre 2009 e 2016, nin sequera os denunciou”. Estas frases demostran o total descoñecemento do maxistrado sobre a violencia de xénero e a delicada e complexa configuración das relacións entre vítimas e maltratadores. Igualmente preocupa, polo seu carácter persoal e a ausencia de base xurídica, a súa crenza de que Juana Rivas usou tanto ós medios de comunicación como ós organismos públicos para “orquestrar” unha campaña “coa mal calculada crenza de que así obtería vantaxes ó seu favor”. Esa idea de que Rivas utilizou os malos tratos como medio para obter vantaxes procesais, mantense ó largo de toda a sentenza, un texto cheo de prexuízos baseados nos estereotipos de xénero.
Como colofón ó cúmulo de despropósitos que acumula a sentenza, o xuíz decide desestimar os informes psicolóxicos que o CIM de Maracena fixo tanto de Juana Rivas como do seu fillo maior. O argumento esgrimido é que nin Rivas nin o menor mostran síntomas ou secuelas de padecer esta violencia. Con esta sentenza lánzase unha mensaxe terrible e desoladora ás mulleres vítimas de violencia de xénero. A decisión que tomou Rivas naceu da necesidade e da vontade de protexer ós seus fillos dun pai maltratador pero malia iso a sentenza establece que non poderá ter a custodia dos fillos durante seis anos, unha medida inxusta e desproporcionada que máis parece un castigo á nai que unha consideración en base ás necesidades duns menores que, lamentablemente, volverán a mans dun pai maltratador.
O papel do CIM neste caso Os Centros de Información á Muller son espazos dependentes da administración pública impulsados desde a Unión Europea cuxo persoal depende dunha regulación específica e está supervisado e formado en materia de xénero e igualdade. Cuestionar, do xeito que o fai esta sentenza, o asesoramento e apoio que recibiu Juana Rivas, supón cuestionar o traballo, a profesionalidade e a ética de tódalas persoas que desde os CIMs loitan diariamente contra a violencia de xénero. Esta clase de comentarios e alusións responden ó descoñecemento por parte de moitos membros da xudicatura do traballo que desenvolven os CIMs e poden chegar a minar o efecto positivo que os CIMs teñen no seu ámbito de acción (a nivel local) desestabilizando as redes de apoio ás vítimas de violencia de xénero que se focalizan nestes espazos. Desde ASOCIM se quere insistir na necesidade e importancia de que as valoracións, contribucións e informes dos CIMs en xuízos por violencia de xénero sexan sempre tomados en conta polos maxistrados/as pois están avalados por avogadas/os, psicólogas/os e demais persoal técnico con experiencia e formación especializada en materia de igualdade e xénero. Xa para rematar, esta entidade considera que un membro da xudicatura con formación de perspectiva de xénero comprendería tódolos matices do caso de Juana Rivas sendo o resultado da sentenza ben diferente.
En opinión de ASOCIM é necesaria e posible outra forma de administrar xustiza, unha na que se teñan en consideración e se apliquen as leis que protexen e garanten os dereitos das vítimas e, especialmente, os dos fillos menores que sofren estas terribles situacións. Por iso, urxe formación con perspectiva de xénero dentro da xudicatura. En ASOCIM instan ós dirixentes públicos a tomar medidas e activar reformas urxentes para mellorar e asegurar a protección das mulleres maltratadas e dos menores.
PARA MÁIS INFORMACIÓN: DEPARTAMENTO DE COMUNICACIÓN DE ASOCIM GALICIA Tlfno: 636 792 073 Correo electrónico: prensaasocim@gmail.com / asociacionprofesionaiscim@gmail.com